मरकुस 11
11
यीशु रौ यरुशलेमा दी ज़ीत आशणी
(मत्ती 21:1-11; लुका 19:28-40; यहुन्ना 12:12-19)
1यीशु और तेसरै च़ेलै यरुशलेम शहरा कु दख पिछ़ुड़ै जैतून नावां री पहाड़ी दी पौउंच़ै। तिऐ दुई गाऊं थै, ज़ासरै नाऊं बैतफगै और बैतनिय्याह थै। तैबै यीशुऐ आपणै च़ेलेऊ मांझ़िऐ कु दुई च़ेलै इणै बोलीयौ भेज़ै कि 2“आपणै सामनै वाल़ै गाऊं दी डैयौ तिऐ पौउंच़ियौ तेबी तुमुकै खाम्बै दी एक गौधेटु मिला बानौ औन्दौ ज़ास माथै इबी झ़ांऊ कोई ना बोशौ। तेस खोलिऔ ओरु आणेऊ। 3अगर तुमु कु कुण पुछ़ा लौ, ‘एस खोलियौ केशी निआं ई?’ तैबै तुमै बोलीयौ, ‘एसरी प्रभु कै ज़ुरत आ। प्रभु एस गौधेटु शिगरी ई भेज़ा ओरु।’ ”
4तैबै सै च़ेलै डेई गौऐ। डेइयौ तिंउऐ बाटा काऐ एक घौरा रै दारा दी एक गौधेटु देखौ बानौ औन्दौ। तैबै च़ेलै तेस गौधेटु काऐ डेइऔ तेस खोलदै लागै। 5तिऐ ज़ेज़ै लोग थै सै च़ेलेऊ लै बोलदै लागै कि, “तुमै का कौरा ई? एस गौधेटु कैलै खोलाई?” 6यीशुऐ ज़िणौ तिउंलै बोलौ थौ तिंउऐ तिणौ बोलौ तिऊं लोगु लै। इणौ शुणियौ तिऊं आदमीऐ सेऊ गौधेटु निणै दैऔ। 7च़ेलेऊ ऐ सेऊ गौधेटु यीशु काऐ आणौ तेस माथै आपणै जुड़कै बिछ़ाऐ। तैबै यीशु तेस गौधेटु माथै बोशौ। 8डेउंदै-डेउंदै भौरी लोगुऐ आपणै-आपणै शौल, च़ादरु बाटा दी बिछ़ाऐ। कुछ़ लोगुऐ ता डोखरै दी डेइयौ हौरी-हौरी डाल़ी आणी काटियौ, तैबै बिछ़ाई यीशु रै स्वागता लै बाटा ई धौनी। (ज़िणौ खास लोगु रै स्वागता लै यहुदी लोग कौरा ई) 9ज़ो लोग यीशु आइलै औगाड़िऐ-पिछ़ाड़िऐ थै लागै औन्दै आण्डदै सै ज़ै ज़ै कार कौरदै लागै कि, “होसाना! तुमै प्रभु रै नाऊं कौरीऐ आशै ई। तुमारी ज़ै ज़ै हो! 10ज़िणौ पुराणै ज़मानै दी दाऊद राज़ौ थौ, तुमै भी आमारै राज़ै ई। होसाना! सौरगा दी परमेश्वरा री बौड़ाई हो!”
