Lucas 8
8
Jesústa yanapaq warmikuna
1Tsaypitanam chunka ishkay discïpulunkunawan marka marka Jesús purir Tayta Diospa mandakuyninpa alli willakuyninta willakurqan. 2Paykunawanmi aywayarqan supaypa poderninpita jipinqan warmikuna y qeshyankunapita allïtsinqan warmikuna. Tsaynömi aywarqan Magdalena niyanqan María. Paypitam qanchis supaykunata Jesús qarqurqan. 3Tsaynöllam aywayarqan Herodespa yanapaqnin Chuzapa warmin Juana, Susana y wakin warmikuna. Paykunam Jesústa y discïpulunkunata imaykankunallawanpis yanapayarqan.
Diospa willakuyninta muruman Jesús iwalatsinqan
Mateo 13.1-9; Marcos 4.1-9
4Maytsay markakunapita atskaq runakuna qorikäyaptinmi Jesús yachatsir nirqan: 5<<Juk runash trïgu muruq aywanä. Muruta mashtaptinshi näniman wakin chänä. Tsayshi runakuna jaruyänä y pishqukunapis upshaskiyänä. 6Wakin murunash shaqaman chänä. Tsaychö jeqamurpis allpa mana kaptinshi tsakiskinä. 7Wakin murush kashakuna rurinman chänä. Jeqamurpis kashakuna ñitiptinshi qarwashtaykällar ushakänä. 8Wakin murunash alli allpaman chänä. Tsaykunaqa jeqaskamurshi cada espïgachö pachak (100) trïguta wayunä>>.
Tsaynö yachaskatsirmi jinchipa Jesús nirqan: <<¡Rinriyuq kaqkunaqa ninqäkunata wiyakuyätsun!>>
Iwalatsiypa imanir Jesús yachatsikunqan
Mateo 13.10-15; Marcos 4.10-12
9Tsaynam discïpulunkuna Jesústa tapuyarqan: <<Taytay, ¿ima ninantä tsay iwalatsikuypa yachatsikunqayki?>>
10Jesúsnam nirqan: <<Qamkunataqa Tayta Diospa mandakuynin imanö kanqantapis shumaqmi tantiyatsiyäshayki. Peru wakinkunatam sïqa imamanpis iwalatsiypa willä. Tsaymi rikarpis cuentata qokuyantsu y wiyaykarpis tantiyayantsu>>.#Isa. 6.9-10.
Muruman iwalatsinqanta Jesús tantiyatsinqan
Mateo 13.18-23; Marcos 4.13-20
11<<Iwalatsiypa yachatsinqäta kanan tantiyatsiyäshayki. Muruqa Tayta Diospa willakuyninmi.
12<<Wakin runakunaqa chukru näninömi kayan. Tayta Diospa willakuyninta wiyayaptinpis diablu shamurmi wiyayanqallantapis qonqaskatsin. Tsaymi mana criyir salvacionta tariyantsu.
13<<Wakin runakunaqa shaqa chakranömi kayan. Tsaymi Tayta Diospa willakuyninta wiyar kushishqa chaskirpis matsükuyta mana puëdiq jachanö kar desgraciakuna päsaptin criyikuyninta jaqiskiyan.
14<<Wakin runakunaqa kasha chakranömi kayan. Paykunaqa Tayta Diospa willakuyninta wiyarpis yarpachakuyan waray warantinkuna imanöpis kawayänanpä, imaykayuqpis kayänanpä y kikinkuna munayanqannö kawayänanpä. Tsaynö karmi mana wayuq trïgunö kayan.
15<<Peru wakin runakunam sïqa alli allpanö kayan. Tsaymi Tayta Diospa willakuyninta llapan shonqunwan cäsur Tayta Dios munanqannö kawayan. Alli allpachö muru wiñamur alli wayunqannömi imaypis kawayan>>.
Willakuyninta aktsiman Jesús iwalatsinqan
Marcos 4.21-25
16<<Manam pipis aktsita tsariskatsir manka rurinman ni catri jawanman churantsu, sinöqa wayiman yaykuqkuna rikayänanpämi alayriman churan.#Mat. 5.15; Mar. 4.21. 17Tsaynömi yachatsinqäkuna kanan pakaraykaqnö karpis musyakanqa. Kanan mana tantiyakarpis waraykunaqa tantiyakanqam.#Mar. 4.22. 18Tsaynö kaykaptinqa shumaq wiyayämay. Yachatsinqäta cäsukuqkunaqa masmi tantiyayanqa. Peru mana cäsukuqkunam sïqa ichik tantiyayanqallantapis qonqaskiyanqa>>.#Mat. 13.12; 25.29; Mar. 4.25.
