Mateo 4
4
Jesústa Satanás tentayta munanqan
Marcos 1.12-13; Lucas 4.1-13
1Tsaypitanam diablu tentananpä Espíritu Santu desiertuman Jesústa pusharqan.#Heb. 2.18; 4.15. 2Tsaychö chusku chunka (40) junaq y chusku chunka paqas ayunaskirnam Jesús wanunayparä mallaqaskirqan. 3Tsaymi diablu chaykur nirqan: <<Diospa Tsurin karqa mä kay rumikunata tantaman tikratsiy>>.
4Jesúsnam nirqan: <<Tayta Diospa palabranmi nin: <Manam tantata mikullartsu runa kawan, sinöqa Tayta Dios llapan ninqankunata cäsurmi kawan> >>.#Deut. 8.3.
5Tsaypitanam sagrädu Jerusalén markaman Jesústa diablu pusharqan. Tsaychönam templupa mas altunninman ichiykatsir 6nirqan: <<Diospa Tsurin karqa mä kaypita jeqarpuy. Diospa palabranmi nin: <Angelninkunatam Tayta Dios mandamunqa cuidayäshunaykipä. Paykunam tsariyäshunki chakillaykitapis rumikunachö mana takakunaykipä> >>.#Sal. 91.11-12.
7Jesúsnam nirqan: <<Tsaynöllam Tayta Diospa palabranchö nin: <Tayta Diosta ama tentankitsu> >>.#Deut. 6.16.
8Tsaypitanam altunnin jirkaman diablu pushaykur maytsay nacionkunata riquëzankunatawan rikatsir 9nirqan: <<Qonquriykur adoramaptikiqa llapan rikanqaykitam qarashayki>>.
10Jesúsnam nirqan: <<¡Kaypita witiy, Satanás! Tayta Diospa palabranmi nin: <Tayta Diosllatam adorayanki. Pay japallantam sirviyanki> >>.#Deut. 6.13.
11Tsaynö niptinmi diablu aywakurqan. Tsaypitanam angelkuna chaykur Jesústa yanapayarqan.
Galileachö willakur Jesús qallanqan
Marcos 1.14-15; Lucas 4.14-15
12Carcelchö Juan wichqaraykanqanta musyaskirmi#Mat. 14.3; Mar. 6.17; Luc. 3.19-20. Galileaman Jesús kutirqan. 13Nazaret markachö täränanpa rantinqa Capernaúm markachö täränanpämi aywarqan. Tsay markaqa karqan Galilea qocha kuchunchö y Zabulón y Neftalí trïbu runakuna täyanqan kaqchömi. 14Capernaúmchö Jesús tärarmi profëta Isaías willakunqanta cumplirqan. Tsay willakunqanchömi nin:
15<<Zabulón trïbu y Neftalí trïbu runakuna,
qamkuna täyanqaykipam lamar kuchunpa y Jordán mayu wak tsimpanpa näni päsaykan.
Mana Israel runakunapis qamkuna täyanqaykichö atskaqmi täyan.
16Tsakäpakushqanö kawarpis atsikyayta rikaqnömi salvashuqnikita rikayanki.
Tsakaychönö kawayaptikipis salvashuqnikiqa aktsinömi kanqa>>.#Isa. 9.1-2.
17Capernaúmchö tärarmi willakuyta qallaykur Jesús nirqan: <<¡Tayta Diospa mandakuynin chämushqanam! ¡Jutsaykikunata dëjaskir Tayta Dios munanqannöna kawayay!>>#Mat. 3.2.
Discïpulun kayänanpä pescädu tsariqkunata Jesús qayanqan
Marcos 1.16-20; Lucas 5.1-11
18Galilea qocha kuchunpa aywaykanqanchömi ishkaq runakunata Jesús rikarqan. Pescädu tsariq karmi mällanta yakuman jitaykäyarqan. Paykunam kayarqan Simón y wawqin Andrés. Simónpa jukaq jutinmi karqan Pedro. 19Paykunatam Jesús nirqan: <<Qatiyämay. Noqam yachatsishayki runakunata pescayänaykipä>>.
20Tsaynö niptinmi mällankunata dëjaskir Jesúswan aywayarqan.
21Tsaypita päsaskirnam Santiaguta y wawqin Juanta rikarqan. Paykunaqa papänin Zebedeuwanmi büquinchö mällankunata allitsaykäyarqan. Paykunapis Jesús qayaptinmi 22papäninta y büquita jaqiskir jinan höra aywayarqan.
Qeshyaqkunata Jesús allïtsinqan
Lucas 6.17-19
23Entëru Galileapa Jesús purirmi Tayta Diospa mandakuyninpa alli willakuyninta sinagögakunachö yachatsirqan y tukuy niraq qeshyawan qeshyaqkunata allïtsirqan.#Mat. 9.35; Mar. 1.39. 24Tsaytam Siria nación markakunachöpis musyayarqan. Tsaymi paykunapis Jesús kaqman apayarqan tukuy niraq qeshyawan qeshyaqkunata, supay ñakatsinqan runakunata, wanuy qeshyawan ñakaqkunata y paralïticukunatapis. Tsay llapan qeshyaqkunatam Jesús allïtsirqan.
25Atskaqmi Jesústa qatiräyarqan. Tsay runakunam kayarqan Galileapita, Decápolispita, Jerusalénpita, Judeapita y Jordán mayu wak tsimpanpitapis.
Currently Selected:
Mateo 4: qxo
Highlight
Share
Copy
Want to have your highlights saved across all your devices? Sign up or sign in
© 2002, 2008, Wycliffe Bible Translators, Inc. All rights reserved.