JAKARIA 13
13
1 Eeya Taa Laba-labaalo kawasa lotahuda, “To dulahee boito mamo pentelai butu lotaluhu tuwau u mopo mantali walimai lei Dauda wau ulipu lo Yerusalemu monto dusa wau polotubowa balaahala u mapilohutu limongolio. 2To dulahee boito maluluto-U̒ tanggulo babaa-laahalaalo monto huta botie, tilinggula diduu̒ penu boli ngotaa mao̒ tadonggo moe̒elao̒. Ngoa̒amila taa u mongaku batangalio nabi mapolahiyo-U̒ pee̒-pee̒enta woli mongolio tamaa ilotunga lorohu udiila motulidu hale. 3Wau wonubolo donggo woluo taa u moloi̒ya deu̒ tio mopo tunggula tahuli, tiyamo wau tiilolio lohihilao mamoloi̒ya mao̒ olio deu̒ tio musi hukuu-maniyolo mate, sababu uiloi̒yaalio yito wimbulo. Wonu tio debo mongaku batangalio odelo nabi olo, tio mabituo̒olo tunggula mate liyamo wau liilolio lohihilao.
4To dulahee boito, mongonabi mamolaasa moolito u mohutu debo odelo nabi. Timongolio diila tamomake pakeyangi lonabi u mohimbulo wau mopomangga bibilohe-bibilohelio. 5Bolii̒o mao̒, timongolio mamoloi̒ya, ‘Wau̒ diila nabi. Wau̒ bo ngotaalio lo tamoomengia tahemo kalaja to halabolu ngotupa lo tutumulo.’ 6Wau wonu tau mohintu mao̒ olio, ‘Pali wolo uwoluo to duhelumu boito?’ tio mamolametao̒, ‘Wau̒ ilotuhata lopali boito tobele lo sahabatiu̒.’ ”
Palenta u momate diiti mate-mateelo mao̒ tailutolia lo Allahu Taa̒ala
7 Eeya Taa Laba-labaalo kawasa lotahuda, “Pobongulo mola, wuu wamilo, wau tuhuwalo diiti tahe mokalaja duo̒lo-U̒! Pateaalo tio mate-mateelo mao̒, yi hihii-mbaawaalo mamo bubuua̒yawa. Wau̒ mamoluhu umati-U̒, 8wau to ngoilanggubu lipu dulo tayadu totolu monto ulipulio maamate. 9Bo ngotayadio totolu mamoa̒ahu. Wau timongolio boito mapo mantaliyo-U̒ debo odelo talaa̒ u pilobelesi lotulu. Timongolio matesiyo-U̒ debo odelo tamotesi hulawa. Lapatao̒ timongolio mamodua̒ mai ode Olau̒, wau Wau̒ mamolametai olimongolio. Wau̒ mamotahuda ode limongolio deu̒ timongolio yito umati-U̒, wau timongolio olo mamongaku deu̒ Wau̒ulo Eeya Allahu Taa̒ala limongolio.”
Currently Selected:
JAKARIA 13: LAIGOR
Highlight
Share
Copy
Want to have your highlights saved across all your devices? Sign up or sign in