मरकुस 10
10
तलाका रै बारै दी यीशु री शिक्षा
(मत्ती 19:1-12; लुका 16:18)
1तैबै यीशु कफरनहूम गांवा छ़ाड़ियौ यहुदा परदेशा बाटीऐ यरदन नौईं पारा रै परदेशा दी आशै। तिऐ भी तेस काऐ एक भौरी भीड़ कौठै हुई। सेऊ तिऐ लोगु लै शिक्षा दैंदै लागौ, ज़िणौ कि सेऊ सौदा कौरा थौ। 2तैबै कुछ़ फरीसी लोग यीशु काऐ आशै और तेस पौरखणा लै पुछ़दै लागै कि, “एक आदमी लै आपणी छ़ेउड़ी रौ फैसलौ कौरणौ ठीक आ या नाईं?” 3यीशुऐ ज़वाब दैऔ, “परमेश्वरै आपणै सेवक मुसा रै ज़ौरिऐ केज़ौ हुकम आ दैऔ औन्दौ?” 4तिऊं लोगुऐ बोलौ, “मुसा रै नियमा ई इणौ आ लिखौ औन्दौ, ‘ज़ुण आदमी आपणी छ़ेउड़ी रौ फैसलौ कौरणौ च़ाहा सा, सेऊ आदमी तिऐं राज़ीनाऊं देइयौ पोरु गाड़ी सौका आ।’ ” 5यीशुऐ तिउंलै बोलौ, “मुसै एज़ौ हुकम पुराणै ज़मानै रै लोगु लै एथलै लिखौ थौ कैलैकि लोग परमेश्वरा री इच़्छ़ा पुरी कौरणै कु पोरु मुकरा ई।” 6धौर्म शास्त्रा दी इणौ आ लिखौ औन्दौ कि, “परमेश्वरै धौतरी चाणनै री शुरुआता दी मौरद और छ़ेउड़ी चाणै ई। 7और इणौ भी लिखौ औन्दौ कि ‘मौरद आपणै मां-बाबा छ़ाड़ियौ आपणी छ़ेउड़ी आइलै मिली रौआ आ। 8और सै एका ज़िसम बौणा ई।’ एज़ै कारणै सै दुई नाईं बल्कि एक ज़िसम ई। 9एथीलै परमेश्वर एक मौरद और छ़ेउड़ी शादी दी ज़ोड़ा आ तैबै सै एकी दुजै लै फैसलौ ना दिया।”
10ज़ेबी यीशु आपणै च़ेलेऊ आइलै घौरा दी थै तैबै च़ेलै एज़ै बारै दी तौंइऐ यीशु कु पुछ़दै लागै। 11तैबै यीशुऐ तिउंलै बोलौ, “ज़ुण आपणी छ़ेउड़ी लै राज़ीनाऊं देइऔ दुजी छ़ेउड़ी आइलै शादी कौरा सा, सेऊ आपणी पैहली छ़ेउड़ी रै विरोधा ई गान्दै काम कौरा आ। 12और ज़ेज़ी छ़ेउड़ी आपणै बोउटै लै राज़ीनाऊं देइयौ दुजै आदमी आइलै शादी कौरा सा, सै छ़ेउड़ी भी आपणै पैहलै बोउटै रै विरोधा ई गान्दै काम कौरा आ।”
लोल़डेऊ लै आशीर्वाद
(मत्ती 19:13-15; लुका 18:15-17)
13लोग यीशु काऐ लोल़डै लागै आणदै ताकी यीशु तिउंलै छ़ुंइयौ आशीष दिआ लौ। पर यीशु रै च़ेलेउऐ सै लोग डांटै। 14इणै देखीयौ यीशुऐ रोशुइयौ, आपणै च़ेलेउलै बोलौ, “लोल़डेऊ मुं काऐ आशणै दैऔ। इऊं ना रोकौ। कैलैकि इणै लोगु रै ज़िवा दी परमेश्वर राज़ कौरा आ ज़ुण इऊं लोल़डेऊ बाशीऐ भोल़ौ आ। 15हाऊं तुमुलै सौच़्च़ौ बोलाऊ, ज़ुण लोग परमेश्वरा रौ राज़, इऊं लोल़डेऊ बाशीऐ नाईं अपणावा लौ, तेसरै ज़िवा दी परमेश्वर केबी भी राज़ नाईं कौरी बौल़दौ।” 16इणै बोलीयौ यीशुऐ सै लोल़डै आपणी उंगाल़ी ऐ च़ुंगै और तिऊं रै मुंडा माथै हाथा छ़ाड़ियौ तिउंलै आशीष देई।
