Ore i mexü̃ ga Márcu ümatüxü̃ 14
14
Naxca̱x nadaugü nax ñuxãcü Ngechuchuxü̃ yayauxgüxü̃
(Mt. 26.1-5; Lc. 22.1-2; Jn. 11.45-53)
1Rü taxre ga ngunexü̃ nataxu nax nawa nanguxü̃ ga Yudíugüarü peta ga Üpetüchiga ga nagu nangõ̱xgüãxü̃ ga paũ ga ngearü pu̱xẽẽruü̃ã́xü̃. Rü nümagü ga chacherdótegüarü ãẽ̱xgacügü rü ngúexẽẽruü̃gü ga mugüwa ngu̱xẽẽtaegüxü̃ rü naxca̱x nadaugü nax ñuxãcü bexma duü̃xü̃güechita Ngechuchuxü̃ yayauxgüxü̃ nax yama̱xgüãxü̃ca̱x.
2Yerü nümaxü̃ rü ñanagürügü: —Taxucürüwama ñu̱xma petagu tayayauxgü, erü duü̃xü̃gü rü tá tamaxã nanue —ñanagürügü.
Wüxi ga nge rü Ngechuchuerugu inaba ga pumara
(Mt. 26.6-13; Jn. 12.1-8)
3Rü Ngechuchu rü Betániawa naxũ napatawa ga Chimóü̃ ga rüchaxünecümaxã naxugüãcü. Rü yexguma mechawa natoyane, rü yéma ingu ga wüxi ga ngecü ga wüxiwexü̃ ga pumara ga yixichixü̃ ga tatanüxü̃chixü̃ yéma ngecü. Rü iyapoyenágu ga yema pumarachixü̃ ga nuta ga mexẽchicünaxca̱x, rü Ngechuchuerugu inaba ga yema pumara.
4Natürü ñuxre ga yema yéma yexmagüxü̃ rü nanue naxca̱x ga yema naxüxü̃ ga yema ngecü, rü nügümaxã ñanagürügü: —¿Tü̱xcüü̃ ngẽxma inaxaiyaxü̃ i ngẽma pumara?
5Rü narümemae chi nixĩ i 300 tachinü i diẽrugu namaxã itaxe, rü ñu̱xũchi ngẽma diẽrumaxã nüxü̃ rüngü̃xẽxẽ i ngẽma duü̃xü̃gü i ngearü diẽruã̱xgüxü̃ —ñanagürügü. Rü yemaacü ngĩchiga nidexagü ga yema nge.
6Natürü ga Ngechuchu rü ñanagürü nüxü̃: —¡Ngexrüma! ¿Tü̱xcüü̃ ngĩxü̃ pechixewe? Erü ngẽma chomaxã naxüxü̃, rü wüxi i mexü̃ nixĩ.
7Rü ngẽma ngearü diẽruã̱xgüxü̃ rü guxü̃gutáma petanüwa nangẽxmagü, rü ngẽmaãcü pexü̃́ natauxcha nax nüxü̃ perüngü̃xẽẽxü̃ i ngẽxguma penaxwa̱xegu. Natürü i choma rü taxũtáma guxü̃gu petanüwa changexma.
8Rü ñaa nge rü inaxü i guxü̃ma i ngẽma ngĩxü̃́ tauxchaxü̃, rü ngẽmaca̱x yoxni choxü̃ ipumaraxü̃ne naxü̃pa nax ichatáxü̃.
9Rü aixcüma pemaxã nüxü̃ chixu rü guxü̃ i naanewa i ngextá duü̃xü̃gü nüxü̃ íxugügüxü̃wa i ore i maxẽxẽẽruxü̃, rü ngẽma ñaa ngecü chomaxã üxü̃ rü tá ta nüxü̃ nixugügü. Rü ngẽmaãcü tá ngĩxna nacua̱xãchie i duü̃xü̃gü —ñanagürü ga Ngechuchu.
