MATIUS 16
16
Tau Farisi e měgẹ̌gausu i Yesus apẹ̌kẹ̌koạ tanda makạl᷊aherang
(Mrk. 8:11-13; Luk. 12:54-56)
1 #
Mat. 12:38; Luk. 11:16 Piạko tau Farisi ringangu Saduki pirang katau nahunděnta su anung Yesus měhěbagẹ̌ si Sie. I sire němpẹ̌dorong u i Sie apẹ̌kẹ̌koạko tanda makạl᷊aherang pạnahuntěngadʼu rarěntanʼE kai wọu anun Duata. 2Mawu Yesus simimbang, [”Kamagengu matangěllo e kạsědạe, i kamene mạul᷊ị u, ’Wanua e mapia, u l᷊angịe kawe mahamụ.’ 3Dingangu mal᷊ukade wue ute, i kamene nẹ̌bera u, ’Sahěllo ini e rumasehẹ̌, u l᷊angịe kawe mahamụ dingangu malělubẹ̌.’ Ho, i kamene masingkạbe mẹ̌patehẹ̌ banua ringangu makasilowe kakoạu l᷊angịe, arawe tatialan tempo e kawe tawe ikatighadʼi kamene!”] 4#Mat. 12:39; Luk. 11:29 ”Kai apạe karal᷊aị dingangu kawawal᷊ětohẹ̌ taumatang orasẹ̌ ini. I kamene měgẹ̌gausʼu Iạ e apěkẹ̌koạ tanda makạl᷊aherang. I kamene tawe panọdekangu tanda makạl᷊aherange sarang sěmbaụ tabeạu katewe tanda makạl᷊aherang bọu Nabi Yunus.” Sarạeng bọu něhengetang kerene, i Yesus e naněntangken sire, mase rimal᷊eng.
Ragin tau Farisi ringangu tau Saduki
(Mrk. 8:14-21)
5Piạ e manga muritʼi Yesus nahumpạen sěmběkan dano e, wuhụe kinasingkateng i sire u i sire kawe niwul᷊e nẹ̌bawa borotẹ̌. 6#Luk. 12:1 I Yesus něhengetangke si sire, ”Pakatateghang bue su ragin tau Farisi ringangu tau Yahudi e.”
7Nakaringihe manga waweraʼm Mawu Yesus e, manga muritʼE nanětạe němpahumbisara sěmbaụ su wal᷊ine. ”I Sie nẹ̌bera kerene e kai puhinengu i kitẹ tawe němpẹ̌bawa borotẹ̌ e.”
8Mawu Yesus e masingkạ u apang ipạhumbisaran sire. Kụ i Sie něhengetang, ”Unụe i kamene měmpạhumbisaran tawẹ borotẹ̌ niwawang kamene? I kamene kadodọ pangangimang e! 9#Mat. 14:17-21 Kai wẹ̌dang ta nakaěnna i kamene ngae? Kai ta nakatahěndung i kamene borotẹ̌ l᷊imam baụ takụ pinẹ̌papahiạ baugu l᷊ima hiwu su kataune? Pirang luwe lěmbeng kaěng nịkakomol᷊ʼi kamene? 10#Mat. 15:34-38 Kụ kereapa wue borotẹ̌ pitu ene waugu ěpạ u hiwu su kataune? Piran luwe lěmbeng kaěng nịkakomol᷊ʼi kamene. 11Kawe nakoạ kereapa ho i kamene mang ta makal᷊aěnna, u Iạ, tawe mal᷊aanum borotẹ̌ si kamene? Pakatateghang bue su wawitaugu tau Farisi ringangu Saduki!”
12Kasueěnge manga muritʼi Yesus e nakaěnnạe u Mawu Yesus mạul᷊ịu pakatateghang e wal᷊inewe apẹ̌tẹ̌tihọ u ragi kakaugẹ̌ borotẹ̌ e, kaiso kawe apětẹ̌těghangu manga těntirong tau Farisi ringangu Saduki.
Laakum Petrus mạanuʼm Mawu Yesus
(Mrk. 8:27-30; Luk. 9:18-21)
13Mawu Yesus nakoạe sarang banua maraning soang Kaisarea Filipi. Sene i Sie kai nakiwal᷊o su manga muritʼE, ”Ungkuěng u taumata e, kai i sai Ahusʼu Taumata e uade?”
14 #
Mat. 14:1-2; Mrk. 6:14-15; Luk. 9:7-8 Manga muritʼE naul᷊ị u, ”Angkuěngu sěnggạ i Yohanes Mananahani, sěnggạe wue mạul᷊ị u i Elia. I sirẹewe lai wal᷊ine ute mạul᷊ị u i Yeremia, arau sěngkatau wọu tal᷊oaran manga nabi.”
