MATIE 4
4
Satana yamba sila Yezu
(Mar. 1.12-13; Luk. 4.1-13)
1Nɛ Hi Wi Santo kã Yezu dɛ li gba zɔ̃ i, takɔ Satana yamba sila a. 2Nɛ a ɔa i mɔ 'bu tũ nalɛ, nɛ nde a nyɔ̀ngɔ̀ mɔ gɔ, nɛ wɔ ba a. 3Nɛ Satana hɔa, nɛ a tɔ̃ hã a na: “Fala kɛ mɔ a Be 'da Gale kpaa nde, nɛ mɔ tɔ̃́ hã otanɔ gɛ, kɔ ma kifi nyɔngɔmɔ, hã mɔ nyɔngɔ.”
4Nɛ Yezu gese hã a na: “Wa kɔma kɔ 'Buki 'da Gale na: ‘Wele kpásá tati a we nyɔngɔmɔ iko gɔ, nɛ nde a wia tɛ kpasa we wenɔ vɛ̃ kɛ ma yolo nu Gale ni.’ ” #4.4 Mɔ tɔ́lɔ́ Mbulanɔ 8.3.
5Nɛ Satana ba a, nɛ a la do a dɛ kɔ le Yeruzalɛmɛ, nɛ a e a gbogbo zu tɔa Tɛmpɛlo i, 6nɛ a tɔ̃ hã a na: “Fala kɛ mɔ a ngbongbo Be 'da Gale, nɛ mɔ bũlũ, kɔ mɔ zĩ nù. We kɛ wa kɔma kɔ 'Buki na:
‘Gale a a sɛ oanzɛnɔ 'da a na,
wa zɔ mɔ tɛ mɔ.
Wa kpɔ sɛ kɔ̃ wa ti mɔ dɛ li ngɔ gɛ na,
dɔ mɔ tó nyanga mɔ do ta gɔ.’ ” #4.6 Mɔ tɔ́lɔ́ Zumanɔ 91.11-12.
7Nɛ Yezu gese hã a na: “Wa kɔma 'bɔ kɔ 'Buki na: ‘Mɔ tɛ yàmbà Nwa Gale 'da mɔ gɔ.’ ” #4.7 Mɔ tɔ́lɔ́ Mbulanɔ 6.16.
8Nɛ Satana ba 'bɔ a, nɛ a e a tɛ ngɔ 'bɛ̃lɛ̃ zu kala, nɛ a be lenɔ ngɔ nù gɛ, do dɔ̃lɔ̃ li 'da ma vɛ̃ hã a, 9nɛ a tɔ̃ hã a na: “Fala kɛ mɔ gu nù ti mi, kɔ mɔ dɔnggɔ mi, nɛ mi hã sɛ mɛnɔ ni vɛ̃ hã mɔ.”
10Nɛ Yezu gese hã a na: “Mɔ fó tɛ mɔ, Satana! Wa kɔma kɔ 'Buki na: #4.10Mɔ tɔ́lɔ́ Mbulanɔ 6.13. ‘Mɔ dɔnggɔ sɛ Nwa Gale 'da mɔ, nɛ mɔ sambala tati a a zu a kpo.’ ”
11'Do ki ni wá, nɛ Satana la Yezu, nɛ oanzɛnɔ wa hɔ, nɛ wa gala a.
Yezu ndua nyanga dɛa toe 'da a tɛ Galile
(Mar. 1.14-15; Luk. 4.14-15)
12Yezu nɛa we zele na, Herodɛ ba Yoanɛ wi batisa winɔ do bɔlɔkɔ ni, nɛ a la dɛ ngɔ nù Galile i. 13A hɔa Nazarɛtɛ, nɛ a ɔ̀ di ni gɔ, nɛ a la we ɔ tɛ Kafarnaumɛ, kɛ ma dɛ nu gba ndɔ Galile, tɛ ngɔ nù Zabuloni do Nɛftali ni. 14A dɛa na mɛ ni, takɔ we Ezai, wi gba olo nu Gale tɔ̃a zɛ́ ni, ma dɛ tɛ̃ ɛ. A tɔ̃a zɛ́ na:
15“Nù Zabuloni do Nɛftali,
lenɔ tɛ nu kolo gba lì, do kɛnɔ kulu lì Yɔrdanɛ,
nù Galile, kɛ ogele winɔ wa ɔ nɛ ni!
16Owinɔ wa ɔ kɔ gba tũ ni,
wa zɔa gba nyɛa we yele ngbaa.
Nɛ wanɔ kɛ wa kɔ gba tũi 'da fionɔ ni,
fala sa ngɔ wa.”#4.16Mɔ tɔ́lɔ́ Ezai 8.23-9.1.
17Nɛ ndo do ngba soe ni, nɛ Yezu ma ngɔ be we na: “Nɛ kífí sila nɛ, we kɛ ngba soe Gale nɛ tɛ we dungu nwa ngɔ nù gɛ ni kɔla ia.”
Yezu sa mɔ hã owi da gbanda zu wa nalɛ
(Mar. 1.16-20; Luk. 5.1-11)
18Mbe ngba soe kpo, nɛ Yezu ma ngɔ la do nu gba ndɔ Galile, nɛ a zɔ owi gbɛ kɔyɔ zu wa bɔa tɛ da gbanda 'da wa 'dɔ gba ndɔɛ ni tɛ fa kɔyɔ. Wi a Simɔ (kɛ wa sa 'bɔ li a na Petro ni), do nya a Andre. 19Nɛ Yezu tɔ̃ hã wa na: “Nɛ tɛ́, kɔ lɛ yɛnggɛ do nɛ, nɛ mi a sɛ nɛ do owi fa wele hã Gale.” 20Wa nɛa we zele ni, nɛ wa la gbanda 'da wa dɛ di ni do ti, nɛ wa la do Yezu.
21A nɛa we la dɛ dati, nɛ a zɔ owele bɔa, wa 'bɔ a onya wi, wi a Zake do Yoanɛ, benɔ 'da Zebede. Wa zi a kɔ ga do baa wa Zebede tɛ kpo li gbanda 'da wa. Nɛ Yezu sa mɔ hã wa, 22nɛ wa la baa wa do ga 'da wa dɛ di ni do ti, nɛ wa la do Yezu.
23Nɛ Yezu yɛngga do ngɔ nù Galile vɛ̃ tɛ be mɔ hã owinɔ kɔ tɔa mbulanɔ 'da wa. Nɛ a tɛ be Dia Sako dɛa to nwa 'da Gale hã wa, nɛ a kpasa owi zɛlɛ kpi do kpi. 24Nɛ we 'da a yɛ'ba ngɔ nù Siri vɛ̃, nɛ Owele wa tɛa do owi zɛlɛ kpi do kpi hã a. Wa tɛa do winɔ kɛ wa do o'dã hi wi kɔ wa ni, do owi zɛlɛ tindili, do Owi kala nyanga, nɛ Yezu kpasa wa vɛ̃. 25Nɛ ogba gili wele, wa zi tɛ yɛnggɛ 'dɔkɔlɔ a. Wa yula ngɔ nù Galile, do ngɔ nùi kɛ wa sa li nɛ na Lenɔ 'Bu ni, do kɔ le Yeruzalɛmɛ, do ngɔ nù Yude, do kɔ lenɔ kulu lì Yɔrdanɛ i ni.
Currently Selected:
MATIE 4: NGB
Highlight
Share
Copy
Want to have your highlights saved across all your devices? Sign up or sign in
Ngbaka DC Bible (We Nu Gale) Version © Bible Society of the Democratic Republic of Congo, 1995.