Yúda rü ãẽ̱xgacügümaxã nanamexẽxẽ nax ñuxãcü tá Ngechuchuxü̃ yayauxgüxü̃ca̱x
(Mt. 26.14-16; Lc. 22.3-6)
10Rü Yúda ga Icharióte ga wüxi ga yema 12 ga ngúexü̃tanüxü̃ ixĩxü̃, rü Yudíugüarü chacherdótegüarü ãẽ̱xgacügütanüwa naxũ nax namaxã yamexẽẽãxü̃ca̱x nax ñuxãcü tá Ngechuchuxü̃ yayauxgüxü̃ca̱x.
11Rü yexguma yemaxü̃ naxĩnüegu, rü nümagü ga yema ãẽ̱xgacügü rü nataãẽgü. Rü diẽru Yúdana ngĩxü̃ naxuaxü̃gü. Rü yexgumama inanaxügü ga Yúda ga naxca̱x nax nadauxü̃ ga ñuxãcü nüxü̃́ nax natauxchaxẽẽgüãxü̃ nax duü̃xü̃güechita Ngechuchuxü̃ yayauxgüxü̃ca̱x.
Coriarü õnachiga
(Mt. 26.17-29; Lc. 22.7-23; Jn. 13.21-30; 1 Co. 11.23-26)
12Rü nawa nangu ga ngunexü̃ ga nagu inaxügüxü̃ ga yema peta ga paũ ga ngearü pu̱xẽẽruü̃ã́xü̃ nagu nangõ̱xgüxü̃. Rü yema nixĩ ga ngunexü̃ ga nagu carnéruxacü naxca̱x yama̱xgüxü̃ ga Üpetüchigaarü peta. Rü yexguma ga norü ngúexü̃gü rü Ngechuchuna nacagüe, rü ñanagürügü: —¿Ngextá cunaxwa̱xe nax tanamexẽxẽxü̃ i õna i Üpetüchigaarü petagu ingṍxü̃? —ñanagürügü.
13Rü yexguma ga nüma rü nanamu ga taxre ga norü ngúexü̃gü, rü ñanagürü nüxü̃: —¡Ẽcüx, yea ĩanewa pexĩ! Rü ngẽxma tá nüxü̃ peyangau i wüxi i yatü i wüxi ya tü̃xü̃ ya dexámaxã ããcuxe ngẽxma tüxü̃ ingexü̃. ¡Rü nawe perüxĩ!
14¡Rü yima ĩpata ya nagu yaxücune i ngẽma yatü, rü yima ĩarü yoramaxã nüxü̃ pixu, rü ñapegügü nüxü̃: “Torü ngúexẽẽruxü̃ nüxü̃ nacuáxchaü̃ nax ngexü̃ yixĩxü̃ i ngẽma ucapu i norü ngúexü̃gümaxã tá nawa nachibüxü̃ i Üpetüchigaarü õnagu”, ñapegügü nüxü̃!
15Rü nüma tá pexü̃ nüxü̃ nadauxẽxẽ i wüxi i ucapu i taxü̃ i marü mea mexẽẽxü̃ i norü daxũchiü̃wa ngẽxmaxü̃. ¡Rü ngéma penamexẽxẽ̱x i tórü õna i Üpetüchigaca̱x ixĩxü̃! —ñanagürü nüxü̃.
16Rü inaxĩãchi ga yema taxre ga ngúexü̃gü, rü ĩanewa naxĩ. Rü yexma nüxü̃ inayangaugü ga guxü̃ma yema Ngechuchu namaxã nüxü̃ ixuxü̃rüxü̃. Rü yéma nanamexẽxẽ ga õna ga Üpetüchigaca̱x ixĩxü̃.
17Rü yexguma marü nachütachaü̃gu, rü ínangu ga Ngechuchu namaxã ga yema 12 ga norü ngúexü̃gü.
