1 Bamakabe 9
9
Yudase udi ufua
1Pumvuila Demetriyuse muvuabu bashipa Nikanore, batshimuna ne tshiluilu tshiende, kutumaye tshiakabidi Bakidese ne Alkime#9.1 Demetriyuse: tangila 7.1. — Nikanore: tangila 3.38 ne 7.26. — Bakidese: tangila 7.8-9. — Alkime: tangila 7.5 ne diumvuija. mu ditunga dia bena Yuda mu tshikondu atshi bua kuludika tshiluilu tshiende. 2Bena tshiluilu kuyilabu njila wa ku Ngalileya, kunyungulula musoku wa Mesalote pa buipi ne tshimenga tshia Arbele.#9.2 Arbele: tshimenga tshivua mutantshi wa kilometre 5 ne dijiba dia Ngenezarete. Kukuatabu musoku ewu, kushipa musumba wa bantu. 3Mu ngondu wa kumpala wa tshidimu tshia 152,#9.3 ngondu wa kumpala wa tshidimu tshia 152: ngondu muinayi ne muitanu mu 160 bgbg ne Y.K. kuasabu mitanda yabu mitangilangane ne Yerushalayime. 4Pashishe kuyabu ne basalayi bavua benda ku makasa binunu makumi abidi, ne ba pa tubalu binunu bibidi, batangile ku Bereta.#9.4 Bereta: mutantshi wa kilometre 16 ne Yerushalayime. 5Kadi Yudase pende uvua ne bena mvita bapiluke binunu bisatu, bavua base mitanda mu Elasa.#9.5 Elasa: tangila 3.16. 6Pamuenabu bunene bua tshiluilu tshia baluishi, ke bena mvita ba bena Yuda kupetabu bowa. Bavule kunyema, kushalaku amu bantu nkama muanda mukulu. 7Yudase umona muvua bena tshiluilu tshiende bongoloka baya, nwita payi mimufinakaje, muoyi kumusunsuka munda. Bualu kavua ne diba dia kusangisha bena diende kabidi to. 8Yudase mutekesha mu maboku, kadi uvua amu wambila bavua bashala ne:
— Jukayi, tuyayi kudi baluishi betu, ne tudi mua kubatshimuna.
9Bena mvita bende kabavua banyishe, kumuambilabu ne:
— Katuena ne tshitudi mua kuenza mpindiewu to. Kadi tukebe amu bua tuikale ne muoyi. Pangapingana ne bana betu ne tushishe kubangulula mvita. Bualu tudi bungi bukese.
10Yudase kuandamuna ne:
— Kanuambi nanku to, tshiena musue bua bantu bambe ne: mmunyeme! Tshikondu tshietu tshia lufu tshiakumbanyi, tufuayi ne muoyi mukole bua bana betu. Katuena mua kunyanga lumu luetu to.
11Baluishi kupatuka mu mitanda, kuela mualu wa mvita kumpala kua bena Yuda. Babandi babu ba pa tubalu tua mvita bavua batapulula mu bisumbu bibidi. Beedi ba mabue ne ba miketa bavua benda kumpala kua tshiluilu, kadi baluanganyi bapiluke bavua mu milongu ya kumpala ya tshiluilu. 12Bakidese kulombola luseke lua ku dia balume dia tshiluilu. Bena mafuma, miele ne ngabu, ba ku makasa, bavua basesa ku nseke yonsu ibidi, balonda mudi mpungi idila. Bena mvita ba Yudase kuela pabu mpungi.
13Buloba kuzakala ne mutoyi mukole wa biluilu bibidi ebi. Myita kutuadija ku dinda too ne ku dilolu. 14Yudase kumona muvua Bakidese ne tshitupa tshinene tshia tshiluilu tshiende benda ku dia balume. Uvua munyungulukila kudi bantu ba bukitu. 15Kutankulabu baluishi ba bena Siriya bavua benda ku dia balume dia tshiluilu, kubalondakaja too ne ku mikuna ya Azara.#9.15 mikuna ya Azara: mbafunde mikuna ya Asdode, kadi mu buloba bua Asdode kamuena mukuna to. 16Kadi bena ku dia bakaji bamona bena ku dia balume benda basemena panyima, kupindulukabu panyima pa Yudase ne bena diende, benda babaluisha mvita. 17Mvita kukola, bantu bavule ba nseke yonsu ibidi kufua.
