Litanga 18
18
1Na Yahova ya loleka ku Abrahamu, himbi misala gya Mamre, lwa yikala mu kiliango kyelihema lilye inyinga yoluya lwombasu; 2na ya ginga tsimoni tsitsye, na lola, na henza, avandu vabaka va singira himbi naye: na lwa ya va lola, ya tsia tsimbiru kuvugana navo kutwula ha kiliango kyelihema, na yinama hasi kuduka ku marova, 3na a vola, Mwami wange, ni mba ni nyoye tsimbabasi imbiri wowo, nku saala, u ta vita kutwula ku mutumekiri wowo: 4amadzi makekeke ga letwe, mu savidze virenge vyenyu, mwesosidzemmusalayigu: 5kandi nda leta vyokulia vikekeke, mweleminye mwoyo gwenyu; lwenyima mu a la vita kutsia imbiri: kigira mu mali kuduka ku mutumekiri wenyu. Navo va vola, kuli u voye, u kole ndiyo. 6Kunangwa Abrahamu ya tsia bwangu ku Sara mu lihema, na vola, Kola bwangu u lombe vigero vivaka vyobusie bunyuki, u bu mine, u lombe mikati. 7Kandi Abrahamu ya nyagula tsimbiru kutsia ku kyayo na a vugula Ikimoli kidoto na kilahi na a ha mutugwa; nave ya kola bwangu kukilomba. 8Kandi ya vugula maguta, na maveere, na kimoli kya ya lomba, na a va vikira imbiri wavo; naye ya singira himbi kuvo mmusala, na va lia.
9Navo va mu volera, Sara mukali wowo a veye haliha? Naye ya vola, Henza, a veye mu lihema. 10Na ya vola, Ligali ndirana ku ive lwa tsinyinga tsi duka; na henza, Sara mukali wowo a livula mwana muyai. Na Sara ya hulira ha kiliango kyelihema, kya li inyima wewe. 11Ku yaga Abrahamu na Sara va li vakungu ligali, nokuva nemihiga minyingi; lya li li mali kutwula ku Sara lilonda miima gyavakali. 12Kunangwa Sara ya sekera mmwoyo mwimwe, na a vola, Lwa nduki kuva mekeere, nda nyola busangali, musatsa wange kandi a veye musakulu? 13Na Yahova ya volera Abrahamu, Kigira ki Sara a sekanga, nokuvola, Inze ligali, ndivula mwana lwa mbeye mukeere? 14Ha veye nekindu ku vyosi ki nyala kutama Yahova? Ku inyinga ya lagwa ndirana ku ive, lwa tsinyinga tsi duka, na Sara a la nyola mwana muyai. 15Hene yaho Sara yambakana, na a vola, Si nda seka mba; kigira ya tia. Naye ya vola, Auwa, navutswa wa seka.
16Kunangwa avandu yavo va twula ha zana, na va henza ku luvega lwa Sodoma: na Abrahamu ya tsia halala navo kuvahereka ku inzira. 17Na Yahova ya vola, Mbise ku Abrahamu kya nkolanga? 18Kigira Abrahamu ligali a la duka kuva ihiri inene neyetsingulu, na tsihiri tsyosi tsyelirova tsi la gasidzirwa muye? 19Kigira inze mmu manyi, kuduka a lage avana veve nevenyumba yeye inyima wewe, va duke kugumira inzira ya Yahova, kukola ubulungi nelikalaga lilungi; Yahova a duke kuleta ku Abrahamu aga ya vola kuye. 20Kunangwa Yahova ya vola, Ligali lilira lya Sodoma na Gomora li veye linene, na ligali, ubwoni bwavo bu veye bunene ligali; 21kalunu nda sulunguta, kulola ni va va ni va kola kuli lilira lyavo li duki ku inze; ni ga ta li ndiyo, nda manya.
22Kunangwa avandu va girumkana kutwula yaho, na va tsia ku iuvega lwa Sodoma: navutswa Abrahamu ya tigala kusingira imbiri wa Yahova. 23Na Abrahamu yesunda himbi, na a teva, U la dividza avalungi halala navadamano? 24Ni i va va nyoleka avalungi makumi gatano mu lidala: u la li dividza naho u la li vera tsimbabasi kigira avalungi amakumi gatano va veye mu? 25Kukola kuli yaga ga ta va ku ive, kudividza avalungi halala na vadamano, kuduka avalungi va ve kuli avadamano; yago ga ta va ku ive: Mukalagi welirova lyosi si a la kola bulungi? 26Na Yahova ya vola, Ni mba ni nyola mu Sodoma mu lidala, avalungi makumi gatano, nda honnya lyosi kigira yavo. 27Kandi Abrahamu ya tivula na a vola, Henza, kalunu, nduviriye kuvolerana na Mwami, inze u veye ulugukyi na ligoke vutswa: 28ni i va va daka vatano ku makumi gatano avalungi: u la dividza lidala ku lidaka lya vatano? Naye ya vola, Si nda li dividza ni i va va va ho amakumi gane na vatano. 29Na ya mu volera kandi, na a vola, Ni i va va va ho amakumi gane. Naye ya vola, Si nda kola kigira yavo makumi gane. 30Na ya vola, O Mwami a ta vihirirwa, na inze nda vola: ni i va va va ho amakumi gavaka. Naye ya vola, Si nda kola ni ndola ho makumi gavaka. 31Na ya vola, Henza kalunu, Inze nsingiye kuvolerana na Mwami: mbula va la nyoleka ho amakumi gaviri. Naye ya vola, Si nda li dividza kigira yavo makumi gaviri. 32Kandi ya vola, O Mwami a ta vihirirwa, na nda vola kandi lulala lweng'ine: mbula va la nyoleka ho likumi. Naye ya vola, Si nda li dividza kigira yavo likumi. 33Kunangwa Yahova ya tsia, lwa ya mala kuvolerana na Abrahamu: na Abrahamu yirana hehe.
Currently Selected:
Litanga 18: MBE
Highlight
Share
Copy
Want to have your highlights saved across all your devices? Sign up or sign in
©Bible Society of Kenya, 1967