Luka 4
4
Ogoteemwa kwa Yeso
(Mat 4:1-11; Mar 1:14-15)
1Na Yeso oichire n’Omoika Omochenu, akairana korwa Yorodani, agatang’anwa n’Omoika kogenda ase erooro, 2agateemwa na Saitani ase engaki y’amatuko emerongo ene. Na amatuko aria tariete gento. Goika agachia koera, akaigwa enchara. 3Saitani akamoteebia, “Onye kore Omwana o Nyasae, teebia rigena eri ribe omogati.”
4 #
Okoir 8:3
Yeso akamoiraneria, “Neriikire. Omonto takoba moyo ase omogati bwoka.”
5Saitani akamoira aase aimokererete igoro, akamworokia amarwoti onsi ay’ense ase egeka ekemo, 6akamoteebia, “Ninkoe okobua oko gwonsi, na obonene bwaye, ekiagera nabieirwe, na inche iga nkoa oyo ngwancha. 7Nabo koransasiime, bionsi nabibe ebiao.”
8 #
Okoir 6:13
Yeso akamoiraneria, “Neriikire: Mosasiime Omonene Nyasae oo, omokorere ere bweka.”
9Saitani akamoira goika Yerusalemu, akamotenenia igoro ase egechuria gie Hekalu egetambe mono, akamoteebia, Onye kore Omwana o Nyasae, etugute gochia inse korwa aa, 10#Zab 91:11,12ekiagera neriikire:
Ere nagochikere abamalaika baye bakorende,
11naende:
Nabakoimokie ase amaboko abo,
erinde tobaisa kogochwa okogoro kwao ne rigena.
12 #
Okoir 6:16
Yeso akamoiraneria, “Neteebire, Toteema Omonene Nyasae oo.”
13Saitani agachia gokoora ogoteema kwaye gwonsi, akaimoka korwa asare, akamotiga ase egeka.
Yeso ogochaka emeremo Galili
(Mat 4:12-17; Mar 1:14-15)
14Yeso akairana gochia Galili ne chinguru chi’Omoika, chinkuma chigasarera ase chinsemo chionsi chi’ense eria. 15Ere akorokereria ase chisinagogi chiabo, ogotogigwa nabaanto bonsi.
Yeso okwangwa Nazareti
(Mat 13:53-58; Mar 6:1-6)
16Akagenda Nazareti, aria ase arereretwe; na ase rituko ri’Esabato agasoa ase esinagogi yabo, buna engencho yaye yarenge, agatenena gosoma. 17Akaegwa egetabu y’omobani Isaya. Nabo akaigora egetabu eyio, akanyora aase ariikire,
18 #
Isaya 61:1,2 Omoika bw’Omonene nigo ore igoro yane,
ekiagera ong’akire amaguta koranderia abataka amang’ana amaya.
Ontomire koranderia abasibwa ogosiborwa,
na koa abare emeuko banyare korora naende,
na gosibora abasionoirwe.
19Na korandia omwakabwo Omonene bwancheretwe.
20Akamumekeria egetabu eria akayea omokori emeremo bw’esinagogi, agaikaransa. Abanto bonsi abarenge ase esinagogi bakamobeta amaiso. 21Agachaaka kobateebia, “Reero ririiko eri riaikeranigwe ase more buna mwarigwa rigosomwa.”
22Bonsi bakamokwana buya bagakumia amang’ana obuya aruete ase omonwa oye, bagateebania, “Oyo tari ere omwana o Yusufu?”
23Akabateebia, “Ekeene, namonteebie omoreng’anio oyo: Omogwenia, egwenie aye omonyene; amang’ana onsi twaigure akorekire Kapernaumu, yakore aiga ase ense yao.” 24#Yoh 4:44Akabateebia, “Ekeene nabateebirie: Omobani tari oranyare gwanchwa ase ense yaye omonyene. 25#1 Abar 17:1Korende ekeene nabateebirie ng’a mbarenge ababoraka abange ase Israeli ase amatuko ’Elija, ekero igoro yasiegetwe emiaka etato na emetienyi etano nomo, ekero enchara enene yasoete ase ense yonsi; 26#1 Abar 17:8-16na Elija tatometwe ase oyomo obo, otatiga ase omokungu oyorenge omoboraka agwo Sarefata, ase ense ya Sidoni. 27#2 Abar 5:1-14Naende mbarenge ase Abaisraeli abanto abange abaare noborwaire bwa ukoma ase ekero ki’omobani Elisha; onde tari osibegete otatiga Naamani, omonto o Siiria.”
28Bagachia koigwa aya, bonsi ase esinagogi bagaichorwa nendamwamu. 29Bakaimoka bakamosokia isiko y’omochie, bakamoira goika igoro y’egetunwa keria omochie obo oagachire erio, banyare komoturunkania. 30Korende ere agaeta egati‐gati yabo, akagenda.
Okogwenigwa kw’omonto obwatire nekerecha ki’eubi
(Mar 1:21-28)
31Agatirimboka goika Kapernaumu, omochie o Galili. Akaba nkoborokereria are rituko ri’Esabato. 32#Mat 7:28,29Bagakumia mono ase okworokereria kwaye, ekiagera ring’ana riaye riarenge nokobua. 33Naende ase esinagogi narengeo omonto obwatire n’Omoika bw’ekerecha ki’eubi. Ere agaaka eriogi ase chinguru, akabora, 34“Ah! Totige intwe Inki tore naye, Yeso o Nazareti? Ngwachire gotosiria? Nakomanyire aye, Omochenu o Nyasae.”
35Yeso akagetogonyera, akabora, “Kira, omorwe!” Ekerecha keria gekamoiyeria agwo gati‐gati, gekamorwa, tikiamokorera gento. 36Bagakumia bonsi, bagateebania barabwo ase barabwo, “Ing’ana ki eri? Naki ase chinguru na okobua kiagochika ebirecha bi’eubi, na birobio biasoka.” 37Chinkuma chiaye chigasarera ase chinsemo chionsi chi’ense eria.
Yeso okogwenia aaria mwa Simioni
(Mat 8:14-17; Mar 1:29-39)
38Akaimoka korwa ase esinagogi, agasoa ase enyomba ya Simioni. Nabo ng’ina biara Simioni konya orwarire esosera; bakamosaba ase engencho yaye. 39Agatenena ang’e nere, agatogonyera esosera eria; ekamotiga. Bwango ere akaimoka akabakorera.
40Goika erioba rigachia kogwa bakarenta asare abanto bonsi abarenge nabarwaire bare namarwaire ao ao, na ere akabeeka amaboko aye igoro ase kera oyomo, akabagwenia. 41Ebirecha bigasoka korwa ase abange, bigaaka eriogi, bikabora, “Aye naye Omwana o Nyasae.” Akabitogonyera, tabitiga bikwane, ekiagera biamanyete ng’a nere Kristo.
Yeso okorandia ase esinagogi
42Goika ekaba mobaso, agasoka, akagenda aase atari nabaanto. Na abanto bakamoriga‐rigia, bakamoikera, bakarigia komotanga taimoka korwa ase bare. 43Akabateebia, “Nengwenerete korandia amang’ana amaya ay’oborwoti bwa Nyasae ase emechie ende boigo, ekiagera natometwe ase engencho eyio.”
44Akaba nkorandia are ase chisinagogi chia Boyahudi.
Currently Selected:
Luka 4: EKGE
Highlight
Share
Copy
Want to have your highlights saved across all your devices? Sign up or sign in
©Bible Society of Kenya, 2021