MATAYO 25
25
Oluchelo lwabakhaana abashisila ekhumi
1 #
Luka 12:35
“Ebise ebio Obwami bwa Nyasaye bwakhachelaasibwe nende abakhaana abashisila ekhumi, ababukula tsitaha ne nibatsia okhwakaanila omwene shiselelo. 2Barano khubo bali abayingwa, ne barano bandi bali abachesi. 3Okhuba olwa abakhaana abayingwa babukula tsitaha tsiabwe, shibabukulakhwo amafura kandi tawe. 4Ne abachesi abo nabo nibabukula amafura kandi mubimuka halala nende tsitaha tsiabwe. 5Ne lwomwene shiselelo yashinda okhwitsa, boosi ekhumi barenjetsa nibakona tsindoolo.
6“Ne mushilo hakari bachaaka okhuhulila olukhu mbu, ‘Lole, omwene shiselelo ngwoyo yetsanga! Rule elwanyi mwitse mumwakanile.’ 7Mana abakhaana abo boosi nibabuukha, nibarechekha tsitaha tsiabwe. 8Kho abayingwa abo nibaboolela abachesi bari, ‘Mukhuhekhwo amafura kenywe, shichila tsitaha tsiefwe tsisimanga.’ 9Nebutswa abachesi abo nibabakalusia bari, ‘Haundi shikalakhuhela ifwe nende inywe tawe. Khulweshio nobulayi inywe abeene mutsie mwikule amafura kenywe.’ 10Kho olwa abakhaana abayingwa abo bali nibashitsiile okhukula amafura, omwene shiselelo yoola. Ne abakhaana barano abali niberecheshe, nibenjila ninaye mwisabo lieshiselelo, ne omuliango nikwikalwaho.
11 #
Luka 13:25
“Olunyuma, abakhaana abayingwa abo bosi niboola. Nibalanjilisia bari, ‘Omwami, omwami, khwikulileho omuliango!’ 12Naye omwene shiselelo nabakalusia naboola mbu, toto mwene emuboolela mbu, isie shiemumanyile ta.” 13Mana Yesu namalilisia naboola ari, “Mube meeso, shichila shimumanyile inyanga kata isaa tawe.”
Oluchelo lwabakhalabani bataru
(Luka 19:11-27)
14 #
Luka 19:11-27
“Mubise ebio, Obwami bwa Nyasaye bwakhachelaasibwe nende omundu owali nali okhutsia muluchendo lwehale. Ne nalanga abakhalabanibe, nabalaka okhusinjilila emianduchie. 15Nahelesia buli mulala okhulondana nende obunyalibwe bwokhubilinda. Owambeli yamuhelesia tsitalanda#25:15 italanda: Yihela nende tsidinari ebikhumila birano (Idinari yalinji omurungo kweinyanga ndala). tsirano, owakhabili namuhelesia tsitalanda tsibili, ne owakhataru namuhelesia italanda ndala. Mana omundu oyo narula natsia khuluchendolwe. 16Omukhalabani owali nanyoolile tsitalanda tsirano yatsia natsikholela inganga, ne nanyoola tsitalanda tsindi tsirano. 17Munjila ndala eyo, omukhalabani owali nanyoolile tsitalanda tsibili, yakhola inganga ne nanyoola tsitalanda tsindi tsibili. 18Ne omukhalabani owali nanyoolile italanda ndala oyo, yatsia nayabila hasi amapesa aka omwamiwe.
19“Olunyuma lwetsinyanga tsinyinji, omwami wabwe oyo yachelela nabasia ninabo emianduchie. 20Omukhalabani owali niyahebwa tsitalanda tsirano oyo, niyetsa netsindi tsirano naboola ari, ‘Omwami, wambelesia tsitalanda tsirano, lola enyoolile inganga yetsitalanda tsindi tsirano.’ 21Omwamiwe namuboolela ari, ‘Okholile obulayi, oli omukhalabani omulayi khandi omwisiikwa. Obeele omwisiikwa khubindu ebituutu, khweshio ndalakhwemekha okhusinjilila ebindu ebinji, winjile mubusangaali bwomwamiwo.’
22“Omukhalabani owali niyahebwa tsitalanda owali niyahebwa tsitalanda tsibili niyetsa naboola mbu, ‘Omwami, wambelesia tsitalanda tsibili, lola enyoolile inganga yetsindi tsibili.’ 23Omwamiwe namuboolela ari, ‘Okholile obulayi, oli omukhalabani omulayi khandi omwisiikwa; obeele omwisiikwa khubindu ebituutu, ndalakhwemekha okhusinjilila ebindu ebinji. Winjile mubusangaali bwomwamiwo.’
