MALAKHI 2
2
1“Mynta te, ko phi ki lyngdoh, kane ka hukum ka long ïa phi. 2Lada phin ym sngap, bad lada phin ym pyrkhat, ïa ka ban ai burom ïa ka kyrteng jong nga,” ong U Trai ki paid, “te ngan phah ïa ka jingtim halor jong phi, bad ngan tim ïa ki jingkyrkhu jong phi: shisha keiñ, nga la tim lypa ïa ki, namar ba phim pyrkhat ïa kane. 3Ha khmih, ngan pynshitom ïa ki symbai jong phi namar jong phi, bad ngan tah da ka kynsha halor ki khmat jong phi, da ka kynsha ki jingkñia jong phi keiñ; bad yn shim noh ïa phi lem bad ka. 4#Jkñ. 3:11-13.Te phin tip ba nga la phah ma nga ïa kane ka hukum ha phi, khnang ba ka jutang jong nga kan ïoh long bad u Lebi,” ong U Trai ki paid. 5#Jkñ. 25:12.“Ka jutang jong nga bad u, ka la long ka jong ka jingim bad ka jingsuk; bad nga la ai ïa kine ha u, ba un dup sheptieng ïa nga; bad u la sheptieng ïa nga, bad u la sngewtriem ïa ka kyrteng jong nga. 6Ka hukum ka jingshisha ka la don ha ka shyntur jong u, bad ïa ka jingbymhok ym shym shem ha ki rmiang shyntur jong u: u la ïaid bad nga ha ka jingsuk bad ka hok, bad u la pynphai noh shibun na ka jingbymhok. 7Naba ki rmiang shyntur u lyngdoh ki dei ban sumar khop ïa ka jingtip, bad ki dei ban wad ïa ka hukum na ka shyntur jong u: naba u long u nonglam-ktien jong U Trai ki paid. 8Hynrei, phi la kynriah noh na ka lynti; phi la pynthut ïa ki bun shaphang ka hukum; phi la pynpyut ïa ka jutang u Lebi,” ong U Trai ki paid. 9“Namar kata, nga ruh nga la pynlong ïa phi kiba beiñ bad kiba poh ha khmat u paidbah baroh, kat kumba phim shym sumar ïa ki lynti jong nga, hynrei, phi la shah shiliang ha ka hukum.”
U Blei u sneng tyngeh ïa u paidbah namar kaba mane bleithaw
10Hato ngi baroh ngim don uwei u kpa? uwei U Blei um shym la thaw ïa ngi? balei ngi ïashet kylla uwei uwei ïa la u para, ngi da pynsang ïa ka jutang jong ki kpa jong ngi? 11U Judah u la shetkylla, bad la leh ïa ka jingijli ha Israel bad ha Jerusalem; naba u Judah u la pynsang ïa ka jingkhuid jong U Trai ïa uba u ieit, bad u la shongkurim ïa ka khun jong u blei nongwei. 12U Trai un ot noh ïa u briew uba leh ïa kane, ïa uta uba ap bad uta uba phai ktien, na ki ïingjaiñ u Jakob, bad ïa uta uba ainguh ïa ka jingainguh ha U Trai ki paid.
13Bad ïa kane phi leh pat: phi tap ïa ka duwan U Trai da ki jingjaw ummat, da ka jingïam, bad da ka jingud, haduh ba um ñiew shuh ïa ka jingainguh, lymne um pdiang ïa ka na ka kti jong phi da ka mon sngewbha. 14Pynban, phi ong, “Namar balei?” Namar ba U Trai u la long u sakhi hapdeng jong me bad ka tnga samla jong me, ïa kaba me la shetkylla, la ka long ka lok jong me, bad ka tnga ka jutang jong me. 15Hato ruh u la pynlong ïa kawei ne em, la ka mynsiem ka dang tam ha u? Namar balei te ïa kawei? u la wad ïa u symbai bariewblei keiñ. Namar kata, to sumar ïa la ka mynsiem, bad wat ai ïano ïano ba un shetkylla ïa ka tnga samla jong u. 16“Naba nga isih ïa kaba iehnoh noh,” ong U Trai, U Blei ki Israel, “bad ïa uta uba pynbit-tngit ïa la ka jaiñkup da ka jingleh-jubor,” ong U Trai ki paid: “namar kata, to sumar ïa la ka mynsiem, ba phin ym shetkylla.”
Ka sngi ka jingbishar ka la hajan
17Phi la pynbtai ïa U Trai da la ki ktien. Pynban, phi ong, “Ha kaba kumno ngi la pynbtai ïa u?” Ha kaba phi ong, “Uwei uwei baroh uba leh sniew u long u babha ha khmat U Trai, bad u sngewbha ha ki;” lane “hangno U Blei ka jingbishar?”
Currently Selected:
MALAKHI 2: KHB
Highlight
Share
Copy
Want to have your highlights saved across all your devices? Sign up or sign in
The Bible Society of India