Malakia 3
3
Leia e saele i mua o le mesia
1Ko leinei, e kau kakau loa laku tagata avelogo ;
E teuteu loa e ia le ala i oku mua.
Ti fokifa e ulu loa ki lona fale tapu le Aliki leia e kotou afa ;
Ti ko le tagata avelogo o le sai leia e kotou oli ki ai, ko leinei, e au a ia,
E pati le Eteleno o kau tau.
2Ko ai e mafai loa ke tuu i le aso o lana saele mai ?
Ko ai e tuu loa i aluga mo ka sa mai loa a ia ?
Talie e fai loa a ia pe le afi a le tagata saka ukamea,
Pe le topa a le tagata faifo.
3E tonatona loa a ia ki lalo, e saka loa e ia, ti e fakamea loa e ia le siliva ;
E fakamea loa e ia a vosa o Levi,
E fakamea loa e ia latou ofaipe le fakamea o le aulo mo le siliva,
Ti e lotou fai loa ki le Eteleno ni moliga i le faitotonu.
4Ti e malie loa le moliga a Suta mo Selusalemi ki le Eteleno,
Ofaipe aso mago, ofaipe fetuu o le temi afea.
5E kau fakafeofi loa kia koutou ki le fakamaau,
Ti e kau fakatavili loa o fakamaoki ki le kau faikikite loi mo le kau tono fafine,
Kia latou ala e fakapapau loi,
Kia latou ala e taofi ia le totogi o le tagata gaoi,
Latou ala e fakamamae ia le fafine sala avaga mo le toe sala matua,
Mo latou ala e agaveli ki le matapule, ti mo latou ala e leaise i kiate au,
E pati le Eteleno o kau tau.
6Talie ko au ko le Eteleno, e leaise kau fetogi.
Ti ko koutou, fanau a Sakopo, na leaise kotou fetogi foki.
Moliga mo tapuakina
7Talu mei le temi o okoutou tamana, na kotou mavae i aku fakatotonu,
Na leaise kotou tausi latou.
Kotou toe liliu mai kiate au, ti e kau toe liliu mai loa kia koutou,
E pati le Eteleno o kau tau.
Kae kotou pati : Kolea le nea leia e tonu ke motou toe liliu mai ai ?
8Pe kakaai e se tagata le Atua ?
Talie e kotou kakaai au,
Ti e kotou pati : Kolea le nea leia na motou kakaai ai a koe ?
I vaega kau agafulu mo moliga.
9Kua taai koutou e le malaia,
Kae e kotou kakaai au,
E le puleaga katoa !
10Kotou aumai ki le fale tanaki koloa a vaega kau agafulu fuli,
O tupu ke i ai se nea kai i loku fale ;
Kotou asiasii au i le nea aia,
E pati le Eteleno o kau tau,
Ti e kotou tio loa pe leaise kau fakamavaa loa kia koutou a matapa o atu lagi,
Pe leaise kau liligi loa kia koutou le tapuakina o lasi ai.
11Kia koutou e kau valoki loa leia e kai,
Ti e leaise maumaui loa e ia a fua o le kele,
Ti e leaise paa loa le vite i okoutou ulu fenua,
E pati le Eteleno o kau tau.
12E pati loa a puleaga fuli kia koutou, manuia,
Talie e kotou liliu loa ko se fenua o nea malilie,
E pati le Eteleno o kau tau.
Le kesekese o le tagata agatonu mo le tagata agatuu i le aso o le Eteleno
13E fia nealasi akoutou masau kiate au, e pati le Eteleno,
Ti e kotou pati : Kolea na motou lau kiate koe ?
14Na kotou pati : E leaise aoga o le tausi ki le Atua ;
Kolea na tou maua i le tausi o ana pelesepeto,
Ti mo le saele i le mamae,
O tupu ko le Eteleno o kau tau ?
15I le temi nei e motou pati : e manuia ake latou ala e fia taualuga ;
Io, e mou koloa ake latou ala e agaveli. Io, e lotou asiasii le Atua, ti e lotou saosaoa !
16Ti na masau loa latou ala e i ki le Eteleno ia latou ;
Na tokaga loa le Eteleno, ti na fakalogo loa a ia.
Ti na tosi loa se tosi fakamanatu i ona mua
Kia latou ala e i ki le Eteleno
Ti e fakaapaapa ki lona suafa.
17E lotou liliu loa ko loku kakai, e pati le Eteleno o kau tau,
E lotou liliu loa ko loku koloa mauiga, i le aso leia e kau teuteui.
E kau alofa loa kia latou,
Ofaipe se tagata e alofa ki lona vosa leia e tausi kiate ia.
18Ti e kotou toe tio loa ki le kesekese
O le tagata agatonu mo le tagata agaveli,
O leia e tausi ki le Atua
Ti mo leia e leaise tausi kiate ia.
Currently Selected:
Malakia 3: FB2000
Highlight
Share
Copy
Want to have your highlights saved across all your devices? Sign up or sign in
© Société Biblique de Genève, 2000-2020