2 MACABEOS 11
11
Lisiase' cu yáax jóokol j ba'atel
(1 Mac 4.28-35)
1Chéen jun p'íit kiin dzo'oc u máane', Lisias u aj canan yéetel u láaktzil ajaw le máax xan ilic le méektáanilo', bey sen chi'ichnac tu yo'olal le ba'axo'ob táant u yúuchulo'obo', 2tu much'quintaj míin ochenta mil xíimbal ooc aj ba'atelo'ob, bey xan tuláacal u aj nat' tziimino'obe', ca j bin tu yóokol le judíob. Tu tucultaj ca'ach u sutic Jerusalene', u caajal le griego'obo', 3tu tucultaj xan u beetic u bo'ota'al u páatanil le kulnaj je'el bix u beetic u láak múuch' caajo'obo', yéetel u conic ja'ab man ja'ab u páajtalil u beeta'al u noojochil aj kiino'ob. 4Ba'ale' ma' tu tucultaj u nactáanta'al tumen u páajtalil Kui', leti'e' tu kubaj u yóol ti' u sen ya'abil u aj ba'atelo'ob yéetel u tziimino'ob bey ti' u ochenta elefanteob.
5Le ca j ooc tu lu'umil Judeae', tu nadzajubáa ti' Bet-sur, jun p'éel tuulum yaan míin veinticinco kilómetros ti' u caajil Jerusalene', ca tu ba'ateltaj. 6Le ca tu yojéeltaj Macabeo yéetel u aj ba'atelo'ob táan u ba'atelta le tuulum tumen Lisiaso', tu much'ajuba'ob yéetel tuláacal le caajo', ca jo'op' u yawat okolo'ob táan u káatico'ob ti' Yuumtzil ca túuxta'ac jun túul ángel u ti'al toquic Israel. 7Macabeoe', leti' tu yáax ch'a'aj u nu'ucul u ba'atele', ca tu dzaj u yóol u chuucáano'ob u ti'al ca xi'ico'ob tuláacalo'ob tu táan le ba'atelo' tu yo'olal u yáantico'ob u láaktzilo'ob. Tuláacalo'obe' chuca'an u yóolo'ob ca jo'op' u bino'ob. 8Ca'aliquil naadz yanilo'ob Jerusalene', chíicpaj tu táan le aj ba'atelo'obo', jun túul aj nat' tzíimin, sac u búuc táan u pi'iktic u nu'uculo'ob u ba'atel oro u ca'ajo'ob. 9Tuláacalo'ob túune' tu qui' t'anto'ob Ku cu ch'a'a óotzilil, tu yu'ubajo'ob sen mu'uka'ano'ob u ti'al u ba'atelo'ob ma' chéen yéetel máaco'obi' ba'ale' tac yéetel u asab dzíiquil ba'alche'ob, bey xan tac ti' tuulumo'ob beeta'ano'ob tu yéetel fierro. 10Xíimbalnajo'ob u tzolmajuba'ob u ti'al le ba'atelo', yéetel u aj ca'anil tocsajo'ob, áanta'ano'ob tumen u ch'a'a óotzilil Yuumtzil. 11Tu puljuba'ob tu yóokol u aj p'eeco'ob je'el bix u pulicuba'ob leóno'obe', tu pulajo'ob j lu'um once mil aj xíimbal oquil aj ba'atelo'ob yéetel mil setecientos aj nat' tzíimino'ob, cu dzo'ocole' tu beetajo'ob u púudzul u chuucáano'ob. 12U asab ya'abilo'obe' j púudzo'ob loobilta'ano'ob bey xan mina'an u nu'ucul u ba'atelo'ob. Lisiase' tu tocajubáa tumen j púudz ich subtalil.
Cu yantal jéedzel óol ti' judíob
(1 Mac 6.55-63)
13Ba'ale' Lisiase' ma' jun túul j ma' na'ati', le ca jo'op' u tucultic ba'axten j pa'ab u muuke', tu yilaj ma' tu pa'abal u muuk le hebreobo', tumen ti' yaan tu tzéelo'ob Junab Ku ti' máax yaan tuláacal páajtalile'. Tu túuxtaj túun aj túux chi'ob 14u ti'al ca u ya'al ti' leti'ob ca yanac jéedzel je'el bix unaje', bey xan tu ya'alaj je'el u caxtic bix u yocsic tu pool ajaw ca u bisjubáa tu yéetelo'obe'.
15Macabeo bey táan u caxtic u bin utzil ti' tuláacalo'obe', tu éejentaj tuláacal ba'ax tu túuxtaj a'albil Lisias, ajaw xane' tu éejentaj tuláacal ba'ax tu káataj Macabeo ti' le dzíib tu túuxtaj ti' Lisias tu yo'olal le judíob.
