Mateo 3
3
Bautizaq Juan willakunqan
Marcos 1.1-8; Lucas 3.1-9, 15-17; Juan 1.19-28
1Tsay watakunam Judea provincia desiertuchö Bautizaq Juan willakur 2nirqan: <<¡Tayta Diospa mandakuynin chämushqanam! ¡Jutsa rurayta dëjaskir Tayta Dios munanqannöna kawayay!>>#Mat. 4.17; Mar. 1.15.
3Tsaynö willakunanpämi profëta Isaías qellqanqanchö nin:
<<Juk runam desiertuchö qayaraypa willakur nin:
<Tayta Dios shamunanpä nänita allitsayay.
Wiksu nänikunata derechayay> >>.#Isa. 40.3.
4Juanpa röpanqa camëllupa aqtsanpita awashqam karqan. Wachukunpis camëllupa qaranpita rurashqam karqan.#2Rey. 1.8. Mikuyninpis chukllushkuna y abëjapa mishkinmi karqan.
5Juan willakunqanta wiyayänanpämi Jerusalénpita, Judeapita y Jordán mayu kinran markakunapita runakuna aywayarqan. 6Tayta Diosta perdonta mañakuyaptinmi Jordán mayuchö tsay runakunata Juan bautizarqan.
7Tsayman atskaq fariseukuna y saduceukuna bautizakuq chäyanqanta rikarmi Juan nirqan: <<¡Culebra casta runakuna!#Mat. 12.34; 23.33. ¡Pitä qamkunata niyäshurquyki Tayta Diospa castïgunpita qeshpiyänaykipä kanqanta! 8Jutsaykikunata rasunpa dëjashqa karqa Tayta Dios munanqannöna kawayay. 9Ama yarpäyaytsu Abrahampa castan kayanqaykipita#Juan 8.33. Tayta Dios salvayäshunaykipä kanqanta. Noqam nï: Tayta Dios munarqa kay rumikunatapis Abrahampa castanmanmi tikratsinman. 10Mana wayuq jachakunata matsunpita mutuskir ninaman jitaqnömi jutsa ruraqkunata castigananpä Tayta Dios alistakushqana kaykan.#Mat. 7.19.
11<<Jutsa rurayta dëjar Tayta Dios munanqannö kawayänaykipämi yakuwan bautizä. Peru qepäta shamuq kaqmi sïqa Espíritu Santuwan y ninawan bautizayäshunki. Noqapita mas poderyuq kaptinmi llanqinta apanalläpäpis välïtsu. 12Trïguta wayrananpä jurquitan aptashqanam kaykan. Wayraskirnam trïguta wayinman churanqa. Päjantanam imaypis mana upiq ninaman qaykunqa>>.
Jesústa Juan bautizanqan
Marcos 1.9-11; Lucas 3.21-22
13Juan bautizananpämi Jesúspis Galileapita Jordán mayuman aywarqan. 14Chaykuptinnam bautizayta mana munar Juan nirqan: <<Taytay, manam qamta bautizämantsu, sinöqa noqatam bautizamankiman>>.
15Jesúsnam nirqan: <<Imanö kaptinpis bautizamay. Bautizamänaykitam Tayta Dios munan>>.
Tsaynö niptinmi bautizarqan. 16Bautizakuskir yakupita yarqaykämuptinmi ciëlu kichakarqan. Tsaychömi Jesús rikarqan Espíritu Santu imayka palumanö jananman uraykämuqta. 17Tsaynöllam ciëlupita Tayta Dios nimurqan: <<Payqa kuyay tsurïmi. Paypitam kushikü>>.#Sal. 2.7; Mat. 17.5; Mar. 1.11; Luc. 9.35.
Currently Selected:
Mateo 3: qxo
Highlight
Share
Copy
Want to have your highlights saved across all your devices? Sign up or sign in
© 2002, 2008, Wycliffe Bible Translators, Inc. All rights reserved.