LUKAS 4
4
Mawu Yesus nisal᷊ukateng u Setang
(Mat. 4:1-11; Mrk. 1:12-13)
1Mawu Yesus napenẹ u Rohkẹ̌ u Ruata e su tempong i Sie naněntangu sal᷊ụ u Yordan e. Rohkẹ̌ u Ruata e nangahạ si Sie sol᷊ong banua l᷊inggi. 2Sene i Sie nisal᷊ukateng u setang ěpạ u pul᷊o su ěllone karěngụe. Karěngụewen ěllo ene, i Sie tawe kimaěng manga apa-apa kụ pěngěnsueěnge i Sie nakapěndang nahutung.
3Setang nẹ̌berạe si Sie, ”I Kau Ahusẹ̌ben Duata arauěng? Ute pěngoroko watu ěndaị apakakoạ borotẹ̌.”
4 #
Pang. 8:3
Tangu Mawu Yesus simimbang, ”Su ral᷊ungu Winohẹ Susi kạbawohẹ, ’Taumata e tawe makapẹ̌biahẹ̌ sěmatang bọu borotẹ̌.’ ”
5Mase setange něngahạe si Yesus sol᷊ong sěmpalang marangẹ, kụ su ral᷊ungu sěngkakondạ tangu setange nanodẹen patikụ kararatuangu dunia ini e si Sie. 6”Patikụ kawasa ringangu kakakalạ ěndaị e sarung takụ onggotang si Kau e,” angkuěngu setang si Yesus e, ”ual᷊ingu patikụ ene seng nighěllị si siạ, ute walạewe iạ mapulu měnsang takụ ionggọ si sai-sai. 7Tangu patikụ ene sarung makoạ bạgeangʼU, kereu i Kau mẹ̌suba su těngoku.”
8 #
Pang. 6:13
I Yesus simimbang, ”Su ral᷊ungu Winohẹ Susi e mạbawohẹ, ’Pẹ̌subạe su Mawu Kasěllahenge kụ pẹ̌tahamawụ e si Sie sẹ̌sane.’ ”
9Mase setange nangahạewen Yesus sol᷊ong Yerusalem kụ naměllọ i Sie su wowong atụ u Wal᷊em Mawu e, kụ nẹ̌berạe si Sie, ”I Kau Ahusẹ̌ben Mawu Ruata arau ěng? Ute tumpạ e wọu ini. 10#Mzm. 91:11 Batụu su ral᷊ungu Winohẹ Susi e mạbawohẹ, ’Mawu Ruata e sarung mẹ̌parenta manga malạekatẹ̌ ipěnanudẹ̌ pakapia-pia si Kau.’ 11#Mzm. 91:12 Kutẹu lai, ’Manga malạekatẹ̌ sarung měmpanal᷊endeng si Kau ringangu l᷊imang sire, tadeạu l᷊aedʼU e lai tawe matangga su watu.’ ”
12 #
Pang. 6:16
I Yesus simimbang, ”Su ral᷊ungu Winohẹ Susi mạbawohẹ, ’Kumbahang manal᷊ukạ Mawu Kasěllahenge Ruatanu.’ ”
13Tangu sarạeng setange nangědọe nanal᷊ukạ si Yesus dingangu haghin sasal᷊ukạ, tangu i sie namehọe wọu anun Yesus kụ něngampal᷊ẹ̌ tempone mapia.
Mawu Yesus nanětạen munaranʼE su Galilea
(Mat. 4:12-17; Mrk. 1:14-15)
14Bọu e i Yesus nẹ̌sul᷊ẹ e sol᷊ong Galilea; kụ i Sie nilohoěngken Rohkẹ̌ u Ruata e. Kụ telengu mạanun Sie měngkatewe nasěsahẹ̌ su patikụ banua ene. 15I Sie mạněntiro su manga wal᷊em pẹ̌kakal᷊iomanengang ringangu kěbị taumata mẹ̌dẹ̌dalo si Sie.
