MATIE 5
5
Yezu bia we ngɔ dungu yangga
(Luk. 6.20-23)
1Yezu nɛa we zɔ gba gili winɔ ni, nɛ a kũ dɛ ngɔ kala i, nɛ a dungu nù. Nɛ owi yambala mɛnɔ 'da a wa tɛ dɛ kɛ zã a, 2nɛ a ma ngɔ be we hã winɔ na:
3“Yangga do owinɔ kɛ wa ĩ na,
lo a mɔ gɔ dati Gale ni,
we kɛ wa sɛ a owi kɔ le nwa 'da Gale.
4Yangga do owinɔ kɛ wa do 'bako ni,
we kɛ Gale a fo sɛ 'bakoe 'da wa.
5Yangga do owinɔ kɛ sila wa a gɛ̃ ni,
we kɛ wa kpa sɛ nùi kɛ Gale kpua mbulu nɛ hã wa ni.
6Yangga do owinɔ kɛ wa do wɔ
we dɛ mɛnɔ kɛ Gale kɔ̃a ni,
we kɛ Gale a hã sɛ ngawi hã wa we dɛ ma.
7Yangga do owinɔ kɛ wa ĩ 'bako hã ongba wa ĩ ni,
we kɛ Gale a ĩ sɛ 'bako hã wa.
8Yangga do owinɔ kɛ sila wa a sa ni,
we kɛ wa zɔ sɛ Gale.
9Yangga do owinɔ kɛ wa hã tɛ wa
we 'dafa dɛa na sanga ngba wa ni,
we kɛ Gale a sa sɛ li wa na,
wa a obenɔ 'dɛ ɛ.
10Yangga do owinɔ kɛ owele wa zɛlɛ tɛ wa,
we kɛ wa dɛ mɛnɔ kɛ zã Gale kɔ̃a ni,
wa sɛ a Owi kɔ le nwa 'da Gale.
11“Yangga do nɛ, owinɔ kɛ Owele wa dã nɛ, nɛ wa zɛlɛ tɛ nɛ, nɛ wa 'bili bɛlɛ dɛ ngɔ nɛ kpi do kpi, we kɛ nɛ a winɔ 'da mi ni. 12Wa dɛ do nɛ ní, nɛ nɛ dɛ́ yangga, nɛ nɛ te salangga, we kɛ nɛ kpa sɛ si olo nɛ li nza i gã wena. Mba gɔ, owele wa hã zɛ́ 'bɔ kpo zɛlɛ tɛ ni hã owi gba olo nu Gale zɛ́ dati gɛ.
Owi kɔ̃a wenɔ wa a mwinda
(Mar. 9.50; Luk. 14.34-35)
13“Sanga owinɔ ngɔ nù gɛ, nɛ ɔ nɛ tɔ̃ ni. Hã fala kɛ tɔ̃ zãlã, nɛ nde wa wè tɛ dɛ 'bɔ na, ma dãlã dɛ olo nɛ gɔ. Nɛ wa wè tɛ dɛ do to gɔ, nɛ wa a ma nù, nɛ winɔ wa ma iko.
14“Sanga owinɔ nù gɛ, nɛ ɔ nɛ mwinda ni. Le kɛ wa dɛa ma ngɔ kala ni, ma wè tɛ usu tɛ̃ ɛ gɔ. 15Wele tũ mwinda, nɛ nde a gú kpana zu nɛ gɔ. A e ma ngɔ mɔ e do mwinda, takɔ ma yele 'da winɔ kɔ tɔa ni vɛ̃. 16Kɔ ma wia na, nɛ nyɛ ɔ nɛ mwinda ni dati winɔ, takɔ wa zɔ de dɛa mɛ kɛ nɛ dɛ ni, kɔ wa dɔnggɔ Baa nɛ, kɛ a li nza i ni.