11तैबै यीशु यरुशलेमा शहरा दी पौउंच़ौ। तिऐ सेऊ परमेश्वरा रै घौरा दी डैऔ। और तिणीऐ तिऐ सारौ कुछ़ देखौ। और आपणै च़ेलेऊ आइलै राच बिताउंदै शहरा कु बाइरै बैतनिय्याह गाऊं दी आशौ, कैलैकि तेबी ब्याल़ हुई गोई थी।
बिणा फौल़ा रौ फेड़ु रौ पेड़
(मत्ती 21:18,19)
12दुजै दिनै यीशु और तेसरै च़ेलै बैतनिय्याह गांवा कु यरुशलेम शहरा लै डेउंदै लागै। बाटा दी डेउंदै-डेउंदै लागी यीशु कै भूख। 13दख दूर यीशुऐ एक फेड़ु रौ पेड़ देखौ ज़ो हौरौ भौरौ थौ। यीशुऐ सुंच़ौ कि एस पेड़ा कु कुछ़ खाणा लै मिला लौ। ज़ेबी यीशु तेस पेड़ा काऐ डैऔ, यीशु कै तेस पेड़ा दी पाचा-पाच मिलै। तेस पेड़ा दी फौल़ नाईं थै कैलैकि सेऊ बौगत फौल़ा रौ नाईं थौ। 14यीशुऐ तेस पेड़ा देखीयौ तेसलै बोलौ, “आज़ा कु तैरौ फल़ कोई ना खान्दौ कैलैकि तू आज़ा कु नाईं फौल़दौ।” इऐ बूश च़ेलेउऐ भी शुणी।
परमेश्वरा रै घौरा कु सामाना बेच़णै वाल़ै गाड़नै
(मत्ती 21:12-17; लुका 19:45-48; यहुन्ना 2:13-22)
15तैबै यीशु और तेसरै च़ेलै यरुशलेम शहरा दी आशै। सेऊ तिऐ परमेश्वरा रै घौरा ई डैऔ। तिऐ खौल़ै दी कुछ़ लोग समाना बेच़दै थै लागै औन्दै। यीशु तिऊं समाना बेच़णै वाल़ै लोगु बाइरै गाड़दै लागौ, पैसेऊ री औदल़ी-बौदल़ी कौरणै वाल़ेऊ री भी यीशुऐ रेढ़ी पौल्टी। तिऐ ज़ेज़ै लोग भैंटा च़ौड़ाउणा लै कबुतर और दुजी च़ीज़ बेच़ा थै तिंउरै बोशणै रै पाटड़ै भी पोरु पौल्टै। 16यीशुऐ केज़ौ भी आदमी समाना कौरी खौल़ै बाटीऐ नाईं दै डेउणै। 17तैबै यीशु शिक्षा दैंदै लागौ कि, “धौर्म शास्त्रा ई इणौ आ लिखौ औन्दौ कि ‘मैरौ घौर सारी ज़ातीऊ रै लोगु कालै प्राथना कौरणै रौ घौर आ।’ पर तुमुऐ ता ज़ादै पैसेऊ लै समाना बेच़ीयौ एऊ लुटणै वाल़ेऊ रौ आड्डौ चाणी ऐरौ आ।” 18इणै शुणियौ बौड़ै याजक, और यहुदी शास्त्री लोग यीशु झ़ांगणै रै बारै दी सुंच़दै लागै। कैलैकि सै तेस देखीयौ डौरा थै, कि सारै लोग तेसरी शिक्षा शुणियौ हैरान थै। 19ब्याल़कै, न्यारै हुईऔ, यीशु और तेसरै च़ेलै तेस शहरा छ़ाड़ियौ वापिस बैतनिय्याह गांवा लै डिआ थै।
शुकै औन्दै फेड़ु रै पेड़ा कु शिक्षा
(मत्ती 21:20-22)
