1 Bamakabe 2
2
Mutuangaji Matatiyase udi udila
1Mu mine matuku awu, muvua muntu diende Matatiyase, muana wa Yowanane, muikulu wa Simeyone. Matatiyase uvua mutuangaji wa ku ndelanganyi ya Yoyaribe. Kumukaye mu Yerushalayime bua kuya kusomba mu tshimenga tshia Modine.#2.1 Yoyaribe: mfumu wa tshisumbu tshia kumpala tshia bisumbu makumi abidi ne binayi bia batuangaji (tangila 1 Kul 24.7). — Modine: mpindiewu badi bamubikila ne: Ele-Midya, mutantshi wa kilometre 10 ne Lida-Lode, ke kuvua Simeyone muibake nkita ya bena diku diende bu mudibu bafunde mu 13.27-30. 2Uvua ne bana balume batanu: Yowanane muinyika Ngadi, 3Simeyone, muinyika Tasi, 4Yudase, muinyika Makabe.#2.4 Makabe: dina edi kabidi ne mena makuabu a bana babu ne Yudase, kabena bamanye mua kuumvuija bimpe. 5Elazare muinyika Awarane ne Yonatane muinyika Afuse. 6Matatiyase mumone malu mabi avuabu benza muditunga dia Yuda ne mu Yerushalayime, 7kuambaye ne:
— Ndikasa dianyi dia kabi! Bua pandi mulele bua mmone mudibu babutula tshisamba tshianyi,
banyanga kabidi tshimenga tshia tshijila,
nshale musombe amu nanku patupu bu ndi tshiyi ne bualu,
mmone tshimenga tshikuata kudi baluishi,
Nzubu wa Mvidi Mukulu mu bianza bia benyi?
8Nzubu awu mmushala bu muntu kayi lumu.
9Bintu bidi bileja lumu luende mbaye nabi,
bu bintu bipawule mu mvita.#2.9 bintu bipawule mu mvita: fuanyikija ne 2 Bak 24.13.
Bana betu batekete mbashipela mu misesu,
bansongalume mbabutula ku muele wa mvita.
10Bantu ba mu bisamba bikuabu,
kukuatabu tshimenga, kupawula bintu,
11banyenga bilengejilu biatshi bionsu.
Tshivua tshimenga tshia tshidienzela malu,
mpindiewu tshiashadi tshia bapika.
12Bulenga bua muaba wetu wa tshijila buvua butusankisha,
mpindiewu muaba awu ukadi tshipela.
Bantu ba bisamba bikuabu badi baunyanga.
13Tshindi nshadila ne muoyi kabidi ntshinyi?
14Matatiyase ne bana bende kupanda bilamba biabu, kuvuala mikusu, kuenza madilu manene.
Matatiyase udi ujula tshimvundu mu tshimenga
15Balombodi ba bena mvita ba mukalenga Antiyokuse bafika, kufundila bantu bua kulekelabu mikenji ya Moshe. Kuyabu mu tshimenga tshia Modine, bambila bantu bua balambule milambu ya benyi. 16Bena Izrayele basule kuyabu kubakidila, kadi Matatiyase ne bana bende kubengabu, kudisangisha pa nkayabu. 17Bantu bavua mukalenga mutume kuambila Matatiyase ne:
— Wewe udi mfumu mumanyike, munene mu tshimenga emu mujima. Badi bakumvua kudi bana bebe ba balume ne kudi bana benu. 18Tungunuka wakumpala bua kukumbaja diyi dia mukalenga, bu muvuabu benza kudi bena bisamba bionsu, kudi bantu ba mu Yudeya ne kudi bonsu bavua bashale mu Yerushalayime. Wewe ne bana bebe nenushale “balunda ba Mukalenga.#2.18 balunda ba Mukalenga: bavua bapeta dina dia butumbi divua dibasangisha ku bukalenga abu.” Mukalenga neanupe bintu bia ka lumbandi: ke nkanu mitoke ya mushinga mukole, mpawungi ne binga bintu bivule.
19Matatiyase kuandamuna diyi dikole, wamba ne:
— Nansha bantu ba bisamba bikuabu, bavua basombe mu bukalenga, bateleja mukalenga, bitaba ku meyi ende, muntu yonsu ulekela ntendelelu wa bankambua bende, ulonda meyi a mukalenga, 20kadi meme, bana banyi ne bana betu, tudi tulonda amu ndondu uvua Mvidi Mukulu mutue ne batatuetu. 21Mvidi Mukulu atuambuluishe bua tumone mua kulama Meyi ne mikenji kashidi. 22Katuena mua kuteleja diyi dia mukalenga bua kusesuka mu ntendelelu wetu awu to.