Yezu bia we ngɔ mbula
17“Nɛ tɛ lènggè na, mi tɛa we 'danga mbula 'da Mɔizɛ do bia we 'da Owi gba olo nu Gale gɔ. Mi tɛ̀ we 'danga ma 'danga gɔ, nɛ nde mi tɛa, takɔ gulu mbulanɔ ni hɔ dɛ wila fala vɛ̃. 18Mi tɔ̃ hã nɛ do gbãlã we na, gbaa na li nza do nùi 'danga ni, nɛ nde wa fó sɛ mɔ kpo tɛ mbula gɔ, nɛ gbãlã mbɛti kpo kɔ nɛ bísí sɛ gɔ, gbaa na mɛnɔ vɛ̃ dɛ tɛ̃ ɛ, sɛ nɛ de. 19Na mɛ ni, gɛnɛ kɔ wele bɛ̃ mbe bi mbula sĩ kɔ mbulanɔ ni, kɔ a be hã ongba a na, wa bɛ̃ tɛ mɛ 'bɔ gɛnɛ nɛ, nɛ wi ni sɛ a wi ngɔ go'do kɔ le nwa 'da Gale. Nɛ nde wi kɛ a dɛ mbula ni, kɔ a be hã ongba a na, wa dɛ tɛ 'bɔ ma, nɛ wi ni sɛ a wi dati kɔ le nwa 'da Gale. 20Mi tɔ̃ hã nɛ na, nɛ ha tɛ nɛ we dɛ mɛnɔ kɛ Gale kɔ̃a ni nɛ ngɔ Owi be mbulanɔ do Ofariziɛnɔ. Ní gɔ, nɛ nde nɛ lé sɛ kɔ le nwa 'da Gale gɔ.
Yezu bia we ngɔ nɔ̃lɔ̃ zã
(Luk. 12.57-59)
21“Nɛ zila we wa tɔ̃a zɛ́ hã oyaa nɛ na: ‘Mɔ tɛ gbɛ̀ wi gɔ. Kɔ fala kɛ wele gbɛ ngba a, nɛ wa nɛ do a dati owi 'bili wenɔ’ ni. 22Nɛ nde kɛ 'da mi, mi tɔ̃ hã nɛ na, wi kɛ zã a nɔ̃lɔ̃ dɛ tɛ ngba a, nɛ ma wia na, wa nɛ do a dati owi 'bili wenɔ. Fala kɛ wele tɔ̃ hã ngba ɛ na: ‘Yɔndɔ wi’, nɛ ma wia na, wa nɛ do a kɔ tɔa mbula dati Owi 'bili wenɔ. Kɔ fala kɛ wele tɔ̃ hã ngba ɛ na: ‘Bɔ zu mɔ’, nɛ ma wia na, Gale da wi ni li gba nyɛa we. 23Fala kɛ mɔ te do dɔnggamɔ, we e ngɔ gbagala we dɔnggɔ do Gale, kɔ ta zu mɔ gba na, ngba mɔ do we dɛ 'da mɔ nde, 24nɛ mɔ lá dɔnggamɛ 'da mɔ dɛ di ni, nɛ mɔ nɛ, nɛ mɔ 'dafa sanga tɛ ngba mɔ do a dati, sɛ nɛ mɔ kpolo tɛ mɔ we hã dɔnggamɛ ni hã Gale de.
25“Fala kɛ wele da mɔ, kɔ nɛ ma ngɔ nɛ do a we yɔlɔ gulu we ni dati owi 'bili wenɔ, nɛ ma wia na, mɔ dɛ nganda na, nɛ 'dafa we ni sanga tɛ ngba nɛ dɛ li wala nga iko. Dɔ a é mɔ dati owi 'bili wenɔ, kɔ wa hã mɔ hã osodanɔ, kɔ wa fi mɔ bɔlɔkɔ gɔ. 26Mi tɔ̃ hã mɔ do gbãlã we na, wa fí mɔ kɔ bɔlɔkɔ, nɛ nde mɔ hɔ́ sɛ nza gɔ gbaa na, mɔ futa mbili wa wia hã mɔ ni vɛ̃, sɛ nɛ de.