Mawu Yesus pinẹ̌binsị su Nazaret
(Mat. 13:53-58; Mrk. 6:1-6)
16Ene i Yesus natamai lai sol᷊ong Nazaret tampạe nạung kinasariaěnge. Su ěllon Sabatẹ̌ e tuhụewe tundune i Sie simuẹ̌ su wal᷊em pẹ̌kakal᷊iomanengang. I Sie nẹ̌buạ dimarisị mẹ̌basa Winohẹ Susi e, 17kụ nighěllikangkem bukẹ̌ u Nabi Yesaya. I Sie namingkahẹ̌ bukẹ̌ ene, mase nakahombang ayetẹ̌ ini,
18 #
Yes. 61:1-2
”Rohkẹ̌ u Mawu ene si Siạ,
batụu i Sie seng nělanisẹ̌ si Siạ
tadeạu ipẹ̌lẹ̌habarʼu habarẹ̌ makạdal᷊uasẹ̌ e su makakasiang.
I Sie rimolohʼu Iạ mědeạu pěmẹ̌mohangu
karal᷊ěsọ u mạtatahungkụ
dingangu kawawekesu matan tau wuta;
iapělẹ̌liu tau tẹ̌tumbiagheng
19ringangu iapělẹ̌habarʼu orasʼu rarěntang Mawu e,
makasal᷊amatẹ̌ umatʼE pinilene.”
20Mase i Yesus wọeten něndul᷊ung bukẹ̌ ene kapia kụ naněgong ene su mělahal᷊ẹ̌, bọu ene i Sie kimaiang.#4:20: Kimaiang: Su tempo ene tau Yahudi e kumaiang mạeng měněntiro. Matang kal᷊awọu taumata su ral᷊ungu wal᷊em pẹ̌kakal᷊iomanengang e měngkatewe matatandạ si Sie. 21Tangu i Yesus nanětạe něhengetang si sire kere ini, ”Manga ayetʼu Winohẹ Susi su sahěllo ini e pinakasěhụ su orasʼu i kamene nakaringihẹ̌.”
22Manga wawera niweranʼE měngkatewe maral᷊ěnggihẹ̌, hakịu i sire němpẹ̌dal᷊inaụ dingangu mạbohang si Sie. I sire němpẹ̌bera, ”Kai wal᷊inewe anạ i Yusup i Sie Ho?”
23Tangu i Yesus něhengetang si sire, ”Ěndịu i kamene mang mẹ̌pakẹu sasailing bawera ini e si Siạ, ’Dokterẹ̌ pangundangko watangengue. Apan nakal᷊aherang kinaringihʼi kami e nikoạ u su Kapernaum, koạko l᷊ai su soan gaghurangu e.’ ” 24#Yoh. 4:44 I Yesus saụewe něnamba, ”Pẹ̌tahěndungke, tawe apa nabi kụ lẹ̌adateng su soane sẹ̌sane. 25#1Rat. 17:1 Ual᷊ingu ene daringihẹ̌ko: su tempong Elia, piạ e arẹ̌gan těllu taung ěnnungu wul᷊ang karěngụe tawe rimasehẹ̌, hakịu piạ e karal᷊unusẹ̌ masaria su kạguwạu wanua. Su tempo ene lawọ manga wawine wal᷊u su Israel. 26#1Rat. 17:8-16 Maning seng kerene, Mawu Ruata e tawe něndolohʼi Elia tamai sol᷊ong sěngkatau wọu manga wal᷊u e, kaiso kětạewen sol᷊ong anun sěngkatau wawine wal᷊u su Sarfat su wanuang Sidon. 27#2Rat. 5:1-14 Kerene lai su tempon Nabi Elisa mal᷊awọ taumata su Israel piạ sakịe kusta makatatakụ, kaiso tawẹu sarang sěngkatau l᷊ai woʼi sire nipakaul᷊e, tumbạewen i Naaman tau Siria e.”
28Kěbị taumata su wal᷊em pẹ̌kakal᷊iomanengang e měngkatewe nisawelangu pẹ̌du sarạeng nakaringihẹ̌ tamai ene. 29Kụ i sire měngkatewe němpẹ̌bua mase nanokol᷊ʼi Yesus nipasẹ̌bang bọu soa, ringangu niwawan sire sarang lengehu wul᷊ude, pinẹ̌koateng soan sire. I sire mẹ̌nẹ̌naung u měnuhudʼi Sie su těnggilihange. 30Arawe i Yesus dimal᷊eng bọu tal᷊oaran taumata l᷊awọ e apidu natamai.