23Matatiyase ujikija diakula, ke umue wa ku bena Yuda, kusemena ne milambu, bonsu batangila, bua kulambula pa tshilambuilu tshia Modine bu muvua diyi dia mukalenga. 24Matatiyase umona abi, tshiji tshiende kulunduka, bia munda kumunyunga: tshiji tshia pa bualu kumujuka munda muende. Kudielaye kuvua muntu awu, kumukosela muminu pa tshilambuilu. 25Muntu uvua mukalenga mutume bua kufikisha diyi dia kulambula awu, Matatiyase kumushipelamu pende amu pine apu, kutonkola ne tshilambuilu tshiabu. 26Matatiyase kuleja muvuaye munange mikenji ya Moshe bikole, amu bu muvua Pinase muenze ne Zimri, muana wa Salu.#2.26 Pinase…Salu: tangila Dib 25.6-14; Pinase, muikulu wa Arone, udi nkambua wa batuangaji ba bena Izrayele.
Bena Yuda balamatshi ba Mvidi Mukulu badi batombokela mukalenga
27Pashishe Matatiyase kuenda wela mbila mikole mu misesu ya mu tshimenga, wamba ne:
— Bonsu badi bananga mikenji ya Moshe, kabidi balama ndondu wa Mvidi Mukulu bandonde.
28Kushiyabu bintu bionsu mu tshimenga, yeye ne bana bende, kunyemenabu mu mikuna. 29Diba adi bantu bavule bavua bakeba kulonda diyi ne njila wa buakane, bu umvua Moshe muambe, kuyabu mu tshipela bua kusomba.#2.29 tshipela (tshia Yuda): fuanyikija ne Mat 3.1 ne diumvuija. 30Bavua baye ne bana babu ba balume, bakaji babu ne bimuna biabu, bualu bakavua babakengesha bikole. 31Kumanyishabu bantu ba mukalenga ne bena tshiluilu bavua basombe mu Yerushalayime, tshimenga tshia Davide, ne: “Bantu bavua babenga diyi dia mukalenga abu mbaye kusokoma mu mbuebue ya mu tshipela.” 32Tshiluilu tshinene kubalondakaja, babapeta. Ke kuasabu mitanda mitangilangane ne yabu. Bavua badilongolola bua kubabunda dituku dia Dikisha. 33Kubambilabu ne:
— Patukayi mu mitanda. Bua nuenu kushala ne muoyi, amu nuenu bitabe diyi dia mukalenga.
34Ke bena Yuda kuandamuna ne:
— Katuena tupatuka to. Katuena tuenza tshidi mukalenga muambe bua kushipa mukenji wa dituku dia Dikisha to.#2.34 Mu Tshim 16.29 mbikandike bua muntu kupatuka ku nzubu dituku dia Dikisha.
35Baluishi kutshinta bena Yuda ne mvita. 36Bena Yuda kabavua bakandamana, kabavua babela nansha dibue, kabavua nansha binjila ku mishiku ya mbuebue bua muntu kabuedi to. 37Bavua bamba amu ne: “Tufue mu buakane, diulu ne buloba mbijadike bu munudi nutushipa kapayi bualu.” 38Kubelabu mvita mikole mu dituku dia Dikisha. Bena Yuda kubutuka bavule, ne bakaji ne bana, kabidi ne bimuna biabu. Bavua batue ku tshinunu.
39Matatiyase bumvua bualu abu yeye ne bana bende, kudilabu bana babu bikole. 40Kuandamunabu ne: “Bu tuetu bonsu tuenza muenji bana betu emu, katuyi tuluisha bisamba bia benyi, bua tuetu kushala ne muoyi kabidi ne bua kulama Meyi etu, bantu aba nebatubutule diakamue pa buloba.” 41Dituku adi kuangatabu dipangadika dia ne: “Muntu walua kutubunda dia Dikisha, tudi tumuluisha, nanku katuakufua bonsu bu mufuile bana betu mu mbuebue yabu to.”
42Ke musumba wa bantu, bena mu Aside,#2.42 bena Aside: dina dia mu buena ngreke didibu bafunde mu buena ebrewu ne: “mutendeledi”: tshisumbu tshia bena Yuda etshi ntshilamate ku mikenji ya Moshe. Bavua benza tshisumbu tshinene tshia bena nwita ba Yudase Makabe (tangila 2 Mak 14.6), kadi bavua balongolola malu mushindu uvuabu basue (tangila 1 Mak 7.13 ne diumvuija). kulua kudisangisha nabu. Bavua bantu ba bukitu ba mu bena Izrayele balami ba mikenji. 43Bantu bakuabu bavua banyema bavua babakengesha kuvua kuvudija tshisumbu tshiabu. Bungi bua bena tshiluilu kuvula. 44Kusangishabu bena tshiluilu, kushipabu bantu bavua babenga mua kulama mikenji, kumana tshiji ne bonsu bavua babenga Mvidi Mukulu. Bantu bavuabu kabayi mua kushipa, kunyemenabu mu bisamba bia benyi. 45Matatiyase ne balunda bende kuendakanabu mu ditunga, benda batonkola bilambuilu bia nwidie ya benyi. 46Kabidi bavua bateka nsongalume panshi ku bukole. Ke bonsu ba mu tshitupa tshia buloba bua bena Izrayele, bavuabu kabayi banji kuteka panshi. 47Kuipatabu bamfumu bonsu ba bisamba bikuabu bavua baditambisha. 48Kukandikabu benyi ne bamfumu babu bua kabanyangi mikenji ya Moshe. Mukalenga Antiyokuse kupanga mua kutombokela Mvidi Mukulu.