सेठ आदमी और सौदा री ज़िन्दगी
(मत्ती 19:16-30; लुका 18:18-30)
17ज़ेबी यीशु आपणै च़ेलेऊ आइलै बाटा दी थौ लागौ औन्दौ आण्डदै, तेबी एक आदमी दूड़िऔ तेस काऐ आशौ, और तेसरै बांगणै बौंधिऔ तेसकु पुछ़ौ, “ओ सारेऊ कु भौलै गुरु आ! मुलै इणौ बोलौ कि परमेश्वरा आइलै सौदा री ज़िन्दगी पाइणा लै मुं का जा सा कौरणौ?” 18यीशुऐ तेसलै बोलौ, “तू मुलै सारेऊ कु भौलौ कैलै बोलाई? एसरौ मतलब सुंच़ एरी। केज़ौ भी आदमी सारेऊ कु भौलौ नाईं आ सिरफ परमेश्वर ई सारेऊ कु भौलौ आ। 19पर तू परमेश्वरा रै हुकम ता ज़ाणाई, ताइंऐ धर्मशास्त्र पौड़ै हुणै कि, ‘खून ना कौरणौ, दुजै री छ़ेउड़ी आइलै गान्दै काम ना कौरणै, च़ोरी ना कौरणी, झ़ुठी गवाही ना देणी, धोखै-बाज़ी ना कौरणी, आपणै मां-बाबा री इज़्ज़त कौरणी।’ एज़ै नियमा माथै च़ालणौ ज़ुरुरी सा।” 20तैबै तिणी आदमीऐ बोलौ, “गुरुजी इऊं सारी बुशै ता हाऊं लोल़डी ओउलै मानाऊं। का मुंइऐ औज़ौ जा कुछ़ कौरणौ?” 21तैबै यीशुऐ तेस आदमी भिलै बौड़ै ध्याना कौरीऐ देखीयौ तेस आइलै प्यार कियौ और बोलौ, “ताउंलै औज़ौ भी एक काम आ ज़ो ताइंऐ कौरणौ जा सा। ज़ो धन-ज़यदात ताउंकै आ, तिऐं बेच़ीयौ ज़ो पैसै बौणा ई, तिऊं पैसै गरीबु कै बांट। तेथ बासिऐ आशै तू मुं पिछ़ु। तैबै ताउंलै सौरगा दी असली धन मिला आ।” 22इणै शुणियौ सेऊ आदमी ज़िऊंशुऔ। सेऊ मुं औंकड़ाइयौ पोरु डैऔ। कैलैकि सेऊ आदमी भौरी सेठ थौ।
23यीशुऐ च़ारौ तौरफा ई देखीयौ आपणै च़ेलेउलै बोलौ, “सेठ लोगु कै आपणै ज़िवा दी परमेश्वर राज़ कौरणै री ज़ाज़त देणी केती मुश्कल़ आ।” 24च़ेलै एज़ी बुशै शुणियौ हैरान हुऐ। (कैलैकि सारै लोग सुंच़ा थै कि परमेश्वरा री आशीषा कौरीयौ सेठ बौणा ई) तैबै यीशुऐ तिउंलै तौंइऐ बोलौ, “ओ मैरै भाईउओ, ज़ुण पैसै माथै भरोसौ छ़ाड़ाई तेसलै आपणै ज़िवा दी परमेश्वरा रौ राज़ कौराउणौ भौरी मुश्कल़ हुआ आ। 25ज़िणौ ऊंटा रै सिउणी री पाशी बाटीऐ डेउणौ कठिण आ। तिणी ई तेथकु भी भौरी कठिण आ सेठ लोगु लै आपणै ज़िवा दी परमेश्वर राज़ कौरणै दैणौ।” 26इणै शुणियौ च़ेलै औज़ौ भी भौरी हैरान हुऐ। सै आपु मांझ़िऐ पुछ़दै लागै, “ज़ैबै सेठ आदमी ना बौच़ी बौल़दौ तैबै कुण बौच़ा सा?” 27यीशुऐ सै बौड़ै ध्याना कौरी देखै और तिउंलै बोलौ, “लोगु कै ता इणौ नाईं औन्दौ पर परमेश्वरा कै हुआ सा। कैलैकि परमेश्वर सारौ कुछ़ कौरी बौल़ा आ।” 28पतरस यीशु लै बोलदै लागौ, “देख, आमै सारौ कुछ़ छ़ाड़ियौ ताऊं पिछ़ु लागै औन्दै आण्डदै।” 