Litanga 34
34
1Kandi Dina mukana wa Leah, wa yivulira Yakobo, ya tsia kulola avakana vekivala. 2Na Shekem mwana wa Hamoru Muhivi, munene wekivala, ya mu lola, na a mu vugula, na a va halala naye, na a mwononya. 3Na mwoyo gwigwe gwa hambana na Dina mukana wa Yakobo, naye ya yanza mukana uyu, na a volera mukana makuva malahi. 4Kandi Shekem ya volera dada wewe Hamoru, na a vola, U mbugulire mukana uyu, a ve mukali wange. 5Kunangwa Yakobo ya hulira uyu yononya Dina mukana wewe; na avayai veve va li mu kyayiru halala nemitugu: na Yakobo ya kiring'ana kuduka lwa vadza. 6Na Hamoru dada wa Shekem ya tsia ku Yakobo kuvolerana naye. 7Na avayai va Yakobo va twula mu kyayiru lwa va hulira: na avandu yava va verera ligali, ni va vihirirwa muno, kigira ya kola kifwabwi mu Israeli ku va halala na mukana wa Yakobo; inkuva i ta dukana kukolwa. 8Na Hamoru ya volerana navo, na a vola, Mwoyo gwa Shekem mwana wange, gu kayirangwa ligali mukana wenyu: mwadza, mu mu he a ve mukali wewe. 9Na mwinye mu lombe lihilana nekwinye; mu ku he avakana venyu, na mwinye mu vugule ku avakana vetu. 10Na mwinye mu la menya halala nekwinye: na kivala ki la va imbiri wenyu; mu menye nokukiranya yimu, na mwenyolira miyandu yimu. 11Na Shekem ya volera dada wa Dina na avabotso veve, Mwadza, nyole tsimbabasi imbiri wenyu, na ku vyosi vya mu mbolera, nda ki haana. 12Mu teve ku inze ubukwi nevihaanwa vya mwenya, na inze nda haana kuli mu mbolera: navutswa mu mpe mukana a ve mukali wange. 13Na avana va Yakobo va tivulira Shekem na Hamoru dada wewe nobugadi, ni va vola, kigira ya li ni yononyi Dina mbotso wavo, 14ni va va volera, Si ku nyala kukola inkuva yiyi, kuha mundu wa vula kukevwa, mbotso wetu, kigira inkuva yiyi i la va tsisoni ku kwinye. 15Ku inkuva yiyi indala yeng'ine ya ku la bugirira ku mwinye: ni mu va ni mu bugirira kuva kuli kwinye, avasatsa venyu vosi va kevwe; 16kunangwa ku la mu ha avakana vetu, na kwinye ku la vugula avakana venyu, na ku la menya halala nemwinye, na ku la gwa ihiri indala. 17Navutswa ni mu va ni mu ta ku hulira mu kevwe; kunangwa ku la vugula mukana wetu, na ku la tsia iwetu.
18Kunangwa makuva gavo ga yanzidza Hamoru, na Shekem mwana wa Hamoru. 19Na musoleli si ya lindagira kukola inkuva yiyi mba, kigira ya li na a yanza mukana wa Yakobo: naye yidzominywa kuvita vosi avenyumba ya dada wewe. 20Na Hamoru na Shekem mwana wewe va duka ku kiribwa kyelidala lyavo, nokuvolerana na avasatsa velidala, ni va vola, 21Avandu yava va veye nemirembe ku kwinye; kunangwa ku leke va menye mu kivala kyetu, nokukirannya mu; kigira henza, kivala ki veye nobwiyangu bu duki kuvo; ku vugule avakana vavo kuva avakali vetu, nokuvaha avakana vetu. 22Navutswa inkuva indala yeng'ine va duke kubugirira kumenya halala na kwinye, kugwa ihiri indala, ni yiyi avasatsa vosi ku kwinye va kevwe kuli vava va kevangwa kevwe, kuli yava va kevangwa. 23Tsing'ombe tsyavo, nobutugi bwavo, nemitugu gyavo gyosi, si vi la va vyetu? Ku bugirire inkuva yiyi yeng'ine kuvo, navo va la menya halala na kwinye. 24Na vosi ava twula mu kiribwa kyelidala, va hulira makuva ga Hamoru na Shekem mwana wewe; na avasatsa vosi va kevwa; vosi ava twula mu kiribwa kvelidala 25Na ga duka ku lidiku lya kavaka, lwa va salira ligali, avayai vaviri va Yakobo, Simeoni na Levi, avabotso va Dina, va vugula sa mulala kivavi kikye, nokutsia kulidala yilyo makiriri, nokwiita avasatsa vosi. 26Kandi vita Hamoru na Shekem mwana wewe nobwogi bwekivavi, na va twulidza Dina mu inyumba ya Shekem, ni va tsia. 27Na avayai va Yakobo vadza ku yava aviitwa, ni va fwula lidala, kigira va li kwononya mbotso wavo. 28Na va hila vyayo vyamagondi, nevyetsing'ombe, na tsisukiri, na vyosi vya li mu lidala, na vyosi vya li mu mulimi; 29nobutugi bwavo bwosi, na avana vavo, na avakali vavo, va va vugula, ni va va fwula, nokuvalanya, kali vyosi vya li mu inyumba. 30Na Yakobo ya volera Simeoni na Levi, Mwinye mu ndambidzi, nokunkola kufunya ubudamano mu avandu vekivala yiki, hagati ha Vakanani na Vaperizi: na inze mbeye na vakekeke, va levuganya ku inze, nokunduya; na nda diva, inze nenyumba yange. 31Navo va vola, Ga dukanga a kole mbotso wetu kuli va kola wamalaya?
Currently Selected:
Litanga 34: MBE
Highlight
Share
Copy
Want to have your highlights saved across all your devices? Sign up or sign in
©Bible Society of Kenya, 1967