MATAYO 26
26
Abasinjilili ba Abayahudi batuta okhwira Yesu
(Mrk. 14:1-2; Luka 22:1-2; Yoh. 11:45-53)
1Ne olwa Yesu yali namalile okhwechesia amakhuwa ako koosi, yaboolela abeechibe ari, 2#Okhur. 12:1-27“Shinga olwa mumanyile, olunyuma lwetsinyanga tsibili, lisabo lia Pasaka litsiokhubaho, ne Omwana womundu alahaanwa mbu abambwe.” 3Kho abesaaliisi abakhulundu nende abakhulundu bandi nibakhung'anila halwanyi wa Kayafa, omwisaaliisi omukhulundu. 4Nibasanjilana halala nibatuta shinga olwa banyala okhutiila Yesu mabiswi, nende okhumwiira. 5Habula baboola bari, “Shikhulakholakhwo amakhuwa kano munyanga tsielisabo ta, shichila indiri inyala okhubuukha mubandu.”
Yesu abakhwa amafura keshing'ari Betsania
(Mrk. 14:3-9; Yoh. 12:1-8)
6Ne olwa Yesu yali Betsania, munzu mwa Simoni omundu wobuchele, Yesu niyekhaale nalitsanga, 7#Luka 7:37,38omukhasi undi yetsa khuye nali nende eshimuka shiamafura keshing'ari khandi akobukusi obweikulu muno, natsukhulula amafura ako khumurwe kwa Yesu. 8Nebutswa olwa abeechi balola bario basinyikha, nibareeba bari, “Mbushiina nikasasibwa butswa kario? 9Shichila amafura kano kakhakusiibwe obukusi bweikulu, mana amapesa ako kahebwa abatakha!” 10Nebutswa Yesu yali namanyile akabali nibaboolanga, kho nababoolela ari, “Munyasinjia omukhasi uno mbushiina? Okhuba yakholeele isie likhuwa lilayi khandi eliolukoosi. 11#Okhuk. 15:11Inywe buli lwosi muli nende abatakha, nebutswa shimulabetsanga ninasi tsinyanga tsiosi tawe. 12Omukhasi uno atsukhuluule amafura kano khumubili kwanje, khulwokhurechekha omubili kwanje okhuyabilwa. 13Emuboolela toto mbu, hosi hosi aha amakhuwa amalayi aka Nyasaye kano kakhayaalwe mushialo, amakhuwa komukhasi uno akholile okhuula kakharumbulwe khulwa okhumwitsulila ye.”
Yuda afuchilila okhukhoba Yesu
(Mrk. 14:10-11; Luka 22:3-6)
14Kho mulala khubeechi ekhumi nababili owalangwa mbu; Yuda Isikarioti, yatsiila abesaaliisi abakhulundu, 15#Zak. 11:12nabareeba ari, “Nishiina eshiamulambelesia nemba nehaana Yesu khwinywe?” Kho nibabala ebitonye bieifetsa amakhumi kataru nibamuhelesia. 16Ne okhurula ebise ebio, Yuda yachaaka okhukhaaba obwiyangu obulayi bwokhukhobelamwo Yesu.
Yesu nende abeechibe berecheshela lisabo lia Pasaka
(Mrk. 14:12-21; Luka 22:7-14,21-23; Yoh. 13:21-30)
17Khunyanga yambeli yelisabo liemikaate chibulamwo limela, abeechi abo betsa khu Yesu nibamureeba bari, “Nihena aha wenya mbu khukhurecheshele eshiokhulia shielisabo lia Pasaka?” 18Naye nabakalusia ari, “Tsie mwitookho, mulanyoolayo omundu mana mumuboolele muri, ‘Omwechesia aboolanga mbu, ebise bianje bili ahambi okhuula, ne isie nende abeechi banje khulaliila lisabo lia Pasaka munzumwo.’ ” 19Mana abeechi nibakhola shinga olwa Yesu yali nabalachilisiye, ne nibarechekha lisabo lia Pasaka. 20Olwa obwile bwola, Yesu nende abeechibe ekhumi nababili bekhala khulwokhulia. 21Ne olwa bali nibaliitsanga, Yesu naboola ari, “Emuboolela toto mbu, mulala khwinywe niye oulaakhoba isie.” 22Abeechibe nibabeelela muno, ne buli mulala nachaaka okhumureeba ari, “Omwami, ndakhaba nendi isie noho?”