29यीशुऐ बोलौ, “हाऊं तुमुलै सौच़्च़ौ बोलाऊ कि ज़ुणिऐ मैरौ च़ेलौ बौणना लै और खुशी री खौबर शुणाउणा लै आपणै घौर या आपणी भाई-बौइणी या आपणै मां-बाब या आपणै छ़ोटी-छ़ोहरु या आपणी जमीन छ़ाड़ाई, 30तेसरी ज़िन्दगी लै शौ गुणौ कौरीयौ मिला आ। तेसकै घौर और आपणै टौबरा ज़िणै लोग मिला ई। तेसकै डोखरै भी मिला ई। लोग तेस सौतावा ई। पर सेऊ मुं आइलै। सौदा री ज़िन्दगी ज़िवा सा ज़ेबी हाऊं राज़ौ बौणु लै। 31भौरी लोग इणै ई ज़ुण आपुलै बौड़ै बौणा ई। ज़ेबी हाऊं राज़ौ बौणीयौ आशु लै तेबी सै लोग छ़ोटै हुआई। ज़ुण आपुलै छ़ोटै सौमझ़ा ई सै हुआई बौड़ै।”
आपणै मौरणै रै बारै दी यीशु रै चीजी बारै बोलणौ
(मत्ती 20:17-19; लुका 18:31-34)
32तेथ बासिऐ यीशु यरुशलेमा शहरा भिलै बाटा दी लागौ आण्डदै। कुछ़ लोग भी लागै तेस पिछ़ु आण्डदै। च़ेलै हैरान थै कि यीशु लागौ औन्दौ यरुशलेमा लै डेउंदै। कैलैकि तिऐ इणै भी लोग थै ज़ो तेसरै विरोधी थै। ज़ेज़ै लोग तेस पिछ़ु थै डेउंदै लागै औन्दै सै गौऐ थै डौरी कि तिऐ यीशु रौ का हाल औलौ। बाटा दी तिणीऐ सै बारह च़ुनै औन्दै च़ेलै अलग निऐं। ज़ो कुछ़ तेस आइलै हुणै वाल़ौ थौ तेथरै बारै दी तौंइऐ लागौ आपणै च़ेलेऊ कै बोलदै। 33यीशुऐ बोलौ, “शुणौ आमै यरुशलेमा लै ई डेउंदै लागै औन्दै। आदमी रौ छ़ोहरु, बौड़ै याजक और शास्त्रिउ रै हाथाई पकड़ाइया आ। सै मुलै मौउता री सौज़ा देइयौ मुं दुजी ज़ातीऊ रै हाथा दी दिआई। 34सै लोग मैरौ मज़ाक उड़ावा ई, मुंआ दी थुकाई, कोड़ै मारा ई। सै मुं पोरु झ़ांगाई, पर हाऊं चिजै दिनै तौंइऐ हुआ ऊ ज़िउंदौ।”
याकूब और यहुन्ना री औरज़
(मत्ती 20:20-28)
35बाटा दी डेउंदै-डेउंदै जबदी रै दुई छ़ोहरु याकूब और यहुन्ना यीशु काऐ आशै। तिंउऐ यीशु लै बोलौ, “गुरुजी, आमै च़ाई कि ज़ो आमै मांगी ई तुमै आमुलै पुरौ कौरेऊ।” 36यीशुऐ तिउंलै बोलौ, “तुमै का च़ाहा ई?” 37तिंउऐ बोलौ, “ज़ेबी तुमै राज़ै बौणा लै तेबी आमै भी तुमु आइलै राज़ कौरणौ च़ांई। आमु मांझ़िऐ कु एक बोशाल़ेउ सुल़टी भिलै और एक बोशाल़ेउ उल़टी भिलै।” 38यीशुऐ बोलौ, “तुमै नाईं सौमुझ़दै कि तुमै का ई लागै औन्दै मांगदै। ज़ेज़ौ दु:ख मुंइऐ झ़ेलणौ आ का तुमै तेस झ़ेली बौल़ा ई? ज़िणौ एथ बासिऐ मुं झ़ांगाई का तुमै तिणौ मौरी बौल़ा ई?” 39याकुबै और यहुन्नै बोलौ, “ओ आमै कौरी बौल़ी ई।” यीशुऐ बोलौ, “तुमै भी दु:ख झ़ेलियौ मौरा ई। 