Jesúspa maman y wawqinkuna pï kayanqanpis
Mateo 12.46-50; Marcos 3.31-35
19Tsaypitanam Jesúspa maman y wawqinkuna chäyarqan Jesús kaykanqan wayiman. Peru atska runakuna kayaptinmi yaykuyta puëdiyarqantsu. 20Tsaymi Jesústa juk runa willarqan: <<Mamaykiwan wawqikikunam waqtachö shuyaykäyäshunki>>.
21Jesúsnam nirqan: <<Pipis Tayta Diospa willakuyninta wiyar cäsuq kaqmi mamä y wawqïkuna kayan>>.
Vientuwan qocha laqchikachaqta Jesús päratsinqan
Mateo 8.23-27; Marcos 4.35-41
22Juk junaqmi discïpulunkunawan büquiman yarkurkur Jesús nirqan: <<Wak tsimpaman päsashun>>.
Niptinmi büquiwan aywayarqan. 23Qochata tsimpaykaptinmi Jesús punukaskirqan. Tsayyaqmi pasaypa vientuwan yaku laqchikachar büquita jundikätsinanpäna kaykarqan. 24Tsaynam Jesústa rikchatsir niyarqan: <<¡Rabí, rabí! ¡Jundikaykantsiknam!>>
Jesús rikchaskirnam vientutawan yakuta ollqutuparqan. Ollqutupaskiptinmi vientuwan yakupis päraskirqan. 25Discïpulunkunatanam nirqan: <<¿Imanirtä yärakuynikikuna kantsu?>>
Tsaymi kikinkunapura mantsakashqa ninakuyarqan: <<Yakupis vientupis tsaynö cäsunanpäqa ¡pinatä kay runaqa!>>
Supaykuna löcuyätsiyanqan runata Jesús allïtsinqan
Mateo 8.28-34; Marcos 5.1-20
26Tsaypitanam Gerasa#8.26 Wakin griego copiakunachömi Gadara nin. Wakinnam Gergesa niyan. niyanqan partiman chäyarqan. Tsayqa kaykan Galileapa wak tsimpanchömi. 27Büquipita Jesús yarpuskiptinnam supaykuna löcuyätsinqan runa shamurqan. Tsay runaqa unaypitam qallapächulla puriq. Wayichöpis manam tarqantsu, sinöqa panteonllachömi täkurqan. 28Jesústa rikaykurmi pasaypa qayarar puntanman lätaykur jinchipa nirqan: <<¡Poderösu Diospa Tsurin Jesús! ¡Imatatä noqawan munanki! ¡Ama ñakatsillämaytsu!>>
29(Tsaynö supay nirqan runapita yarqunanpä Jesús nishqa kaptinmi. Tsay runataqa atska kutim munanqanta supay ruratsirqan. Tsaymi makinta chakinta cadënawan watayaptinpis rachiskir tsunyaq jirkakunapa aywakuq.)
30Tsaypitanam Jesús tapurqan: <<¿Imatä jutiki?>>
Paynam nirqan: <<Legión>>.#8.30 Legión ninanqa atska waranqa ninanmi.
(Tsaynö nirqan atska supaykuna payman yaykushqa kayaptinmi.)
31Tsay supaykunam Jesústa kutin kutin rugakuyarqan pasaypa tsakayman mana qarpunanpä. 32Washalänin jirkanchömi atska kuchikunata mitsiykäyarqan. Tsaymi supaykuna Jesústa rugakuyarqan kuchikunaman yaykuyänanpä. Rugakuyanqanta Jesús awniptinmi 33supaykuna runapita yarquskir tsay kuchikunaman yaykuyarqan. Tsaymi kuchikuna löcuyar tunapa cörrir qochaman jeqarpuyarqan. Tsaychömi shenqaypa wanuyarqan.
34Tsayta rikaykurmi kuchi mitsiqkuna cörrilla aywar markachö täraq y cercanchö täraq runakunata willayarqan. 35Willakuyaptinnam runakuna ima päsanqantapis rikayänanpä aywayarqan. Jesús kaykanqanman chaykurnam supay löcuyätsinqan runata tariyarqan röpan jatishqa y juiciunchöna Jesúspa puntanchö jamaraykaqta. Tsayta rikaykurmi pasaypa mantsariyarqan.