23 #
Tsits. 41:9
Yesu nabakalusia ari, “Oyo outonganga omukaate mushikaye shilala ninasi niye oulaakhoba isie. 24Omwana womundu alafwa shinga olwa Amahandiko amatakatifu kaboola, nebutswa ali mushilaamo shiobubi omundu oukhoba Omwana womundu! Bwakhabeele obulayi omundu oyo naba niyalakhebuulwe tawe!” 25Yuda, owakhoba Yesu nachinguula omwoyo nareeba ari, “Omwechesia, nisie owoboolangakhwo noho?” Naye Yesu nakalusia naboola ari, “Lwokhali Omwene niwe ouboolile.”
Lisabo elia Omwami
(Mrk. 14:22-26; Luka 22:14-20; 1 Abakor. 11:23-25)
26Ne olwa bali nibaliitsanga, Yesu yabukula omukaate, nakhupila Nyasaye orio, nakusonyola, ne nahelesia abeechibe. Nababoolela ari, “Bukule, mulie. Kuno nikwo omubili kwanje.”
27Khandi nabukula eshikombe shieidivai, nakhupa orio khu Nyasaye, nabahelesia. Nababoolela ari, “Bukule munywekhwo mwesi. 28#Okhur. 24:8; Yer. 31:31-34Kano namabanga kanje, akokhutinyisia indakano ya Nyasaye yakhola nende abandube, akasundukha kho mbu abandu abanji baleshelwe obwonooni. 29Emuboolela toto mbu, shindalanywakhwo khandi idivai yino tawe, okhuula khunyanga eya ndakhanywe ninenywe idivai yimbia mubwami bwa Papa wanje.” 30Kho nibemba olwimbo ne nibarula nibatsia khushikulu shia Miseituni.
Yesu aboola mbu Petero alamwikaana
(Mrk. 14:27-31; Luka 22:31-34; Yoh. 13:36-38)
31 #
Zak. 13:7
Mana Yesu nababoolela ari, “Inywe mwesi eshilo shino mulanzilukha nimundekha, okhuba Amahandiko amatakatifu kaboola mbu, ‘Nyasaye alakhupa omwayi, ne amakondi komwitulilie kalasalaasibwa.’ 32#Mat. 28:16Ne olunyuma lwokhulamusibwa khwanje, neranjilile okhutsia Galilaya inywe nimushili.” 33Naye Petero namukalusia ari, “Kata abandi boosi nibaba nibelukha nibakhulekha, isie shindalakhulekha tawe.”
34Yesu naboolela Petero ari, “Ekhuboolela toto mbu, eshilo shino itaywa niyilashialakula ta, olanzikaana akhandi khataru.” 35Petero namukalusia naboola ari, “Kata nikakhaba mbu okhuula isie efwe ninawe, shiyala okhukhwikaana kata nahatuutu tawe.” Khandi abeechi bandi abo boosi nibaboola bario.
Yesu asaaya mumukunda kwa Getsisemane
(Mrk. 14:32-42; Luka 22:39-46)
36Mana Yesu natsia nende abeechibe habundu ahalangwa mbu Getsisemane, ne nababoolela ari, “Mutong'e hano nasi neshitsiakhwo halia okhusaaya.” 37Kho nabukula Petero nende abasiani ba Zebedayo babili abo, nachaaka okhubeelela nende okhunyakhana mumwoyo. 38Mana nababoolela ari, “Omwoyo kwanje kuli neshibeela eshinji, kata shinyala okhunzira. Mutong'e hano ne mube meeso.” 39Natsiakhwo hambeli hatiiti, nakwa hasi mafumama ne nasaaya naboola ari, “Papa wanje, nikaba nikanyalikha, rusiakhwo eshikombe shiamanyakhano shino! Nebutswa kalaba aka isie enzenya ta, habula aka iwe wenya.”