Matatiyase udi ulayangana ne bantu
49Matatiyase kudiumvua ukadi pa kufua. Ke kuambilaye bana bende ba balume ne:
— Monayi tshikondu tshidi bantu baditambisha,
tshikondu kabidi tshidi Mvidi Mukulu ne bua kuleja tshiji,
tshiji tshikole tshia kunyoka buenzayi.
50Kadi nuenu, bana banyi, suminyinayi mu dilama dia Meyi ne mikandu bia Moshe.
Nuluile ndondu ivua Mvidi Mukulu mutue ne bankambua benu.
51Vulukayi malu avua bankambua betu benza tshikondu tshiabu.
Nulonde tshilejilu tshiabu, nanku nenupete lumu lunene ne butumbi bua kashidi.
52Abrahame#2.52 Abrahame: tangila Tshib 15.6; Sir 44.20. uvua mulamate Mvidi Mukulu mu dikenga
ke pavua Mvidi Mukulu mumutangile bu muakane.
53Yozefe#2.53 Yozefe: tangila Tshib 41.37-43. uvua mulame Meyi a Mvidi Mukulu mu dikenga,
ke kushalaye mukalenga wa bena Ejipitu.
54Nkambua wetu Pinase#2.54 Pinase…nkambua: tangila kan. 26 ne diumvuija, tangila kabidi mu Sir 45.24. uvua uleja disuminyina diende dilelela,
ke pavua Mvidi Mukulu mulame ndelanganyi yende yonsu bua ikale batuangaji kashidi.
55Yoshuwa#2.55 Yoshuwa: tangila Dib 13.1—14.12; 27.16-23: Sir 46.1-7. ukumbajile mudimu mumufundila;
kushalaye mulombodi mu Izrayele.
56Kalebe#2.56 Kalebe: Tangila Dib 14.24; Sir 46.9. bua pajadikilaye bulelela, bena Izrayele basangila,
wakapeta buloba bua bumpianyi.
57Davide,#2.57 Davide: tangila 2 Sam 7.8-16; Sir 47.8. bu muvuaye mulamatshi wa Mvidi Mukulu,
wakapeta nkuasa wa bumfumu buende ne bua ndelanganyi yende kashidi.
58Eliya#2.58 Eliya: tangila 1 Bak 19.10; 2 Bak 2.11; Sir 48.9. pavuaye mupite kusuminyina mu dilama dia Meyi ne mikandu,
bakamuambula mu diulu.
59Pavua Ananiya, Azariya ne Mikayele#2.59 Ananiya, Mikayele: tangila Dan 3. batekemena kudi Mvidi Mukulu,
bakapanduka ku ndimi ya kapia.
60Danyele#2.60 Danyele: tangila Dan 6. pavuaye muntu muakane,
ntambue kayakamuenzela bualu.
61Numanye ne: mu ndelanganyi yonsu badi batekemena kudi Maweja-Nangila,
kabakupanga diambuluisha kashidi.
62Kanutshinyi mikanu ya mukalenga ewu,
muluishi wa Mvidi Mukulu,
neafue, misanda idie mubidi wende,
lumu luende nelunyanguke.
63Lelu udi uditambisha, uditemba, kadi maloba kenaku,
bualu neandamuke lupuishi,
kabidi bidiye mupangadike mbinyanguke.
64Nuenu bana banyi, ikalayi bantu ba muoyi mukole,
luilayi meyi a Mvidi Mukulu,
bualu wowu nganupa lumu luvule.
65Monayi Simeyone wenu, mmuntu wa meji, numuteleje, neashale bu tatuenu. 66Monayi Yudase Makabe, mmuntu wa mpolondu bituadije ku buana buende, yeye neashale uludika tshiluilu tshienu, nealudike nwita padi baluishi benu banubunda. 67Buenu nuenu, kungijayi bonsu badi balama mikenji, nushindike mua kudisombuela kudi bukua bisamba. 68Enzelayi benyi bibi bu muvuabu banuenzela. Nulame bionsu bidi mikenji mmufundile.
69Pashishe Matatiyase kubajingila diakalenga, kufuaye. 70Ufuile mu tshidimu tshia lukama ne makumi anayi ne isambombu.#2.70 Ke tshidimu tshia 166 bgbg ne Y.K. Bana bende kumujika mu nkita ya mu diku diabu mu tshimenga tshia Modine. Bena Izrayele bonsu kuenza madilu ende.
Currently Selected:
1 Bamakabe 2: TSH96
Highlight
Share
Copy
Want to have your highlights saved across all your devices? Sign up or sign in
Bible avec Livres Deutérocanoniques en Tshiluba © Société Biblique de la R. D. Congo, 1996