Yezu bia we ngɔ ɔ do kɛnɛ ngba wi
(Mar. 9.43-48)
27“Nɛ zila we wa tɔ̃a zɛ́ na: ‘Mɔ tɛ ɔ̀ do kɛnɛ ngba mɔ gɔ’ ni. 28Nɛ nde kɛ 'da mi, mi tɔ̃ hã nɛ na, wi wili kɛ a soko kɛnɛ ngba a, kɔ a ba wɔ tɛ̃ a, nɛ nde a ɔa do wuke ni do kɔ sila a ia. 29Fala kɛ gbali mɔ kɛ ngɔ ngawili kɔ̃ fi mɔ kɔ 'dã mɔ, nɛ mɔ 'dɔ́ ma, nɛ mɔ da ma nyɛlɛ do mɔ! We duzu kɛ ma dia fé na, mbee tɛ mɔ fe, olo li kɛ na, mɔ le li gba nyɛa we do kili tɛ mɔ vɛ̃ ni. 30Kɔ fala kɛ ngawili kɔ̃ mɔ fi mɔ kɔ 'dã mɔ, nɛ mɔ 'bílí ma, nɛ mɔ da ma nyɛlɛ do mɔ! We duzu kɛ ma dia fɛ̃ na, mbee tɛ mɔ fe, olo li kɛ na, mɔ le li gba nyɛa we do kili tɛ mɔ vɛ̃ ni.
Yezu bia we ngɔ bɛ̃ ngba wi
(Mat. 19.9; Mar. 10.11-12; Luk. 16.18)
31“Wa tɔ̃a zɛ́ 'bɔ na: ‘Fala kɛ wi wili bɛ̃ kɛnɛ a, nɛ ma wia na, a hã mbɛti bɛ̃ ngba wi hã wuke ni.’ 32Nɛ nde kɛ 'da mi, mi tɔ̃ hã nɛ na, wi kɛ a bɛ̃ kɛnɛ a, kɔ ma ɔ̀ we kɛ wuke yɛnggɛ vĩ zu yali dɛ kɔ̃ a gɔ, nɛ nde a dɛa na, wuke ni yɛnggɛ vĩ zu yali, fala kɛ a ba mbé wili ni. Nɛ wi kɛ a ba wuko kɛ wili a bɛ̃a a ni, nɛ nde a yɛngga vĩ zu yali do wuke ni.
Yezu bia we ngɔ kana tɛ wi
33“Nɛ zila 'bɔ we wa tɔ̃a zɛ́ hã oyaa lɛ na: ‘Mɔ tɛ kpòlò nu mɔ ngɔ kana tɛ wi kɛ mɔ kana ni gɔ. Mɔ dɛ́ mɛ kɛ mɔ kana tɛ mɔ dati Nwa Gale we nɛ ni.’ 34Nɛ nde kɛ 'da mi, mi tɔ̃ hã nɛ na, nɛ tɛ kànà tɛ nɛ fala kpo gɔ! Nɛ tɛ kànà tɛ nɛ do li nza gɔ, we kɛ mɛ a fala kpongbo nwa 'da Gale. 35Nɛ tɛ kànà tɛ nɛ do nùi gɔ, we kɛ mɛ a fala kɛ Gale a do nyanga a. Nɛ nɛ tɛ kànà tɛ nɛ do le Yeruzalɛmɛ gɔ, we kɛ mɛ a le 'da gã Nwa Gale. 36Mɔ tɛ kànà tɛ mɔ do mili zu mɔ gɔ, we kɛ mɔ wè tɛ dɛ na, mbe gbãlã mili zu mɔ kpo kutu mbu, tabi ma tũ gɔ. 37Nɛ nde ma wia na, nɛ tɔ̃ na, lo dɛa ni, tabi lo dɛ̀ ni gɔ. We kɛ gba gili wenɔ nɛ tɔlɔ vɛ̃ ni, ma yolo 'da Satana.
