JAKARIA 12
12
Yerusalemu mapo aahuwolo
1Uti-utieelo tahuli lo Eeya tomimbihu Isirai̒lu. Eeya talo pobua̒de hulungo, lopowali dunia wau longohi tutumulo ode manusia, lotahuda mai, 2“Watia mamohutu Yerusalemu debo odelo hakati utua-tuanga angguru; lilii-puuwaalo to tiheedio mamongilu mao̒ wau mototoo-yonga debo odelo taa huwoa̒alo. Wau wonu Yerusalemu balaalio, kokoo-tawaalo tolipu lo Yehuda u donggo leitolaa, mabalaalio olo. 3Bo wonubolo dulahee boito meidungga, Wau̒ mamohutu mao̒ Yerusalemu debo odelo botu u mobuheeto; wau penu boli bangusa toonu tamo himontala momintao̒ mamoo̒tapu topotala. Ngoa̒amila bangusa todunia mamo tituwau u moluhu Yerusalemu. 4To dulahee boito ngoa̒amila wadala popoo-linguwo-U̒ wau mongo jokilio popoo-biyongo-U̒, ulipu lo Yehuda madaaha-U̒, bo totoonulalo wadala lomusuulio popoo-pitoo̒o-U̒. 5Lapatao̒ ngangaa-laa̒waalo lo Yehuda mamoloi̒ya todelomo hilao, ‘Eeya Taa Laba-labaalo kawasa wambao̒ tamongohi olootolo ode umati-Lio tahi biluloa̒awa to Yerusalemu.’
6To dulahee boito ngoa̒amila ngaalaa̒ lo Yehuda mapowaliyo-U̒ debo odelo tulu todelomo huntua lo ayu podiio̒ meaalo morongo lei̒-lei̒ita to walungo ngongoo-buhuta batango pale; timongolio mamopo binasa babaa-ngusawalo to palitio. Bo ulipu lo Yerusalemu maadebo motibiluloa̒ todelomo kota wolo aamani.
7Wau̒, Eeya, tabohu-bohulio mamongohi moo̒haama to suludadu lo Yehuda, alihu ohulumati u tilolimo lonto wali mai lei Dauda wau ulipu lo Yerusalemu diila mongilabota ohulumati utilolimo lo ulipu lo Yehuda wewolio. 8To dulahee boito Wau̒ mamoduo̒la ulipu lo Yerusalemu; wau tamailaba molulupuhe olo towolota limongolio mamowali molotolo debo odelo tei Dauda. Timongolio matau̒wa lo wali mai lei Dauda debo odelo lo malai̒kati-U̒, tumbao̒ debo odelo ola-U̒ lohihilao. 9To dulahee boito Wau̒ mamopo binasa timii̒du bangusa tamo himontala moluhu Yerusalemu.
10Lapatao̒ wali mai lei Dauda boli ulipu lo Yerusalemu mahiya-U̒ hilao u motohilaa motolia̒ngo wau motohilaa modua̒. Timongolio mamoo̒onto olio tamaa ngilamo limongolio wau hiliyongolio debo odelo taa lohiliyongao̒ opopate lo walai̒o bo tuwa-tuwaulo. Timongolio mahumoyongo wolo mooloolo daa̒, debo odelo taa u mai̒loolia lowalao̒ tamohuhula daa̒. 11To dulahee boito mawoluo mai hilimuta ulaba-labaalo to Yerusalemu, debo odelo hilimuta odelei Hadad-Rimon to Lumbaya Megido. 12-14Lapatao̒ timii̒du ngaalaa̒ tolipu boito mamo hilimuta ngota-ngota; ngaalaa̒ lo walimai lei Dauda, ngaalaa̒ lo walimai lei Natan, ngaalaa̒ lo walimai lei Lewi, ngaalaa̒ lo walimai lei Simei, wau ngoa̒amila ngaalaa̒ wewolio. Timii̒du ngaalaa̒ mamo hilimuta ngota-ngota, wau tau-tauwalo mongo lolai monto timii̒du ngaalaa̒ mamo hilimuta wawaalahe wolo mongobua.”
Currently Selected:
JAKARIA 12: LAIGOR
Highlight
Share
Copy
Want to have your highlights saved across all your devices? Sign up or sign in