18Rü yexguma mechawa ínachibüeyane, rü Ngechuchu rü ñanagürü: —Aixcüma pemaxã nüxü̃ chixu rü wüxíe ya petanüwa i ñu̱xma chomaxã nua chibüxe tá tixĩ ya bexma choxü̃ íyaxuaxü̃xe —ñanagürü.
19Rü yexguma ga nümagü ga norü ngúexü̃gü rü poraãcü nangechaü̃gü. Rü inanaxügüe nax wüxichigü nüxna icachigüxü̃, rü ñanagürügü: —Pa Corix, ¿choma tá chixĩxü̃ i cuxü̃ íchayaxuaxü̃xü̃? —ñanagürügü.
20Rü nüma ga Ngechuchu nanangãxü̃ rü ñanagürü nüxü̃: —Wüxi i pema i 12 tanüwa i daatama poratuwa norü paũ iwaixẽẽxü̃ tá nixĩ i choxü̃ íyaxuaxü̃xü̃.
21Rü Tupana Nane ya duü̃xü̃xü̃ ixĩcü, rü tá nayu ngẽma Tupanaarü ore i ümatüxü̃ nüxü̃ ixuxü̃rüxü̃. Natürü wüxi i ngechaü̃xü̃chi nixĩ naxca̱x i ngẽma yatü i choxü̃ íyaxuaxü̃xü̃. Rü narümemae chi nixĩ ga noxtacüma taxũchima nax nabuxü̃ —ñanagürü.
22Rü yexguma ínachibüeyane, rü Ngechuchu nanayaxu ga paũ. Rü Tupanana moxẽ naxã, rü inanabücu, rü norü ngúexü̃güxü̃ nayanu. Rü ñanagürü nüxü̃: —¡Penayaxu̱x i ñaa paũ! Rü ngẽma rü chaxunechiga nixĩ —ñanagürü.
23Rü yemawena nanayaxu ga wüxi ga copu ga bínumaxã ããcuxü̃. Rü yexgumarüxü̃ ta Tupanana moxẽ naxca̱x naxãxíra, rü ñu̱xũchi norü ngúexü̃güna nanaxã. Rü guxü̃ma nawa naxaxegü.
24Rü ñanagürü nüxü̃: —Daa bínu ya chaugü i muxü̃ma i duü̃xü̃güca̱x ibacüchiga nixĩ. Rü yimáwa Tupana nanango̱xẽxẽ nax aixcüma yixĩxü̃ i norü uneta.
25Rü aixcüma pemaxã nüxü̃ chixu rü taxũtáma wena chayaxaxü ya daa bínu ñu̱xmatáta Tupana ãẽ̱xgacü ixĩxü̃wa bínu ya ngexwacaxü̃cü chayaxaxü —ñanagürü.
Ngechuchu nüxü̃ nixu rü Pedru rü tá nügü nixã nax norü ngúexü̃ yixĩxü̃
(Mt. 26.30-35; Lc. 22.31-34; Jn. 13.36-38)
26Rü ñu̱xũchi Tupanaarü wiyaegu nawiyaegü. Rü yemawena rü Oribunecüarü Ma̱xpǘnewa naxĩ.
27Rü yexguma ga Ngechuchu rü ñanagürü nüxü̃: —Guxãma i pema rü tá choxü̃ ípeta̱xgü. Erü ngẽmaãcü nüxü̃ nixu i Tupanaarü ore i ümatüxü̃ i ñaxü̃:
“Tá chayama̱x ya carnéruarü dauruxü̃,
rü tá nanaxüanemare i carnérugü”,
ñaxü̃.
28Natürü ngẽxguma marü yuwa ícharüdaxguwena, rü chaxíra tá pexü̃pa Gariréaanewa chaxũ —ñanagürü.
29Rü yexguma ga Pedru rü ñanagürü nüxü̃: —Woo guxü̃ma i togü cuxü̃ íta̱xgu, rü choma rü taxũtáma cuxü̃ íchata̱x —ñanagürü.
