Mataio 13
13
1Hiwio nouri Iesu motoudo naibaha ohuo wia auoturi barawa naibaha emi. 2Wia oubi godogodo nouido naibaha orowai‐eediowaumo, mabu nouri nou peito naibaha orovia naiba emi wia oubi gema auwoha potowa naibaha otoiwaumo. 3Wia nana godogodo, oroa aibo, nou naibaha iwaduutiwa wia nou naiba iaowa: Tarovidioumo! Na’u mati kibo dubu, mate kiboido naibaha o’uro. 4Ina nou mate naibaha imobotuti, mate amida nave gohowa oromooutiwaumo wia pahagama naiba o’umo naiba ihoumo. 5Mate amida akabu batiwa oromooutiwaumo, batii nouowa hopu goberi biahai, wia hagohagoha nei naibaha orowohuodutiumo, nouri hopu goberi biahai. 6Ina hiwio naibaha iororo, nei naibaha ipihamuti wia neiio naibaha orokokoutiumo, nouri hipi tatori. 7Mate amida eperapera batiwa oromooutiwaumo, wia eperapera naibaha ihuodutiumo naiba imakikitiumo. 8Wia mate amida hopu meawa oromooutiwaumo, wia iopu naibaha imohaudiotutiumo, amida 100 amida 60 amida 30. 9Dubu nou gare ramu, wade nouro mirovidio.
10Wia nou kitomudio mere nouido o’umo naiba iaowaumo: Teiri riaowa roro neido oroaibo wadeito. 11Wia nou neido naibaha imowameai naiba iaowa: Mabu nouri imini mea rioido tau imaati Toboro‐bububati piroha nana’i umoitimoi wia neido nou aibo imaati biahai. 12Dubu nouri nou nana amida airia, ata nana nouido aiwaimaati, wia nou nana godoiha aiwairahooi; wia dubu nouri nou nana tatori doo nou himia nana auwoha aiwaimo‐orowaihiiti. 13Mabu nouri oroaibo neido mainaro, nouri nei keiiri keiiri ina eaurimo biahai; nei korowairi korowairi ina irovidioumo biahai wia nei umooitimo biahai.
14Isaia peroveta wade neido naiheha o’uro. Nou naiba iaowa;
Rioo aiwaimo‐irovidiotuti, aiwaimo‐irovidiotuti, wia rioo umoitimo raihe;
Rioo aiwaimo‐imeaurituti aiwaimo‐imeaurituti ina rioo iaurimo raihe.
15Nouri oubi imini nou koko oitiumo,
Wia nei gare tumutumuri,
Wia nei idomai nei tau irodumeaumo,
Nouri nei idomaito iauri tore,
Naiba nei gareito irovidio tore,
Naiba nei iminito iraromodioumo tore,
Mabu nouri nei himia imini imowaimo tore,
Nouri moro neido meaha banidodiai.
16Wia rio himia idomai nei tiaha geiiri, nouri nei meaha riauridumo; naiba rio gare nei tiaha geiiri, nouri nei meaha rirovidiodumu. 17Naiheha mo rioido ainaro; Peroveta oubi godogodo, rio himia kiauri nana’i nei auwo niro iaurimoi, ina neiio iaurimo biahai; wia rio himia kirovidio nana’i nei auwo niro irovidioi ina neiio irovidioumo biahai. 18Tarovidioumo rio, nouri mate kibo dubu oroaibo wade. 19Ina dubu nouri bububati wade irovidiowa wia wade nouri nou umoiti biahai; uba‐urio nou airo’uro wia nou iminiwa kibo na’i nouro naibaha iwodau; nouri dubu nou mate navewa koromoouti duburi. 20Nouri dubu nou mate akabu batiwa ivia, nouvia wade imetevidio wia geii ramu irovidio hagohagoha. 21Ina hipi nou himia nirogorowa oua biahai. Nou tutu emidio biahai ina uba ta’uwa wia heauwo ta’uwa nouri wadeudo o’umoi, hagohagoha nou niro biahai. 22Nouri dubu nou mate eperapera gorowa ivia; nouvia wade airovidio wia nouri batibati kiraromodio na’i wia moni koromohuwodio na’i, wade nouri neiio airarakasaraubiaidumo wia nou iopu tato romowai. 23Wia nouri dubu nou hopu meahawa mate tau ivia, nou wade imetevidio wia nou umo mea naibaha oiti wia iopu naibaha ihuodutiumo wia imohaudioumo amida 100 amida 60 amida 30.