18Yudase kufua pende muine mu mvita ayi. Diba adi bantu bende bavua bashale kuditua lubilu. 19Yonatane ne Simeyone kuangata tshitalu tshia Yudase, kutshijika mu Modine#9.19 Modine: tangila diumvuija mu 2.1; fuanyikija ne 2.70; 13.25. mu nkita ya diku diabu. 20Bena Izrayele kudila Yuda bikole. Kuenzabu madilu ende matuku mavule, bamba ne: 21Tshilobu tshia bena Izrayele tshiajiminyi bishi?
22Mikuabu mianda ya Yudase, bu mudi mvita yende, malu a bulobu buende, kabidi ne bionsu bidi bileja malu a lumu luende, kabiena bifunda bionsu to, bualu mbipite bungi.
Yonatane udi upingana muanabu Yudase
23Yudase mumane kufua, bantu bavua kabayi banemeka meyi a Moshe, ne bonsu bavua ne buenzayi mu Izrayele, kupetabu dikamakama. 24Kadi bu muvua tshiyole tshinene mu ditunga, bena Izrayele kumyuangana ne bantu babi abu. 25Ke Bakidese kusungula munkatshi mua bena Yuda babengi ba diyi dia Mvidi Mukulu bua bamone mua kuludika ditunga. 26Bantu aba kukuatshisha balunda ba Yudase, kubafila kudi Bakidese bua kubanyokaye, kubatshimbakaja. 27Izrayele kubuela mu tshinyangu tshivua katshiyi tshienzeka katshia tshikondu tshia bambi tshiapita. 28Nanku ke balunda bonsu ba Yudase kusangila, kuambilabu Yonatane ne:
29— Katshia Yudase wenu wafua, kakuena muntu udi mua kuluisha baluishi betu bu yeye, kuluisha Bakidese ne bonsu badi bapangila ditunga dietu. 30Tudi tukusungula lelu bua ushale pa muaba wende bu mfumu ne mutuludiki, kabidi bua ulombole tshiluilu tshietu.
31Diba adi, ke diapingena Yonatane pa muaba wa muanabu Yudase. Kuitabaye bua kulombola bena Yuda.
Yonatane udi usombuela muanabu Yowanane
32Bakidese umvua malu awu, kukebaye mua kujimija Yonatane. 33Yonatane ne Simeyone wabu kumanya bualu. Kabidi ne bonsu bavua ne Yonatane kubumanya pabu. Kusombabu mu tshipela tshia Tekowa. Kuasabu mitanda yabu pabuipi ne mabungu manene a mayi a mu Asfare.#9.33 tshipela: fuanyikija ne Mat 3.1 ne diumvuija. — Tekowa: ditunga dia ba muambi Amosa, divua mutantshi wa kilometre 18 ne Yerushalayime. — mayi a mu Asfare: misangu mikuabu udi mua kuikala Sheyike Amade Safare wa mpindiewu, udi mutantshi wa kilometre 6 ne ditunga dia Tekowa. 34(Bakidese kumvua bualu abu dituku dia Dikisha, muaba uvuabu. Ke kusabukaye musulu wa Yardene ne tshiluilu tshiende.#9.34 Malu adi mafunde mu kanungu aka mafuanangane ne adi mu kanungu ka 43.) 35Yonatane kutuma muanabu Yowanane uvua ulombola bena meku a bena nwita bua alombe balunda bende bena Nabate#9.35 bena Nabate: tangila 5.25 ne diumvuija. dianyisha dia kuteka mabuki abu mavule mu musoku wabu. 36Kadi bena Jambri ba mu Medeba#9.36 bena Jambri ba mu Medeba: misangu mikuabu tshidi mua kuikala tshisamba tshia bena Arabe. kubakula Yowanane ne bionsu bivuaye nabi mu njila, kuya nabi. 37Ke Yonatane ne Simeyone wabu kumvua ne bena Jambri badi benza tshibilu tshinene tshia dibaka. Nsongakaji uvua muana wa muntu munene wa bena Kenaane. Bumvua kabidi ne: bantu musumba nebaye kuangata muana mu tshimenga tshikolesha tshia mu Nabata.#9.37 Nabata: badi bela meji ne: musoku ewu udi mua kuikala mutantshi wa kilometre 2 ne Medeba. 38Ke Yonatane ne Simeyone kuvulukabu lufu lua muanabu Yowanane, mushipa kudi bena Jambri. Kuyabu, kusokoma mu lubinga lua mu mikuna. 39Pavuabu basokoma, kumvuabu mutoyi munene, kumonabu mulume uvua mubangilangane, ne balunda bende ne bana babu, benda ne bintu bivule. Bena misambu ne bena ngoma bavua nabu. Bonsu bavua ne bia lufu mu bianza. 40Yonatane ne bena Yuda kupatuka, kudiela kuvua baluishi, kubashipa ba bungi. Bashadile ne muoyi kunyemabu batangila ku mikuna. Bena Yuda kuangata bintu bionsu bivua baluishi abu nabi. 41Nenku “didia dia dibaka kuandamuka madilu. Misambu payi kuandamuka miyenga ya muadi.#9.41 Ke bivua bifunde mu Amosa 8.10.” 42Yonatane ne Simeyone kusombuelabu lufu lua muanabu. Kupinganabu mu tshisense tshia musulu wa Yardene.