30Rü Ngechuchu nanangãxü̃ rü ñanagürü nüxü̃: —Aixcüma cumaxã nüxü̃ chixu rü ñomatama i chütaxü̃gu rü naxü̃pa nax taxree̱xpü̱xcüna yacaxü̃ i ota, rü tomaepü̱xcüna tá cugü quixã nax chorü duü̃xü̃ quixĩxü̃ —ñanagürü.
31Natürü nüma ga Pedru rü ñanagürüama: —Woo wüxigu cumaxã chayu̱xgu, rü taxũtáma chaugü chixã nax curü duü̃xü̃ chixĩxü̃ —ñanagürü. Rü guxü̃ma ga togü ga norü ngúexü̃gü rü ta yema ñanagürügü.
Ngechuchu rü Yechemaníwa nayayumüxẽ
(Mt. 26.36-46; Lc. 22.39-46)
32Rü yemawena rü Ngechuchu rü wüxigu norü ngúexü̃gümaxã nawa naxĩ ga wüxi ga nachica ga Yechemanígu ãégaxü̃. Rü Ngechuchu rü ñanagürü nüxü̃: —¡Nua perütogü rü choma rü tá yoxni yea chayayumüxẽ! —ñanagürü.
33Rü ñu̱xũchi ínayagagü ga Pedru, rü Chantiágu, rü Cuáü̃. Rü naxca̱x inaxügü ga nax poraãcü nangechaü̃xü̃ rü naxĩ̱xãchiãẽxü̃.
34Rü yexguma rü ñanagürü nüxü̃: —Poraãcü changechaü̃ rü chanaxĩ̱xãchiãxẽ, rü nagu charüxĩnü nax ngẽmamaxã tá chayuxü̃. ¡Rü nuxã perücho i pemax, rü ipedaue! —ñanagürü.
35Rü yexguma ga Ngechuchu rü yéaxüra naxũ. Rü ñaxtüanegu nanangücuchi. Rü Tupanana naxca̱x naca rü ngẽxguma chi Tupanaarü ngúchaü̃ yixĩxgu nax nawa ínanguxuchixẽẽãxü̃ca̱x i ngẽma ngúxü̃ i tá yangexü̃.
36Rü norü yumüxẽwa rü ñanagürü: —Pa Chaunatüx, cuxca̱x rü guxü̃ma natauxcha. ¡Rü nüxna choxü̃ ínanguxuchixẽxẽ i ñaa ngúxü̃ i tá cha̱u̱xca̱x ínguxü̃! Natürü chanaxwa̱xe i curü ngúchaü̃ cuxü rü tama i choxrü —ñanagürü.
37Rü ñu̱xũchi nataegu ga norü ngúexü̃gü íyexmagüxü̃wa. Rü nüxü̃ inayangau nax ínapeexü̃. Rü ñanagürü Pedruxü̃: —Pa Chimóü̃, ¿ícupe? ¿Tama ẽ̱xna namaxã cupora nax icudauxü̃, rü bai i wüxi i ora?
38¡Rü ipedaue, rü Tupanana naxca̱x peca nax pexü̃ nangü̃xẽxẽxü̃ca̱x nax tama choxü̃ ípetáxü̃ca̱x i ngẽxguma guxchaxü̃ pexca̱x ínguxgu! Erü aixcüma peãxẽwa rü ípememare, natürü pexene nixĩ i ngẽma turaxü̃ —ñanagürü.
39Rü wenaxarü ínixũ, rü noxrirüü̃tama nayayumüxẽ.
40Rü yexguma wenaxarü norü ngúexü̃güca̱x nataeguxgu, rü nüxü̃ inayangau nax wenaxarü ínapeexü̃, yerü poraãcü nayaxtaexüchi. Rü yemaca̱x ga nümagü rü tama nüxü̃ nacua̱xgü nax ta̱xacümaxã tá nangãxü̃güaxü̃.
