Malakia 2
2
Tautea o kau faisakilifisio ;
valoki o le kakai
1I le temi nei, kia koutou le fakatotonu leinei, kau pelepitelo !
2Kapau e leaise kotou fakalogo, kapau e leaise kotou tokaga i lokoutou loto katoa
O tuku le kololia ki loku suafa, e pati le Eteleno o kau tau,
E kau kakau loa kia koutou le malaia,
Ti e kau fakaliliu loa a tapuakina ala na kau fakapapau atu kia koutou ko ni malaia ;
Io, e kau fakaliliu loa latou ko ni malaia, talie e leaise kotou tokaga ki ai i lokoutou loto katoa.
3Ko leinei, e kau maumaui loa akoutou pulapula,
Ti e kau laku loa ki okoutou mata ni faikauga,
A faikauga o manu ala e kotou momoli i akoutou sakilifisio,
Ti e ave loa koutou mo latou.
4E kotou iloa ai loa na kau tuku atu kia koutou le fakatotonu lena,
O tupu ke mauli laku sai mo Levi,
E pati le Eteleno o kau tau.
5Ko laku sai mo ia ko se sai o le mauli mo le tokamalie,
Ko lena le nea leia na kau tuku kiate ia o tupu ke i ai kiate au ;
Ti na maua e ia se i kiate au,
Na lulu a ia i mua o loku suafa.
6Na nofo le lao o le maoki i lona loto,
Ti na leaise maua le agaveli i ona laugutu ;
Na saele a ia mo au i le tokamalie mo le maoki,
Ti na fakamaliu e ia mei le veli ni tagata toka api.
7Talie e tonu ke taupau e laugutu o le tagata faisakilifisio le poto,
Ti e tonu ke afa i lona gutu le lao,
O tupu ko se tagata a ia na kakau mai e le Eteleno o kau tau.
8Kae ko koutou, kua kotou mavae i le ala,
Kua kotou fakaliliu le lao ko se nea fakatupu siga ki se toka api,
Ti kua kotou maumaui le sai mo Levi,
E pati le Eteleno o kau tau.
9Ti ko au, e kau fakaliliu loa koutou ko ni nea noa mo fakalialia
Ki mata o le kakai katoa,
Talie na leaise kotou taupau oku ala,
Ti na kotou tio ki mata o tagata
Mo ka kotou too le lao.
10Pe leaise tou maua fuli se tamana e tasi ?
Pe leaise ko se Atua e tasi leia na fakatupu ia tatou ?
Kolea e leaise tou agatonu ai i otou vasaa,
Ti e tou maumaui ai le sai o otou tamana ?
11Na leaise agatonu a Suta,
Ti na fai se nea fakalialia i Iselaele mo Selusalemi ;
Talie na fakakelekele e Suta le nea leia na fakatapu ki le Eteleno, le nea leia e fiafia ai le Eteleno :
Na avaga a ia mo le taine o se atua kese.
12E motusi loa e le Eteleno le tagata leia e fai ia le nea lena, leia e alaala mo leia e tali,
E motusi loa e ia a ia i falela o Sakopo,
Ti motusi loa e ia leia e fai ia se moliga
Ki le Eteleno o kau tau.
13Ko leinei foki le tasi a nea leia e kotou fai :
E kotou ufiufi le aletale o le Eteleno ki loimata,
Ki tagi mo lauga,
O tupu e leaise koi tokaga a ia ki moliga,
Ti e leaise koi tali e ia se nea mei okoutou lima.
14Ti e kotou pati : Kolea lona tupuaga ?…
Se tupu na ke fakapapau i mua o le Eteleno ke ke agatonu ki le fafine leia na avaga mo koe i lou temi tupulaga.
Ko lou soa a ia, leia na ke filifili totonu,
Kae ko leinei kua ke tiaki a ia.
15Na leaise fai le nea lena e se tasi, mo ka na i ai sona ga poto.
Ko le toka tasi na fai ia a ia, ti kolea lona tupuaga ?
Talie na afa e ia le sakoga leia na fakapapau e le Atua kiate ia.
Koia kotou tokaga ai kia koutou totonu,
Ti ke aua na agatuu se tasi ki le avaga o lona temi tupulaga !
16Talie e kau vesia ki le kapu o le avaga,
E pati le Eteleno, le Atua o Iselaele,
Ti mo leia e uufi ia le agamakeke ki lona kofu,
E pati le Eteleno o kau tau :
Kotou tokaga ki okoutou laumalie,
Ti ke aua na kotou agatuu !
Fakamea o Suta i le aso o le fakamaau
17E kotou fakapakia le Eteleno ki akoutou masau,
Ti e kotou pati : kolea le nea na motou fakapakia ai a ia ?
Se tupu na kotou pati : Ko leia e fai ia le veli e malie ki mata o le Eteleno,
Ti e fiafia a ia i le tagata lena !
Pe kotou pati : Kofea le Atua o le faitotonu ?
Currently Selected:
Malakia 2: FB2000
Highlight
Share
Copy
Want to have your highlights saved across all your devices? Sign up or sign in
© Société Biblique de Genève, 2000-2020