Lucas 9
9
Chunka ishkay discïpulunkunata Jesús mandanqan
Mateo 10.5-15; Marcos 6.7-13
1Tsaypitanam chunka ishkay discïpulunkunata qayaykur poderninta Jesús qararqan runakunapita supaykunata qarquyänanpä y qeshyaqkunata allïtsiyänanpä. 2Tsaypitanam paykunata mandarqan Tayta Diospa mandakuynin chämunqanta willakuyänanpä y qeshyaqkunata allïtsiyänanpä. 3Tsaymi nirqan: <<Aywar ama apayankitsu tukruta, alporjata, millkapata, qellayta ni trocakuyänaykipä röpatapis. 4Pipa wayinchö patsakurpis tsay markapita aywakuyanqaykiyaq tsayllachö quëdakuyanki. 5May markachöpis mana chaskiyäshuptikiqa chakikikunachö polvuta tapsikuskir aywakuyanki. Tsaynö rurayanki Tayta Dios paykunata castigananpä kaqta musyayänanpä>>.
6Tsaynö niptinmi discïpulunkuna marka marka aywar Tayta Diospa alli willakuyninta willakuyarqan. Qeshyaykaqkunatapis maytsaychömi allïtsiyarqan.
Jesústa Herodes reqiyta munanqan
Mateo 14.1-12; Marcos 6.14-29
7Jesús ruranqankunata musyaykurmi Galileapa mandaqnin Herodes imanö kaytapis puëdirqantsu. Wakin runakunam Jesúspä niyarqan: <<Bautizaq Juanmi kawamushqa>>.
8Wakinkunam niyarqan: <<Profëta Elíasmi yurimushqa>>.
Y wakinkunanam niyarqan: <<Unay tiempu profëtakunam mayqan karpis kawamushqa>>.
9Herodesnam nirqan: <<Juanpa umanta roquykätsiptïqa ¿pirä kanman tsay runa? ¿Pipätä imaykata ruranqanta wiyä?>>
Tsaynö nirmi Jesústa imanöpapis reqiyta munarqan.
Pitsqa waranqa runakuna mikuyänanpä milagruta Jesús ruranqan
Mateo 14.13-21; Marcos 6.30-44; Juan 6.1-14
10Willakuyanqanpita apostolkuna kutiykurmi llapan rurayanqanta Jesústa willayarqan. Tsaypitanam paykunata pushakurkur Betsaida marka cercanchö tsunyaqman Jesús aywarqan. 11Tsaypa aywayanqanta musyaykurmi atskaq runakuna qepanta aywayarqan. Chaykuyaptinnam Tayta Diospa mandakuyninpita Jesús yachatsirqan y qeshyaqkunatapis allïtsirqan.
12Tardiyaptinnam chunka ishkay discïpulunkuna Jesúsman witiykur niyarqan: <<Runakunata niy tsay uray wayikunapa aywar mikuyninkuna y posädankuna ashiyänanpä. Kay tsunyaqchöqa manam imapis kantsu>>.
13Jesúsnam nirqan: <<Qamkuna mikuyninkuna qarayay>>.
Tsaynö niptinmi niyarqan: <<Pitsqa tantawan ishkay pescädukunallam kaykan. Kaytsika runakunapäqa ¡rantimurrächi aypätsishwan!>>
14Tsaychömi runakuna pitsqa waranqanö (5,000) kayarqan. Jesúsnam discïpulunkunata nirqan: <<Runakunata pitsqa chunkapa jamatsiyay>>.
15Niptinmi llapanta jamatsiyarqan. 16Tsaypitanam pitsqa tantata y ishkay pescäduta aptarkur ciëluman ñukirkur Tayta Diosta Jesús agradëcikurqan. Tantata pakiskirnam discïpulunkunata makyarqan runakunata qarayänanpä. 17Pacha junta mikuskiyaptinnam sobraq kaqkunata chunka ishkay canasta juntata qoriyarqan.
Tayta Dios mandamunqan Cristo kanqanta Pedro ninqan
Mateo 16.13-19; Marcos 8.27-29
18Juk kutinam discïpulunkunawan juntu kaykar Tayta Diosman Jesús mañakurqan. Mañakuyta ushaskirnam discïpulunkunata tapurqan: <<¿Pï kanqätatä runakuna niyan?>>
19Discïpulunkunanam niyarqan: <<Wakinmi niyan Bautizaq Juan kanqaykita. Wakinnam niyan profëta Elías kanqaykita. Y wakinnam niyan mayqan profëtapis kawamushqa kanqaykita>>.
20Jesúsnam tapurqan: <<Qamkunaqa ¿pï kanqätatä yarpäyanki?>>
Pedrunam nirqan: <<Qamqa Tayta Dios mandamunqan Cristum kanki>>.