15”Arawe su tiněnnan kamene hala, i sai wue tangu Iạ e?” angkuěng i Yesus si sire.
16 #
Yoh. 6:68-69
Ene i Petrus simimbangu, ”I Tuang kai Ratu Mananal᷊amatẹ̌, Ahusʼu Ruata Kụ Biahẹ̌.”
17”Kariangkamang i kau, Simon anạ i Yona!” ungkuěng i Yesus, ”U wal᷊inewe taumata nělahẹu ene si kamene, kaiso kai i Amang-Ku su Sorga. 18Ual᷊ingu ene tangu kasingkạko, i kau e kai i Petrus, batu hanibẹ̌, kụ su wowom batu sasukunang ini e takụ pamětikang u gaheda-Ku; kụ tawe ikawatạ maning lai papate! 19#Mat. 18:18; Yoh. 20:23 Iạ e sarung mẹ̌gěllị u kakunsị u Runian Duata Wuhu e si kau. Kụ apạewen isẹ̌sẹ̌dingu su dunia e mal᷊aing isẹ̌sědingu su sorga. Dingangu apạewen nẹ̌tatal᷊ahino angkuěngu su dunia e, ute nẹ̌tatal᷊ahino lai su sorga.”
20Bọu e Mawu Yesus měsẹ̌sědingu manga muritʼE tadeạu i sire kumbahang maul᷊ị si sai-sai u i Sie kawe Ratu Mananal᷊amatẹ̌.
Mawu Yesus měbẹ̌bisaran sigěsạe ringangu kapapohongʼE
(Mrk. 8:31–9:1; Luk. 9:22-27)
21Nanětạ bọu tempo ene Mawu Yesus naul᷊ị mal᷊ahẹ su manga muritʼE, u i Sie hinong sol᷊ong Yerusalem kụ mẹ̌tatahangu sunsara l᷊awọ bọu manga těmbonange, manga imang těmbonange dingangu manga mananěntirong agama. I Sie sarung pateěng, kaiso su katěllu ěllone i Sie sarung iapẹ̌bangung kapia.
22Kutẹu i Petrus kai namol᷊eng si Yesus sol᷊ong sěndihange ringangu nẹ̌bera si Sie, ungkuěnge, ”Karimạko Mawu Ruata e mapakaraung ene Mawu! Kumbahang bue hal᷊ẹ̌ ene humombang si Kau Mawu!”
23Ene Mawu Yesus nẹ̌bihụe mase nẹ̌bera si Petrus, ”Pamehọ e i kau wọu ini setang! I kau e kai mạnahaghe si Siạ. Tiněnnanue kai tiněnnan taumata; bal᷊inewe tiněnnan Duata!”
24 #
Mat. 10:38; Luk. 14:27 Bọu e Mawu Yesus něhengetangke su manga muritʼE, ”I sai mapulu tumol᷊e si Siạ, ute harusẹ̌ mẹ̌timbul᷊eng batangenge sẹ̌sane, kụ pamasaẹ̌ng kuruise kụ měngkatewe tol᷊e si Siạ e. 25#Mat. 10:39; Luk. 17:33; Yoh. 12:25 U i sai mapulu mẹ̌tahuntěndạ u pẹ̌bawiahe, ute sarung kailangengu pẹ̌bawiahe. Arawe i sai manarakangu pẹ̌bawiahe waugʼu Iạ e, ute sarung makahombang ene. 26Kai apạe untune su pẹ̌sěngkatau, kereu kạguwạu dunia ini makoạ tataghuanenge arawe i sie kailangengu pẹ̌bawiahẹ̌ e? Botonge pẹ̌bawiahẹ̌ e kasal᷊iuangu apa-apa?
27 #
Mzm. 62:13; Mat. 25:31; Rm. 2:6 Selain tawẹ karěngụe Ahusʼu Taumata mahundingangu manga malạekatẹ̌ e sarung duměnta ringangu kawasang Amange. Su tempo ene i Sie sarung mamal᷊isẹ̌ su sěngkatau-sěngkatau tuhụewe kakanoạe. 28Kasingkạko! U wọu tal᷊oarang kamene ěndaịe piạ u ta nakasilo Ahusʼu Taumata ruměnta kere sěngkatau Ratu.”
Currently Selected:
MATIUS 16: SXN
Highlight
Share
Copy
Want to have your highlights saved across all your devices? Sign up or sign in