PAMUNGKAAN 11
11
Tugu na di kota Babel
1Di mulana hum sada do hata ni angka jolma na di tano on, jana sarupa do hata ni halahi sude. 2Di na mardalan halahi mamolus-molus di sabola Habincaran, lalu ma halahi tu tano na hornop di Babilonia. Lalu disi ma halahi maringanan. 3Marsidokkonan ma halahi na sada tu donganna, “Tole ma tabaen batu bata, tatutung ma i lopus pir.” Songon i ma dalanna gabe adong batu bata di halahi sipakeon laho pajongjong bangunan dohot na gabe sipakeon laho palohotkonsa. 4Didok halahi ma, “Tabaen ma sada kota dohot sada tugu lopus tu langit puncutna, anso tarbonggal goarta sandiri jana anso ulang marserak hita di tano on.”
5Jadi mijur ma Tuhan laho mangaligi kota dohot tugu na nipajongjong ni jolma i. 6Jadi didok Ia ma, “Sisada bangso dohot sisada hata do halak on, jana on dope parmulaan ni angka tahi ni halahi. Anggo pola tongkin nari tarbaen halahi ma sanga aha giot ni halahi. 7Dumenggan ma mijur Hita jana Tapasarsar ma hata ni halahi anso ulang be marsiastuan hata ni halahi be.” 8Songon i ma panyarsar ni Tuhan di halahi di tano on sude, jana mantak ma halahi na pajongjong kota i. 9Dibaen ma goar ni kota i Babel, harana disi ma disegohon Tuhan hata ni sude bangso, jana sian i ma halahi marsitondong dalanna be tu sude portibi on.
Pomparan ni si Sem
(1 Juj. 1:24-27)
10On ma pomparan ni si Sem. Dua taon dung salpu aek na oto, di na marumur si Sem 100 taon, adong ma anaknia na margoar si Arpaksad. 11Dung salpu i tamba dope umurnia 500 taon nari, jana adong dope angka anaknia na asing.
12Di na marumur si Arpaksad 35 taon, adong ma anaknia na margoar si Selah. 13Dung i tamba dope umur ni si Arpaksad 403 taon nari jana adong dope dakdanaknia na asing.
14Di na marumur si Selah 30 taon, adong ma anaknia i ma na margoar si Eber. 15Dung i tamba dope umur ni si Selah 403 taon nari, jana adong dope angka dakdanaknia na asing.
16Di na marumur si Eber 34 taon, adong ma anaknia, i ma na margoar si Peleg. 17Dung i martamba dope umur ni si Eber 430 taon nari, jana adong dope angka dakdanaknia na asing.
18Di na marumur si Peleg 30 taon, adong ma anaknia na margoar si Rehu. 19Dung i martamba dope umur ni si Peleg 209 taon nari jana adong dope angka dakdanaknia na asing.
20Di na marumur si Rehu 32 taon, adong ma anaknia na margoar si Serug. 21Dung i tamba dope umur ni si Rehu 207 taon nari, jana adong dope angka dakdanaknia na asing.
22Di na marumur si Serug 30 taon, adong ma anaknia na margoar si Nahor. 23Dung i tamba dope umur ni si Serug 200 taon nari, jana adong dope angka dakdanaknia na asing.
24Di na marumur si Nahor 29 taon, adong ma anaknia na margoar si Terah. 25Dung i tamba dope umur ni si Nahor 119 taon nari jana adong dope angka dakdanaknia na asing.
26Dung marumur si Terah 70 taon, adong ma anaknia tolu halak i ma si Abram, si Nahor dohot si Haran.
Pomparan ni si Terah
27On ma pomparan ni si Terah: Si Terah ma amang ni si Abram, si Nahor dohot si Haran. Adong ma anak ni si Haran si Lot goarna. 28Marujung ma ngolu ni si Haran di kota hatubuanna, i ma di Ur na di Babilonia. Hape mangolu dope hatiha i amangnia. 29Dialap si Abram ma si Sarai gabe dongan saripena, jana si Nahor mambuat si Milka boru ni si Haran. Adong dope angka dakdanak ni si Haran na asing na margoar si Jiska. 30Tapi nada maruntungan si Sarai.
31Dioban si Terah ma si Abram anakna i dohot si Lot pahompuna, dohot si Sarai parumaennia i, jadi rap kehe ma halahi manadingkon kota Ur na di Babilonia. Maksudnia giot kehe tu Kanaan do. Tapi dung lalu di Haran, gabe disi noma halahi maringanan. 32Jana disi noma marujung ngolu ni si Terah di na marumur ia 205 taon.
Currently Selected:
PAMUNGKAAN 11: LAIAKB
Highlight
Share
Copy
Want to have your highlights saved across all your devices? Sign up or sign in
Indonesian Bible Society