Zekaria 10
10
War pa Yehova ni Dhanu Pare
1Wupenj koth ba Yehova i nindo mi koth ma cen, cil ba. Yehova m’utimo lukoth; man ebimio igi cori mi koth, ku ba dhanu nzu ng’atu man lum ma numu i podho. 2#Mt 9:36; Mk 6:34Kum ayi gin m’acwia giyero lembe ma ie nanu, man jung’eilembe gineno ndra; man giyero lek mi ndra, gijuko juk mananu: ka kumeno gicidho i yo migi calu rombe, jusendogi, kum jakwac umbe. 3Ng’ecwiny para bogre kum jukwac, man abimio masendi ba nyogi diegi; kum Yehova mir udul uliewo udul rombe pare, en e ot mi Yuda, man ebikethogi calu riuni pare ma ber i lwiny. 4Kidi ma wi gui biai i bang’e, musumali biai i bang’e, atum mir ali biai i bang’e, jubim kubang’gi nzu karacelo biai i bang’e. 5Man gibibedo calu dhanu ma tek, ma gibenyono jukwojgi i unzabu mi gengi i lwiny; man gibikiedo, kum Yehova ni karacelo kugi; man cwiny ju m’uwotho ku wi riuni bing’abre. 6E abimio tego ni ot mi Yuda, man abibodho ot pa Yusuf, e abidwokogi; kum kisa nega i kumgi; man gibibedo calu abayugi ngo: kum an a Yehova Mungu migi, man abiwinjogi. 7E Efraim bibedo calu jakero man anyong’a binego adundegi calu ku pigulok; eyo, nyithindho migi bineno maeni, man anyong’a binegogi; anyong’a binego adundegi ni kum Yehova.
8Abilwong’ogi ku lwio, e abicokogi; kum awarugi; man gibimedri calu gimedri. 9E abicoyogi i kind kodhidhanu; njan gibipoi pira i ng’om ma bor; man gibibedo ku nyithindhgi, e gibidwogo. 10Abikelogi kendo bende kud i ng’om Misiri, man abicokogi kud i Ascur; e abikelogi i ng’om Gilead man Lebanon; man kaka binwangre igi ngo. 11Man ebikadhu kud i nam mi masendi, man ebigoyo mukura mi nam, e kut ceke mi Nil bidwono; man kuhaya mir Ascur bijwik piny, man uluth mi ker mi Misiri biai. 12E abimio tego igi i Yehova; man gibiwotho malu ku piny i nyinge, Yehova wacu.
Currently Selected:
Zekaria 10: AB1970
Highlight
Share
Copy
Want to have your highlights saved across all your devices? Sign up or sign in
The Holy Bible In Alur (Lur), Revised Orthography © United Bible Societies, 1970.