ROMA 4
4
I Abraham nakoạ tatěnoěng
1Mageng kerene, apạe ikawerang kitẹ mạanung Abraham, i upung u wanuang kitẹ e? Kereapạ e apang kinahombange? 2Kereu manga hal᷊ẹ̌ apang kinoạe e makariadiwe sarang Mawu Ruata měnarimạ i sie kụ makal᷊uasẹ̌ naungu Ruata, tangu piạbe pinẹ̌buakenge si sie waugu lumesạ. Kaiso i sie tawe makal᷊esạ su těngon Duata. 3#Pěnd. 15:6; Gal. 3:6 Su ral᷊ungu Winohẹ Susi mạbawohẹ, ”I Abraham nangimang su Ruata, dingangu ual᷊ingu pangangimange ini, i sie nitarimạ u Ruata nakoạ taumata makạl᷊uasẹ̌ naung u Ruata.” 4I sain mělẹ̌hal᷊ẹ̌, makạtarimạ gadine; kụ gadine wal᷊inewe irẹ̌dekeng kere sěmbaụ gaghěllị, batụu ene kawe hakẹ̌ e. 5Kutẹu piạbe taumata tawe měngangumbala sutawakal᷊ine hala e, kaiso mạnarakangu watangenge su Ruata kụ seng něliwirẹ̌ taumata warạdosa wọu pẹ̌sasal᷊ane. Sural᷊ungken pangangimange ene e Mawu Ruata manarimạ i sie makoạ sěngkatau makal᷊uasẹ̌ naungu Ruata. 6Kerene lai su sipirang i Daud; hakịu i sie nakapẹ̌berang kariangkamang su taumata kụ kahian Duata e seng nitarimạ kere taumata makạl᷊uasẹ̌ naungʼE, maningbe Mawu Ruata e tawe kumakělla manga kakanoạ u taumata ene. I Daud nẹ̌bera kere ini,
7 #
Mzm. 32:1-2
”Kariangkamang taumata apam pẹ̌sasal᷊ane niampungang
dingangu kal᷊awọu manga rosane niampungang u Mawu Ruata!
8Kariangkamang taumata apan dosan sire tawe tatuntukang u Mawu!”
9Apa pẹ̌kakariangkamang ěndaị tumange kẹ̌tạeng su manga taumata kụ tutuhụ atorangu sunatẹ̌ samatang? Arau kai lai tumange su taumata kụ tawe tumatuhụ atorangu sunatẹ̌ ngae? Seng nisěbạ i kami kal᷊imona, u i Abraham nitarimạ u Ruata kere sěngkatau makạl᷊uasẹ̌ naungʼE, ual᷊ingu i Abraham mạngimang su Ruata. 10Kụ ange wue Mawu Ruata e mělahẹ u hal᷊ẹ̌ ene? Kal᷊imona arau samurin Abraham nipakisunatẹ̌? Těngadẹ̌, těntal᷊ang i sie ren tawe nịsunatẹ̌ bal᷊inewe seng bọu. 11#Pěnd. 17:10 I sie nisunatẹ̌ samuri, kụ sunatẹ̌ ene kětạeng kere tatiala u Mawu Ruata seng nanarimạ i sie kere taumata makạl᷊uasẹ̌ naung u Ruata, ual᷊ingu mạngimang su Mawu Ruata. I sie nitarimạ u Ruata su tempon i sie wẹ̌dang ta tumatuhụ atorangu sunatẹ̌ e. Kụ i Abraham nakoạ amang tuhụ marohkẹ̌ baugu kěbị apan mạngimang su Ruata, dingangu ual᷊ingu ene ute seng nitarimạ u Mawu Ruata kere taumata makạl᷊uasẹ̌ naungʼE maningbe i sire tawe tumatuhụ atorang u sunatẹ̌. 12I Abraham mal᷊aing nakoạ i amang marohkẹ̌ baugu taumata tutuhụ tiahan sunatẹ̌. I sie i amang marohkẹ̌ baugʼi sire wal᷊ine kětạeng ual᷊ingu i sire tutuhụ sunatẹ̌, kaiso kawe lai ual᷊ingu i sire mẹ̌bẹ̌biahẹ̌ dingangu pangangimang su Ruata mẹ̌sul᷊ung i Abraham su tempong i sie wẹ̌dang ta tumatuhụ atorangu sunatẹ̌.
