MATIUS 15
15
Tundung i upung gaghurang
(Mrk. 7:1-13)
1Tau Farisi sěngkomol᷊ang dingangu mananěntiro agama pira-pira wọu Yerusalem nahunděnta sol᷊ong anung Yesus. I sire němpẹ̌kiwal᷊o si Sie, 2”Unụe manga muritʼU kawe lụl᷊ampa tundung i upung gaghurang i kitẹ? Mageng mahungkaěng, i sire kawe tawe měmpanguhasẹ̌ l᷊iman sire kal᷊amona kere su atorange!”
3Mawu Yesus ute simimbangke si sire ungkuěng, ”Kụ kawe unụe i kamene mal᷊aing lụl᷊ampa parentang Duata ual᷊ingu pamamewẹ tundung i upung gaghurang i kamene? 4#Sas. 20:12, 21:17; Imng. 20:9; Pang. 5:16 U Mawu Ruata kai něhengetang, ’Pangadatẹ̌ si amangu ringangu si ninangu, kụ i sai měngane si amang dingangu si ninange ute hinong pateěng.’ 5Arawe ungkuěng i kamene ute, mạeng u piạ u mẹ̌bera su gaghurange, ’Apạe angkeěng takụ ighěllị si amangku ringangu si ninangku, seng takụ nịsasěmba su Ruata,’ 6tangu tau ene seng tawe wahal᷊uasʼu měngadatẹ̌ gaghurange.#15:6: Gaghurange: Binohẹ pira-pira nạung kal᷊imona: I amange arau i ninange. Kụ, ual᷊ingken tundung i upung gaghurang i kamene, ute i kamene kawe měmẹ̌malang hengetangʼu Mawu Ruata. 7I kamene kai tau mělle! Nihino-hino apan nitěbal᷊u Nabi Yesaya mạanung kamene, u,
8 #
Yes. 29:13
’Kai kere ini ungkuěngu Mawu:
Umatẹ̌ ini e kai měmpạngadatʼu wiwihʼi sire si Siạ,
arawe naung i sire ute maraung Iạ.
9Tawẹ gunane i sire měmpangadatẹ̌ Siạ,
batụ u i sire kai mạněntirong atorangu taumata
isẹ̌sihing i sire su atorangku.’ ”
Kal᷊awọu apam makạl᷊amuhụ taumata
(Mrk. 7:14-23)
10Tangu Mawu Yesus kimuịe taumata l᷊awọe kụ něhengetang si sire, ”Pěmpẹ̌daringihẹ̌ko mẹ̌deạu makaěnna! 11Apan seng nawoko su mohonge tawe makakal᷊amuhụ taumata; tumbạeng apang mạl᷊ua wọu mohonge, ute kai ene makạkal᷊amuhụ si sie.”
12Mase manga muritʼi Yesus nahunděnta kụ němpẹ̌bera si Sie, ”Masingkạ bue i Tuang u i sire tau Farisi e kawe niměnggạu nakaringihẹ̌ hengetang i Tuang kawe kerene?”
13Mawu Yesus simimbang, ”Apạewen sasuang kụ bal᷊ine nisuang i Amang-Ku su Sorga e, kai ěbukang. 14#Luk. 6:39 Manịeng aị sěmpike i sire tau Farisi ene. I sire kai měngangahạ buta; kụ kereu kawe wuta měngahạ buta ute i rẹ̌dua měngkawunsal᷊ẹ̌ sěngkawunsal᷊ẹ̌ su ral᷊ungu songe.”
15Ene i Petrus něberạe si Sie, ”Tul᷊ungko i Tuang pělahẹu papinintu ene si kami.”
16Kutẹu Mawu Yesus simimbang si sire, ”Kai ta nakaěnna i kamene? 17Kai wěga i kamene, u apam masuẹ̌ su mohonge kawe sumuẹ̌ su tiang, kụ bọu e sumẹ̌bang kapia? 18#Mat. 12:34 Arawe apan sụsěbang bọu mohong, ute kai měbẹ̌buạ bọu naung; kụ kai ene makạdiadi taumata mal᷊amuhụ. 19U kai wọu ral᷊ungu naunge pěbẹ̌buakengu tiněnna raral᷊akịe, makạual᷊i taumata měmate, mawuang, mẹ̌sundal᷊ẹ̌, mẹ̌tako, mẹ̌sahiding konti, ringangu měhodatẹ̌. 20Kakakoạ tamai ene makạual᷊i taumata mal᷊amuhụ, kai wal᷊inẹbe kumaěng u l᷊ima ta nịuhasẹ̌.”
