Kutwula 30
30
1Kandi u la lomba ubwali bwokuvuyidza kimuli: u la bu lomba nomusala gwe kikuma. 2Ubutambi bwabwo bu la va ligera lyomukono mulala, na ubugalamu bwabwo bu la va ligera lyomukono mulala; tsimbega tsyosi tsi la leng'ana; na budiguluku bwabwo bu la va ligera lyamakono gaviri: na tsinziga tsyabwo tsi la va tsyekindu kilala nabwo. 3Kandi u la handidza ku ithahabu indahi, ku luvega lwegulu, nombalu mwabwo tsimbega tsyosi, na tsinziga tsyabwo; na u la bu lombera itaji yethahabu kubukumbiridza tsimbega tsyosi. 4Na u la lomba tsimingiri tsiviri tsyethahabu, nokutsivika isi wetaji yabwo; mbalu mwabwo mwombi u la tsi vika mu tsimbega tsyabwo tsyombi; na tsi la va ho kuvikira misala gyokuhuginga. 5U la lomba misala gyabwo ku musala gwe kikuma nokuhandidza ku ithahabu. 6Na u la bu vika imbiri wengubo yokukinga i veye himbi nelisanduku lyelilolekidza, imbiri wentebe yetsimbabasi, veye ku lisanduku lyelilolekidza, ha nda vugana na ive. 7Na Haruni a la vuyidza kimuli kyokufunya mwayu kubwo: migamba gyosi, lwa a lomba tsitaya a la ki vuyidza. 8Na lwa Haruni a hambidza tsitaya tsya mgolova a la ki vuyidza, ki ve kimuli kya kazozo imbiri wa Yahova mu visukululwi vyenyu vyosi. 9Mu ta vuyidza ku vimuli vindi vigeni, kinga kihaanwa kyokusambwa, kinga kihaanwa kyobusie; kandi mu ta tsuka ku kihaanwa kyokunwa. 10Na Haruni a la lomba ku tsinziga tsyabwo kyokukunlka ubwoni inyinga indala ku muhiga; a la lomba kyokukunika ubwoni na masahi gekihaanwa kyobwoni inyinga indala ku mukiga mu visukululwi vyenyu vyosi: bu veye butakatifu ligali ku Yahova.
11Na Yahova ya volera Musa, na a vola, 12Lwa u validza avana va Israeli, kuli livalidza lyavo li loleka, mundu sa mulala a la haana ku Yahova mutungu kigira mwoyo gwigwe, inyinga u va validza; iplegi i vule kuva kuvo lwa u va validza. 13Na kya va tunga ni yiki, sa mulala ku yava ava validzeywi a la tunga inusu yeshekeli kuli ishekeli ya hatakatifu; (ishekeli i veye igera makumi gaviri), inusu yeshekeli i ve kihaanwa ku Yahova. 14Sa mulala ku yavo ava validzeywi kutwula ku uyu weliduka lilye li veye mihiga makumi gaviri na kuvita, a la haana ku Yahova kihaanwa zana. 15Avatugi si va la leta kuvita, kandi avadaka si va la leta kigeheru, ku inusu yeshekeli zana, lwa va leta kihaanwa ku Yahova, kulombera miyoyo gyenyu kyokukunika ubvvoni. 16Na u la vugula ku avana va Israeli, ifetha yokukunika ubwoni, na u la gi vika i ve yobutumekiri bwelihema lyokuvuganira mu, i ve kyokwidzulitsira avana va Israeli imbiri wa Yahova, kulombera miyoyo gyenyu kyokukunika ubwoni.
17Na Yahova ya volera Musa, na a vola, 18U la lomba lwero lwomugasa, kandi bwikaliru bwalwo bwomugasa, hokwisinga. Na u la lu vika hagati helihema lyokuvuganira mu na ubwali, na u la vika mu amadzi. 19Na Haruni na avana veve va lisava makono gavo na virenge vyavo ha zana: 20lwa vingira mu lihema lyokuvuganira mu, va lisava mmadzi, va vule kukudza; kinga lwa visunda ku bwali kutumika, nokusamba kihaanwa kyokusambwa kya haanwa ku Yahova. 21Va lisava makono gavo na virenge vyavo, va vule kukudza: makuva yaga ga la va lilaga kuvo mihiga nemihiga, ku uyu noku visukululwi vivye mu makula gavo gosi.
22Kandi Yahova ya volera Musa, na a vola, 23U vugule kandi vifunyanga mwayu mulahi: imanemane yere yetsishekeli tsimia tsitano, na mudalasini i duka kuli inusu ku yiyo, kuli tsishekeli tsimia tsiviri na makumi gatano, na indago inulu tsimia tsiviri na makumi gatano, 24na ikida yetsishekeli tsimia tsitano, kuli ishekeli ya hatakatifu, na maguta gomuzeituni g'a duka ihin; 25na u la ga lomba ga ve maguta matakatifu gokuvaka, agokufunya mwayu ga tsukanywa kuli likola lyobusidza bwomutsukanyi wevifunyanga mwayu: ga la va maguta matakatifu gokuvaka. 26Na u la vaka namaguta zana, lihema lyokuvuganira mu, na lisanduku lyelilolekidza, 27na imeza na viju vyayo vyosi, na kinara kyetsitaya na viju vyakyo, na ubwali bwokuvuyidza kimuli, 28no ubwali bwokusamba kihaanwa na viju vyabwo vyosi, no lwero na bwikaliru bwalwo. 29Na u la takasa vindu yivi vyosi, vi ve vitakatifu ligali: ku vyosi ki dira ku vindu yivyo ki la va kitakatifu. 30Na u la vaka Haruni na avana veve, nokuvatakasa, va ntumekire mmiyinzi gyobusalisi. 31Na u la volera avana va Israeli, nokuvola, Yaga ga la va maguta matakatifu gokuvaka ku inze mu visukululwi vyenyu vyosi. 32Ga la vula kutsukwa ku mubiri gwomundu, kandi mu ta lomba gandi kufwanana na yaga, ku litsukanywa lyago; ga veye matakatifu, kandi ga la va matakatifu ku mwinye. 33Ku vosi u li tsukanya maguta kufwanana na yaga, kinga ku vosi u li vika maguta yaga ku mugeni, a la dividzwa kutwula mu avandu veve.
34Kandi Yahova ya volera Musa, U vugule vifunyanga mwayu vilahi, isitakite, na lyonoka, na igalibane; vifunya mwayu vilahi halala na kimuli: ku yivi vyosi sa kilala u la vugula klgero kilala; 35na u la lomba kimuli ki funyanga mwayu kuli likola lyobusidza bwomutsukanyi wevifunyanga mwayu, ki hambiridzwa nomunyu, kilahi na kitakatifu: 36na u la vugula kukyo vikekeke, nokuduvulanya ligali, nokukivika imbiri welilolekidza mu lihema lyokuvuganira mu, ha ndi vugana na ive: ki la va ku mwinye kitakatifu ligali. 37Na kimuli kya u li lomba, ku litsugana lyakyo mu telombera mba: ku mwinye ki la va kitakatifu kya Yahova. 38Ku vosi u li lomba ku lugano lwakyo, a duke kuhulira lifunya lyakyo, uyu a la dividzwa kutwula ku avandu veve.
Currently Selected:
Kutwula 30: MBE
Highlight
Share
Copy
Want to have your highlights saved across all your devices? Sign up or sign in
©Bible Society of Kenya, 1967