Zekaria 1
1
Lwong’o Nidwogo ba Yehova
1 #
Ezr 4:24-5:1; 6:14 I dwi mir aborane, i rundi mir arionde pa Dario, lembe pa Yehova bino ba Zekaria ma wod Berekia, ma wod Ido, ma jabila, m’uwacu kumae, 2Yehova thungo dit ni wegwu. 3Ka kumeno wac igi kumae, Yehova mir udul uwacu kumae: Wudwog i bang’a, Yehova mir udul uwacu, e abidwogo i beng’wu, Yehova mir udul uwacu. 4Kud wubed calu kwaruwu, ma jubila ma kwong’a gilwong’o i bang’gi, giwacu kumae, Yehova mir udul uwacu kumae, Wudwog kawono kud i yo mu ma rac, man kud i giratima mu ma rac: ento giwinjo ngo, kadi giciko ithgi de ngo ira, Yehova wacu. 5Kwaruwu, gini kani? jubila de, gibedo mi nja? 6Ento lembe para ku cik para, m’ang’olo ni jutic para ma jubila, ginwang’u kwaruwu ngo? man gilokri giwacu kumae, Calu i Yehova mir udul upido ya etim iwa, calku yo mwa, man calku giratima mwa, e etimo kumeca i bang’wa.
Ginmawokiwang’ pa Jabila pi Riuni
7I ceng’ pier ario wi ang’wende mi dwi apar wi acende, ma en e dwi Cebat, i rundi mir arionde pa Dario, lembe pa Yehova bino ba Zekaria ma wod Berekia, ma wod Ido, ma jabila, m’uwacu kumae, 8#Nyu 6:4; Nyu 6:2Aneno ku diewor, man, nen, ng’atu moko bewotho ku wi riuni ma kwar, man ecungo kind yen m’adundo the tipo; man i ng’eye riuni nuti, ma kwar, ku m’athobi, ku ma tar. 9Alund awacu kumae, E rwoth para, maeni ang’o? Man malaika m’uweco kuda wacu ira kumae, Abinyutho iri nia maeni ang’o. 10Man ng’atu m’ucungo kind yen m’adundo loko lembe man ewacu kumae, Maeni ju ma Yehova orogi giwoth kun ku kun i kind ng’om. 11Man giloko lembe ni malaika pa Yehova m’ucungo i kind yen m’adundone, giwacu kumae, Wawotho kun ku kun i kind ng’om, man, nen, ng’om ceke bedo ling’, man epoto.
12Malaika pa Yehova lund uloko lembe man ewacu kumae, E Yehova mir udul, nindo bibedo rokani ma kisa binegi ie ngo kum Yerusalem kud adhura mi Yuda, ma ng’ecwiny unegi i kume rundi pier abiro? 13E Yehova loko lembe ni malaika ma waweco wakude ku lembe ma ber, en e lembe mi juk. 14Ka kumeno malaika ma waweco wakude wacu ira kumae, Koki, wac kumae, Yehova mir udul uwacu kumae: Ngiri nega kum Yerusalem man kum Sayuni ku ngiri ma dit. 15Man adhunjo dit ni thek ma gibedo abeda kum naka adhunjo nyanok, man ginyayu masendi. 16Ka kumeno Yehova wacu kumae: Adwogo Yerusalem ku kisa; ot para bigombre i ie, Yehova mir udul uwacu, man jubitelo thol wi Yerusalem. 17Kok kendo, wac kumae, Yehova mir udul uwacu kumae: Adhura para bipong’ hau ku mierolembe; man Yehova bijuko Sayuni, man fodi ebigoyo wi Yerusalem.
Ginmawokiwang’ pa Jabila pi Tung ku Jubodho
18E ating’o wang’a malu, man aneno, man, nen, tung ang’wen. 19E awacu ni malaika m’uweco kuda kumae, Maeni ang’o? Man eloko lembe ira kumae, Maeni tung m’uketho Yuda mba, kud Israel, man Yerusalem. 20Man Yehova nyutho ira jubodho mir umbu ang’wen. 21Alund awacu kumae, Maeni gibino timo ang’o? Man ewacu kumae, Maeni tung m’ulalu Yuda, ketho ya ng’atu moko ting’o wie malu ngo; ento maeni gibino kara ginyai ndiri i igi, kara giredh tung mi thek piny, m’uting’o tung’gi malu kum ng’om mi Yuda kara gikethe.
Currently Selected:
Zekaria 1: AB1970
Highlight
Share
Copy
Want to have your highlights saved across all your devices? Sign up or sign in
The Holy Bible In Alur (Lur), Revised Orthography © United Bible Societies, 1970.