Yezu bia we ngɔ gese olo 'dã mɔ
(Luk. 6.29-30)
38“Nɛ zila we wa tɔ̃a zɛ́ na: ‘Gbali wi olo gbali wi, gogo wi olo gogo wi’ ni.#5.38Mbula 'da Oyudanɔ ma tɔ̃ zi na, wele gbini gogo ngba a, nɛ wa gbini tɛ mɛ 'bɔ gogo a olo nɛ. 39Nɛ nde kɛ 'da mi, mi tɔ̃ na, mɔ tɛ gèsè 'dã mɔ hã wi kɛ a dɛa 'dã mɔ do mɔ ni gɔ. Fala kɛ wele zɛ gulu zala mɔ kɛ ngɔ ngawili kɔ̃, nɛ mɔ síkí kɛ ngɔ gale hã a, nɛ a zɛ ma. 40Kɔ fala kɛ wele kɔ̃ we da mɔ 'da owi 'bili wenɔ, takɔ a ba tulu ngɔ 'da mɔ tɛ mɔ, nɛ mɔ lá 'bɔ gba tulu 'da mɔ hã a na a ba. 41Kɔ fala kɛ mbe wele hɛ̃lɛ̃ mɔ na, mɔ ba mbe tole hã ɛ we kilomɛtrɛ kpo,#5.41Mbula 'da Oroma tɔ̃ zi na, soda Roma wia tɛ tombo wele ɔ nɛ kɛ zã a kɔ̃a ni we kilomɛtrɛ kpo. nɛ mɔ bá tole ni hã a we kilomɛtrɛ bɔa. 42Fala kɛ wele gɔ mɔ kɔ̃ mɔ, nɛ mɔ te dɔ̀ a gɔ. Fala kɛ wele kɔ̃ we ba ku'da kɔ̃ mɔ, nɛ mɔ tɛ bɛ we hã ma hã a gɔ.
Yezu bia we ngɔ kɔ̃ gɛnɛ Owi sɛnɛ wi
(Luk. 6.27-28,32-36)
43“Nɛ zila we wa tɔ̃a zɛ́ na: ‘Mɔ kɔ̃́ gɛnɛ ngba mɔ, nɛ mɔ sɛ́nɛ́ wi sɛnɛ mɔ’ ni. 44Nɛ nde kɛ 'da mi, mi tɔ̃ hã nɛ na, nɛ kɔ̃́ gɛnɛ wi sɛnɛ nɛ, nɛ nɛ sámbálá Gale we wanɔ kɛ wa zɛlɛ tɛ nɛ ni, 45nɛ nɛ sɛ a ngbongbo benɔ 'da Baa nɛ, kɛ a li nza i ni. We kɛ a dɛ na, wese 'da a to dɛ ngɔ o'dã winɔ do odia winɔ, nɛ kole 'da a tɛ dɛ ngɔ owi dɛ de mɛnɔ do Owi dɛ 'dã mɛnɔ vɛ̃. 46Fala kɛ nɛ kɔ̃ tati a gɛnɛ owinɔ wa kɔ̃a gɛnɛ nɛ ni iko, nɛ dɛ do kɛ nɛ 'bɔ 'da si olo nɛ ni nɛ nde? Gɛnɛ kɔ owi futa takonɔ, wa dɛ 'bɔ na mɛ ni. 47Fala kɛ nɛ hã balɛ hã onya nɛ iko, nɛ nde ki ni a mɔ ɔ ɔngba nde? Gɛnɛ kɔ owinɔ kɛ wa ĩ̀ ti Gale gɔ ni, wa dɛ 'bɔ na mɛ ni. 48Ma wia na, dɛa mɔ tɛ nɛ we ngboo, ɔ nɛ kɛ 'da Baa nɛ, kɛ a li nza i ni.
Currently Selected:
MATIE 5: NGB
Highlight
Share
Copy
Want to have your highlights saved across all your devices? Sign up or sign in
Ngbaka DC Bible (We Nu Gale) Version © Bible Society of the Democratic Republic of Congo, 1995.