Yonatane udi ubunda baluishi ku muelelu wa Yardene
43Bakidese umanya muaba uvuabu, kuluaye dituku dia Dikisha ne tshiluilu tshinene ku muelelu wa Yardene. 44Yonatane kuambila bantu bende ne:
— Tuyayi! Tuluangane bua kudisungidila. Katshia katuena banji kupeta njiwu bu itudi nayi lelu. 45Tudi mpindiewu ne baluishi kumpala kuetu, kunyima kudi musulu wa Yardene, ku nseke kudi tshis nse kabidi ne difu. Katuena ne muaba nansha umue wa kunyemena. 46Tutendelelayi Maweja-Nangila bua tupanduke kudi baluishi betu.
47Myita kubanga, Yonatane olola diboku ne ntape Bakidese. Kadi Bakidese kuepela, kupingana tshianyima, kuvua bena mvita babu. 48Ke Yonatane ne bena diende kudiela mu musulu wa Yardene, kuowela, kusabuka dia muamua. Baluishi babu nansha kusabuka musulu to. 49Bantu bavua Bakidese nabu, kufua batua ku tshinunu dituku adi.
Bakidese mu Yudeya. Lufu lua Alkime
50Bakidese kupingana mu Yerushalayime. Kuibakaye bimenga bikolesha ne bimana, biibi ne bikuvu, mu ditunga dia Yudeya, mu Yeriko, mu Emawuse, mu Betorone, mu Betele, mu Timna, mu Faratone ne mu Tefone.#9.50 Yeriko: udi mu tshibandabanda tshia Yardene, mutantshi wa kilometre 25 ne Yerushalayime. — Emawuse: tangila 3.40 ne diumvuija. — Betorone: tangila 3.16 ne diumvuija. — Betele: mutantshi wa kilometre 18 ne Yerushalayime. — Timna: mutantshi wa kilometre 15 ne Betele. — Faratone: mutantshi wa kilometre 25 ne Timna, pabuipi ne Tefone mu Samariya. 51Pashishe kutekaye tshisumbu tshia bena mvita mu tshimenga tshionsu bua kusuya bena Izrayele. 52Kukoleshaye tshimenga tshia Bete-Sure, tshia Ngezere#9.52 Bete-Sure: tangila 4.29 ne diumvuija. — Ngezere: tangila 4.15 ne diumvuija. kabidi ne bimana bia Yerushalayime. Kutekayemu bisumbu bena mvita ne mayeba a biakudia. 53Kukuataye bana ba bamfumu ba matunga lukola, kubalamina mu nzubu wa lukanu wa bimana bikolesha.
54Mu tshidimu tshia 153, mu ngondu muibidi, Alkime kutuma diyi bua babumbule tshimana tshia munda mua lupangu lua nzubu wa Mvidi Mukulu. Ke muvuaye musue kunyanga mudimu muenzeja kudi bambi.#9.54 ngondu muibidi wa tshidimu 153: mu ngondu wa muinayi ne muitanu mu 159 bgbg ne Y.K. — bambi: badi bafuanyikija ne mudimu muenza kudi Agayi ne Zekarya pavuabu basulula nzubu wa Mvidi Mukulu bamane kumuka ku bupika. Kutuadijabu kubibumbula. 55Kadi Alkime kupeta disama, midimu kuanji kuimana. Katshivua ne bukole, kayi mua kunyungisha mubidi, katshiyi mua kuakula nansha kuamba kalu ka dilayangana ne bena diku diende. 56Alkime kufua mu tshikondu atshi, mukenga bikole ne disama. 57Bakidese umvua muvua Alkime mumane kufua, kupinganaye kuvua mukalenga Demetriyuse. Ke bena Yuda kuanji kushala mu ditalala bidimu bibidi.
