Matayo 17
17
Kit Yesu Lokre
(Mk 9:2-13; Lk 9:28-36)
1Man yo ng’ei ceng’ abusiel Yesu gamu Petro, giku Yakobo, man Yohana m’umin mire; man eterogi malu ka nge wi got ma wiu: 2e kite lokre i wang’gi; wang’e de rieny pami ceng’, kendi pare de doko tar calu der. 3Man nen, Musa gikud Elia giwok i bang’gi gibeweco gikugi. 4Petro de loko lembe, ewacu ni Yesu kumae, Rwoth, en e ber iwa kum wani keni: tek iyenyo, abigomo odbak adek keni; acel iri, acel ni Musa, acel ke ni Elia. 5#Tha 22:2; Zab 2:7; Isa 42:1; Mt 3:17; 12:18; Mk 1:11; Lk 3:22; Poi 18:15#2 Pet 1:17, 18Kinde m’ebeweco, nen, afuru m’urieny uketho tipo i wigi: man nen, dwal uwacu ku i afuru kumae, Meni Woda ma jamerna, ma anyong’a nega i kume; wuwinje. 6Ka julubne giwinjo maeni, gipodho arieba wang’gi, lworo de makugi dit. 7E Yesu bino emulo kumgi de man ewacu kumae, Wuai malu, lworo kud unegwu. 8E ka ging’ayu wang’gi malu, gineno ng’atu moko ngo, ndhu Yesu kende.
9E ka gibeloro piny ku wi got, Yesu ng’olo igi, ewacu kumae, Kud wuyer pi ginmawokiwang’ ni ng’atu moko, ma fodi Wod dhanu kucer ungo ku kind ju m’utho. 10#Mal 4:5Julubne de gipenje kumae, Ka kumeno jugorcik giwacu nedi nia Elia bikolarbino be? 11Man eloko lembe ewacu kumae, Elia bino andha, man ebidwoko gin ceke: 12#Mt 11:14ento awacu iwu, nia Elia daru bino, endre ging’eye ngo, ento gitimo gin ceke ma giyenyo i kume. Wod dhanu bende bisendre igi kumeca. 13Julubne gilund ging’eyo nia eyero igi pi Yohana ma Jabaputisi.
Yesu Wodho Pajogi kud i Nyathin
(Mk 9:14-29; Lk 9:37-43)
14Man ka giwok bang’ udul dhanu, e ng’atu moko bino i bang’e, erum ire, ewacu kumae, 15Rwoth, bed ku kisa kum woda: kum en e won thimbu, man ebesendre dit; kum wang’ udul epodho i mac, man wang’ udul i pi. 16E akele ba julubni, man gicopo keyo kume ngo. 17Yesu loko lembe ewacu kumae, E dhanum’utuk m’umbe yic ma juco bende, wabibedo wakudu rokani? abisendra kudu rokani? kele i bang’a ku. 18Man Yesu juke; pajogi de ai woko kud i ie: e nyiruno kume kei i saa nica.
19Julubne gilund gibino ba Yesu ka nge, giwacu kumae, Ewodhre woko iwa ngo nedi? 20#Mt 21:21; Mk 11:23; 1 Kor 13:2Man ewacu igi kumae, Kum yioyic mu bedo nok: kum awacu iwu andha kumae, Tek wubedo ku yioyic ma ro ku nying atingli, wubiwacu ni got maeni kumae, Ai kakeni ci kuca; e ebiai: gin moko mbe de ma bicopre iwu ngo. 21Ento wagi maeni ai ungo ndhu ku rwo ku weko cam de.
Yesu Nyutho pi Tho Pare Kendo
(Mk 9:30-32; Lk 9:43-45)
22E kinde ma gibedo i Galilaya Yesu wacu igi kumae, Jubimio Wod dhanu i cing’ dhanu: 23e gibinege, man i ceng’ mir adege ebicer. E can ma dit apila makugi.
Jumio Ajok
24 #
Ai 30:13; 38:26 E ka giwok Kapernaum, ju ma gamu ng’et sente gibino ba Petro, giwacu kumae, Japonji peri mio ng’et sente ngo? 25Ewacu kumae, Eyo. E kan ebino i ot, Yesu kwong’o yero ire, ewacu kumae, Ii bepido nik ang’o, Simoni? ju m’ubimo m’i ng’om gigamu jambng’om kadi ajok de ba ng’a? ba wotgi, kadi bang’ umondo? 26Kan ewacu ire kumae, Bang’ umondo, Yesu wacu ire kumae, Ka kumeno wot gibedo agonya. 27Ento kara ku waketh gikier, cidh i nam, ibol gol de, man ijak rec m’ular uwok; kan iyabu dhoge de, ibinwang’u sente; iting’ maeno, imi igi kakara wakudi de.
Currently Selected:
Matayo 17: AB1970
Highlight
Share
Copy
Want to have your highlights saved across all your devices? Sign up or sign in
The Holy Bible In Alur (Lur), Revised Orthography © United Bible Societies, 1970.