36Jesús allïtsinqanta rikaqkunanam tsayman chaqkunata willayarqan imanöpa allïtsinqantapis. 37Tsaymi tsay partichö täraq runakuna pasaypa mantsariywan Jesústa rugayarqan tsaypita aywakunanpä. Tsaynö rugayaptinmi büquiman yarkuskir discïpulunkunawan Jesús aywakurqan.
38Manarä aywakuyaptinmi allïtsinqan runa Jesústa rugarqan paywan aywakunanpä. Peru Jesúsnam nirqan: 39<<Wayikipa kutir Tayta Dios allïtsishunqaykita willakuy>>.
Tsaynam aywar Jesús allïtsinqanta pïmaytapis willarqan.
Jairupa tsurinta kawatsinqan y warmita allïtsinqan
Mateo 9.18-26; Marcos 5.21-43
40Qocha wak tsimpanman Jesús kutiptinmi shuyaraykaq atskaq runakuna kushishqa chaskiyarqan. 41Tsaymanmi sinagögachö mandakuq Jairo jutiyuq runa charqan. Paymi Jesúspa puntanman qonquriykur rugarqan wamranta allïtsiq wayinman aywananpä. 42Tsay wamranqa chunka ishkay watayuqnö jukllaylla warmi tsurinmi karqan. Paymi pasaypa antsa qeshyar wanuykarqanna.
Jairupa wayinman Jesús aywaptinmi atskaq runakuna kichkiyparä qatiyarqan. 43Tsay runakunawanmi chunka ishkay watana yawar apaywan qeshyaq warmipis aywarqan. [Jampikunanpämi imaykantapis rantikur usharqan. Peru] manam ni pï jampiptinpis allirqantsu. 44Tsay warmi Jesúspa qepallanpa witiykur röpanpa kuchunta yataykuptinmi jinan höra yawar apaynin alliskirqan. 45Jesúsnam nirqan: <<¿Pitä yatamashqa?>>
Niptinmi llapanpis niyarqan: <<Manam yatayarqütsu>>.
Tsaymi Pedro nirqan: <<Taytay, kayläya kichkim aywaykantsik. [¿Imanöpatä musyayäman mayqan yatashunqaykitapis?]>>
46Peru Jesúsnam nirqan: <<Pï karpis yatamashqam. Podernï yarquqtam tantiyarqü>>.
47Yatanqanta tantiyaptinmi tsay warmi mantsariywan tsuktsukyarrä Jesúspa puntanman qonqurikuykurqan. Tsaypitam imanir yatanqanta y jinan höra allinqanta llapan runakunapa puntanchö willarqan. 48Jesúsnam nirqan: <<Hïja, yärakamunqaykipitam allirquyki. Kananqa kushishqana aywakuy>>.
49Jesús tsaynö parlaykaptinmi Jairupa wayinpita willakuq chaykur nirqan: <<Taytay, tsurikiqa wanushqanam. Amana Jesústa pushaynatsu>>.
50Tsaynö niqta wiyaykurmi Jesús nirqan: <<Ama llakikuytsu. Tayta Diosman yärakuy. Tsurikiqa kawamunqam>>.
51Wayiman chaykurmi Pedruta, Juanta, Santiaguta y Jairutapis warmintinta Jesús yaykutsirqan. Wakinkuna yaykuyänantaqa manam munarqantsu. 52Wamra wanushqa kaptinmi waqtachö runakuna pasaypa waqayarqan. Tsaymi Jesús nirqan: <<Ama waqayaytsu. Manam wanushqatsu, sinöqa punuykanllam>>.
53Tsaynö niptinmi wamra wanushqa kanqanta musyar Jesústa asipäyarqan. 54Peru Jesúsnam makinpita tsarirkur wamrata nirqan: <<Wamra, shäriy>>.
55Tsaynö niptinmi jinan höra kawaskamur sharkurqan. Jesúsnam nirqan: <<Kay wamrata pachan qarayay>>.
56Wamran kawamunqanta rikaykurmi papäninwan maman pasaypa kushikuyarqan. Peru Jesúsnam nirqan wamra kawamunqanta pitapis mana willakuyänanpä.
Currently Selected:
Lucas 8: qxo
Highlight
Share
Copy
Want to have your highlights saved across all your devices? Sign up or sign in
© 2002, 2008, Wycliffe Bible Translators, Inc. All rights reserved.