20दुजै दिनै यीशु और तेसरै च़ेलै यरुशलेम शहरा भिलै थै डेउंदै लागै औन्दै। तिदै बाटा दी तिंउऐ सेऊ फेड़ु रौ पेड़ ज़ौड़ी कु शुकौ औन्दौ देखौ, ज़ासलै यीशुऐ फिटकार दैऔ थौ। 21पतरसा कै याद आशौ कि यीशुऐ तेस पेड़ा लै का बोलौ थौ। तैबै पतरसै यीशु लै बोलौ, “ओ गुरु देख! एज़ौ फेड़ु रौ पेड़, ज़ासलै तुमुऐ फिटकार दैऔ थौ, एऊ शुकी गौ आ।” 22यीशुऐ बोलौ, “तुमै हैरान कैलै हुआई? परमेश्वरा माथै विश्वास कौरौ। 23हाऊं तुमुलै सौच़्च़ौ बोलाऊ कि ज़ुण इऐं पहाड़ी लै बोलालौ कि, तू उठ, समुन्दरा दी डेऊ। और सै शक ना कौरालै आपणै ज़िवा दी, पर आपु कौरालै इणौ विश्वास कि ज़िणौ मुंइऐ बोलौ आ तिणौ हुऔ आ, तैबै परमेश्वर तेसलै तिणी ई कौरा आ। 24कैलैकि हाऊं तुमुलै बोलाऊ कि ज़ो कुछ़ तुमै प्राथना दी मांगा ई, विश्वास कौरौ कि सेऊ तुमुलै मिली ऐरौ आ तैबै परमेश्वर तुमुलै तिणी कौरा आ।” 25यीशुऐ औज़ौ बोलौ कि, “ज़ेबी तुमै प्राथना कौरना लै त्यार हुआई, अगर तेबी तुमुकै याद आशा कि कुणिऐ तुमुलै बुरौ कियौ आ, तैबै पैहलै तेस माफ कौरौ ताकी सौरगा रौ परमेश्वर भी तुमारै पाप माफ कौरा। 26अगर तुमै दुजेउरी गौलती माफ नाईं कौरालै, तैबै परमेश्वर भी तुमारै पाप माफ नाईं कौरदौ।”
यीशु रै हक्का माथी सवाल
(मत्ती 21:23-27; लुका 20:1-8)
27तैबै यीशु और तेसरै च़ेलै यरुशलेम शहरा दी आशीयौ परमेश्वरा रै घौरा रै खौल़ा ई डैऔ। तिऐ यहुदी शास्त्री, बौड़ै याजक और स्याणै लोग तेस काऐ आशै। 28सै यीशु कु स्वाल पुछ़दै लागै कि, “ज़ो कुछ़ ताइंऐ ईज़ कियौ आ, एऊ केज़ै हक्का कौरी कौरौ आ? इणै कौरणै रौ हक्क ताउंकै कुणिऐ दैऔ आ?” 29तैबै यीशुऐ तिउंलै बोलौ, “हाऊं भी तुमु कु एक स्वाल पुछ़ाऊ, तुमै पैहलै तेस स्वाला रौ ज़वाब दैऔ, तैबै हाऊं भी तुमुलै बोलाऊ कि हाऊं ज़ो कौराऊ कासरै हक्क कौरीऐ कौराऊ। 30तुमै मुकै ज़वाब दैऔ कि यहुन्ना बपतिस्मौ दैणै वाल़ौ कासरै बोलणै माथै बपतिस्मौ दिआ थौ? परमेश्वरा रै बोलणै माथै या लोगु रै बोलणै माथै दिआ थौ?” 31इणै शुणियौ सै लोग आपु मांझ़िऐ चौपड़िंदै लागै, “अगर आमै बोलु लै कि ‘परमेश्वरा रै बोलणै माथै, तैबै इणीऐ बोलणौ आ इणौ कि तुमुऐ तेस माथै विश्वास कैलै ना कियौ?’ 32अगर आमै बोलु लै कि ‘लोगु रै बोलणै माथै, तैबै लोग रोशिणै ई’ कैलैकि इऐ लोग माना ई इणौ कि यहुन्ना परमेश्वरा री तौरफा कु आशौ औन्दौ भविष्यवक्ता आ।” 33तैबै तिंउऐ यीशु लै ज़वाब दैऔ, “आमै नाईं ज़ाणदै।” यीशुऐ भी तिउंलै बोलौ, “हाऊं भी तुमुकै नाईं बोलदौ कि ज़ो हाऊं कौराऊ, तेस कासरै हक्क कौरीऐ कौराऊ।”
Currently Selected:
मरकुस 11: BFZ-NT
Highlight
Share
Copy
Want to have your highlights saved across all your devices? Sign up or sign in
This work is licensed under Creative Commons Attribution-ShareAlike 4.0 License.