Wanutsiyänanpä kanqanta Jesús willakunqan
Mateo 16.20-28; Marcos 8.30—9.1
21Peru Jesúsnam pitapis mana willayänanpä discïpulunkunata atikarqan.#9.21 Tsay witsan Israel runakuna yarpäyarqan Cristuta Tayta Dios mandamuptin Roma runakunata guërrachö vincinanpä kanqantam. Tsaynö yarpäyaptinpis Jesucristo manam guërrata rurananpätsu shamurqan, sinöqa noqantsik raykur cruzchö wanunanpämi. Tsaymi discïpulunkunata Jesús nirqan pay Cristo kanqanta pitapis mana willayänanpä. Peru wanunqanpita kawaskamurmi sïqa pïmaytapis willakuyänanpä nirqan (Mat. 17.9; 28.19). 22Tsaypitanam nirqan: <<Runapa Tsurintam pasaypa ñakatsiyanqa. Mayor runakuna, mandaq sacerdötikuna y ley yachatsikuqkunam contran shärir wanutsiyanqa. Tsaypita kimsa junaqtaqa kawamunqam>>.
23Tsaynö nirmi llapan runakunata nirqan: <<Pipis discïpulü kayta munarqa kikin munanqannö ama kawatsuntsu, sinöqa qoyay qoyay cruzninta apaqnö noqata qatimätsun.#9.23 Jesucristo kawanqan witsanqa pipis cruzninta aparqan wanutsishqa kananpämi. Tsaymi cruzninta apaqnö noqata qatimätsun nirqa jutsa ruraypä wanushqanö kar Jesucristuta qatinanpä kanqanta nin.#Mat. 10.38; Mar. 8.34; Luc. 14.27; Juan 12.25. 24Kawayninta salvayta munaqkunaqa kawaynintam oqrayanqa. Kawayninta noqa raykur oqraqkunam sïqa kawayninta salvayanqa.#9.24 Tsaynö nirmi Jesucristo nirqan: <<Kikin munanqannö mana alli kawaqkunaqa manam salvakuyanqatsu. Noqa munanqänö kawaqkunam sïqa salvakuyanqa>>.#Mat. 10.39; Mar. 8.35; Juan 12.25.
25<<Infiernuman qaykushqa kananpä kaptinqa ¿imapätä välin entëru mundupa duëñun kanqanpis? 26Pipis noqapita y willakuynïpita penqakuptinqa Runapa Tsurinpis Tayta Diospa, santu angelkunapa y kikinpa chipipiyninwan shamurmi paypita penqakunqa. 27Rasunpam nï: Manarä wanurmi wakiki Tayta Diospa mandakuyninta rikayanki>>.
Jesús chipipirrä kanqan
Mateo 17.1-8; Marcos 9.2-8
28Tsaypita puwaq junaqtanönam Pedruta, Juanta y Santiaguta pushakurkur Tayta Diosman mañakunanpä juk jirkanman Jesús witsarqan. 29Tayta Diosman Jesús mañakuykaptinmi cäran chipipirqan y röpanpis pasaypa yuraqman tikrarmi empañakuyparä atsikyarqan. 30Tsaychömi Moisés y Elías Jesúswan parlaykäyarqan. 31Pasaypa chipipiykaqchömi Jerusalénchö Jesús wanunanpä kaqta parlaykäyarqan.
32Pedrunam ishkay discïpulu mayinkunawan pununaykäyanqanchö Jesús chipipirrä ishkay runakunawan kaykaqta rikayarqan. 33Moisés y Elías aywakuykäyaptinmi mana cuentata qokur Jesústa Pedro nirqan: <<Taytay, allipämi kaychö kaykäyä. Kimsa tsukllata rurayämushä: jukta qampä, jukta Moiséspä y juktana Elíaspä>>.
34Tsaynö parlaykaptinmi pukutay tsapaskirqan. Tsaymi discïpulukuna pasaypa mantsakäyarqan. 35Pukutaypitanam Tayta Dios nimurqan: <<Paymi akranqä#9.35 Wakin griego copiakunachömi kuyay niyanmi. Tsurï. Pay niyäshunqaykita cäsuyay>>.
36Tsaynö parlar ushaskiptinnam discïpulunkuna Jesúsllatana rikaskiyarqan. Jirkachö rikayanqantaqa manam pitapis tsay witsan willakuyarqantsu.
Juk jövinta Jesús allïtsinqan
Mateo 17.14-21; Marcos 9.14-29
37Waraynin junaqnam jirkapita kutiykäyämuptin atskaq runakuna Jesústa taripäyarqan. 38Tsay runakunapa chawpinpitam juk runa jinchipa nimurqan: <<¡Rabí, kay tsurïta kuyapaykullay! Payqa japallan tsurïmi kaykan. 39Supaymi payta illaqpita qayarätsin, tsuktsukyätsin, poqushaytapis aqtutsin. Mana dëjaypam pasaypa ñakatsin. 40Tsaymi supayta qarquyänanpä discïpuluykikunata rugakuptïpis qarquyta puëdiyashqatsu>>.