40Mana nakalukha aha abeechi bataru abo bali, ne nanyoola nibali mundoolo. Naboolela Petero ari, “Kho shimunyala okhuba meeso ninasi kata khulwa isaa ndala yonyene ta? 41Mube meeso nimusaaya kho mbu, muleshe okhukwa mukhuteemwa. Toto omwoyo kwenyanga, nebutswa omubili nomutofu.”
42Khandi Yesu yatsia nasaaya olwakhabili, naboola ari, “Papa wanje, nikakhaba mbu eshikombe eshiamanyakhano shino shishinyala okhurusibwaho nindalashinywelekhwo ta, lekha akawenya kekhole.” 43Ne khandi niyetsa nanyoola abeechibe nibali mundoolo, shichila bali nibashili netsindoolo tsinyinji. 44Mana nabalekha natsia nasaaya olwa khataru naboola amakhuwa malala kene ako. 45Mana niyetsa ahabeechi abo bali, nababoolela ari, “Khandi mushikonanga butswa nimuhuluukha? Lole! Eshise shiulile bulano eshia Omwana womundu akhobilwe mubunyali bwabonooni. 46Buushe, chende khutsie. Lole, omukhobi wanje ali ahambi okhuula.”
Okhutiilwa khwa Yesu
(Mrk. 14:43-50; Luka 22:47-53; Yoh. 18:3-12)
47Ne olwa Yesu yali nashiboolanga, Yuda mulala khubeechi ekhumi nababili, niyetsa nende omukanda omukhongo, nibali nende tsinganga nende ebikong'o, nibarumilwe nabakhulundu ababesaaliisi nende abakofu. 48Ne owamukhoba yali nabamanyiye eshilolelo naboola ari, “Owanefumbeelele niye owatsana oyo, mumutiile.”
49Yuda natsia shilunji khu Yesu namuboolela ari, “Omulembe kube khwiwe Omwechesia,” ne namufumbeelela. 50Yesu nakalusia ari, “Owashianje, khola elia witsile okhukhola.”
Mana nibetsa nibakwa khu Yesu nibamutiila. 51Mulala khubali nende Yesu natsomola olukangalwe, narema omusumba owomwisaaliisi omukhulundu, nakhalaka eshirwishie. 52Yesu namuboolela ari, “Kalusia olukangalwo ahalubetsanga. Boosi abekhoonyelanga olukanga okhwira, baleerwa nolukanga. 53Shimumanyilekhwo mbu enyala okhusaaya obukhoonyi okhurula khu Papa wanje, ne habwene nahabwene niyarumila emikanda chiabelihe ekhumi nachibili, echia abamalaika abanji ta? 54Kho nikaba kario Amahandiko kakhahesibwa karie, akaboolanga mbu, ‘Kano kakhoyile okhwikholekha?’ ”
55 #
Luka 19:47; 21:37 Habwenaho Yesu naboolela abemikanda abo ari, “Murulile nende tsinganga nende ebikong'o okhundiila shinga abatiila omunuuli? Buli nyanga ndekhalanga nimwechesia muhekalu neshimwayandiila ta. 56Ne kano koosi kekholeeshe mbu akabalakusi baboola mu Amahandiko kosibwe.”
Mana abeechibe boosi nibelukha nibamulekha.
