Kutwula 34
34
1Kandi Yahova ya volera Musa, Wevadzire vibao vyamagina viviri kuli vyembiri: na inze nda ng'oda ku vibao makuva aga li ku vibao vyembiri, vya ive wononya. 2Na wetegeke mugamba, na wanegire mugamba mu kigulu kya Sinai, mwene u singire imbiri wange ku isonga yekigulu. 3Na a tanegira mundu kali mulala halala nive; kandi mundu kali mulala a ta loleka mu kigulu kyosi; kandi va taya magondi kinga tsing'ombe himbi na kigulu yikyo. 4Naye ya vadza vibao viviri vyamagina kuli vyembiri; na Musa ya vuka mugamba mabwebwe, ni yanegira mu kigulu kya Sinai, kuli Yahova ya mu laga, na a ginga vibao viviri vyamagina mu mukono gwigwe. 5Na Yahova yikira mu lilesi, na a singira imbiri wewe, nokwilwadza lieta lya Yahova. 6Na Yahova ya vita imbiri wewe, ni yilwadza, Yahova, Yahova, Nyasaye wetsimbabasi nowobugasu, umuhoma, wa galaha ku butima, nomuhinda wobuyanzi na ageligali; 7u hedzanga avandu tsielfu liverererwa, musamehi wobudamano, na mahyolo nobwoni; na a la vula kuvola kali hakuzuzu, mudamano a veye mulahi, na wokuvika ubwoni bwavadada ku avana, noku avana va avana, ku likula lya gavaka noku lya gane. 8Na Musa ya kola bwangu, ni yinama mutwe gwigwe, nokusigamira. 9Naye ya vola, Kalunu ni mba ni nyoye liverererwa imbiri wowo, O Mwami, nku goonya, Mwami, u gende hagati hetu; kigira va veye avamagoti madinyu; na u samehe mahyolo getu na ubwoni bwetu, na u ku vugule kuva miyandu gyigyo.
10Naye ya vola, Henza, nombanga lilagana: na nda kola vyokugenya imbiri wa avandu vovo vosi, kuli vi kikiri kukolwa mu lirova lyosi, kinga mu ihiri kali indala; na avandu vosi ava u veye hagati havo, va la lola miyinzi gya Yahova; kigira ni inkuva yokutihidza ya nkola ku ive. 11Ive u kole aga nku laganga lero: henza, nda kunga kutwula imbiri wowo Avaamori, na Avakanani, na Avahiti, na Avaperizi, na Avahivi, na Avajebusi. 12Welinde mwene, gase u la kola lilagana na avandu vekivala kya u tsia yo, gase li la va mutego hagati hoho: 13navutswa mu la vunanya ubwali bwavo, nokusambula minara gyavo, nokutema misala gyemiluka gyavo; 14(kigira u la vula kusigamira munyasaye wundi: kigira Yahova, welieta lilye li veye Wokukendeka, a veye Nyasaye wobukendeki); 15gase u la lomba lilagana na avandu vekivala, navo va tsia mu ma buheyi bwe lilonda vanyasaye vavo nokwiitira avanyasaye vavo tsisadaka, na mulala a ku langa, nive u la lia ku isadaka yeye: 16na u la kwehidza avayai vovo ku avakana vavo, na avakali zana va la tsia mu buheyi bwelilonda avanyasaye vavo, nokung'usa avayai vovo kutsia mu buheyi bwelilonda avanyasaye vavo. 17U telombera avanyasaye avobunyinda.
18Lilia lyobukima bu ta li na mamera, ga ku dukira kulilinda. U la lagira ubukima bu ta li na mamera madiku gatano na gaviri, kuli nda ku laga, inyinga ya tovolwa mu mweli gwa Abibu; kigira mu mweli gwa Abibu wa twula mu Egepeti. 19Ku vyosi vya tanga kwivulwa vi veye vyange; noku mitugu gyigyo gyosi gyi veye gyekisatsa, yigyo gyi tanga kwivulwa, ing'ombe na ligondi. 20Na kya tanga kwivulwa kyesukiri, u la ki kirannya kimeme: kandi nu u va nu u tenya kukikirannya u la vunanya ligoti. Vosi ava tanga kwivulwa ku avayai vovo, u la va tungira. Kandi a ta va ho u duka imbiri wange na makono makaya. 21U la kola miyinzi madiku gatano na lilala, navutswa ku lidiku lya gatano na gaviri u la sosa: inyinga yokulima na inyinga yeligesa u la sosa. 22Na u la linda lilia lya masidza nalyo li veye lyobuhya bweligesa lyengano, na lilia lyokutera mu lyekiheri kyomuhiga. 23Ku muhiga mulala avasatsa vovo vosi va la vugana hali kavaka, imbiri wa Mwami Yahova, Nyasaye wa Israeli. 24Kigira nda kunga tsihiri imbiri wowo, na nda meda tsinzako tsitsyo: kandi si ha la va nomundu u kayirwa kivala kikyo, lwa wanegira kuloleka imbiri wa Yahova Nyasaye wowo hali kavaka ku muhiga mulala. 25U ta haana masahi gekihaanwa kyange halala nobukima bu veye na mamera; kandi kihaanwa kyelilia lyelipasaka si ki la tigala kuduka mugamba. 26Gokutanga kwenga gamarova gogo u la ga leta mu inyumba ya Yahova Nyasaye wowo. U ta dekera kimeme mu maveere ga mama wakye.
27Na Yahova ya volera Musa U ng'ode makuva yaga: kigira kuli makuva yaga nombi lilagana nive na Israeli. 28Naye ya li ho halala na Yahova madiku makumi gane mbasu nobudiku; na ya vula kulagira ubukima, kinga kunwa amadzi. Naye ya ng'oda makuva ga lilagana ku vibao, amalago likumi.
29Na ga duka, lwa Musa ya sulunguta kutwula mu kigulu kya Sinai nz vibao viviri vyelilolekidza mu mukono gwa Musa, lwa ya sulunguta kutwula mu kigulu, Musa si ya manya ligodo lyomumoni mwime lya ng'ereng'ana kigira livolerana lilye naye. 30Na Haruni na avzna va Israeli vosi lwa va lola Musa, henza, ligodo lyomumoni mwimwe li ng'ereng'ani; navo va tia kwisunda himbi naye. 31Na Musa ya va langa; na Haruni na avakulundu vosi velivugana virana kuye: na Musa ya va volera makuva. 32Na lwenyima avana va Israeli vosi vesunda himbi: naye ya va ha mu lilaga makuva gosi ga Yahova ya volerana naye mu kigulu kya Sinai. 33Musa lwa ya mala kuvolerana navo ya kunika mumoni mwimwe nengubo inzasasu. 34Navutswa Musa lwa yingira imbiri wa Yahova kuvolerana naye, ya twulidza ingubo inzasasu, kuduka, lwa ya twula; naye ya tsia kyova na a volera avana va Israeli yaga aga ya lagwa. 35Na avana va Israeli va lola mumoni mwa Musa, ligodo lyomumoni mwa Musa lya ng'ereng'ana: na Musa ya kunika mumoni mwimwe nengubo inzasasu kandi, kuduka lwa yingira kuvolerana naye.
Currently Selected:
Kutwula 34: MBE
Highlight
Share
Copy
Want to have your highlights saved across all your devices? Sign up or sign in
©Bible Society of Kenya, 1967