LUKAS 3
3
Habarʼi Yohanes Mananahani
(Mat. 3:1-12; Mrk. 1:1-8; Yoh. 1:19-28)
1Su taung kapul᷊o l᷊imane pẹ̌paparentang Kaisar Tiberius, i Pontius Pilatus nahengkẹ nakoạ Guběrnur su Yudea kụ i Herodes nẹ̌parenta su Galilea. I Filipus anạ u sěmbaụ i Herodes nẹ̌parenta su wanuang Iturea dingangu Trakhonitis. Arawe kawe i Lisanias ute nẹ̌parenta su Abilene. 2Kutẹu nakoạ manga imang mawantugẹ̌ ute kai i Hanas dẹ̌duang Kayafas.#3:2: i Hanas dẹ̌duang Kayafas: Hanas ute kai i amang i Kayafas kinaratingang kụ maning seng tawe nakoạ imang mawantugẹ̌ kaiso wedang lẹ̌lahunggěetang. Su taung ene ute Mawu Ruata něhengetang si Yohanes anạ i Zakharia su wanua l᷊inggi. 3Tangu i Yohanes rimal᷊eng su apan tampạ su kaguwạu wimbaengu Sal᷊ụ u Yordan e kụ mělẹ̌habarʼu hengetangu Ruata e. I Yohanes něhabarẹ̌ si sire u, ”Pěmpẹ̌tobate i kamene wọu kal᷊awọu rosanu, kụ i kamene harusẹ̌ pakisahani, tadeạu Mawu Ruata mangampung i kamene.” 4#Yes. 40:3-5 Ene, kerẹewe mạbawohẹ su ral᷊ungu bukẹ̌ u Nabi Yesaya:
”Piạ e tingihʼu tau mạmohang su wanua l᷊inggi,
’Diahiko raral᷊engangu Mawu e,
pakatateneko daral᷊engang i Sie.
5Apang pingkạ e ambunge,
apam bul᷊ude ringangu wongkone e sapo.
Apang dal᷊eng kalelọ e tul᷊ide,
ringangu apang dal᷊eng matatahigagul᷊ẹ̌ e harusẹ̌be tene.
6Patikụ taumata su dunia e sarung makasilo
sal᷊amatʼu Mawu Ruata e!’ ”
7 #
Mat. 12:34, 23:33 Mal᷊awọ taumata e mạhunděnta sol᷊ong anung Yohanes e mědeạu makisahani. I Yohanes nẹ̌bera si sire, ”E i kamene taumata raral᷊aị! I sai tangu nẹ̌bera u i kamene makatal᷊ang bọu hukumang u Mawu Kasěllaheng e ramahi kạděntane? 8#Yoh. 8:33 Todẹ̌ko su kakanoạ i kamene u i kamene kai seng němpẹ̌tobatẹ̌ bọu kal᷊awọu rosang kamene! Kụ kumbahang měnětạ mẹ̌bera u i Abraham e kai i upung i kamene. Pẹ̌tahěndung: Bọu manga watu tamai ini e Mawu Kasěllaheng e mal᷊aing makakoạ pal᷊ahiteng Abraham! 9#Mat. 7:19 Bal᷊iung e seng kạdariahi waugu i panuwang kalu sarang manga hamụ e. Tangu apạeweng kalu ta mẹ̌bawuam buane mapia e, sarung tuwangeng kụ iwahung su ral᷊ungu putung.”
10”Kụ kai apạ e tangu hinong koateng i kami e?” Kerene kakiwal᷊ong taumata lawọ e si Yohanes.
11I Yohanes simimbang, ”I sain piạ l᷊akụ e rarua, gěllịko sěmbaụ e si sain tala; dingangu i sain piạ kaěnge, hinom pěmahiạ l᷊ai.”
12 #
Luk. 7:29
Maghaghělle manga bea e mal᷊aing diměnta su anung Yohanes mědeạu makisahani. I sire nakiwal᷊o, ”Tuang Guru, kai iapẹ̌kapura tangu i kami e?” 13I Yohanes simimbang, ”Kumbahang maghělle kụ něngalembo wọu apan seng nipoěng.”
14Piạ l᷊ai sordado nakiwal᷊o, ”Kereapa wue i kami e? Apạ e hinong koateng i kami tangu?”
I Yohanes simimbang, ”Kumbahang měmpěngakal᷊ẹ̌ si sai-sai dingangu kumbahang měmpěhampasẹ̌ doitẹ̌ ual᷊ingu pěngangangěnsilẹ̌ tạ katěngade. Kaiso pěmpẹ̌kadarewen ěbạ i kamene e!”