24Oroaibo wade ata nouro neiido naibaha imowahuo nou naiba iaowa: Toboro bubu bati, dubu ata nou aibori. Nou mate mea nou himia batiwa naibaha ibo. 25Wia nou ta’uwa oubio uwo idamohiumo, nou himia korowaematuti dubu naibaha o’uro wia eperapera, mate koni batimabuwa, naibaha ibo wia nou himia naveito naibaha o’u. 26Ina koni mu naibaha iwohuodutiumo wia iopu naibaha imohaudio, nou ta’uwa eperapera naibaha iwohuodutiumo. 27Wia moto abea kowaati oubi nouido naibaha o’umo, naiba aroumo; Auwo‐dubu e, mate mea ro himia batiwa roro ibo tatora, ina eperaperanu toubatiudo o’umo? 28Nou neido naibaha iaowa; na’u korowaematuti duburo ibo. Kowaati mere’i nouido naibaha aroumo; Ina ro nirora imo aina’idumo ia’ubomoi? 29Wia nou naiba iaowa, O’o; noupa eperapera rioo ia’ubomowa ina koni ramu rioo ia’ubomo tore. 30Neiti himia mihuodio, doo iopu naiba oitimowa; ina iopu kimohaudio ta’u o’uwa, moro kiahio oubido ainaroi; rio eperapera taiiahiitimo wia taitohitimo patu mipihamuti, wia koni mo himia koni motowa hirio tavioumo.
31Oroaibo wade ata nouro neido naibaha imowahuo. Nou naiba iaowa: Toboro‐bububati nou Sinapi mate aibori, nouri dubu ataro naibaha emidai wia nou batimabuwa naibaha ibo. 32Iopu nouri kekehari, mate ata auwori, ina nou ta’uwa nou noro nou auwo airoiti, ata nou aibo biahai, wia nou nua aibo airoiti, nouri pahagama toboroudo naibaha o’umo wia nou keteri ohuwa naibaha emiwaumo.
33Oroaibo wade ata nouro neido naiba imowahuo; Toboro‐bububati nou dou kiaupai naibori, o’bo nouri emidai wia neewa na’u auwo koimo flour nouro piroha naibaha idia, ta’ui nouowa auwoha naiba iaupaumo.
34Nouri nana auwoha Iesu oubi gemaido oroaibo wadeito naiba iaowa; wia nana ata, oroa tato, nouro neido wade iao biahai.
35Nouri peroveta kiao wade nouro naiheha iwai: Peroveta dubu naiba iaowa:
Mo maata ainabooatuti oro aibo wade ainai‐iaodioi,
Ina nouri piroha kiwai nana’i, batibati kidodiai ta’ui nouowa, moro ainai‐waduuti.