41Rü norü tomaepü̱xcüna wenaxarü norü ngúexü̃güca̱x nataegu, rü ñanagürü nüxü̃: —¿Ñu̱xma rü ta ẽ̱xna ípepeeama rü iperüngüeama? ¡Rü marütama! Erü Tupana Nane nax duü̃xü̃xü̃ ixĩcü rü marü nawa nangu i ora nax yayauxgüãxü̃ nax pecaduã̱xgüxü̃na namugüãxü̃.
42¡Rü ipechigü, rü ngĩxã ítixĩ! Erü ñomama nixĩ i ngẽma choxü̃ íyaxuaxü̃xü̃ —ñanagürü.
Ngechuchuxü̃ niyauxgü
(Mt. 26.47-56; Lc. 22.47-53; Jn. 18.2-11)
43Rü yexguma íyadexayane ga Ngechuchu, rü ínangu ga Yúda ga norü ngúexü̃chire̱x ixĩxü̃. Rü nawe narüxĩ ga muxü̃ma ga duü̃xü̃gü ga taramaxã rü naimaxã ixãxnexü̃. Rü yema nixĩ ga duü̃xü̃gü ga yéma namugüxü̃ ga chacherdótegüarü ãẽ̱xgacügü rü ngúexẽẽruü̃gü ga mugüwa ngu̱xẽẽtaegüxü̃arü ãẽ̱xgacügü rü Yudíugüarü ãẽ̱xgacügü.
44Rü Yúda ga ínaxuaxü̃xü̃ rü marü yema duü̃xü̃gümaxã nanamexẽxẽ, rü ñanagürü: —Ngẽma nüxü̃ chachúxuxü̃ nixĩ ya Ngechuchu. Rü ngẽma tá nixĩ i piyauxgüxü̃ rü mea peyanáiãcüma peyagagüxü̃ —ñanagürü.
45Rü yemaacü Ngechuchuca̱x nixũ, rü ñanagürü nüxü̃: —Pa Ngúexẽxẽruxü̃ —ñanagürü. Rü ñu̱xũchi nanachúxu.
46Rü yexgumatama Ngechuchuxü̃ niyauxgü.
47Natürü wüxi ga Ngechuchutanüxü̃ nanawe̱xechi ga norü tara, rü yemamaxã chacherdótegüarü ãẽ̱xgacüarü duü̃xü̃xü̃ ínadaepachinü.
48Rü yexguma ga Ngechuchu rü yema duü̃xü̃güna naca, rü ñanagürü nüxü̃: —¿Tü̱xcüü̃ taragü rü naixmena̱xãgümaxã cha̱u̱xca̱x nua pexĩ nax choxü̃ peyarüyauxgüxü̃ca̱x ñoma wüxi i ngĩ́ta̱xaxü̃ chixĩxü̃rüxü̃?
49Rü guxü̃ ga ngunexü̃gu rü petanüwa chayexma ga yexguma Tupanapata ga taxü̃newa changu̱xẽẽtaegu, rü taguma choxü̃ piyauxgü. Natürü ñaa ñu̱xma ngupetüxü̃, rü nangupetü nax yanguxü̃ca̱x i Tupanaarü ore i ümatüxü̃ —ñanagürü.
50Rü yexguma ga guxü̃ma ga norü ngúexü̃gü rü nüxna nibuxmü. Rü nüxicatama yéma nanata̱xgü ga Ngechuchu.
51Natürü wüxi ga ngextü̱xücü ga düxruü̃maaxica nügü nuquecü nawe nixũchigü. Rü yema duü̃xü̃gü rü nayayauxgü.
52Natürü nüma rü nüxü̃ ninge̱x ga yema düxruxü̃, rü yemaacü ngexchiruãcüma niña.
Ãẽ̱xgacügüpe̱xewa Ngechuchuxü̃ nagagü
(Mt. 26.57-68; Lc. 22.54-55, 63-71; Jn. 18.12-14, 19-24)
53Rü yexguma ga yema duü̃xü̃gü rü chacherdótegüarü ãẽ̱xgacüpe̱xewa nanagagü ga Ngechuchu. Rü yexma nangutaque̱xegü ga guxü̃ma ga yema togü ga chacherdótegü ga ãẽ̱xgacügü ixĩgüxü̃, rü yema Yudíugüarü ãẽ̱xgacügü, rü yema ngúexẽẽruü̃gü ga mugüwa ngu̱xẽẽtaegüarü ãẽ̱xgacügü.
