Mataio 12
12
1Nou ta’uwa Sabati hiwiowa Iesuro koni bati naibaha ohodai wia nou kitomudio mere’i dou niroro naibaha i’ai ina koni kia’e kia’e naibaha o’uwaumo. 2Ina Parisea oubio naibaha eauriumo neiio nouido naiba iaowaumo, Taiauri! ro kitomudio mereo Sabati bubu airemadauuriaidumo ina neiio naibaha ridodiaidumo. 3Wia nou neido naiba iaowa, Rioo titi iapo tatora nouri nana Davidaro nou ododiai hiwio’i nouowa nou wia nei noumu emidiowa dou niroro iai. 4Taiba Iehova Tana‐motoito nou odoro wia tana‐dou nouro ihowa. Bubu airia nou kiho biahai naiba noumu kemidio oubi nei kiho biahai, kohena‐oubi nei himia gauwoha. 5Ina rio bubu bukawa iapomo tatora nouri kohena‐oubio kimadoho nana ridodiaidumo Sabati hiwiowa, wia nei uba oitimo biahai. 6Wia mo rioido ainaro; Na’u dubu nouowari nou auwori, Tana moto kekebuori. 7Ina wade nouri rio umori, Mo niainiai kidia niro nimahebidio; kimio nana’i mo niro biahai; uba wade’i mea oubido rioo aro tato batoaumo. 8Nouri Oubiha‐mere, nou Sabati hiwio paiduburi.
9Ina nouri bati nou naibaha emeheai nei sunagoito nouro naibaha odoro. 10Wia dubu nouowa emidio karawo karawo tu ramu. Wia neiio Iesuido naibaha atodoumo: Meahara dubunu Sabati hiwiowa mea owaira? nouri neiio nouido ema’utimo niroi. 11Wia nou neido naiba iaowa: Boti mereri rio auwoha, ina nou mamoe na’u airoworoho ina Sabati hiwiowa nou bobowa ohuumaiwa nouro boboudo oviai tatora? 12Taiba auwori dubura e mamoera? Nouri nou uba biahai mea kidia idodiaimoi Sabati hiwiowa. 13Nou ta’uwa tu karawo karawo dubuido nou naibaha iaowa; Ro tu tatoturo, ina nou aiototuro wia nou tu mea naibaha oiti, tu ata aibo. 14Ina Parisea‐oubi naibaha o’uwaumo naibaha oromododiaiwaumo Iesu taiba epiamoi. 15Wia nou ta’uwa Iesu naiba umodaiti, nouri batii nouro naibaha emeheai, wia oubi gema piipiiha nou dooudo orobodowaumo wia nei auwoha nouro meaha naibaha iwaiwa. 16Wia nou neido wade modoboito iaowa; Mo rioo apoiwamo aue oubi amidaido. 17Nouri nana naibaha o’uro Isaia peroveta wade naiheha owaimoi; nou naiba iaowa;
18Taaurimo mo hiwaa mere’i moro nou tau nahueta,
Mo auwo niro mere mo giopu nouido geii geiiha nemahebidio,
Mo Urio nouido ainamaai;
Wia kemeiwotatuti wade, douboi oubido nouro aiwai mapoiwai.
19Nouro imama’utidio raihe, wia nouro imawo’idio raihe,
Wia dubu amidao nou himia viro navewa orovidioumo raihe.
20Tama karamoto nua nouro ehebia raihe.
Wia kupo keke nouro odoiia raihe.
Nouro kemeiwotatuti wade aiwatiodoi kotoihiro nana’i imidaimoi.
21Wia douboi oubi nou himia painawa neiio meaha aiwaimo‐araromodioi.