15Su tempo ene tangu taumata e nanětạ e měkẹ̌kakiwal᷊o, měnsang i Yohanes ute kai Ratu Měnanal᷊amatẹ̌ lẹ̌antiwang i sire ngae. 16Kai ual᷊ingu ene hakịu i Yohanes nẹ̌bera si sire kěbị, ”Iạ e měnẹ̌nahani si kamene e ringangu akẹ, kai hědowen sarung duměnta Taumata něngalembong kasěllahe wọu iạ e. Kal᷊ingung měluka tal᷊ing sapatune e, iạ e mal᷊aing tawe wotonge. I Sie sarung měnahani si kamene ringangu Rohkẹ̌ u Ruata e dingangu putung. 17Su l᷊imanʼE seng piạ nihung mědeạu pẹ̌taěkang kěbị gandung e sarangkewe mawurẹ̌si. Gandung sarung ikomol᷊ẹ̌ su ral᷊ungu pěndaresokange, arawe kěbị apam bal᷊ẹ̌kane sarung tutungangʼE su ral᷊ungu putung tawe masasẹ̌bu!”
18Kerene i Yohanes mạnal᷊ěntihọ si sire ringangu haghing kakakoạ e, su tempọen sie mělẹ̌habaru Injilẹ̌. 19#Mat. 14:3-4; Mrk. 6:17-18 Arawe i Herodes datun Galilea e nisěngkul᷊ang i Yohanes hal᷊ẹ̌ u pẹ̌kakawinge ringang i Herodias, kinawing u tuhang e, dingangkewelain su hal᷊ẹ̌ u kěbị kararal᷊aị bal᷊ine e kụ seng kinoạ e. 20Kaiso i Herodes kai sauneng něnambang kararal᷊akise kụ dingangu nanuẹ̌ i Yohanes su ral᷊ungu tahungkụ.
I Yesus nisahani
(Mat. 3:13-17; Mrk. 1:9-11)
21Tangu sarangke taumata kěbị e seng nisahani, i Yesus nisahani l᷊ai. Kụ piạ e i Sie kapẹ̌kẹ̌kal᷊iomanenge, tangu langị e nahěngẹ, 22#Pěnd. 22:2; Mzm. 2:7; Yes. 42:1; Mat. 3:17; Mrk. 1:11; Luk. 9:35 kụ Rohkẹ̌ u Ruata e nẹ̌těngkatěntung si Sie kere manụ paluma su pusige. Bọu ene kinaringihe tingihʼu Mawu Ruata e něhengetang, ”I Kau e kai Ahusẹ̌-Ku ikẹ̌kěndagẹ̌ e. I Kau e makạl᷊uasẹ̌ naung-Ku e.”
Dol᷊ẹ̌ u manga i upung gaghurang u Mawu Yesus Kristus
(Mat. 1:1-17)
23Su tempon Mawu Yesus nanětạ u munaranʼE, umurʼE seng piạ u manga těllum pul᷊o su taunge. Angkuěngkewen taumata, uade i Sie kai anạ i Yusup, anạ i Eli, 24anạ i Matat, anạ i Lewi, anạ i Malkhi, anạ i Yanai, anạ i Yusup, 25anạ i Matica, anạ i Amos, anạ i Nahum, anạ i Hesli, anạ i Nagai, 26anạ i Maat, anạ i Matica, anạ i Simei, anạ i Yosekh, anạ i Yoda, 27anạ i Yohanan, anạ i Resa, anạ i Zerubabel, anạ i Sealtiel, anạ i Neri, 28anạ i Malkhi, anạ i Adi, anạ i Kosam, anạ i Elmadam, anạ i Er, 29anạ i Yesua, anạ i Eliezer, anạ i Yorim, anạ i Matat, anạ i Lewi, 30anạ i Simeon, anạ i Yehuda, anạ i Yusup, anạ i Yonam, anạ i Elyakim, 31anạ i Melea, anạ i Mina, anạ i Matata, anạ i Natan, anạ i Daud, 32anạ i Isai, anạ i Obed, anạ i Boas, anạ i Salmon, anạ i Nahason, 33anạ i Aminadab, anạ i Admin, anạ i Arni, anạ i Hezron, anạ i Peres, anạ i Yehuda, 34anạ i Yakub, anạ i Ishak, anạ i Abraham, anạ i Terah, anạ i Nahor, 35anạ i Serug, anạ i Rehu, anạ i Peleg, anạ i Eber, anạ i Salmon, 36anạ i Kenan, anạ i Arpakhsad, anạ i Sem, anạ i Nuh, anạ i Lamekh, 37anạ i Metusalah, anạ i Henokh, anạ i Yared, anạ i Mahalaleel, anạ i Kenan, 38anạ i Enos, anạ i Set, anạ i Adam, anạ u Ruata.
Currently Selected:
LUKAS 3: SXN
Highlight
Share
Copy
Want to have your highlights saved across all your devices? Sign up or sign in