16Le dzíibil ju'uno'ob tu túuxtaj Lisias ti' le judíobo' bey dzíibta'anilo'oba':
Lisiase', cu te'escuntic u caajil judíob. 17Juan yéetel Absalón a aj túux chi'exe', tu kubajo'ob teen le ju'un dzíiba'an je'el bix le in dzíibtmaj caabalo', tu káatajo'ob teen ca in éejente. 18Tene' tin wa'alaj ti' ajaw tu yo'olal le ba'axo'ob chéen leti' je'el u éejentico', ba'ale' le yaan tin kab in éejentico' quin láaj éejentic ti' te'ex. 19Wa te'ex ma' tu kexpajal a wóole'ex ti' u meeyjulo'ob u ba'aluba'ob le méektáanilo', tene' bíin in wil u bin utzil ti' te'ex. 20Dzo'oc in wa'alic ti' a aj túux chi'ob yéetel ti' le in ti'alo'ob ca u múuch' tuculto'ob bix cun u beetilo'ob. 21Xi'ic utzil ti' te'ex.
Tu veinticuatro kiinilo'ob ti' u winal Dióscoro ti' u ja'abil ciento cuarenta y ochoe': 22U dzíibil ju'un ajaw Antíocoe' cu ya'alic beya':
Ajaw Antíocoe' cu te'escuntic Lisias u láaktzil. 23Bey tumen in taata dzo'oc u bisa'al le tu'ux yaan le kuo'obo', in káat ca cajlac yéetel jéedzel le máaxo'ob yano'ob tu yáanal in ajawile', tu yo'olal u páajtal kubicuba'ob ti' u meeyjulo'ob. 24Ba'ale' dzo'oc in wu'uyic u ya'ala'ale', le bin le judíobo' ma' u káato'ob cuxtal je'el bix suuc ti' le griego'ob je'el bix ca'ach u káat in taatae', ba'ale' u káato'ob cuxtal je'el bix suuc ti' leti'obo', le o'olale' dzo'oc u káatico'ob ca cha'abac u dzo'ocbesico'ob u ya'almaj t'aano'ob. 25Bey tumen in káat ca yanac xan jéedzel ti' le múuch' caaj je'elo', quin wa'alic ca su'utuc ti'ob le kulnajo' tu yo'olal u páajtal u cuxtalo'ob je'el bix suuc ti' u máanja'an ch'i'ibalo'obe'. 26Beet teen utz a túuxtic dze'edzec aj túux chi'ob u beeto'ob u t'aanil jéedzel tu yéetelo'ob, tu yo'olal le quéen u yojéelto'ob ba'ax dzo'oc in wa'alique' ca yanac jéedzel ti'ob u ti'al ca u kububa'ob ti' u meeyjulo'ob yéetel jéedzel.
27U dzíibil ju'un ti' u caajil judíobo' cu ya'alic ca'ach beya': ajaw Antíocoe', cu te'escuntic u múuch'ul u nuuquilo'ob le caaj yéetel xan tuláacal u caajil le judíobo'. 28Quin dzíiboltic ca xi'ic te'ex utzil, tene' toj in wóol. 29Menelaoe' dzo'oc u ya'alic teen a káate'ex bin suut ta wotoche'ex. 30Le o'olale' quin sa'atsic u si'ipil tuláacal le máaxo'ob dzo'oc u suuto'ob tu caajalo'ob tu kiinil treinta ti' u winalil Xántico. 31Le judíobo' je'el u páajtal u jaantico'ob le janalo'ob chéen u ti'alo'ob leti'obo' bey xan je'el u páajtal u dzo'ocbesico'ob u ya'almaj t'aano'ob je'el bix ca'ach úuche'. Mix jun túul ti'ob je'el u páajtal u chi'ichnaccunta'alo'ob tu yo'olal si'ipil u beetmajo'ob ca'ach úuchi. 32Quin túuxtic xan Menelao, u ti'al ca u yil u bin te'ex utzil. 33Xi'ic te'ex utzil:
Tu quince kiinilo'ob u winalil Xáantico ti' u ja'abil ciento cuarenta y ocho.
34Le Romano'obo' tu túuxtajo'ob xan ti' le judíob jun p'éel dzíibil ju'un cu ya'alic beya':
Quinto Memio yéetel Tito Manio, aj túux chi'ob Romanoilo'obe', cu te'escuntico'ob u caajil judíob. 35Le ba'ax dzo'oc u ya'alic te'ex Lisias u láaktzil ajawo', to'one' c éejentic xan. 36Ba'ale' ma'alob ile'ex le ba'ax tu ya'alaj ca máansa'ac tu táan ajaw, túuxte'ex to'on jun túul aj túux chi', tu yo'olal beyo' to'on bíin xi'ico'on tu táan ajaw u ti'al c ilic u beeta'al je'el bix a káate'exo', tumen táan c bin tac Antioquía. 37Bey túuno', séeb túuxte'ex to'on dze'edzec aj túux chi'ob u ti'al ca c ojéelt ba'ax a káate'ex. 38Xi'ic te'ex utzil.
Tu quince kiinil u winalil Xántico tu ja'abil ciento cuarenta y ocho.
Currently Selected:
2 MACABEOS 11: MAYADC
Highlight
Share
Copy
Want to have your highlights saved across all your devices? Sign up or sign in
Biblia Maya de Yucatán © Sociedades Bíblicas Unidas, 1992.