LUKA 18
18
Oluchelo lwomukhasi omulekhwa nende omukhalachi weshiina
1Mana Yesu naboolela abeechibe oluchelo, khulwa okhubechesia mbu bakhoyile okhusaayanga tsinyanga tsiosi obulafwa omwoyo tawe. 2Naboola ari, “Yaliho omukhalachi undi weshiina mwitookho lindi, oulahelesinjia Nyasaye oluyali kata okhuteeba abandu ta. 3Khandi mwitookho tsana elo yalimwo omukhasi omulekhwa owetsanga khumukhalachi weshiina oyo namulilila ari, ‘Ukhalachile eshiina habwene hakari wanje nende owakhuyalananga ninaye!’ 4Khulwa oluhoono olurambi, omukhalachi weshiina oyo yaloba okhumukhoonya, nebutswa olunyumakhwo, napaara mumwoyokwe ari, ‘Kata nindalahelesinjia Nyasaye oluyali kata okhuteeba abandu ta, 5ndalakhalachila omukhasi omulekhwa uno eshiinashie habwene shichila yaanyasinjia, ne nindalakhola endio ta, alatsiililila okhwitsa mana yanjonyie!’ ” 6Mana Omwami naboola ari; “Hulile aka omuyaasi omushiamu oyo yaboola. 7#Sira 35:19Kho Nyasaye shialakhalachila abalobolebe abamuhaabilanga eshiteere nende eshilo eshiina shiahabwene, okhubakhoonya? 8Emuboolela mbu alabakhalachila eshiina shiabwe bwangu. Ne kata kario, olwa Omwana womundu alitsa alinyoola abandu nibali nobusuubili toto?”
Oluchelo olwa Omufarisayo nende Omusololi wobushuru
9Yesu khandi naboolela abandu abelolanga abeene okhuba abalunjishi, ne nibachaaya abandu bandi boosi oluchelo luno 10ari, “Abasaatsa babili batsia muhekalu okhusaaya, mulala khubo yali Omufarisayo, ne oundi yali omusololi wobushuru. 11Omufarisayo yasinjila nasaaya mumwoyokwe omwene ari, ‘Nyasaye, ekhupila orio muno shichila isie shiendi shinga abandu bandi; abanuuli, abashiamu, abaheyi kata shinga omusololi wobushuru uno tawe. 12Ndiyimanga eshiokhulia khulwa okhusaaya khabili mwichuma, ehaananga eshitonye shielikhumi khubiosi ebienyoolanga.’ 13Nebutswa omusololi wobushuru oyo yasinjila ehale, kata shiyachinguula tsimonitsie mwikulu ta; nebutswa yekhupa khushilifushie naboola ari, ‘Nyasaye, umbele tsimbabasi, isie omwonooni!’ 14#Mat. 23:12; Luka 14:11Emuboolela mbu, omusololi wobushuru oyo yatsia ingowe ebionoonobie nibileshelwe, nebutswa Omufarisayo oyo tawe, okhuba buli omundu owiyemekha omwene alatutuyibwa, naye owitutuyia omwene alemekhwa.”
Yesu asabila abaana abatiiti ikhabi
(Mat. 19:13-15; Mrk. 10:13-16)
15Abandu bandi bareerera Yesu abaana abatiiti mbu abarekhwo amakhono. Ne olwa abeechibe balola babahalabila. 16Nebutswa Yesu yalanga abaana abo mbu betse khuye naboola ari, “Leshe abaana abatiiti betse khwise, mulabekalila ta, shichila obwami bwa Nyasaye, nobwa abo abali shinga bano. 17Emuboolela toto mbu, omundu yesi oulafuchilila obwami bwa Nyasaye shinga omwana omutiiti, shialinjilakhwo mwikulu kata nahatuutu tawe.”
Omuyinda nende obwami bwa Nyasaye
(Mat. 19:16-30; Mrk. 10:17-31)
18Omwimilisi undi omuyahudi yareeba Yesu ari, “Omwechesia omulayi, nishiina eshia ekhoyile okhukhola kho ndinjile mubulamu bweinziayo?” 19Yesu namureeba ari, “Eshichila niwunanga omulayi nishiina? Abulaho ouli omulayi ta, habula Nyasaye yenyene. 20#Okhur. 20:14; Okhuk. 5:18; Okhur. 20:13; Okhuk. 5:17; Okhur. 20:15; Okhuk. 5:19; Okhur. 20:16; Okhuk. 5:20; Okhur. 20:12; Okhuk. 5:16Omanyile amalako mbu; Shiolaheyanga ta; shioleranga omundu ta; shioleeba ta; shiolachikha ta; ohelesinjia papawo nende mamawo oluyali.” 21Omuyinda oyo namukalusia ari, “Okhurula mubwana bwanje ndatiila amalako ako koosi.”
