Kutwula 33
33
1Kandi Yahova ya volera Musa Mu twule, mwanegire, ive na avandu ava wa leta kutwula mu kivala kya Egepeti, mu tsie mu kivala kya ndesuhira Abrahamu, na Isaka na Yakobo, nokuvola, Nda ha kisukululwi kikyo kivala yiki: 2na nda tuma ingelosi imbiri wowo, na nda kunga Avakanani, na Avaamori na Avahiti, na Avaperizi, na Avahivi, na Avajebusi: 3kuduka mu kivala ki gangalukanga amaveere na ubwuki: kigira inze si ndanegira hagati henyu; kigira mu veye avandu ava magoti madinyu; gase nda mu dividza ku inzira. 4Na avandu lwa va hulira makuva madamano yaga, va syoma: si ha li nomundu wivika vyokwisiaha vivye. 5Na Yahova ya volera Musa, U volere avana va Israeli, Mwinye mu veye avandu ava magoti madinyu; inze, ni mba ni ngenda hagati henyu idakika indala, nda mu dividza: kunangwa mu navule vyokwisiaha, nduke kumanya kya mmukolera. 6Na avana va Israeli va navula vyokwisiaha kutwula mu kigulu kya Horebu nokutsia hambiri.
7Na Musa ya vugula lihema na a lyombaka kyova wa hokusosa, ihale ku ha zana; na a li gulika, Lihema lyokuvuganira mu. Na ga duka, ku vosi sa mulala wenya Yahova ya twula kutsia ku lihema lyokuvuganira mu, lya li kyova wa hokusosa. 8Na ga duka, lwa Musa ya twula kutsia ku Lihema, avandu vosi va vuka, ni va singira, sa mulala mu kiliango kyelihema lilye, na a henza Musa kuduka lwa ya mala kwingira mu Lihema. 9Kunangwa Musa lwa yingira mu Lihema, munara gwelilesi gwika hasi, na gwa singira imbiri wekiliango kye Lihema: na Yahova ya volerana na Musa. 10Na avandu vosi va lola munara gwelilesi ni gu singiye imbiri wekiliango kye Lihema: na avandu va singira nokusigamira, sa mulala mu kiliango kyelihema lilye. 11Na Yahova ya volerana na Musa moni na moni, kuli mundu a volerana nomulina wewe. Ma yirana hokusosa: navutswa mutumekiri wewe Joshua, mwana wa Nuni, musoleli, si ya twula ku Lihema mba.
12Na Musa ya volera Yahova, Henza, u mbolera, Wanegiridze avandu yava: na u vuli kummanya ni bwaha wa u li tuma halala ninze. Na u voye, Nku manya lieta lilyo, kandi u nyoye tsimbabasi imbiri wange. 13Kunangwa, kalunu nku saala, ni mba ni nyoye tsimbabasi imbiri wowo, u mmannye tsinzira tsi tsyo, inze nduke kukumanya, nduke kunyola liverererwa imbiri wowo: na widzulitse ihiri yiyi i veye avandu vovo mwene. 14Naye ya vola Liva lyange li la tsia nive, na nda ku ha ubwelemeridzi. 15Naye ya mu volera, Liva lilyo ni li vula kutsia ninze, u ta kwanegiridza kutwula hano mba. 16Kigira, kalunu ga la manyikana ndi inze nyoye liverererwa imbiri wowo, inze na avandu vovo? Si ga li ku litsia lilyo halala nekwinye, kuduka inze na avandu vovo, kwahulwa ku avandu vosi ava veye mu lirova?
17Na Yahova ya volera Musa Nda kola yaga kandi ga u voye, kigira u nyoye liverererwa imbiri wange, na nda ku manya lieta lilyo. 18Naye ya mu volera, Nku goonya kalunu, u mmannye ubukumi bubwo. 19Naye ya vola, Nda vitidza ubulahi bwange bwosi imbiri wowo, na nda landidza lieta lya Yahova imbiri wowo; nda gasidza uyu wa nyenya kumugasidza, na nda vererera uyu wa nyenya kumuvererera. 20Kandi ya vola, Si u nyala kundola mmoni mwange; kigira mundu si a la ndola nokuva mwoyo. 21Na Yahova ya vola, Henza, ha veye ha luvega himbi na inze, na ive u la singira ku lwanda: 22na ga la va, inyinga ubukumi bwange bu vitanga, nda ku vika mu lubwa lwolwanda, na nda ku kunika nomukono gwange kuduka lwa mmali kuvita: 23ma nda twulidza mukono gwange, na u la lola mgongo gwange; navutswa mmoni mwange si mu la loleka mba.
Currently Selected:
Kutwula 33: MBE
Highlight
Share
Copy
Want to have your highlights saved across all your devices? Sign up or sign in
©Bible Society of Kenya, 1967