Litanga 19
19
1Kunangwa tsingelosi vaviri va duka Sodoma inyinga ya mgolova; na Loti yikala ha kiribwa kya Sodoma: na Loti ya va lola, na a singira kutsia kwagana navo; naye yeyinaminya na tsimoni tsitsye tsi henza hasi; 2na ya vola, Henza avami vange, mwevete, mmu goonya mwingire mu inyumba yomutugwa wenyu, nokugona, na mu saavidze virenge vyenyu, na mu la vuka mugamba tsuri, mu tsie. Navo va vola, Auwa, navutswa ku la va ku inzira ubudiku bei. 3Naye ya va goonya ligali; navo va girunkana na vingira mu inyumba yeye; naye ya vihula, na a va lombera ubukima bu ta li na mamera, na va lia. 4Navutswa lwa va kikiri kugona, avandu velidala, kali avandu va Sodoma, va kumbiridza inyumba, avasoleli na vahindira, avandu vosi vetsimbega tsyosi; 5na va langa Loti na va mu volera, Avandu va li kwingira ku ive ubudiku yibu, va veye haliki? U va lete kyova ku kwinye, ku va manye. 6Na Loti mwene ya tsia kyova kuvo ha muliango, na a hana muliango inyima wewe. 7Naye ya va volera Ngoonya mwinye avamitu, mu ta kola ubudamano yibu. 8Henza, mbeye navana vange vakana vaviri ava kikiri kumanya musatsa; mmu goonya, nda va leta ku mwinye kyova, mu va kole kuli mu lola kuva bulahi: navutswa mu ta kolera avandu yava kindu; kigira vingiye mu inyumba yange. 9Navo va vola, Vita inyima. Kandi va vola, Mundu uyu ya duka ku kwinye mumenya,, na nkani yenyanga kuva mukalagi: kalunu ku la ku kolera ubudamano kuvita yavo. Navo va mina ligali mundu uyu, Loti na visunda himbi kwononya muliango. 10Navutswa avandu yavo va nyira mukono gwavo, nokuleta Loti kuvo mu inyumba, nokuhana muliango. 11Kandi va duya avandu ava li ha muliango kyenyumba ni va vakulidza tsimoni, avakekeke navanene, va luha va vule kunyola muliango.
12Kunangwa avasatsa yava va teva Loti, U veye navandi hano? Navizala, kinga avana vayai vovo, kinga avakana vovo, na vosi va u veye navo mu lidala u va twulidze hano: 13kigira ku ia li dividza, kigira lilira lyavo li gwiye linene imbiri wa Yahova, na Yahova u ku tumi kulidividza. 14Kunangwa Loti ya twula na a volera navizala veve, ava kwa avakana veve, na a vola, Mu vuke, mu twule hano; kigira Yahova a la dividza lidala yili. Navutswa ku navizala veve ya li kuli mundu u kolanga kihenyahenye. 15Na lwa bwakya, tsingelosi va vukidza Loti, ni va vola, Vuka, u vugule mukali wowo, na avakana vovo ava veye hano, gase u la divira mu kivi kyelidala. 16Navutswa ya lindagira; na avandu yavo va mu gumira mukono, nomukono gwomukali wewe, nomukono gwavakana veve vaviri; Yahova a mu vera tsimbabasi: na va mu twulidza, nokumuvika kyova welidala. 17Kunangwa, lwa va va vika kyova, va va volera, U honnye livamwoyo lilyo; u ta henza inyima wowo, kandi u ta singira mu kivala kya Kereremu; wirukire mu kigulu, gase u la diva. 18Loti ya va volera, O, ga ta va ndiyo, mwami wange: 19henza kalunu, mutugwa wowo u nyoye tsimbabasi mu tsimoni tsitsyo, na ive u medi tsimbabasi ku inze, tsya u nkoleye inze ku lihonnya livamwoyo lyange; na inze si nyala kwirukira mu kigulu, gase ubudamano bu la ngwira, na nkudze; 20henza, lidala yili li veye himbi kwirukira mu, nalyo li veye likekeke: O nzirukire yo, (si li veye likekeke?) Na livamwoyo lyange li la hindira. 21Na ya mu volera, Henza, Nku bugiriye ku kindu yiki kandi, si nda dividza lidala lya u mboleye. 22Kola bwangu, wirukire yo; kigira si nnyala kukola kindu kuduka lwa u veye yo. Kunangwa lieta lyelidala lya langwa Zoaru.
23Liuva lya tonga ku lirova lwa Loti yingira Zoaru. 24Kunangwa Yahova ya kupidza ku Sodoma na Gomora kibiridi na muliru kutwula ku Yahova migulu; 25na a dividza madala yaga na Kereremu kyosi, navo vosi avomu madala yaga, na vyosi vya mera ku lirova. 26Navutswa mukali wewe ya li inyima, na yekevuka, na ya gwa munara gwomunyu. 27Na Abrahamu yanegira mabwebwe ha ya li kusingira imbiri wa Yahova: 28na ya henza ku luvega lwa Sodoma na Gomora, noku luvega lwekivala kyosi kye Kereremu, na a lola, na, henza, mwoki gwekivala gu vuya kuli mwoki gwekisambiru kinene.
29Na ga duka, lwa Nyasaye ya dividza madala gekivala kya Kereremu, yidzulitsa Abrahamu, na a twulidza Loti hagati helidividzwa, lwa ya dividza amadala ga Loti ya menya mu. 30Na Loti yanegira kutwula Zoaru, na a menya mkigulu, navakana veve vaviri halala naye; kigira ya tia kumenya mu Zoaru: na a menya mu luhangaywa, uyu navakana veve vaviri. 31Na uyu wa tanga kwivulwa ya volera muke, Dada wetu a veye musakulu, na si ha li nomusatsa mu lirova kuva nekwinye kuli miima gyelirova lyosi: 32genda ku nwehidze dada wetu iwaini, na ku la va halala naye, ku singeridze visukululwi ku dada wetu. 33Navo va nwehidza dada wavo iwaini ubudiku zana, na uyu wa tanga kwivulwa yingira na a va halala na dada wewe; naye si ya manya lwa ya ingira, kinga lwa ya twula. 34Kunangwa mugamba uyu wa tanga kwivulwa ya volera muke Henza, nda li halala na dada wange mgolova: ku mu nwehidze iwaini kandi ubudiku buno; na ive wingire kuva halala naye, ku singeridze visukululwi ku dada wetu. 35Kandi va nwehidza dada wavo ku budiku yibwo kandi: na muke yingira kuva halala naye; na si ya rnanya lwa yingira, kinga lwa ya twula. 36Na ndiyo avakana vombi va Loti va li inda ku dada wavo. 37Na munene yivula mwana muyai, na a mu gulika Moabu: wa zana ni dada wa Avamoabu kuduka lero. 38Kandi muke yivula mwana muyai, na a langa lieta lilye Ben-ammi, wa zana ni dada wa avana va Amon kuduka lero.
Currently Selected:
Litanga 19: MBE
Highlight
Share
Copy
Want to have your highlights saved across all your devices? Sign up or sign in
©Bible Society of Kenya, 1967