Kutwula 16
16
1Kandi va samula kutwula Elim, na livugana lyosi lya avana va Israeli va duka ha kyangalangwi kya li Sini, kya li hagati ha Elim na Sinai, ku lidiku lye likumi na gatano gomweli gu kola gyiviri inyima welitwula lyavo mu kivala kya Egepeti. 2Na livugana lyosi lya avana va Israeli va monya Musa na Haruni mu kyangalangwi: 3na avana va Israeli va va volera, Bwa li bulahi nkano kwa kudzira ku mukono gwa Yahova mu kivala kya Egepeti, ha kwikala himbi na tsinyingu tsyetsinyama, ha kwa lagira ubukima nokwiguta; kigira mwinye mu ku leti nokukuvika mu kyangalangwi yiki, kwiita kiduma yiki kyosi nenzala.
4Hene yaho Yahova ya volera Musa, Henza, Nda mu kupidzira imbula yobukima kutwula migulu; na avandu va la tsia kyova kazozo kudola kidieli kyelidiku selilala, nduke kuvageridza, ni va va ni va genda mu malago gange naho mba. 5Na ga la va, ku lidiku lya gatano na lilala, va la lomba bwa va leta mu inyumba, na bu la va hali kaviri kuli bwa va dola lidiku sa lilala. 6Na Musa na Haruni va volera avana va Israeli vosi, Inyinga ya mgolova, mu la manya ni Yahova wa mu leta kutwula mu kivala kya Egepeti, 7na mugamba, mu la lola ubukumi bwa Yahova; kigira uyu a huliranga limonya lyenyu lya mu monyanga Yahova: na kwinye ku veye ibwaha, mu duke kukumonya? 8Na Musa ya vola, Ga la va ndiyo, lwa Yahova a li mu ha inyama mgolova kulia, na mugamba ha la va nobukima kuduka mwigute; kigira uyu Yahova a huliranga limonya lyenyu lya mu mu monyanga: na kwinye ku veye ibwaha? Limonya lyenyu si li veye ku kwinye mba, navutswa li veye ku Yahova. 9Na Musa ya volera Haruni, U volere livugana lyosi lya avana va Israeli, Mwisunde himbi imbiri wa Yahova; kigira uyu u huliye limonya lyenyu. 10Kunangwa, inyinga Haruni ya li mu livola ku livugana lyosi lya avana va Israeli, va henza ku kyangalangwi na henza, ubukumi bwa Yahova bwa loleka mu lilesi. 11Na Yahova ya volera Musa, na a vola, 12mbuliye limonya lya avana va Israeli: va volere ndi, u vole, Inyinga ya mgolova mu la lia inyama, na mugamba mu liguta ubukima; na mu la manya inze mbeye Yahova Nyasaye wenyu.
13Kunangwa inyinga ya mgolova tsisindu tsya duka, na tsya kunika hosi ha lisosa lyavo: na mugamba lime lya li ku marova ha lisosa lyavo. 14Na lime lya li hasi lwa lya kama, henza, ku kyangalangwi ha li nekindu kikekeke kyekuyungu, kikekeke kuli ingeregeridza yelirne ki veye ku marova. 15Na lwa avana va Israeli va ki lola, va tevana avene na avene, Ni kindu ki yiki? Kigira si va manya ni kindu ki. Na Musa ya va volera, Nobukima bwa Yahova a mu heye, mu lagire. 16Yiki ni kindu kya Yahova u lagi, Mu dole ku yiki sa mulala kuli lilagira lilye; kigero kilala ku mundu mulaia, kuli livalidza lya avandu venyu, mu vugule ndiyo, sa mulala kuduka yava ava veye mu lihema lilye. 17Na avana va Israeli va kola ndiyo, avalala va dola kuvita, na avandi va gehera. 18Na lwa va ki gera nekigero, uyu wa dola kinyingi si ya tigala nekindu, na uyu wa dola kikekeke si ya gehera; va dola sa mulala kuli lilagira lilye. 19Na Musa ya va volera Ku vosi mundu a ta ki leka ki tigale kuduka mugamba mba. 20Navutswa si va hulira Musa; navutswa avalala kuvo va ki tigalidza kuduka mugamba, na kya gwa netsing'ende, nokufunya ububi: na Musa ya va vihirirwa.
21Navo va ki dola mugamba no il mugamba, mundu sa mulala kuli lilagira lilye: na lwa mbasu gwa duka kulula kya kamaluka. 22Kunangwa, ku lidiku lya gatano na lilala, va dola ubukima hali kaviri, mundu sa mulala vigero viviri: na avakulundu vosi velivugana va tsia kuvolera Musa. 23Naye ya va volera, Yili ni likuva lya Yahova ya vola, Mugamba li veye lyelemeridza, lisabato litakatifu ku Yahova: mwuminye kya mu liyuminya, na mu minage kya mu li minaga; na kyosi kya tigala, mu vike kulindwa kuduka mugamba. 24Navo va ki vika kuduka mugamba, kuli Musa ya va laga: nakyo si kya funya bubi mba, kandi si kya gwa netsing'ende. 25Na Musa ya vola, Mu lagire yiki lero; kigira lero ni lisabato lya Yahova: lero si mu la ki nyola ku marova. 26Mu la ki dola madiku gatano na lilala; navutswa lidiku lya gatano na gaviri ni lisabato, ku yilyo si ki la loleka mba. 27Navutswa ku lidiku lya gatano na gaviri, avalala ku avandu va tsia kudola, navo si va ki lola. 28Na Yahova ya volera Musa, Mu la sula kugumira malago gange na makuva gange kuduka inylnga ki? 29Henza, kigira Yahova a mu heye lisabato, kigira yaga a mu hedzanga ku lidiku lya gatano na lilala, vyokulia vya madiku gaviri; mu honge sa mulala hango hehe, ku vosi mundu a ta twula hango hehe ku lidiku lya gatano na gaviri. 30Kunangwa avandu va sosa ku lidiku lya gatano na gaviri.
31Na inyumba ya Israeli va gulika lieta lyakyo, Mana: nakyo kya li kuli bugutsa bukekeke bulavu; na bunolu bwakyo bwa li kuli mkati gwa lombwa na bwuki. 32Na Musa ya vola, Yili ni lilaga lya Yahova, Kigero kilala kyekindu yiki ki vikirwe, visukululwi vyenyu; navo va duke kulola ubukima bwa nda mu lageridza mu kyangalangwi, lwa nda mu twulidza mu kivala kya Egepeti. 33Na Musa ya volera Haruni, Vugula kikopo, u vike mu kigero kilala kya mana, na u ki vike imbiri wa Yahova, ki linderwe visukululwi vyenyu. 34Kuli Yahova ya laga Musa, Haruni ya kola ndiyo na a ki vika imbiri wa Lilolekidza kulindwa. 35Na avana va Israeli va lagira mana mihiga makumi gane, kuduka inyinga va duka mu kivala ki veye navandu; va lagira mana, kuduka inyinga ya vingira mu tsinzako tsye kivala kya Kanani. 36Na ligera zana li veye kidieli kilala kyelikumi kya efa.
Currently Selected:
Kutwula 16: MBE
Highlight
Share
Copy
Want to have your highlights saved across all your devices? Sign up or sign in
©Bible Society of Kenya, 1967