MATIU 3
3
Na pa-bobarungu-na i Yuhani Pa-runungu
(Mrk. 1:1-8; Luk. 3:1-18; Yuhn. 1:19-28)
1La rehi nu tàka-nanyaka i Yuhani Pa-runungu, la maràda telangu la Yundia hi na-pakiringu pa-pabobarungu, 2“Kapata beliya na lurimi, nadu i Ala ba lu nàmunya-ka pa-pareta ba Hanganji-ya!” wàna. 3Yiana i Yuhani jia-yaka na palana i Wunangu Yahaya la paniina,
“Ninya na tau mawa - wara la maràda wara,
‘Rima-nyawa àndana i Miri; pa-linjaku-nya ngia palina Nyuna!’ ” ba wàna.
4I Yuhani napaki wulu ota. Na boruna manulangu, tàka pangana kabala dàngu manggaluangu omangu. 5Dangu tau welingu la Yeruhali, dàngu welingu la nggubulu tana Yundia dàngu welingu la ngaba winggiru Luku Yorundangu damai lai Yuhani. 6Dapeka-ha da njalada, tàka i Yuhani hi na-parunu-nja la Luku Yorundangu.
7Dangumbu tau Parihi dàngu Handuki mamai lai Yuhani ka parunu-nja. Tàka ba naita-haka ba damai, panii dàna-njaka, “Nyimi tau akatu-kai! Nggamu mapeka-nggai nyimi ba peku marami welingu la hukungu-na i Ala na manàmu-nya? 8Pa-itangu bàdi wàngu pawunda-mi nyimi ba dunjaku-minjaka da njalami. 9Àmbi kaka-duya nyimi ba peku luhumi welingu la hukungu bai panii nyuma boku la mangilu-manya i Ambarahàmu ba wàmi. Kanandi-nya, jiapa ka yiada-kadu da watu, i Ala peku-mbuna ba natuha umbuku-na i Ambarahàmu! 10Na kataka ninya-padua-ka la papunggu-ya na pingina na ai lundu la amu - amuna. Da pingi ai - pingi ai da manda tu wuada napa papunggu-ha hi ndauha-ha la epi. 11Nyungga ku-parunu wànggai wai tandana nyimi ba dunjaku-minjaka da njalami; tàka napa na manàmu-nya ba taliu-nggu nyungga, nyuna duna na ma-parunu wànggai Ngahuna i Ala dàngu epi. Nyuna nabokulu-mapa duna welingu lai nyungga. La payiutu-nya halapa-ana nyungga yia nda ràka-mbuna. 12La limana ninya na tàpi hi natàpi hàlaya na uhu nggàndumu hi lundu na-yarahu. Na uhu nggàndumu na-pauhi-nya hi natuya la dàndaku, tàka na kalàmba-na mbuu ndàbana natunu-ya la epi panda peku pàda.”
I Miri Yehu ba parunu-nya
(Mrk. 1:9-11; Luk. 3:21-22)
13La rehi nu i Yehu lua-nanyaka la Luku Yorundangu welingu la Nggalilia. Lai nu mai-nanyaka lai Yuhani hi nakarai pa-runungu. 14Na-kamangu làti i Yuhani patipa-ya na pakarai-na. Napanii i Yuhani, “Nyungga bàdi ràka pa-parunu-mu. Tàka ni nyumui mamai lai nyungga,” wànanya.
15Tàka napaya i Yehu, “Màla bia duna la rehi nàhu. Ba tunda nu padeni ndàba-ndanya na pambuha-na i Ala,” wàna. Jia i Yuhani hi na-parunu-nya i Yehu.
16Hàla parunu, i Yehu hi nadita pa-renggangu welingu la wai luku nuna. Hi jia tabunggahu biana na awangu, tàka i Yehu hi naita-ya na Ngahuna i Ala ba napuru hama tuna kulundiha-ya la tiduna. 17Tunaka nu rongu-nanyaka na liina i Ala, “Yiana jia-yaka na Ana pambuha-nggu. Nyuna na mali hàmuya na etinggu,” na mawàna.
Currently Selected:
MATIU 3: KAM
Highlight
Share
Copy
Want to have your highlights saved across all your devices? Sign up or sign in
@LAI 1995 Indonesian Bible Society (Lembaga Alkitab Indonesia)