MATAYO 16
16
Abafarisayo benya eshilolelo shiamakana
(Mrk. 8:11-13; Luka 12:54-56)
1 #
Mat. 12:38; Luka 11:16 Abandi khu Abafarisayo nende Abasadukayo betsa khu Yesu nibenya okhumureka namareebo, kho nibamureeba mbu abakholelekhwo eshiamakana, okhumanyia mbu ali nobunyali okhurula khu Nyasaye. 2Naye nabakalusia ari, “Khubwile muboolanga mbu, ‘Kulaba omuheso, shichila mbu likulu liakhaanye.’ 3Ne mumabwibwi muboola mbu, ‘Ifula yeyimbumbuyeka yilakwa, shichila likulu liakhaanye khandi liliime.’ Mumanyile okhwahukhasia okhufwana khwelikulu, nebutswa shimunyala okhumanyilisia ebilolelo biebise bino tawe. 4#Mat. 12:39; Luka 11:29Olwibulo luno olumayanu olubula obusuubili mu Nyasaye! Muureebanga eshilolelo? Tawe! Shimulahebwa eshilolelo shindi ta, habula eshilolelo shia Yona shionyene.” Mana nabarulakhwo niyenyokha.
Limela elia Abafarisayo nende elia Abasadukayo
(Mrk. 8:14-21)
5Olwa abeechi bambukha niboola injelekha weinyanza, betsulila mbu bali nibebiliile okhubukula emikaate. 6#Luka 12:1Yesu nababoolela ari, “Mubetsenje meeso, nimwilinda okhurula khwimela elia Abafarisayo nende elia Abasadukayo.”
7Nibachaaka okhuboolelana abeene khu beene bari, “Aboolanga ario shichila shikhuchinjilekhwo omukaate tawe.”
8Yesu namanyile aka bali nibaboolanga, yabareeba ari, “Mbushiina nimuboolanga abeene khu beene mbu shimulikhwo nomukaate kwosi kwosi ta? Muli nobusuubili butiiti burie? 9#Mat. 14:17-21Mushili kata okhumanyilisia? Shimwitsulilanga emikaate chirano echia abandu ebikhumila biraano (5,000) balia, nende obunji bwebimweelo bia mwabunjelesia ta? 10#Mat. 15:34-38Ne emikaate musafu echiabasaatsa ebikhumila bine (4,000) balia, echiatong'a mwetsusia ebimwelo binga? 11Muli murie abalamanyilisinjia mbu shiemboolilenje khukemikaate tawe? Chetsihe khwimela elia Abafarisayo nende elia Abasadukayo!”
12Mana nibamanyilisia mbu shiyababoolelanga okhuchetsiha khwimela liemikaate ta, nebutswa khumechesio aka Abafarisayo nende Abasadukayo.
Petero arumbula Yesu okhuba Kristo Omwana wa Nyasaye
(Mrk. 8:27-30; Luka 9:18-21)
13Ne olwa Yesu yoola mumbali tsia Kaisaria Filipi, yareeba abeechibe ari, “Abandu baboolanga mbu, Omwana womundu niwiina?” 14#Mat. 14:1,2; Mrk. 6:14,15; Luka 9:7,8Nibamukalusia bari, “Abandi baboolanga mbu, niwe Yohana Omubatiisi, nabandi baboolanga mbu Eliya, nabandi mbu Yeremia, noho mulala khubalakusi.” 15Nabareeba ari, “Nenyu, muboolanga mbu nisie wina?” 16#Yoh. 6:68,69Simoni Petero nakalusia ari, “Niwe Kristo, Omwana wa Nyasaye ouliho mwoyo.”
17Yesu namukalusia ari, “Oli oweikhabi iwe Simoni, omwana wa Yohana! Okhuba shiali omundu namundu oukhufwimbulile likhuwa lino ta; habula obuuliilwe nende Papa ouli mwikulu. 18Khandi ekhuboolela, iwe Petero mbu, niwe olwanda, ne khulwanda luno ndalombakhakhwo ikanisa yanje, ne kata lifwa shililachihula tawe. 19#Mat. 18:18; Yoh. 20:23Ndalakhuhelesia tsifunguwo etsia Obwami bwa Nyasaye, ne shiosi shiosi eshioboha mushialo shilabohwa mwikulu, ne shiosi shiosi eshiobolola mushialo shilabololwa mwikulu.”
20Mana Yesu nakania abeechibe mbu balaboolelakhwo omundu yesi yesi mbu niye Kristo tawe.
Yesu aboola khu akokhunyakhanakhwe nende okhufwakhwe
(Mrk. 8:31–9:1; Luka 9:22-27)
21Okhurula khushise eshio Yesu yachaaka okhuboolela abeechibe habulafu ari, “Okhuula enzie Yerusalemu, esandibwe muno nabakofu, abesaaliisi abakhulundu, nende abeechesia bamalako. Ndaleerwa ne olunyuma lwetsinyanga tsitaru ndalalamusibwa.”
22Petero namuyila halubeka, nachaaka okhumukania obutinyu ari, “Nyasaye akhulinde Omwami! Kano kaleshe okhwikholekha khwiwe.” 23Yesu nashiukhana nakondeshela Petero ari, “Rula imbeli wanje iwe Setani! Oli eshisichirasio khwisie, okhuba shioli owelubeka lwa Nyasaye ta, habula oli owelubeka lwabandu.”
24 #
Mat. 10:38; Luka 14:27 Mana Yesu naboolela abeechibe ari, “Omundu yesi naba niyenya okhunondakhwo, okhuula yekaane omwene, achinje omusalabakwe mana yanondekhwo. 25#Mat. 10:39; Luka 17:33; Yoh. 12:25Okhuba owenya okhuhonia obulamubwe omwene alabukosia; ne oukosia obulamubwe khulwanje alabunyoola. 26Kakhamukasila shiina omundu niyakhenyoolela eshialo shiosi, ne nakosia obulamubwe? Kata shiakhaba shiina eshiomundu yakhahaana khulwa okhuhonia obulamubwe? 27#Mat. 25:31; Tsits. 62:12; Abaro. 2:6Okhuba Omwana womundu aliitsa nende abamalaikabe muluyali lwa Samwana, mana alirunga buli shiamulala khu aka yakhola. 28Emuboolela toto mbu; baliho khubasinjiile hano bano, abalibula okhufwa okhuula olwa balilola Omwana womundu niyetsa shinga Omuruchi.”
Currently Selected:
MATAYO 16: OLUPR
Highlight
Share
Copy
Want to have your highlights saved across all your devices? Sign up or sign in