54Natürü ga Pedru rü yáxü̃gu nawe nixãchigü ñu̱xmata gumá chacherdótegüarü ãẽ̱xgacüpataa̱xtüwa nangu. Rü purichíagü ga Tupanapata ga taxü̃nearü dauruü̃gümaxã yéma ĩã̱xtüwa narüto. Rü nügü yéma nanaixü̃ üxüxü̃tawa.
55Rü yema chacherdótegüarü ãẽ̱xgacügü rü guxü̃ma ga yema ãẽ̱xgacütücumü rü naxca̱x nadaugü nax ñuxãcü tá yu Ngechuchumaxã naxuegugüxü̃. Natürü taxucürüwa nüxü̃ inayangaugü ga ta̱xacüca̱x tá nax yama̱xgüãxü̃.
56Yerü woo muxü̃ma ga duü̃xü̃gü rü nüxü̃ nixugüe ga doramare ga nachiga, natürü nügütanüwatama rü tama nawüxigu ga norü ore.
57-58Rü ñuxre ga togü inachigü rü doraxü̃mare nixugüe ga Ngechuchuchiga. Rü ñanagürügü: —Toma nüxü̃ taxĩnüe nax ñaxü̃: “Tá chanangutaü̃xẽxẽ ya daa Tupanapata ya taxü̃ne ya duü̃xü̃gü üxü̃ne. Rü tomaepü̱x i ngunexü̃gu tá chanaxü ya nai ya tama duü̃xü̃gü üxü̃ne”, ñaxü̃ —ñanagürügü.
59Natürü woo yema oremaxã, rü tama nawüxiguéga ga norü ore.
60Rü yexguma ga gumá chacherdótegüarü ãẽ̱xgacü rü guxü̃pe̱xewa inachi. Rü Ngechuchuna naca, rü ñanagürü: —¿Ẽ̱xna taxuxü̃maxã cunangãxü̃ i ñu̱xmax? ¿Rü ta̱xacü nixĩ i ngẽma nüxü̃ yaxugüxü̃ i cuchiga? —ñanagürü.
61Natürü ga Ngechuchu rü nangea̱xmare, rü taxuxü̃maama nanangãxü̃. Rü yemaca̱x ga nüma ga chacherdótegüarü ãẽ̱xgacü rü wenaxarü nüxna naca, rü ñanagürü: —¿Cuma yixĩxü̃ ya Cristu ya Nane ya Tupana ya duü̃xü̃gü nüxü̃ icua̱xüü̃gücü quixĩxü̃? —ñanagürü.
62Rü Ngechuchu rü ñanagürü nüxü̃: —Ngü̃. Ngẽma nüxü̃ quixuxü̃ chixĩ. Rü tá nüxü̃ pedau ya Tupana Nane ya duü̃xü̃xü̃ ixĩcü i ngẽxguma Tupana ya Guxü̃étüwa Ngẽxmacüarü tügünecüwawa nato̱xgu i ngẽxguma caixanexü̃gu núma naxũxgu —ñanagürü.
63Rü yexguma ga yema chacherdótegüarü ãẽ̱xgacü rü norü numaxã nügüchirugu nagáugü. Rü ñanagürü: —¿Tü̱xcüü̃ tanaxwa̱xe i to i duü̃xü̃gü i nüxü̃ ixugüxü̃ i nachiga?
64Rü pematama marü nüxü̃ pexĩnüe nax Tupanachiga chixri yadexaxü̃. ¿Rü ñuxũ ñapegüxü̃ i ñu̱xmax? —ñanagürü. Rü guxü̃ma wüxigu narüxĩnüe rü: —Aixcüma nixĩ nax chixexü̃ naxüxü̃ rü namexü̃ nax nayuxü̃ —ñanagürügü.