24“Kho omukhalabani owali niyahebwa italanda ndala niyetsa, naboola ari, ‘Omwami, ndakhumanya shinga lwoli omundu omutinyu, ouchesanga aha walaraaka ta, oubunjelesinjia aha walamiitsa ta. 25Ndaria mana ninzia okhubisa italandayo mwiloba. Lola! Italandayo njieyino.’
26“Kho omwamiwe namukalusia ari, ‘Iwe omukhalabani omumayanu khandi omutofu! Wamanya mbu enjesanga aha ndalaaraaka ta, nimbunjelesia aha ndalalamiitsa tawe. 27Wali nokhoyile okhukholela italanda yanje inganga, ne mukhuchelela khwanje ndakhanyoolile italanda yanje nende injelesio yayo. 28Khulweshio, mumunuule italanda eyo, ne muhelesie ouli netsitalanda ekhumi oyo. 29#Mat. 13:12; Mrk. 4:25; Luka 8:18Okhuba buli mundu ouli nende ebindu alameetwa ebindi, ne alaba ninabio ebinji, nebutswa oyo oubula eshindu, kata shitiiti eshiali ninashio alanuulwa.’ 30#Mat. 8:12; 22:13; Luka 13:28Ne omukhalabani omukhaya uno mumusukune elwanyi mushiilima, ewa abandu balalila nibalumasia ameeno.”
Obukhalachi bweshiina shiokhumalilikha
31 #
Mat. 16:27;
Mat. 19:28
“Olwa Omwana womundu yakhetse muluyalilwe halala nende abamalaika boosi, yakhekhale khushifumbishie shioburuchi shioluyali. 32Ne abandu bamahanga koosi bakhakhung'asibwe imbeliwe, ne yakhabakabulemwo emikanda chibili, shinga omwayi yahukhasinjia amakondi nende tsimbusi. 33Yakhare abandu abalunjishi khumukhonokwe musaatsa, ne abamayanu khumukhonokwe mukhasi. 34Mana Omuruchi yakhaboolele abali khumukhonokwe musaatsa ari, ‘Mwitse, inywe abahebwa tsikhabi nende Papa wanje, munyoole obulaame obwa Obwami bwamwarecheshelwa okhurula khukhulongwa khweshialo. 35#Sira 7:32-36Shichila ndali inzala nimumbelesia eshiokhulia, ndali nobuloho nimumbelesia eshiokhunywa, ndali omucheni nimunzinjisia mutsinzu tsienywe, 36ndali eshiechenye nimuufwala ebifwalo, ndali omulwale nimwitsa okhungoonya, khandi ndali mumbohe nimwitsa okhundolayo.’
37“Mana abalunjishi abo bakhamukalusie nibamureeba bari, ‘Omwami, niliina olwa khwakhulola noli inzala nikhukhuhelesia eshiokhulia, kata noli nobuloho nikhukhuhelesia eshiokhunywa? 38Khandi niliina olwa khwakhulola noli omucheni nikhukhwinjisia mutsinzu tsiefwe, kata noli eshiechenye nikhukhufwala ebifwalo? 39Khandi niliina olwa khwakhulola noli omulwale nende noli mumbohe nikhwitsa okhukhukoonyayo?’ 40Mana Omuruchi yakhabakalusie ari, ‘Emuboolela toto mbu, shinga olwa mwakholelanga mulala khubatuutu abokhubaana befwe bano, nolwa mwakholelanga isie.’
41“Olunyuma yakhaboolele abamayanu abali khumukhonokwe mukhasi ari, ‘Muurulekhwo, inywe abali mushilaamo shiobubi, muwinjuile mumulilo okulasimanga ta, okwakasilibwa Setani nende abamalaikabe. 42Shichila ndali inzala, nimulambelesiakhwo eshiokhulia ta, ndali nobuloho, nimulambelesiakhwo eshiokhunywa ta, 43ndali omucheni, nimulanzinjisiakhwo mutsinzu tsienywe ta, ndali eshiechenye, nimulafwalakhwo eshiifwalo ta, ndalwala khandinemba mumbohe, ne nimuletsa okhungoonyakhwoyo tawe.’ ”
44“Nabo bakhamukalusie bari, ‘Omwami, niliina olwa khwakhulola noli inzala, noli nobuloho, kata noli omucheni noho nli eshiechenye, nohomba nolwala, kata mumbohe, ne nikhukhaya okhukhukhalabanila?’ 45Omuruchi naye yakhabakalusie ari, ‘Emuboolela toto mbu, shinga olwa mulaakholela mulala khubatutu bano ta, nolwa mwachweya okhukholela isie murio.’ 46#Dan. 12:2Mana abamayanu abo bakhayilwe mushinyasio eshieinziayo, nabo abalunjishi nibayilwa obulamu bweinziayo.”
Currently Selected:
MATAYO 25: OLUPR
Highlight
Share
Copy
Want to have your highlights saved across all your devices? Sign up or sign in