MATIE 8
8
Yezu kpasa wi zɛlɛ ngbɛlɛ
(Mar. 1.40-45; Luk. 5.12-16)
1Nɛ Yezu zĩlĩ ngɔ kala ni, nɛ ogba gili wele wa nɛ 'dɔkɔlɔ a. 2Nɛ mbe wi zɛlɛ ngbɛlɛ kpo tɛa, nɛ a gu nù ti Yezu, nɛ a tɔ̃ hã a na: “Nwa, fala kɛ mɔ kɔ̃, nɛ mɔ wia we kpasa mi tɛ zɛlɛ tɛ mi gɛ.”
3Nɛ Yezu ɛfɛ kɔ̃ ɛ, nɛ a 'be tɛ̃ a, nɛ a tɔ̃ hã a na: “Mi kɔ̃a, kɔ mɔ kpásá tɛ zɛlɛ tɛ mɔ gɛ.” Nɛ zɛlɛ ngbɛlɛ ia tɛ̃ a do ti. 4Nɛ Yezu tɔ̃ hã a na: “Da dɛ kɔ mɔ tɔ̃́ we kɛ mi kpasa do mɔ gɛ hã wele kpo gɔ. Nɛ nde mɔ nɛ́ 'da nganga i, nɛ mɔ ha dɔnggamɔ hã Gale nɛ́ kɛ Mɔizɛ#8.4 Mɔ tɔ́lɔ́ mbula 'da Mɔizɛ ngɔ wi zɛlɛ ngbɛlɛ kɔ Levitɛnɔ 14.1-32. tɔ̃a zɛ́ ni, we be hã winɔ vɛ̃ na, mɔ kpasa tɛ zɛlɛ 'da mɔ ia.”
Yezu kpasa wi dɛa toe 'da nwa ngɔ sodanɔ
(Luk. 7.1-10)
5Yezu nɛa we le dɛ Kafarnaumɛ, nɛ mbe nwa ngɔ osoda Roma tɛa 'da a, nɛ a ala nu a hã a na: 6“Nwa, mbe wi dɛa toe 'da mi do zɛlɛ ngɔ mɔ ɔi tɔa i. A wè tɛ kulu ngɔ gɔ, nɛ tɛ̃ a zɛlɛ wena.”
7Nɛ Yezu gisa hã a na: “Mi nɛ sɛ we kpasa a.”
8Nɛ nwa ngɔ sodanɔ ni gese hã a na: “Nwa, mi wè wi kɛ na, mɔ le kɔ tɔa 'da mi gɔ. Kɔ mɔ tɔ̃́ we kpo iko, nɛ wi toe 'da mi a kpasa sɛ. 9Mba gɔ, mi tɛ mɛ 'bɔ, mi do nwa ngɔ mi boe, nɛ mi do osoda kɛ wa ti mbula 'da mi ni boe. Kɔ fala kɛ mi tɔ̃ hã mbe na: ‘Mɔ lá!’ Nɛ a la. Kɔ mi tɔ̃ hã mbe na: ‘Mɔ tɛ́!’ Nɛ a tɛ. Kɔ mi tɔ̃ hã wi dɛa toe 'da mi na: ‘Mɔ dɛ́ kɛ gɛ!’ Nɛ a dɛ.”
10Kɔ Yezu nɛa we zele ni, nɛ a ɔngbɔ do lengge 'da nwa ngɔ sodanɔ ni wena. Nɛ a tɔ̃ hã winɔ kɛ wa nɛ 'dɔkɔlɔ a ni na: “Mi tɔ̃ hã nɛ do gbãlã we na, kɛ mi ɔa ngɔ nù Israɛlɛ gbaa gɛ, mi kpà mbe wi kɛ a do kɔ̃a we dɛ 'da mi ɔ nɛ wi gɛ gɔ. 11Mi tɔ̃ hã nɛ na, gba gili Owele wa yolo sɛ si 'biti gba wese, do si 'biti gɛ̃a wese, nɛ wa tɛ we nyɔngɔ mɔ fala nɛ kpo do Abrahama, Izaka, do Yakɔbɔ tɛ kɔ le nwa 'da Gale. 12Nɛ nde wanɔ wa wia sɔ we le kɔ le nwa 'da Gale ni, wa lé sɛ gɔ. Gale a da sɛ wa nza kɔ gba tũ, tɛ fala kɛ wa he sɛ kɔ̃a, nɛ wa nyɔngɔ li gogo wa ni.” 13'Do nɛ, nɛ Yezu tɔ̃ hã nwa ngɔ sodanɔ ni na: “Mɔ sí! E kɔ ma dɛ tɛ̃ ɛ we do 'da kɔ̃a we 'da mɔ.” Nɛ do kpo 'da fala ni, nɛ wi dɛa toe 'da wi ni kpasa.
Yezu kpasa ogba gili wi zɛlɛ
(Mar. 1.29-34; Luk. 4.38-41)
14Nɛ Yezu la dɛ kɔ tɔa 'da Petro. A hɔa i mɔ, nɛ a kpa kɛfɛ Petro wuko nɛ, nɛ nde a ɔa nù, we kɛ tɛ̃ a ba we wena. 15Kɔ Yezu nɛa we 'be kɔ̃ a, nɛ bawe tɛ̃ a gɛ̃ do ti, nɛ a kulu ngɔ, nɛ a ma ngɔ gi nyɔngɔmɔ hã a.