Yesu ayasibwa mushiina shia Abayahudi
(Mrk. 14:53-65; Luka 22:54-55,63-71; Yoh. 18:13-14,19-24)
57Mana abali nibatiilile Yesu bamuyila ewa Kayafa, omwisaaliisi Omukhulundu, ewa abeechesia bamalako nende abakofu bali nibakhung'anile. 58Ne Petero yamulondangakhwo inyuma ehale okhuula mulwanyi lwomwisaaliisi omukhulundu. Niyenjila mulwanyi niyekhala hasi nende abelihe okhulola shinga olwa nakabe mukhumalilikha. 59Abesaaliisi abakhulundu nende abeshiina boosi bateema okhukhola obuloli bwobubeeyi khu Yesu kho mbu bamwire. 60Ne shibanyalilwa okhunyoola obukobosheli bwosi ta, kata olwa abanji berusia nibaboola akobubeeyi khuye. Ne olunyuma, babili berusia 61#Yoh. 2:19nibaboola bari, “Omundu uno yaboola ari, ‘Enyala okhulikulula Ihekalu ya Nyasaye ne mutsinyanga tsitaru nechiumbakha khandi.’ ”
62Mana omwisaaliisi omukhulundu nasinjila namureeba ari, “Shiolikhwo nelikalusio khukano ta? Ne likhuwa shiina liabandu bano bakhwinjililangakhwo.” 63Naye Yesu naholeela butswa. Kho khandi omwisaaliisi omukhulundu namuboolela ari, “Ekhutsuuba muliira lia Nyasaye ouliho mwoyo mbu, okhuboolele noba noli niwe Kristo, Omwana wa Nyasaye.” 64#Dan. 7:13Yesu namukalusia ari, “Omwene lwokhaboolile. Ne emuboolela inywe mwesi mbu, Okhurula bulano mulalola Omwana womundu niyekhaale khumukhono musaatsa kwa Nyasaye, khandi niyetselanga khumumaleesi komwikulu!”
65 #
Abal. 24:16
Mana olwa Omwisaaliisi omukhulundu yahulila amakhuwa ako, yarandula ebifwalobie, naboola ari, “Anyechile Nyasaye! Mbushiina nikhushienya abaloli bandi? Muhuliile bulano shinga olwa anyechile Nyasaye. 66Mukhalaka murie?” Nibamukalusia bari, “Noweshikha, akhoyile okhufwa.”
67 #
Isa. 50:6
Balala khubo bamufutsa amare mubweni, nibamukhupa, nabo abandi nibamupaama tsikhofi, 68nibamuboolela bari, “Iwe Kristo! Khurumbulilekhwo mbu, oukhukhupile niwiina?”
Petero amwikaana Yesu akhandi khataru
(Mrk. 14:66-72; Luka 22:56-62; Yoh. 18:15-18,25-27)
69Naye Petero yali niyekhaale elwanyi mulwanyi. Ne Omukhaana undi niyetsa ewa yali namuboolela ari, “Wesi obeele nende Yesu Omugalilaya.” 70Nebutswa Petero yekaana imbeli wabwe boosi naboola ari, “Shiemanyile akoboolanga tawe.” 71Ne olwa yatsia hashiliibwa, Omukhaana undi namulola, naboolela abali nibasinjiileho ari, “Omusaatsa uno abeele halala nende Yesu Omunazareti.” 72Khandi Petero niyekaana, nakalusia ari, “Nditsuba mbu shiemumanyilekhwo omundu oyo tawe!”
73Ne olunyumakhwo, abali nibasinjiileho beetsa nibaboolela Petero bari, “Toto mwene, wesi oli mulala khubo, okhuba okhuboolakhwo khukhubulanga.” 74Mana nachaaka okhwitsuba ari, “Shiemumanyile omundu oyo tawe.” Habwene nahabwene itaywa niyilakula. 75Mana Petero niyetsulila aka Yesu yali namubooleele mbu, “Itaywa niyishili okhulakula naunzikaane akhandi khataru.”
Narulaho natsia nalila obululu.
Currently Selected:
MATAYO 26: OLUPR
Highlight
Share
Copy
Want to have your highlights saved across all your devices? Sign up or sign in