Matayo 19
19
Ponji pa Yesu pi Pokri pa Nico ku Cege
(Mk 10:1-12; Lk 16:18)
1Etimbre de ka Yesu daru lembe maeni eai kud i Galilaya ebino de i kieu Yahudi ma loka Yordan: 2e udul dhanu ma dit gilubo ng’eye; man ekeyo kumgi keca.
3Jufarisayo de gibino i bang’e, gimulo ie, giwacu kumae, Cik uyio ni ng’atu moko ya eriem cege kum lembe ceke? 4#Tha 1:27; 5:2Man eloko lembe ewacu kumae, Wusomo ngo, nia ng’atu m’ucwiogi ku kwong’a ecwiogi ni nico ku nyaku, 5#Tha 2:24man ewacu kumae, Kum lembe nini nico biweko won ku min, man ebibedo ndhu ku cege; gin ario de gibidoko ni kum aceli? 6Kum kumeno gibibedo ario kendo ngo, ento ndhu kum acel. Ka kumeno gin ma Mungu ribo karacelo, dong’ dhanu kud upok kindgi. 7#Poi 24:1-4; Mt 5:31Giwacu ire kumae, Ka ke yang’ Musa ng’olo ya jumi waraga ma juwodho ko mon mir ang’o, jukethe cen de? 8Ewacu igi kumae, Musa yio wuwodh mon mu ni kum nwang’ cwinywu: ento ugambre ku kwong’a ebedo kumeno ngo. 9#Mt 5:32; 1 Kor 7:10, 11Man awacu iwu kumae, Ng’atu ma tek biwodho cege, ma ku pi tarwang’ ungo, eporo mange de nwang’u egiero gier: man ke ng’atu m’upore ma nwang’u juwodhe de nwang’u egiero gier. 10Julubne giwacu ire kumae, Tek lembe pa nico bedo kumeno giku cege, nwang’u gambri kulokane mbe. 11Ento eloko igi lembe kumae, Dhanu ceke copo jolo lembe maeni ngo, ento ju m’emire igi re. 12Kum jumugumba nuti, ma meggi nyolo kogi anyola: jumugumba nuti de, ma dhanu dwokogi en ni jumugumba: jumugumba nuti de, ma gidwokri gigi ni jumugumba kum ker m’i polo. Ng’atu ma lembe nini jole ire, wek ejole.
Yesu Mio Mugisa wi Nyithindho
(Mk 10:13-16; Lk 18:15-17)
13Julund jukelo nyithindho ma thindho i bang’e, kara eketh cinge i kumgi, erwo de: man julub gikwerogi. 14Ento Yesu wacu kumae, Wuwek nyithindho ma thindho, kud wukwergi, ku bino i bang’a: kum ker m’i polo en e mi ju ma wagi kumeno. 15Eketho cinge de i kumgi, e eai kakeca.
Jabim ma Jalawobi ma Jalonyo
(Mk 10:17-31; Lk 18:18-30)
16Man nen, ng’atu acel ubino i bang’e man ewacu kumae, Japonji, gin ma ber ang’o m’abitimo, kara abed ku kwo ma rondo ku rondo? 17Man ewacu ire kumae, Nedi ipenja pi maeno ma beri? Ng’atu acel nuti ma en e ber: ento tek iyenyo imond i kwo, wor cik. 18#Ai 20:13; Poi 5:17; Ai 20:14; Poi 5:18; Ai 20:15; Poi 5:19; Ai 20:16; Poi 5:20Ewacu ire kumae, Manedi ke? Yesu wacu kumae, Kud ineg nek, Kud igier gier, Kud ikwal kwo, Kud inyuth lembe mi ndra, 19#Ai 20:12; Poi 5:16; Law 19:18Yung wuru ku meru, man, Imar wedu calu imeri giri. 20Jalawobi wacu ire kumae, Gin maeni ceke adaru woro: edong’ ang’o ke ma fodi urem ira? 21Yesu wacu ire kumae, Tek iyenyo ibed ndhu cu, cidhi, ilok maeno m’ibedo ko, imi ni jucan de, man ibibedo ku piny m’akana i polo: ibin de, ilub ng’eya. 22Ento ka jalawobi winjo lembene, eai ma can umake; kum en e ng’atu ma won piny ma dit.
23Yesu wacu ni julubne kumae, Andha awacu iwu kumae, Mondo i ker m’i polo tek ni jalonyo. 24Man kendo awacu iwu kumae, Kadhu ku wang’ sindani yot ni ngamia, ma sagu mondo i ker pa Mungu ni jalonyo. 25E ka julub giwinjo maeni, igi wang’ lii apila, giwacu kumae, Ka kumeno ng’a ma copo bothi? 26Yesu neno bang’gi ewacu igi kumae, Maeni copre ngo ku dhanu; ento gin ceke copre ku Mungu. 27Petro lund uloko lembe man ewacu ire kumae, Nen, waweko gin ceke, man walubo ng’ei: ka kumeno wabibedo ku girang’o? 28#Mt 25:31; Lk 22:30E Yesu wacu igi kumae, Andha awacu iwu, Nia wun ma wulubo ng’eya, i nyol ma nyen ka Wod dhanu bijany wi komker mi dwong’ pare, wun bende wubijany wi komker apar wi ario, ma wupoko ko lembe ni suru apar wi ario mir Israel. 29Man ku ba dhanu nzu m’uweko udi, kadi umego, kadi nyimego, kadi wego, kadi mego, kadi nyithindho, kadi ng’om pi nyinga, ebinwang’u acel bang’ dak man ebicamu pacu mi kwo ma rondo ku rondo. 30#Mt 20:16; Lk 13:30Ento dhanu dupa ma ma kwong’a bidong’ cen; man m’udong’ cen bibedo ma kwong’a.
Currently Selected:
Matayo 19: AB1970
Highlight
Share
Copy
Want to have your highlights saved across all your devices? Sign up or sign in
The Holy Bible In Alur (Lur), Revised Orthography © United Bible Societies, 1970.