22Nou ta’uwa na’u dubu uba urio ramu neiio nouido naibaha owoumo, nou idomai tatori wia mubaruori wia Iesuro nou meaha owai; ina nouri dubu nou idomai tatori wia mubaruori, nou wade naibaha arowa naiba iauriwa. 23Wia oubi gema auwoha aemaeawaumo wia nei naiba iaowaumo: Nouri Davida merera? 24Ina Parisea oubi naibaha orovidioumo, neiio naiba aroumo: Dubu nouri uba urio naibaha riaho’iuti Belesebulo ubauba urio pai‐mere, nou himia pupuito. 25Wia Iesu nei kiraromodio na’i umo naibaha oiti, neido nou naibaha iaowa: Batibati auwoha, ina nou kihi orowai emaimowa, nou buru aibo waai, wia oopowa wia motowa ina nei kihi orowai ematutimowa nei tutu ia raihe. 26Ina Satana Satanaro riaho’iuti, nou himia kihi nouro tau orowai emai, ina taiba nou bububati koa koa tutura. 27Ina Belesebulo pupuito moro uba urio’i iaho’ioutiwa, rio himia mereo taiba waimo‐iahoiuti? Nouri neiio rio kiwotoi oubi aiwaimo‐iwai. 28Ina mo Iehova Tana‐urio pupuito uba urio’i iaho’iuti ina nouri Iehova bububati rioido tau o’uro. 29Pupuo mere motoito, dubu ataro teiri wadoroi wia nana piroito imei? Pupuo mere opuito nou kotohitiha otohiti ina doudo nou moto nana’i nou piroito aiwawamei. 30Dubu nou momu biahai, nouvia mo komobuori; wia dubu nou momu karaubuai biahai, nouro airimeheredio. 31Mabu nouri mo rioido nou niao; dubu ubauba kidia auwoha wia ubauba kiao wade auwoha, nouro aiwai‐ipiti, ata nouri duburo Tana‐urioido ubauba wade iaowa nou ipiti raihe; 32wia nouri duburo Oubiha‐mereido uba uba wade airiao, nou aiwai‐ipiti; ata nouri duburo Tana‐urioido ubauba wade airiao nourovia ipiti raihe; nou kiraromo kiraromo doihabuo batibatinu wia doo batibatii nouowa. 33Nua mea tawai wia iopu naiba mea tawai, e nua uba tawai wia iopu naiba uba tawai, mabu nouri nua auwoha oubio umori nei himia iopu ramuri. 34Rio kewahauke aramio, rioo teiri rarodumo mea nari ina rio ubari. Nouri nana’o imini aiapeeumo, noudo puruoro naibaha riao. 35Mea duburo mea nana nou himia mea iminiudo naibaha riotidio wia uba duburo ubauba nana nou himia ubauba iminiudo naibaha riotidio. 36Wia mo rioido ainaro; kemeiwotatuti hiwiowa, oubi nei himia dawodawoito kiao wade’i auwoha neiio wiha aiwaimo‐oweai. 37Mabu nouri ro himia mea wade’i neiio ro meaha aiwaimoowai wia ro himia ubauba wade’i neiio ro uba aiwaimo‐owai.
38Ina amida titi oubi wia Parisea oubi Iesuido omowameaiwaumo naibaha iaowaumo: Pai‐dubu e, imo tiaha modobo ro mabudo eaurimo niroi. 39Wia nou neido imowameai naiba iaowa; Ubauba wia siwokori oubio modobo naibaha romohodumo wia modobo ata neido imaati raihe, na’u Iona peroveta dubu nou modobori. 40Mabu nouri, naiba Iona, omei niro gororowa naibaha emidiowa, hiwio wia duo neewa na’u, nou aibo Oubiha‐mere hopu turiwa naibaha aiwamidioi, hiwio neewa na’u wia duo neewa na’u. 41Kimeiwotai hiwiowa, Ninevei oubi nouri oubi badi aiwaimo‐oroitorai wia nouri oubi neiio aiwaimo‐iapoiwai, mabu nouri nou ta’uwa Iona itomotuti nei imini aiimowa’umo, wia dubu nouowa auwori, Iona nou kekebuori. 42Kimeiwotai hiwiowa pai‐o’bo, auwoturi hapuowa, nouri oubi badi aiwa‐roitorai wia nouri oubi nouro aiwai‐iapoiwai, mabu nouri bati auudo nou naibaha o’uro Solomona imini mea wade irovidioi, wia dubu nouowa nou auwori, Solomona kekebuori. 43Nou ta’uwa uba urio, dubu aueudo ohuodidiowa; obo tato batiwa nou naibaha orohotuti, kemi bati omohotuti ina nouro owea biahai. 44Ina nou himiaido nou naiba iaowa; Mo himia motoito mainaraiwaidai toubatiudo nodorai; ina nou ta’uwa nou naibaha araiwai, nouro moto buru owea, meaha tau otobirumo wia geii nana’i nou ramu. 45Ina nou aio’u wia 7 urio ata noumu araubuaumo, nei ubaihari nou kekebuo ubari, wia nei idowaumo wia nouwowa emidiowaumo ina dooudo ta’u ubaiihari, opuito ta’u kekebu uba aibori. Ta’ui nou aibo nouri uba oubido nou aiwauro’ui.
46Wia nou ta’uwa Iesuro oubido naiba iaowa, nou mamu nou himia niamamio ramu, wegewa naibaha otoaumo nei nouido wade aroumo niroi. 47Wia dubu na’u nouido naiba aro: Taiauri! ro mamura niamamiora wegewa rotoidumo wia roido wade aroumo niroi. 48Wia nouri kiao dubuido nou naiba omowameai, naiba iatodoi: Bodioi mo mamura wia niamamiora? 49Wia nou tu aiotuturo, nou himia kitomudio mereido nou naibaha iaowa: Taauri! mo mamu wia mo niamamio. 50Nouri dubu nou rododiaidai nouri nana mo Toborowa‐abea nou niroi, nouvia mo niamari wia nirabori wia mamuri.
Currently Selected:
Mataio 12: KXW1941
Highlight
Share
Copy
Want to have your highlights saved across all your devices? Sign up or sign in
Published by the British and Foreign Bible Society in 1941.