Bakidese upanga mua kutshimuna, kumukaye
58Nanku bena Yuda bonsu bavua babenga diyi dia Mvidi Mukulu, kusangilabu, kuambilanganabu ne: “Yonatane ne bena diende bashadi mu bupole, kabayi badimuke bua kutshina mvita. Nanku tupingajayi Bakidese mpindiewu, abakuate bonsu butuku bumue.” 59Kuyabu kumyuangana nende. 60Bakidese kubanga luendu ne tshisumbu tshinene tshia bena mvita. Kufundilaye bena Yuda bavua batue ku tshiende mukanda mu musokoku, ubalomba bua kukuatabu Yonatane ne bena diende. Kadi Yonatane kujandula meji avuaye muele awu. Bualu nansha kukumbana. 61Kadi Yonatane ne bena diende kukuatabu bantu bavua bakeba mbipishilu, batue ku makumi atanu, kubashipa. 62Pashishe Yonatane, Simeyone ne bena diabu bonsu kuya mu tshipela, mu tshimenga tshia Bete-Basi.#9.62 Bete-Basi: mpindiewu badi babikila muaba ewu ne: Beyite-Basa, udi pankatshi pa Betleyeme ne Tekowa (tangila diumvuija mu kan. 33). Kuasululabu nzuba ya muaba awu ivua minyanguke, kukolesha ne bimana. 63Bakidese umvua nanku, kusangishaye tshiluilu tshiende tshijima, kubikilaye kabidi bena diende bavua mu ditunga dia Yudeya. 64Kuvuaye kuela mualu wa mvita mu mpala mua Bete-Basi, kubundaye bavua muaba awu matuku mulongu ne matempu a mvita.#9.64 matempu a nwita: tangila 5.30 ne diumvuija. 65Nenku Yonatane kushiya Simeyone wabu mu tshimenga. Yeye ne tshiluilu tshikese, kupatukabu mu tshimenga bua kuendakana mu ditunga. 66Kutshimunaye Odomera ne bana babu, kabidi ne bana ba Fasirone,#9.66 Odomera…Fasirone: bisamba bibidi bia bena Arabe bivua bidia tshiovu ne Bakidese. mu mitanda yabu. Yeye mumane kubatshimuna kudisangishabu ne Yonatane, bua kuluisha Bakidese pamue nende. 67Simeyone ne bantu bende kupatuka ku Bete-Basi kuosha matempu a mvita. 68Kuluishabu Bakidese, kumutshimuna. Ke diba divuaye mutekeshe mu maboku pavuaye kayi mukumbaje meji ende avuaye muelele bena m vita. 69Bakidese kupeta tshiji tshikole bua bantu babi bavua bamufikishe mu ditunga emu, kubashipa bavule. Kushindikaye bua kupingana kuende.
70Kadi pumvuila Yonatane bualu ebu, kumutuminaye bantu bua batue ndondu, kabidi bapingajilangane bena lukanu. 71Bakidese kuanyisha dilomba dia Yonatane. Kukumbajaye tshivuaye ulomba bua kabenzedianganyi bibi kashidi. 72Kumupingajilaye bena Yuda bonsu bavuaye muele mu lukanu. Pashishe kupinganaye kuende. Kena mufike kabidi mu ditunga dia Yuda to. 73Bena Izrayele kushala mu dikisha. Yonatane kuya kuasa mu Mikmase.#9.73 Mikmase: udi mutantshi wa kilometre 12 ne Yerushalayime. Ufika muamua, kutuadijaye mudimu wa kulumbuluisha bena Izrayele. Ke kushalaye mfumu wa bantu bende, kumushaye bonsu bavua babenga Mvidi Mukulu kabayi bamutumikila.
Currently Selected:
1 Bamakabe 9: TSH96
Highlight
Share
Copy
Want to have your highlights saved across all your devices? Sign up or sign in
Bible avec Livres Deutérocanoniques en Tshiluba © Société Biblique de la R. D. Congo, 1996