Taumata nikasuěkangu rohkẹ̌ dal᷊akị
(Mrk. 1:21-28)
31Bọu e i Yesus tamai sol᷊ong soan Kapernaum su Galilea. Su tampạ ene i Sie mạněntiro taumata l᷊awọ su ěllon Sabatẹ̌ e. 32#Mat. 7:28-29 Kụ i sire mangkewen měmpẹ̌dal᷊inaụ nakasilo kakakoạʼE maněntiro, u i Sie mẹ̌bẹ̌bera ringangu kawasa. 33Ene su wal᷊em pẹ̌kakal᷊iomanengang piạ e sěngkatau nisakeěngu rohkẹ̌ dal᷊akị. Tau ene měngkatewe namansagẹ̌ maihạ-ihạ, 34”Ei Yesus, tau Nazaret, i Kau mapulu mẹ̌koạ apa si kami? I Kau riměnta maminasa si kami e? Iạ masingkạ i sai Kau! I Kau kai rarolohangu Ruata!”
35”Pakarěmmasẹ̌ko!” Pal᷊ěndihʼi Yesus su rohkẹ̌ dal᷊akị e. ”Pěmpẹ̌sẹ̌bangke wọu tau ěndaị e!” Mase rohkẹ̌ dal᷊akị e wọuten napakawẹ̌bahu tau e su těngon sire kẹ̌bị, bọu e simẹ̌bang wọu tau ene, kụ tawe kạdiongeng nakapẹ̌kapura si sie.
36Kěbị taumata naral᷊ingu kụ němpẹ̌bera sěngkatau su wal᷊ine, ”Bal᷊inewe mal᷊ongkọ manga waweranʼE. Piạ pěhěngkingʼE ringangu kawasanʼE, i Sie nẹ̌parenta manga rohkẹ̌ daral᷊aị pasẹ̌bang, kụ i sire nahunsěbangke wue!” 37Kutẹu telengu mạanun Yesus měngkatewe nẹ̌sasěsahẹ̌ su apam beọ u wanua nal᷊ikụ.
Yesus napakapian taumata l᷊awọ
(Mat. 8:14-17; Mrk. 1:29-34)
38I Yesus simẹ̌bang bọu wal᷊em pẹ̌kakal᷊iomanengang e, mase rimangeng su wal᷊eng Simon. Kutẹu i empong Simon bawine e kai lụl᷊ěhabẹ̌, kụ i sire nakitul᷊ungke si Yesus e. 39Tangu i Yesus himaung su ral᷊okangu tau wawine ene, kụ napakailangu lěhabẹ̌ ene. Kụ lěhabẹ̌ e naintal᷊ẹ̌ dingangu i empong Simon bawine e měngkatewe nẹ̌bangung dingangu nẹ̌tangkiang si sire.
40Ene sarạeng matangěllo simědạ e ute kěbị taumata němpangěntudẹ̌ sol᷊ong anung Yesus apạewen anạ u sěngkataun sire balạewe měnsang sakị apa. I Yesus e něnělidʼu l᷊imanʼE su pẹ̌sěngkatau kụ napakapian sire. 41Manga rohkẹ̌ daral᷊aị e mal᷊aing nahunsẹ̌bang bọu taumata l᷊awọ e, apidu kạpẹ̌mansage maihạ, ”I Kau Ahusʼu Ruata e!”
Kutẹu i Yesus kai němal᷊ěndihẹ̌ si sire kụ tawe napakawalan sire niapẹ̌bera, watụ u i sire kawe masingkạ u i Sie kai Ratu Mananal᷊amatẹ̌.
Yesus měnẹ̌nasẹ̌ su ral᷊ungu manga wal᷊em pẹ̌kakal᷊iomanengang
(Mrk. 1:35-39)
42Sarạeng matangěllo e nanětạe siměnnang i Yesus naněntangu soa ene mase nakoạ sol᷊ong tampạ tạ taune. Kutẹu taumata l᷊awọ e nanětạ e mědẹ̌deạ si Sie kụ piạ e i sire nakaěbạ si Sie, i sire měngkai mạmaedẹ̌ si Sie u abe apẹ̌něntang i sire. 43Kaiso i Yesus něhengetang, ”Injilẹ̌ mạanun kereapa Mawu Ruata e mẹ̌parenta ute hinon Takụ habareng lai su manga soa wal᷊ine batụu kai ene Mawu Kasěllahenge rimolohʼu Iạ sol᷊ong dunia e.”
44Ual᷊ingu ene Mawu Yesus měngkawe měnẹ̌nasẹ̌ su manga kanisa su patikụ soan Yudea e.
Currently Selected:
LUKAS 4: SXN
Highlight
Share
Copy
Want to have your highlights saved across all your devices? Sign up or sign in