Kutwula 17
17
1Na livugana lyosi lya avana va Israeli va samula kutwula mu kyangalangwi kya Sini, ku tsingendo tsyavo kuli Yahova ya va laga, ni va lomba lisosa lyavo mu Refidim: na amadzi ga vula kuva ho, avandu va nwe. 2Kigira yaga avandu va hing'ana na Musa, ni va vola, U ku he amadzi, ku nwe. Na Musa ya va volera, Kigira ki mu hing'ana ninze? Kigira ki mu geridza Yahova? 3Na avandu va nyola yo ubuluhu; na avandu va monya Musa, ni va vola, Kigira ki wa kwanegiridza kutwula Egepeti kukwiita na avana vetu, nemitugu gyetu nobuluhu? 4Na Musa yanira Yahova, na a vola, Nda kola ki ku avandu yava? Va veye himbi kundasa magina. 5Na Yahova ya volera Musa, Vita wimire imbiri wa avandu, na u hile halala na ive avalala ku vakulundu va Israeli; na impimbo yoyo, ya wa duyira mugera, u vugule mu mukono, gugwo, na u tsie. 6Henza, nda singira yo imbiri wowo ku lwanda lwa Horebu; na u la duya lwanda, na amadzi ga la twula kulwo, avandu va duke kunwa. Na Musa ya kola ndiyo imbiri wa avakulundu va Israeli. 7Naye ya gulika ha zana Masa, na Meriba, kigira lihing'ana lya avana va Israeli, kandi kigira va geridza Yahova, ni va teva, Yahova a veye hagati hetu, naho mba?
8Kunangwa Amaleki vadza, ni va lwana na Israeli mu Refidim. 9Na Musa ya volera Joshua, U ku tovolere avandu, na u tsie kulwana na Amaleki: mugamba nda singira ku kigulu, nempimbo ya Nyasaye mu mukono gwange. 10Hene yaho Joshua ya kola kuli Musa ya mu volera, na a lwana na Amaleki: na Musa, na Haruni, na Huru vanegira ku kigulu. 11Kunangwa lwa Musa ya ginga mukono gwigwe, Israeli va guuta; na lwa yekidza mukono gwigwe, Ama leki va guuta. 12Navutswa makono ga Musa ga lutsivira; na va leta ligina ni va li vika isi wewe, naye yikala ku, na Haruni na Huru va ginga makono gege, mulala ku luvega lulala, na wundi ku luvega lundi; na makono gege ga dinyeridzwa kuduka lwa liuva lya yera. 13Na Joshua ya guuta Amaleki na avandu veve nobwogi bwekivavi. 14Na Yahova ya volera Musa, U ng'ode yaga mu kitabu, ga ve gokwidzolitsa, kandi u ga vole mu amatu ga Joshua: kuvola Inze ndononnya Amalelii ligali kuvatwulidza isi weligulu. 15Na Musa yombaka bwali, na ya bu gulika Yahovanisi; 16na ya vola, Yahova yesuha: Yahova a la va nobulwani na Amaleki ku makula na makula.
Currently Selected:
Kutwula 17: MBE
Highlight
Share
Copy
Want to have your highlights saved across all your devices? Sign up or sign in
©Bible Society of Kenya, 1967