PAMUNGKAAN 12
12
Dipio Tuhan si Abram
1Didok Tuhan ma tu si Abram, “Tadingkon ma tano hagodanganmu, angka sisolkotmu dohot bagas ni amangmu, jana kehe ma ho mandapotkon luat na giot patuduhononKu tu ho. 2Hulehen pe bahat di ho pomparanmu jana gabe bangso na godang ma halahi. Hupasupasu pe ho jana tarbonggal pe goarmu Hubaen, lopus gabe pasupasu ho di halak na bahat.
3PasupasuonKu ma sanga ise na mamasumasu ho.
Tapi buraanKu ma sanga ise na mamurai ho.
Jana hara ni ho, pasupasuonKu ma sude angka bangso na di tano on.”
4Di na marumur si Abram pitu pulu lima taon, bungkas ma ia sian Haran, hombar tu na nidok ni Tuhan tusia, rap kehe ma ia dohot si Lot. 5Dioban si Abram do si Sarai dadaborunia i, dohot si Lot anak ni angginia bope sude arta dohot angka hatoban na dapotnia di Haran jana kehe ma halahi tu tano Kanaan.
Dung lalu halahi di Kanaan, 6dibolusi si Abram ma luat i lopus lalu ia tu tombak More inganan na badia na di Sikem. (Di hatiha i laing didapot ia dope disi maringanan halak Kanaan.) 7Dipatidahon Tuhan ma diriNa tu si Abram jana didok ma, “Luat on ma da na giot lehenonKu di pomparanmu.” Jadi dipajongjong ia ma sada langgatan di inganan i di Tuhan na patidahon diriNa tusia. 8Dung salpu i pinda ma ia tu Selatan tu luat na mardolok-dolok di Habincaran ni Betel. Jana dipajongjong ia ma disi undung-undungnia di holang-holang ni Betel di Hasundutan dohot Ai di Habincaran. Laing dipajongjong ia muse do disi sada langgatan parsombaan tu Tuhan, laing dipio ia ma goar ni Tuhan disi. 9Dung i marpinda-pinda ma ia sian inganan na sada tu inganan na asing di Selatan ni tano Kanaan i.
Si Abram di tano Mesir
10Tapi masa do haleon potir di tano Kanaan, jana sun ma hancitna pambaen ni bala i, gabe kehe ma si Abram mur dumao tu Selatan lalu tu tano Mesir, anso disi noma ia jolo maringanan sanga na sadia honok. 11Di na laho manyalpui batas ia laho masuk tu Luat Mesir i, didok ia ma tu si Sarai dadaborunia i, “Na jeges do da rupamu. 12Jadi muda diida halak Mesir i ho, diboto roha ni halahi do na dadaborungku ho; jadi bunuon ni halahi ma au tapi anggo ho padiaron ni halahi do mangolu. 13Jadi hara ni i dokkon ma tu halahi, ibotongku do ho anso hara ni ho gabe paloason ni halahi au mangolu jana denggan baenon ni halahi tu au.” 14Jana tutu ma antong, dung disalpui si Abram batas, masuk ma ia tu Mesir; diida halak Mesir i ma na tutu do hape na jeges sajo tompa ni si Sarai. 15Adong ma piga-piga halak pagawe ni bagas godang na midaan ia jana dipaboa halahi ma tu raja sanga songon dia hajegeson ni dadaboru i; jadi gabe dioban ma ia tu bagas godang ni raja i. 16Hara ni si Sarai, gabe denggan ma pambaenan ni raja i tu si Abram, jana dilehen ma disia angka hatoban, biri-biri dohot hambeng, lombu, halode dohot unto.
17Tapi patunda ni na nibuat ni raja i si Sarai, diparo Tuhan ma angka nyae na jorbut tu raja i dohot tu halak na adong di bagas godang i. 18Jadi dipiohon raja i ma si Abram jana didok ma tusia, “Na mambaen bia dehe ho tu au? Biasi nada dipaboa ho na dongan saripemu ia? 19Biasi didokkon ho ibotomu ia jana dipadiar ho hubuat ia gabe dadaborungku? Na ma indon dadaborumon; jagit ma ia jana kehe ma hamu!” 20Diparentahon raja i ma tu angka pagawena i anso dipaorot halahi si Abram sian luat i rap dohot dadaborunia bope sude sinadongannia.
Currently Selected:
PAMUNGKAAN 12: LAIAKB
Highlight
Share
Copy
Want to have your highlights saved across all your devices? Sign up or sign in
Indonesian Bible Society