Luka 3
3
Yohana Omobatisi na amang’ana aye
(Mat 3:1-12; Mar 1:1-8)
1Ase omwaka o ikomi na gatano bw’okogamba gwa Kaisari Tiberio, Pontio Pilato orenge gabana o Boyahudi, na Herode omorwoti o Galili, na Filipo momura omwabo arenge omorwoti o Iturea na ense ya Tarakoniti, na Lusania omorwoti o Abileni, 2ekero ki’obokuani obonene bw’Anasi na Kayafa, ring’ana ria Nyasae rigaikera Yohana, omwana o Zakaria, ase erooro. 3Akagenda chinse chionsi chi’ensemo ya Yorodani, okorandia ebatiso y’okoonchoka ekorenta okwaberwa kw’ebibe. 4#Isaya 40:3-5Buna eriikire ase egetabu y’amang’ana ’omobani Isaya,
“Eriogi ri’oyogoaka egeturi ase erooro,
Roisia enchera y’Omonene,
rongeyia oboeto bwaye.
5Kera rigooko nariichorigwe,
na kera ekegoro na egetunwa nabikeeigwe;
aare bogeka inarongeigwe,
na enchera ere ebitunwa‐tunwa nereng’anigwe;
6na abanto bonsi nabarore ogotooreka gokorwa ase Nyasae.”
7 #
Mat 12:34; 23:33 Nabo agateebia emeganda eyachete, erinde ebatiswe nere, “Inwe oroiboro rwe ching’iti, ning’o obakuureire ng’a motame korwa ase endamwamu egochi‐gocha? 8#Yoh 8:33Gaki, ama okwama kogwenerete okoonchoka, gose timochaaka kobora emioyo yaino ime: Ntore na sokoro yaito, nere Aburaamu. Naki nabateebirie ng’a Nyasae nare nokobua ase amagena aya gokorera Aburaamu abana. 9#Mat 7:19Nonya mbono egesire kiabekirwe ase emeri y’emete; nabo kera omote otameti okwama okuya nonachwe, otugutwe ase omorero.”
10Emeganda eria ekamoboria, “Ninki rende torakore?” 11Akabairaneria, “Oyore ne chianga ibere ae ere oyotari nero; na oyore nendagera akore boigo.”
12 #
Luk 7:29
Abarusia ebango bagacha erinde babatiswe, bakamobooria, “Omworokia, inki rende naintwe torakore?” 13Akabairaneria, “Timorusia kobua ebi mwachigetwe.”
14Abasikari nabarabwo bakamobooria, “Naintwe inki torakore?” Akabairaneria, “Timourereria monto onde ase chinguru gose ase obosoeri bw’oborimo; naende moisaneke neng’eria yaino.”
15Ekero abanto baganyete na konakorengereria, bonsi bakeboria ase chinkoro chiabo ime gose Yohana nere Kristo. 16Yohana akairaneria abwo bonsi, “Inche nigo nkobabatisa ase amaache, korende oyore ne chinguru kombua ngocha are, ting’isaini gosibora chiusi chi’ebikoroto biaye; oyio nere orabaabatise ase Omoika Omochenu na ase omorero. 17Oroteru rwaye nigo rore koboko kwaye, ere naabuse ekeooreri kiaye, nasangererie engano ase ekiage kiaye, korende omoiriro nayosambe ase omorero otakorimeka.”
18Nabo ase ogokuurera okonge Yohana akaranderia abanto amang’ana amaya. 19#Mat 14:3,4; Mar 6:17,18Korende Yohana agatogonyera Herode omorwoti, ase engencho y’okonyuoma Herodia, moka momura omwabo, na ase engencho y’amabe onsi Herode akorire, 20Korende Herode agakora rinene kobua, ase okoruta ase Yohana echela.
Okobatiswa kwa Yeso
(Mat 3:13-17; Mar 1:9-11)
21Egachia koba abanto bonsi kobaabatisirwe, na Yeso boigo kabatisirwe, na ekero agosaba, igoro akamaanoka. 22#Omoch 22:2; Zab 2:7; Isaya 42:1; Mat 3:17; Mar 1:11; Luk 9:35Omoika Omochenu ogaika igoro asare ase omogwekano bwe riruma, eriogi rikarwa igoro, rigoteeba, “Aye naye Omwana one omwanchwa#3:22 Omwanchwa: engencho yaye oyo bwanchire mono, ngokirie naye.”
Chisokoro ne chisokoororia chia Yeso
(Mat 1:1-17)
23Yeso nere ekero achagete kworokereria, emiaka yaye igo yarenge ang’e emerongo etato, agakagwa ng’a mosinto o Yusufu, o Eli, 24o Mathati, o Lawi, o Meliki, o Yana, o Yusufu, 25o Matathia, o Amos, o Nahum, o Esili, o Nagai, 26o Maathi, o Matathia, o Semei, o Yoseki, o Yoda, 27o Yohana, o Resa, o Serubabeli, o Salatieli, o Neri, 28o Meliki, o Adi, o Kosamu, o Elimadamu, o Eri, 29o Yoshua, o Eliezeri, o Yorimu, o Mathati, o Lawi, 30o Simioni, o Yuda, o Yusufu, o Yonam, o Eliakimu, 31o Melea, o Mainani, o Mattatha, o Nathani, o Daudi, 32o Yese, o Obedi, o Boazi, o Salimoni, o Nashoni, 33o Aminadabu, o Admin, o Aramu, o Hezironi, o Peresu, o Yuda, 34o Yakobo, o Isaka, o Aburaamu, o Tera, o Nahori, 35o Serugi, o Reu, o Pelegi, o Eberi, o Sala, 36o Kainani, o Arifakisadi, o Shemu, o Nuhu, o Lameki, 37o Metusela, o Enoku, o Yaredi, o Malaleeli, o Kainani, 38o Enosu, o Seti, o Adamu, o Nyasae.
Currently Selected:
Luka 3: EKGE
Highlight
Share
Copy
Want to have your highlights saved across all your devices? Sign up or sign in
©Bible Society of Kenya, 2021