36Nou ta’uwa Iesuro oubi gema naibaha imododiai wia nou motoito naibaha odoro: nou kitomudio mere nouido o’umo naiba aroumo: Eperapera batiwa oroaibo wade’i imoido tawaeviaro. 37Nouro naibaha imowameai, neido naiba iaowa: Oubiha‐mere nouvia mea mate kibo duburi. 38Batibati auwoha nei batimabu aibori. Bububati mere nei mea mate aibori. Ubauba urio mere nei eperapera aibori. 39Ubauba pai‐urio, nouvia korowaematuti dubu aibori. Batibati auwoha koropoiio ta’uwa nou iopu kimohaudio ta’u aibori, wia gururu‐mere, neivia kiahio oubi aibori. 40Naiba eperapera neiio daiahirutiumo wia kupoito imaditutiumo, batibati auwoha koropoiio ta’u, nou nou aibori. 41Oubiha‐mere nou himia gururu‐oubi, nouro naibaha aiwauro‐itiodoi wia gooa kowai nana auwoha wia ubauba kidia kidodiai nana auwoha, neiio nana nouri aiwaimo‐iahiiti. 42Wia auwo kupoito neiio nei aiwaimo‐iheei. Idebi kirotuti nouowa aiwaimo‐emidioi. 43Ina nou ta’uwa meamea kidia oubi, hiwio aibo neiio aiwaimo‐imeiviatuti nei himia Abea bububatiwa. Dubu nou gare ramu, nouro mirovidio.
44Ina Toboro‐bububati, moni godogodo bati mabuwa ipiraa, nou nou aibori; ina dubu ataro iviawa, nouro ipiraa wia nou tiaha geii emahebidio. Nouri nou o’uro wia nou himia nana auwoha nou owamewa wia bati mabu nouri nou wiha naibaha owai.
45Ina ata, Toboro‐bububati na’u dubu meamea kerauravi iopu imohoutituti, nou nou aibori. 46Wia nou ta’uwa na’u tiaha mea kerauravi iopu nouro naibaha ivia, nou naibaha o’u wia nou himia nana auwoha nouro naiba owamewa wia iopu nouri nou wiha naibaha owai.
47Ina ata, Toboro‐bububati, kamahu aibori. Nou auwo‐turiwa naibaha amehe’ua wia na auwoha naibaha oribiwaumo. 48Ina nou naibaha apee, nei potoito naibaha ividiaiwaumo wia nei naibaha emiwaumo wia mea mea na nei hito turiwa naibaha ibiwaumo wia ubauba na neiio aihe’eiwaumo. 49Nana nou aibo aiwauro’ui batibati koropoiio ta’uwa. Gururu oubi aiwaumo‐oroworuoi wia ubauba kidia oubi, meamea kidia oubi mabudo, neiio aiwaimo‐itate. 50Wia auwo kupowa neiio nei aiwaimo‐ihe’ei, wia eamo gema nouowa aiwaimo‐iridiotuti wia iowa aiwaimo‐imakikitituti.
51Iesu neido naiba aro: Nouri nana auwoha rio umo aroitidumo? Neiio nouido naibaha omowameaiwaumo: I’o Pai‐dubu e. 52Ina nou neido naiba iaowa: Nouri titi dubu, ina nou Toboro‐bububati kitomudio mere tau oiti, nou moto abea aibori wia orio nana wia tauo nana, nouro naibaha iwohuoduti nou himia tiaha mea kidiamo batiudo.
53Ina Iesu nouri oroaibo wade tau aro, batii nouri nouro naibaha emeheai. 54Ina nou himia batibatito nou naibaha o’uwaro. Nei himia sunagowa nouro neido naibaha imatomudiowa; wia nei auwoha aiemaieawaumo naiba iaowaumo: Nouri dubu imini mea wia tiaha kidodiai nana, toubatiudo iviatutiwa? 55Nouri dubu ive dubu merera? Nou mamu paina Mariara? Nou himia niamamiora Iakobora, Iosera, Simonara, Iudara? 56Nou himia nirabomio imo badi emidioumo tatora; ina toubatiudo rivia tuti nouri nana nouro airiworoho? 57Wia nei nouido gunuuni emahebidiowaumo. Ina Iesu neido naiba iaowa: Peroveta nou pai biahai nou himia batibatiwa wia nou himia motowa. 58Wia godogodo pupuito kiwaati na’i nouowa nouro idodiai biahai, mabu nouri neido iraromodioumo biahai.
Currently Selected:
Mataio 13: KXW1941
Highlight
Share
Copy
Want to have your highlights saved across all your devices? Sign up or sign in
Published by the British and Foreign Bible Society in 1941.