Kẹ̌dong Duata nitarimạ ual᷊ingu mạngimang su Ruata
13 #
Pěnd. 17:4-6, 22:17-18; Gal. 3:29 Mawu Ruata nẹ̌kẹ̌do si Abraham dingangu pal᷊ahitene u dunia ini e sarung mariadi pusakạ i Abraham. Mawu Ruata e nẹ̌kědo kerene bal᷊inewe ual᷊ingu i Abraham matuhụ su toratʼu Yahudi, kaiso kawe ual᷊ingu i sie mạngimang su Ruata hakịu i sie nitarimạ u Ruata kere taumata makạl᷊uasẹ̌ naungʼE. 14#Gal. 3:18 Kai kereu kětạeng ual᷊ingu apan tụtuhụ toratʼu Yahudi samatang makatarimạu apan seng nikẹ̌don Duata, nal᷊ahẹu mangimang su Mawu Ruata e mamben tawẹ kěhase marihutu ringangu pẹ̌kakakẹ̌don Duata e mal᷊aing tawẹ lohone. 15Toratʼu Yahudi e makakạděntang hukumang u Mawu Ruata. Arawe kamageng beng tawẹ toratẹ̌ ute tawẹ apa ral᷊awang.
16 #
Gal. 3:7
Kụ kědon Duata e nẹ̌buạ bọu pangangimang u taumata su Ruata. Ene mariadi sěmbaụ papaiang su patikụ hěnton Abraham u kědo ene nionggọ si sire kere sěmbaụ gaghěllị matagẹ̌ kahian Duata, bal᷊inewe kětạeng si sire apan matuhụ su toratʼu Yahudi kaiso mal᷊aing baugi sire apan měmpangimang su Mawu Ruata mẹ̌sul᷊ung i Abraham mạngimang si Sie. Batụu i Abraham kai i amang i kitẹ kěbị tuhụ marohkẹ̌. 17#Pěnd. 17:5 Batụu Mawu Ruata e něhengetang kere ini si Abraham, ”Iạ seng napakariading kau i amang u kal᷊awọu umatẹ̌.” Kerene Mawu Ruata e něngonggọ kědo ene si Abraham. Kụ i Abraham nangimang si Sie. I Sie kai Ruata kụ mạmiahẹ̌ taumata nate; i Sie kai mal᷊aing Duata kụ kětạeng ual᷊ingu měhengetang seng makariadi apan nạung tala makoạ piạ. 18#Pěnd. 15:5 I Abraham měngkatewe tinalung mělẹ̌harapẹ̌ dingangu mạngimang maning seng lai sal᷊a tạ harape. Ual᷊ingu ene i sie nariadi i Amang u patikụ umatẹ̌. Kerẹe mạbawohẹ su ral᷊ungu Winohẹ Susi: ”Hitenu e sarung mahuntinambang kal᷊awọe.” 19#Pěnd. 17:17 I Abraham su tempo ene masingkạ u i sie seng tawe měhite, watụ u seng tumanịu maghurang dingangu umure seng masandigẹ̌ mahasụ su taunge; kutẹu l᷊ai i Sara kawinge kawe wantọ. Kaiso pangangimang i Abraham tawe manga nělome. 20I sie mang tatapẹ̌ mạngimang dingangu tawe nẹ̌bimbong u kẹ̌don Duata. Kaiso pangangimang sahuneng nahuntinambang katoghase, hakịu i sie měngkate mědẹ̌dalo Ruata. 21I sie mangkewen mangimang u Ruata mapakasěhụʼu apan seng nikědonʼE. 22Hakịewen ene i Abraham nitarimạ u Ruata nakoạ taumata kụ makạl᷊uasẹ̌ naung u Ruata. 23Bawera, ”nitarimạ kere taumata makạl᷊uasẹ̌ naung u Ruata” mạbawohẹ bal᷊ine kětạeng baugi Abraham sẹ̌sane, 24kaiso mal᷊aing baugi kitẹ. I kitẹ mal᷊aing sarung itarimạ makoạ taumata kụ seng makạl᷊uasẹ̌ naung u Ruata, ual᷊ingu i kitẹ mạngimang su Ruata kụ napẹ̌bangung i Yesus, Mawung kitẹ bọu papate. 25#Yes. 53:4-5 I Yesus e seng nisarakang tadeạu pateěng ual᷊ingu kal᷊awọu rosang kitẹ; mase i Sie niapẹ̌bangung kapia kahian Duata mědeạu i kitẹ e mẹ̌sěngkapia saụ dingangu Ruata.
Currently Selected:
ROMA 4: SXN
Highlight
Share
Copy
Want to have your highlights saved across all your devices? Sign up or sign in