Pěngangimangu sěngkatau wawineng Kanaan
(Mrk. 7:24-30)
21Bọu e Mawu Yesus dimal᷊engke naněntangu tampạ ene sol᷊ong banua maraning soan Tirus dingangu Sidon. 22Ene piạ e sěngkatau wawineng Kanaan bọu wanua ene, lụhaung si Yesus kapẹ̌kẹ̌kuine, ”Ahusʼi Daud, tal᷊ěntụkong iạ! Anạku wawine e kai niwal᷊iuangu rohkẹ̌ dal᷊akị kụ tangu kakakoạe marasai.”
23Mawu Yesus e měngkate tawẹ kěndịe. Tangu manga muritʼE němpẹ̌haungke si Sie kụ němpẹ̌dorong, ”Tuang, dolohẹ̌ko apěngensọ bawine ěndaịe pakarau. I sie měngkate kětạeng měgẹ̌gahẹ su l᷊ikudʼi kitẹ!”
24Mawu Yesus simimbang, ”Iạ e nirolohẹ̌ samatang baugʼu kawanuang Israel e, tumange si sire apan něngkapal᷊idẹ̌.”
25Tau wawine ene himaungke kụ nẹ̌suba si Yesus kạpẹ̌berane, ”Tul᷊ungko iạ, Mawu!”
26Kai i Yesus simimbang, ”Tawe hinone měngal᷊ạ kaěng u pal᷊ahanạ kụ iteledẹ̌ su manga asu.”
27”Kerene wue, Mawu,” ungkuěngu wawine ene, ”arawe asu e mal᷊aing kụkaěng manga popahẹ̌ apan měngkạhondosẹ̌ bọu medan mawune.”
28Mase Mawu Yesus něhengetangke si sie, ”Ei wawine, mambeng masaria pěngangimangu e! Kariadịe apan dẹ̌dorongangu e!” Tangu wọuten orasẹ̌ ene anạe napiạe.
Mawu Yesus napakapian masasakị lawọ
29Ene Mawu Yesus naněntangken tampạ ene, kụ simělẹ e wiwihʼu Ranong Galilea e. Bọu e i Sie simaka su wěntihe kụ naiang sene. 30Mal᷊awọ taumata nahunděnta su anunʼE němpangěntudʼu tau kempal᷊ẹ̌, buta, peosẹ̌, mou ringangkewelain masasakị bal᷊ine. I sire němpanondang masasakị ene su těngong Yesus, kụ i Sie napakapian sire ene. 31Taumata l᷊awọ apan ene sene měngkate apa měngkạherang, makạsilọ e apang mou makawera, kempal᷊ẹ̌ něngkapia, peosẹ̌ makạdal᷊eng, dingangu wuta makạsilo. Kụ i sire měngkate měmpẹ̌dẹ̌dalo Mawu Ruatang Israel.
Mawu Yesus napakaěng u ěpạ u hiwu su kataune
(Mrk. 8:1-10)
32Ene Mawu Yesus kimuịe manga muritʼE mase něhengetang, ”Iạ e tụtal᷊ěntụ u taumata l᷊awọ ini. Seng těllu ěllo karěngụe i sire měngkai ringangku kutẹu i sire seng tạ u kanengang. Iạ mạdiri wue i sire měngkapul᷊ẹ dingangu tiang tạ l᷊ohone, kibasịʼu i sire mapinsang su ral᷊eng.”
33Mase manga muritʼi Yesus nakiwal᷊ọe si Sie, ”Kai makaěbạ kaěng bọu apa i kitẹ su wanua maghea ini waugʼu taumata kal᷊awọe ini?”
34”Pirambaụ borotẹ̌ si kamene? Mawu Yesus nakiwal᷊o si sire.”
”Pitumbaụ dingangu kinạ darodọ pirambua.”
35Tangu Mawu Yesus nangorọe taumata l᷊awọe niapahungkaiang su ěntana. 36Mase i Sie nangal᷊ạe borotẹ̌ pitumbaụ dingangu kinạe kụ bọu e nakitarimakasẹ su Mawu. Bọu ene pinẹ̌kakakempangete borotẹ̌ dingangu kinạe ringangu l᷊imanʼE, mase tinẹ̌gonẹ e su manga muritʼE. Kụ i sire němpamahiạe su taumata l᷊awọ ene. 37Kụ i sire nahungkaěng kěbị sarang něngkal᷊aedẹ̌. Bọu ene i sire němpěngomol᷊e manga lěmbeng kaěnge. Kěbị kal᷊awọe pitung kěmbuahẹ̌ napenẹ. 38Kal᷊awọu manga esẹ apan nahungkaěng su orasẹ̌ ene tangu nạung ěpạ u hiwu su kataune, tawẹ nạdekeng manga wawine ringangu manga rariọ e.
39Bọu e Mawu Yesus něndolohʼu taumata l᷊awọe pinakapul᷊ẹ. I Sie simakẹ e su sakaenge, kụ nawunạu wanuang Magadan.
Currently Selected:
MATIUS 15: SXN
Highlight
Share
Copy
Want to have your highlights saved across all your devices? Sign up or sign in