65Rü ñuxre ga nümagü rü inanaxügüe ga nüxna nax nacua̱i̱xgüexü̃. Rü nanatüxetügü rü ñu̱xũchi nüxü̃ nidagügü ñaxü̃maxã: —¡Nüxü̃ nacua̱x nax texé cuxü̃ idagüxü̃! —ñanagürügü. Rü yema Tupanapata ga taxü̃nearü dauruü̃gü ga purichíagü rü nanapechiwegü.
Pedru rü nügü nixa nax Ngechuchuxü̃ nacuáxü̃
(Mt. 26.69-75; Lc. 22.56-62; Jn. 18.15-18, 25-29)
66Rü yoxni ga Pedru rü ñaxtüwa ãẽ̱xgacüpataa̱xtüwa nayexma. Rü yexgumayane yéma ingu ga wüxi ga pacü ga gumá ãẽ̱xgacüarü duü̃xü̃ ixĩcü.
67Rü yexguma Pedruxü̃ nada̱u̱xgu ga yéma üxüxü̃tawa nügü nax nanaixü̃xü̃, rü mea nüxü̃ idawenü, rü ngĩgürügü nüxü̃: —Cuma rü ta namücü quixĩ i ngẽma Ngechuchu i Nacharétucüã̱x —ngĩgürügü.
68Natürü ga Pedru rü nügü nixã rü ñanagürü: —Choma rü tama nüxü̃ chacua̱x ya yimá. Rü tama nüxü̃ chacua̱x i ta̱xacüchiga nixĩ i ngẽma nüxü̃ quixuxü̃ —ñanagürü. Rü yexguma ga nüma rü gumá ĩpataa̱xtüarü düxétüwa naxũ ga norü ĩã̱xwa. Rü yexgumatama nica ga ota.
69Natürü ga yema pacü rü wenaxarü Pedruxü̃ idau, rü inaxügü ga yema togümaxã nüxü̃ nax yaxuxü̃, rü ngĩgürügü: —Ñaa rü wüxi i natanüxü̃ nixĩ —ngĩgürügü.
70Natürü nüma ga Pedru rü wenaxarü nügü nixã. Rü yixcamaxü̃ra rü yema duü̃xü̃gü ga yéma yexmagüxü̃ rü wenaxarü ñanagürügü nüxü̃: —Aixcüma nixĩ nax cuma rü ta ngẽma Ngechuchutanüxü̃ nax quixĩxü̃, erü wüxi i Gariréaanecüã̱x idexaxü̃rüxü̃ quidexa —ñanagürügü.
71Rü yexguma ga Pedru rü inanaxügü nax nügü yaxãxü̃, rü ñanagürü: —Aixcüma tama nüxü̃ chacua̱x i ngẽma yatü i nachiga pidexagüxü̃. Rü ngẽxguma doraxü̃ chixuxgu rü ¡Tupana choxü̃ poxcux! —ñanagürü.
72Rü yexgumatama norü taxree̱xpü̱xcüna nica ga ota. Rü yexguma ga Pedru rü nüxna nacua̱xãchi ga yema ore ga ü̃paacü Ngechuchu namaxã nüxü̃ ixuxü̃ ga ñaxü̃: “Naxü̃pa nax taxree̱xpü̱xcüna ota ica̱xaxü̃, rü cuma rü tá tomaepü̱xcüna cugü quixã nax chorü duü̃xü̃ quixĩxü̃”, ñaxü̃. Rü yexguma ga Pedru rü poraãcüxüchima naxaxu.
Currently Selected:
Ore i mexü̃ ga Márcu ümatüxü̃ 14: tcaP
Highlight
Share
Copy
Want to have your highlights saved across all your devices? Sign up or sign in
© 2022, Wycliffe Bible Translators, Inc. All rights reserved.