1 Pita 2
2
1Kaput bahang, di dudutni balna, alas yulnin, sins dis lani dawak tumnin, dawak muih yulni yulwi karinin satni balna bitik kaupak dakta alahwanauh. 2Muihbinina wisam batatahnna kapat, dukih waltanauh spirit taniwas maisihni dis kidika, kidika munah manna barakna atnamna dawak laihwi yaknin lani kidika bik duna atnamna, 3manna rahm palni amanglanamana kat Dawan laih yamni kidika.#Sal 34:8.
Krais, kipala sangka kidika
4Bahang Krais yaihnit yakat aiwanauh, kipala sangka as muih balna yaklau ruhmwi yayakna kidika, kaunah Papang niningyakat laih kipala as walwi yakna ki dawak bik minit nuhni kalkulna ki. 5Aput laih, Papang yaklau manna kidika sihm kipala sangka, makat yulnin spiritni ūni, sumalyang as holi kapat manayamna karang, Jisas Krais munah spirit niningyakat sakripais yamna atnin, Papang yamni talna atnin. 6Kidika bahang ulna yakat bik aput yulwi:
“Yang lawik sayan yakat kipala as laktayang
kipala as nuhni kidika,
walwi yakna dawak bik minit nuhni kalkulna kidika;
angdika muihni kidika yakat yamni kalkulwarang kidika laih alas kalyulwas karang ki.”#Is 28:16.
7Manna namangnakauh laih, rahm kultamana kidika, kidika kinipala laih minit nuhni kalkulna ki; kaunah rahm kukulwas muihni balna kidika niningnakauh laih ulna yakat yulwa kaput kalahwi:
“Kipala as ū yamyang balna yaklau ruruhmna kidika laih,
kipala as nuhni kalna.”#Sal 118:22.
8Dawak ūk akat bik aput yulwi:
“Kipala nuhni as yakat kalmana baunamana karang.”#Is 8:14-15.
Bahang witingna laih kalnina babauwi yul yamni kidika dakakawas yulni: witingna laih kaput atnin yulni disihna.
9Kaunah manna laih sulani as manawalwi yakna, sumalyang as king dini yamna atnin, nisan as holi,#Ex 19:5-6; Is 43:20. tawan as Papang yaklau duna kidika.#Ex 19:5; Dt 4:20; 7:6; 14:2; Tit 2:14. Dawak adika dini laih aput ki Papang#Is 43:21. warkni taldas dini balna yamna kidika yulna atnamna yulni, witing yaklau manayulna puksani kidika kaupak alahwa witing yaringni taldas dini kidika yakat āwana atnamna yulni.#Is 9:2. 10Manna laih muhnilau kau tawan bik awasmana dai, kaunah waralaih Papang tawanni mana; muhnilau laih Papang yaklau manna yakat mamaknakun manatalwas dai, kaunah waralaih mamaknakun manatwi.#Os 2:23.
Sangka awanauh Papang dini yamna atnamna
11Yang wanaih ki dalani balna, kalmana dinit buktayang, pa ūk muihni balna mana yakat, muihmana nuhni dukih manawa kidika yaklau solmana niningyakat kalbauwa kidika kaldadawinih.#Sal 119:19. 12Papang yakat kukulwas muihni balna kidika pasyakat yamni lapaktanauh. Kaput laih witingna, waradika manna namangna yakat yuyulwarang bik manna laih sihm dutni yamyang balna mana kapat, witingna tatalwarang manna di yamni yamtamana kidika dawak Papang yakat ayangni nuhni yayamwarang witing yaklau muih balna bitik yakat diyulwi dakawarang mani.
13Dawan yulni, la tunan muihni balna bitik tingnina dinityakat awanauh; king tanit nuhni kidika yakat bik, kat tunan muihni nuhni kidika yulni, 14witing yaklau kabamint kayang balna yakat sihwa kidika dutni yamyang balna yakat wah diana atnin dawak di yamni yayamwa balna yakat laih rispik yamna atninna. 15Kat Papang laih dukih kalwi manna kidika di yamni yamna atnamna, kaput karak di amanglalawas dawak mutu balna kidika bik manna namangna yakat di as bik yulwas atninna.
16Muih pri balna kapat awanauh, primana lani kidika data dutni yamnin laih kukulwinih. Papang dini yamyang balna kapat awanauh. 17Muih balna bitik yakat rispik yamtanauh. Wanaihmana balna yakat dalani talnauh, Papang yakat dawak king tanit nuhni kidika yakat bik rispik yamtanauh.
Krais dalani wauhna yakat talnin kidika
18Di yamyang balna, manna damanawan balna yakat rispik lani karuk witingna tingnina dinit yakat awanauh, yayamni dawak amanglalawa balna yakat manah laih awaski kaunah dudutni balna yakat bik. 19Kat Papang laih yamni talwi la kat awas munah muih as wauhnin balna sip wauhwa kidika, witing muhni yakat yamnin dini kat yamwa kidika yulni. 20Bahang manna di dutni as yamnamana yulni wah mananawarang kat, ¿ais as yamniyah kulnamna laihwatna karuk sip wauhna atnamna? Kaunah di yamni yamnamana kidika yulni dalani wauhtanama kat, dawak wauhnin kidika kulnamna laihwatna karuk sip wauhtanama kat, kidika laih Papang muhni yakat yamni talwi. 21Bahang adika yulni Papang yaklau manayulwakat aiwanamana, Krais laih manna yulmana dalani wauhna kidika yulni, witing amput di yamna kat kidika yakat tala usnit uina atnamna yulni. 22Krais laih dutni as bik yamwas dai dawak muih as yakat bik alas kalyulwas dai.#Is 53:9. 23Dutni kalyayamna mani kat, dutni lani karak nangnitnalawas dai; kalyayamwakat dalani wauhna mani kat, bilninalauwas dai, kaunah Papang yakat yamnin kalyulwa dai, witing laih barangni karak la yamwa kidika.#Is 53:7. 24Krais yaklau mayang madutki balna kidika duwi kiuna pan prihni kidika minityakat, mayang laih dutni yakat dauna atnin dawak bik sangka lani as barangni yalahna atnin yulni. Krais laih muihni nuhni kidika kaldakna dai manna yamni alahwana atnamna kidika yulni.#Is 53:5. 25Bahang manna laih muhnilau kau sihm sīp didisna#Is 53:6. kapat mana dai, kaunah waralaih Krais yakat wirlawanamana, sihm sīp maintalyang as kapat mainmanatalwa kidika.
Currently Selected:
1 Pita 2: SUMU
Highlight
Share
Copy
Want to have your highlights saved across all your devices? Sign up or sign in
Biblia Sumo
Texto © Sociedad Bíblica de Nicaragua 1998