16Wese nɛa we gɛ̃ nɛ, nɛ owinɔ wa tɛa do gba gili Owele kɛ wa do 'dã hi wi kɔ wa ni hã Yezu. Nɛ a fua o'dã hi wi kɔ winɔ do we nu a iko, nɛ a kpasa 'bɔ ogele wi zɛlɛnɔ vɛ̃. 17A dɛa na mɛ ni, takɔ we kɛ Ezai, wi gba olo nu Gale tɔ̃a zɛ́ na: “A ba tole kundanɔ 'da lɛ, nɛ a fo zɛlɛ mɛnɔ tɛ lɛ vɛ̃”#8.17Mɔ tɔ́lɔ́ Ezai 53.4. ni, ma dɛ tɛ̃ ɛ.
Wi yɛnggɛ do Yezu
(Luk. 9.57-62)
18Yezu zɔa gba gili winɔ kɛ zã a ni, nɛ a na: “Lɛ kṹ dɛ kulu gba ndɔɛ i.” 19Nɛ mbe wi be mbula kpo tɛa, nɛ a tɔ̃ hã a na: “Wi be mɔ, mi kɔ̃a we yɛnggɛ do mɔ tɛ falanɔ vɛ̃ kɛ mɔ nɛ yɛnggɛ nɛ ni.”
20Nɛ Yezu gese hã a na: “Okpãnɔ wa do kɔ̃ mɔ́ wa boe, nɛ onɔɛnɔ wa 'bɔ do tɔanɔ 'da wa boe. Nɛ nde mi, Be 'da Wele, mi do fala ɔi mɔ́ mi bina.”
21Nɛ mbe wele kpo sanga owi yambala mɛnɔ 'da Yezu aka a na: “Nwa, mɔ mbɔ́kɔ́ mi, kɔ mi nɛ we mi baa mi do'do sɛ nɛ de!”
22Nɛ Yezu gese hã a na: “Mɔ lá fionɔ, kɔ wa mi fionɔ 'da wa! Mɔ tɛ́, kɔ lɛ yɛnggɛ do mɔ.”
Yezu ga gba bũ kamba
(Mar. 4.35-41; Luk. 8.22-25)
23Nɛ Yezu do Owi yambala mɛnɔ 'da a wa kũ kɔ ga. 24Nɛ wa la ni gbaa, kɔ 'da kala bi sĩ, nɛ gba bũ kamba dɛa nganda wena, nɛ ngele lì ma ngɔ go'do dɛ kɔ ga. Nɛ nde 'da fala ni, Yezu ɔa yala. 25Nɛ owi yambala mɛnɔ wa nɛa, nɛ wa tunu Yezu na: “Nwa, lɛ nɛ fi fia, mɔ kpásá lɛ!”
26Nɛ Yezu kulu ngɔ, nɛ a tɔ̃ hã wa na: “Gulu kɛ nɛ dɛ kili ní we ge nde? Kɔ̃a we 'da nɛ ma gã̀ gɔ ni we ge nde?” Nɛ a ga bũi do ngele lì, nɛ ngɔ tɛ nɛ gɛ̃ kpi kpi kpi.
27Nɛ wa ɔngbɔ nɛ ge nde ni, nɛ wa ma ngɔ tɔ̃ na: “A gɛ a wio nde? Gɛnɛ kɔ gba bũ do gba lì, nɛ ma zele we nu a.”
Yezu kpasa owi 'dã bi wi bɔa
(Mar. 5.1-20; Luk. 8.26-39)
28Yezu nɛa we hɔ tɛ kulu gba ndɔɛ i, nɛ wa hɔ ngɔ nùi 'da Ogadarɛ, nɛ a kpa ngba a do ombe wele bɔa, wa yula ngɔ zunu. Owinɔ ni wa zi do o'dã hi wi kɔ wa, nɛ wa 'danga wena, wele wè zi tɛ la wala do di ni gɔ. 29Nɛ wa ma ngɔ he mɔ na: “Be 'da Gale, mɔ nɛ dɛ do lɛ nɛ nde? Mɔ tɛa we hã zɛlɛ tɛ hã lɛ dati a ngba soe 'bili we nde?”
30Mɛ ni, nɛ nde gba gili ongulu wa zi tɛ nyɔngɔ mɔ dɛ fala ni. 31Nɛ o'dã hi winɔ ni wa tɔ̃ hã Yezu na: “Mɔ kɔ̃ we fo lɛ nde, nɛ mɔ tómbó lɛ dɛ kɔ ongulunɔ gɛ.”
32Nɛ Yezu kɔ̃a, nɛ a tɔ̃ hã wa na: “Nɛ lá!” Nɛ o'dã hi winɔ wa za'da nza kɔ owinɔ ni, nɛ wa le kɔ ngulunɔ. Nɛ ngulunɔ ni wa yolo ngɔ kala i, nɛ wa zĩlĩ hurr, nɛ wa ala 'dɔ lì, nɛ wa bindi vɛ̃.
33Kɔ owi fɔmɔ ngulunɔ wa nɛa we zɔ ní, nɛ wa a nyanga wa tɛ yu, we tɔ̃ gulu nɛ hã owinɔ kɔ le i, do tɛlɛ tɛ mɛ ma dɛa owinɔ bɔa, kɛ wa do o'dã hi winɔ kɔ wa ni. 34Nɛ owinɔ kɔ le ni vɛ̃ wa tɛa we kpa ngba wa do Yezu. Kɔ wa nɛa we zɔ Yezu, nɛ wa ala nu wa hã a na, a la ngɔ nùi 'da lo do'do.
Currently Selected:
MATIE 8: NGB
Highlight
Share
Copy
Want to have your highlights saved across all your devices? Sign up or sign in
Ngbaka DC Bible (We Nu Gale) Version © Bible Society of the Democratic Republic of Congo, 1995.