41Jesúsnam nirqan: <<¡Yärakuyniynaq jutsasapa runakuna! ¡Imayyaqrä qamkunawan kaykäshä! ¡Imayyaqrä qamkunata awantayäshayki! Mä wamraykita apamuy>>.
42Jesúspa puntanman chaykatsiptinmi wamrata patsaman supay ishkiratsir pasaypa tsuktsukyätsirqan. Peru Jesúsnam supayta ollqutupar nirqan: <<Kay wamrapita yarquy>>.
Tsaypitanam wamrata sänutana papäninta entregarqan. 43Tayta Diospa poderninwan allïtsinqanta rikaykurmi llapanpis kushikuyarqan.
Wanutsiyänanpä kanqanta Jesús yapay willakunqan
Mateo 17.22-23; Marcos 9.30-32
Ruranqankunapita kushikuyaptinmi discïpulunkunata Jesús nirqan: 44<<Kanan ninqäta shumaq wiyayämay. Runapa Tsurintam chikiqninkunaman entreganqa>>.
45Tsaynö willaptinpis discïpulunkuna imata ninqantapis manam tantiyayarqantsu. Peru mana tantiyarpis tapuytam sïqa mantsapäyarqan.
Mayqan mas mandaq kananpäpis discïpulukuna tapuyanqan
Mateo 18.1-5; Marcos 9.33-37
46Tsaypitanam discïpulunkuna mas mandaq kayta munar kikinkunapura rimanakuyarqan. 47Shonqunkunachö imata yarpäyanqantapis musyarmi juk wamrata puntanman ichiykatsir 48Jesús nirqan: <<Pipis kay wamratanö jutïchö chaskirqa noqatam chaskiman. Noqata chaskimarqa mandamaqnïtapis chaskinmi. Qamkunachöpis llänu shonqu kaqmi mas mandaq kanqa>>.
Supayta qarquptin mana michäyänanpä Jesús yätsinqan
Marcos 9.38-40
49Juannam nirqan: <<Taytay, noqakunam rikayarqü juk runa jutikichö supaykunata qarquykaqta. Peru noqantsikwan mana puriptinmi michäyarqü>>.
50Jesúsnam nirqan: <<Ama michäyankitsu. Pipis contrantsik mana karqa favornintsikmi kaykan>>.
Santiaguta y Juanta Jesús ollqutupanqan
51Ciëluman kutinanpä ichikllana faltaykaptinmi mana mantsariypa Jerusalénman Jesús aywarqan. 52Aywaykarnam mandarqan Samaria partichö juk markaman patsakuyänanpä wayi ashiq. 53Peru Jerusalénman aywaykanqanta musyarmi tsay markachö runakuna patsatsiyta munayarqantsu. 54Tsaymi discïpulunkuna Santiago y Juan niyarqan: <<Taytay, ciëlupita nina shamur kay runakunata ushakätsinanpä ¿[Elíasnö] Tayta Diosman mañakuyämanku?>>
55Peru Jesúsnam ollqutupar [nirqan: <<Tsaynö yarparqa manam Tayta Dios munanqannötsu yarpaykäyanki. 56Runapa Tsurinqa manam runakunata ushakätsinanpätsu shamushqa, sinöqa runakunata salvananpämi>>.]
Tsaynö niskirmi juklä markapana aywakuyarqan.
Qatirayta munaqkunata Jesús tantiyatsinqan
Mateo 8.19-22
57Nänipa aywaykäyaptinmi Jesústa juk runa nirqan: <<Taytay, maypa aywaptikipis qatiräshaykim>>.
58Jesúsnam nirqan: <<Atuqkunapapis machayninkuna kanmi. Pishqukunapapis qeshunkuna kanmi. Peru Runapa Tsurinpam sïqa maychö pununallanpäpis kantsu>>.
59Tsaypitanam juk runata nirqan: <<Aku aywashun>>.
Niptinnam nirqan: <<Taytay, qatiränäpä papänïtarä puntata pampaskamushä>>.
60Jesúsnam nirqan: <<Wanushqakunataqa wanushqa mayinkuna pampayätsun. Qamqa aywar Tayta Diospa mandakuyninta willakuy>>.
61Tsaypitanam juk runapis nirqan: <<Taytay, qatishaykim. Peru wayïchö kaqkunatarä willaramushä>>.
62Jesúsnam nirqan: <<Pipis qepapa rikaraykar jaruqnö karqa Tayta Diospa mandakuyninpä manam sirvintsu>>.
Currently Selected:
Lucas 9: qxo
Highlight
Share
Copy
Want to have your highlights saved across all your devices? Sign up or sign in
© 2002, 2008, Wycliffe Bible Translators, Inc. All rights reserved.