Kutwula 31
31
1Na Yahova ya volera Musa, nokuvola, 2Henza, nangiye I ku lieta lilye, Bezaleli, mwana wa Uri, mwana wa Huru, wehiri ya Yuda: 3na mmali kumwizulitsa Roho wa Nyasaye, mu bugeeri, nomu limanya, nomu busidza bwemiyinzi tsingano tsyosi, 4kulungikidza miyinzi gyobusidza, kusidzaha mu ithahaba nomu ifetha, nomu mugasa, 5nomu livadza magina gokuhandidzwa, noku livadza misala, nokusidzaha mu miyinzi tsing'ano tsyosi. 6Na inze, henza, inze mbiki halala naye, Oholiabu, mwana wa Ahisamaku wehiri ya Dan; kandi mbiki ubugeeri mu myoyo gya vosi avobugeeri, va lombe vyosi vya nda ku laga: 7lihema lyokuvuganira mu, na lisanduku lyelilolekidza na intebe yetsimbabasi i veye ku iisanduku, na viju vyosi vya Lihema, 8na imeza na viju vyayo, na kinara kyetsitaya kisiye na viju vyakyo vyosi, na ubwali bwekimuli, 9na ubwali bwokusamba kihaanwa halala na viju vyabwo vyosi, na lwero na bwikaliru bwalwo, 10na va la lomba tsingubo tsindahi, na tsingubo tsintakatifu tsya Haruni musalisi, na tsingubo tsya avana veve, kutumika mmiyinzi gyomusalisi, 11na maguta gokuvaka, na kimuli kya vifunyanga mwayu vilahi kya hatakatifu: kuli gosi ga nda ku laga va la kola ndiyo.
12Na Yahova ya volera Musa, nokuvola, 13U volere avana va Israeli, na u vole, Ligali mu la gumira masabato gange: kigira ga veye kilolekidzu hagati hange na mwinye mu visukululwi vyenyu vyosi; mu duke kumanya inze mbeye Yahova u takasanga mwinye. 14Kunangwa mu la n gumira lisabato; kigira li veye litakatifu ku mwinye: ku vosi u lyononnya ligali a liitwa; kigira ku vosi u koia miyinzi kulyo a la dividzwa kutwula mu avandu veve. 15Miyinzi gyi la kolwa mmadiku gatano na lilala; navutswa lidiku lya gatano na gaviri li veye lisabato lyobusosi bwelyehodziridza, litakatifu ku Yahova; ku vosi u kola kali muyinzi mulala ku lidiku lyelisabato, ligali a liitwa. 16Kunangwa avana va Israeli va la gumira lisabato, kuhenza lisabato mu visukululwi vyavo, li ve lilagana lyemihiga nemihiga. 17Li veye lilolekidza hagati hange na avana va Israeli lyemihiga nemihiga: kigira mmadiku gatano na lilala Yahova ya lomba ligulu na lirova, na ku lidiku lya gatano na gaviri yelemeridza nokusosa.
18Na Yahova lwa ya mala kuvolerana na Musa mu kigulu kya Sinai ya mu ha vibao viviri vyelilolekidza vibao vya magina, vya Nyasaye ya ng'oda nekidete kikye.
Currently Selected:
Kutwula 31: MBE
Highlight
Share
Copy
Want to have your highlights saved across all your devices? Sign up or sign in
©Bible Society of Kenya, 1967