40पर मुकाऐ उल़टी सुल़टी बियै बोशणै वाल़ौ सिरफ परमेश्वर चुना आ। एज़ौ नाईं मैरौ काम।” 41बासिऐ ज़ैबै बाकी दस च़ेलेऊ कै पौतौ लागौ एज़ी बुशै रौ, तैबै सै याकूब और यहुन्ना लै भौरी रोशुऐ। 42तैबै यीशुऐ सारै च़ेलै आपु काऐ औटाऐ और बोलौ, “तुमै ज़ाणाई कि केज़ै भी सरकारा रै ज़ुण बौड़ै नेतै ई सै आपणी मौरज़ी कौरीऐ लोगु माथै राज़ कौरा ई। सै आपणौ हक्क देखाउणौ च़ाहा ई।” 43पर तुमु मांझ़िऐ इणौ नाईं च़ांई हुणौ। तुमु मांझ़िऐ ज़ुण सारेऊ कु बौड़ौ बौणनौ च़ाहा लौ तिणीऐ तुमु सारेऊ रौ सेवादार च़ांई बौणनौ। 44ज़ेज़ौ परधान बौणनौ च़ाहा लौ, सेऊ बौणा लौ सारेऊ रौ नुकुर। 45कैलैकि हाऊं ज़ुण परमेश्वरा री तौरफा कु आ भेज़ौ औन्दौ, दुजेऊ कु आपणी सेवा कौराउंदै नाईं आशौ औन्दौ बल्कि दुजेऊ री सेवा कौरदै ऊ आशौ औन्दौ। इदरा झ़ांऊ कि मुं पोरु झ़ांगाई। मेरी मौउता कु भौरी लोग आपणै पापा री सौज़ा कु बौच़ी बौल़ा ई।
शेड़ै बरतिमाई री आखी ठीक कौरणी
(मत्ती 20:29-34; लुका 18:35-43)
46तेथ बासिऐ यीशु आपणै च़ेलेऊ आइलै यरीहो शहरा लै आशौ। ज़ेबी सै तिदरु निकुल़दै थै लागै औन्दै तेबी यीशु आइलै बौड़ी भीड़ थी तैबै बाटा दी एक शेड़ौ भीखा मांगदै थौ बोशौ औन्दौ, तेसरौ नाऊं थौ बरतिमाई, ज़ासरौ मतलब तिमाईं नावां रै आदमी रौ छ़ोहरु। 47ज़ैबै तिणीऐ शुणौ कि नासरता गांवा रौ यीशु लागौ औन्दौ डेउंदै एज़ी बाटा दी, तैबै तिणीऐ हाकेउ मारीयौ बोलौ, “ओ यीशु, राज़ै दाऊदा री खानदानी रौ, मुं माथै दया कर।” 48ओरी लोगुऐ तेस शेड़ै लै बोलौ, “च़ुटुक थाक।” पर सेऊ शेड़ौ लागौ औज़ौ ज़ोरै-ज़ोरै हाकेउ मारदै, “ओ यीशु, राज़ै दाऊदा री खानदानी रौ, मुं माथै दया कर।” 49तैबै यीशुऐ टेकीऔ बोलौ, “एस शेड़ौ इदै औटाऔ।” लोगुऐ तेस शेड़ै लै बोलौ, “हिम्मत छ़ाड़, उठ! यीशु ताऊं औटाउंदै लागौ औन्दौ।” 50सेऊ शेड़ौ आपणै च़ादरु शोटीयौ उछ़ल़ियौ उठौ और यीशु काऐ आशौ। 51यीशुऐ तेसलै बोलौ, “का च़ाहा ई तू कि हाऊं ताउंलै का कौरु?” शेड़ै आदमीऐ बोलौ, “गुरुजी, हाऊं देखणौ च़ाहा ऊ।” 52यीशुऐ बोलौ, “डेऊ! ताइंऐ मुं माथै विश्वास कियौ आ, एज़ी ताइंऐ तू च़ांगौ हुऔ ई।” सेऊ शेड़ौ तेबी देखदै लागौ। तेथ बासिऐ सेऊ बाटा दी यीशु पिछ़ु लागौ आण्डदै।
Currently Selected:
मरकुस 10: BFZ-NT
Highlight
Share
Copy
Want to have your highlights saved across all your devices? Sign up or sign in
This work is licensed under Creative Commons Attribution-ShareAlike 4.0 License.