Kutwula 18
18
1Kunangwa Jethro, musalisi wa Midiani, navizala wa Musa ya hulira gosi ga Nyasaye ya kolera Musa, na Israeli avandu veve, kuli Yahova ya twulidza Israeli mu Egepeti. 2Na Jethro, navizala wa Musa, ya vugula Zipora, mukali wa Musa, inyima wa ya mu galukidza 3halala na avana veve vaviri, ava lieta lya mulala lya gulikwa Gerishom; kigira ya vola, Inze mmenyanga mumenya mu kivala kyobumenya: 4na lieta lya wundi lya gulikwa, Eliezeru; kigira ya vola Nyasaye wa dada wange, ya li mukonyi wange, na a nkonya ku kivavi kya Farao: 5na Jethro, navizala wa Musa, yadza ku Musa, halala nomukali wa Musa na avana veve, mwigendinyama ha ya lomba busosero bwibwe, ha kigulu kya Nyasaye: 6naye ya volera Musa Inze Jethro, navizala wowo, nduki ku ive, halala nomukali wowo na avana veve vaviri halala naye. 7Na Musa ya twula na a tsia kuvugana na navizala wewe, naye ya mu sigamira, na a mbusa; ni va tevana liva lyavo; navo vingira mu lihema. 8Na Musa ya volera navizala wewe gosi ga Yahova ya kolera Farao, noku Avaegepeti kigira Israeli, na lidambidza lyosi lya va gwira ku inzira na kuli Yahova ya va honnya. 9Na Jethro ya sangala kigira ubulahi bwosi bwa Yahova ya kolera Israeli kuli ya va honnya mu makono ga Avaegepeti. 10Na Jethro ya vola A gasidzwe Yahova, wa mu twulidza mu mukono gwa Avaegepeti, nonlu mukono gwa Farao; wa honnya avandu yava va twule mu mukono gwa Avaegepeti. 11Kalunu mmanya Yahova a veye munene kuvita avanyasaye vosi; yee, mu inkuva ya va kola noluyai kuvo. 12Na Jethro, navizala wa Musa, ya vugulira Nyasaye kihaanwa kyokusambwa netsisadaka: na Haruni ya tsia, na vakulundu vosi va Israeli, kulagira ubu kima halala na navizala wa Musa, imbiri wa Nyasaye.
13Kunangwa, mugamba Musa yikala kulungikidza makuva ga avandu: na avandu va singira kukumbiridza Musa kutwula muganba kuduka mgolova. 14Na lwa navizala wa Musa ya lola gosi aga ya kolera avandu, ya vola, Inkuva ki yiyi ya u koleranga avandu? Kigira ki ive wikaye weng'ine, na avandu vosi va ku kumbiridza kutwula mugamba kuduka mgolova? 15Na Musa ya volera navizala wewe, Kigira avandu vadza ku inze kuteva Nyasaye: 16lwa va veye nenkuva, vadza ku inze; na inze nkalaga hagati ha mundu nomutende wewe, kandi mbegidza megidzo ga Nyasaye na malago gege 17Na navizala wa Musa ya mu volera, Inkuva ya u kola si i veye indahi mba. 18Ligali u la kamuluka, ive na avandu yava ava veye halala na ive: kigira inkuva i veye indiduhu kuvita ive; ive si u nyala kugikola weng'ine. 19Kalunu u hulire mwoyo gwange, na nda ku ha inkuva indahi, na Yahova a ve halala na ive: ive u la singirira avandu imbiri wa Nyasaye, na u la hila makuva gavo imbiri wa Nyasaye: 20na u la vegidza megidzo na amalago ga Nyasaye, na ive u la va mannya inzira ya va li genda ku, na miyinzi gya va li kola. 21Kandi u la tovola ku avandu vosi, avandu avobunyali, ava tia Nyasaye, avandu va ageligali, ava vihirirangwa vyambeti vyobukyamu; na yava u la va singeridza kuva avanene vetsielfu, na avanene vetsimia, na avanene va makumi gatano, na avanene va makumi: 22navo va la kalaga makuva ga avandu kazozo: kandi ku makuva gosi, li veye linene li la letwa ku ive, navutswa makuva makekeke va la kalaga avene: kunangwa ive u la nyola ubwiyangu mwene, navo va la ginga musigo halala na ive. 23Nu u va nu U kola inkuva yiyi, na Nyasaye a ku laga ndiyo, hene yaho u la nyala kusingira, na avandu yava vosi va la tsia havo nemirembe. 24Kunangwa Musa ya hulira mwoyo gwa navizala wewe, naye ya kola gosi ga ya mu volera. 25Na Musa ya tovola avobunyali mu Israeli yosi, naye ya va vika kuva mitwe ku vandu, avanene vetsielefu, na avanene vetsimia, na avanene va makumi gatano, na avanene va makumi. 26Navo va kalagira avandu kazozo: na makuva madinyu va leta ku Musa, navutswa makuva makekeke va kalaga avene. 27Na Musa ya sivulana na navizala wewe; naye ya tsia mu kivala kikye mwene.
Currently Selected:
Kutwula 18: MBE
Highlight
Share
Copy
Want to have your highlights saved across all your devices? Sign up or sign in
©Bible Society of Kenya, 1967