22Ne olwa Yesu yahulila ario, yamuboolela ari, “Oshileemilekhwo eshindu shilala eshiokhukhola. Tsia okusie ebindu biosi ebia oli ninabio, mana okabile abamanani amapesa konyoolamwo. Ne olaba nelibiishilo mwikulu; mana witse unondekhwo.” 23Ne lwomundu oyo yahulila amakhuwa ako, yabeelela muno shichila yali omuyinda muno. 24Yesu yalola omuyinda oyo nabeleele mana naboola ari, “Nobutinyu muno abayinda okhwinjila mubwami bwa Nyasaye! 25Nobwangu ingamia okhubira munduhu yeisindani, okhushila omundu omuyinda okhwinjila mubwami bwa Nyasaye.”
26Nabo abahulilakhwo amakhuwa ako nibareeba bari, “Kho ounyala okhuhonibwa niwiina?”
27Mana Yesu nakalusia ari, “Akalanyalikha khubandu ta, kanyalikha khu Nyasaye.”
28Mana Petero naboola ari, “Lola! Ifwe khwalekha tsingo tsiefwe nikhukhulondakhwo.”
29Yesu naboola ari, “Emuboolela toto mbu; omundu yesi oulekha inzu, noho omukhasi noho abaana babwe noho abebusi noho abaana khulwa obwami bwa Nyasaye, 30alanyoola ebindi ebishila ebio mutsinyanga tsino nende obulamu bwobumeli mutsinyanga tsitsanga.”
Yesu aboola khukokhufwakhwe olwakhataru
(Mat. 20:17-19; Mrk. 10:32-34)
31Yesu yabukula abeechibe ekhumi nababili nabasitia elubeka bonyene, mana nababoolela ari, “Recheresie! Khutsitsanga Yerusalemu ewa buli likhuwa liosi liabalakusi bahandika khumwana womundu liloosibwa. 32Okhuba alahaanwa mumakhono aka Abamahanga, alanyookhosibwa, nanyekwa, nanyilikhwakhwo amare. 33Balamunywekha tsikhoba, nibamwira; ne khunyanga yakhataru alalamukha okhurula mubafu.”
34Nebutswa abeechi shibamanyilisia eshisina shiamakhuwa ako koosi tawe. Eshisina shiako shiabebisila mana nibalamanya aka Yesu yaboolangakhwo tawe.
Yesu ahonia omubofu owasabasabanga
(Mat. 20:29-34; Mrk. 10:46-52)
35Olwa Yesu yali nali ahambi okhuula Yeriko, omusaatsa undi omubofu yali niyekhaale khundulo weyinjila nasabasabanga amapesa. 36Ne olwa yahulila omukanda nikubiranga yareeba ari “Eshikholekhanga nishiina?” 37Nibamuboolela bari, “Yesu owa Nazareti niye oubiranga.”
38Mana nalaanjilisia nomwoyo omukhongo ari; “Yesu! Omwana wa Daudi! Wumbeele tsimbabasi!”
39Mana abandu abali nibemiile imbeli nibamuhalabila nibamuboolela mbu aholeele tsi, nebutswa yameeta butswa okhulanjilisia obutinyu ari, “Omwana wa Daudi! Wumbeele tsimbabasi!”
40Kho Yesu nasinjila nalaka mbu bareere omubofu oyo khuye; ne lwomubofu oyo yoola ahambi, Yesu yamureeba ari, 41“Eshia wenya mbu ekhukholele nishiina?” Naye nakalusia ari, “Omwami, ndenyanga enyalilwe okhulola khandi.” 42Mana Yesu namuboolela ari, “Lola! Obusuubilibwo bukhuhoniye.” 43Ne habwene nahabwene nachaaka okhulola, naloonda khu Yesu niyetsoominjia Nyasaye. Olwa abomukanda balola amakhuwa ako, boosi betsoomia Nyasaye.
Currently Selected:
LUKA 18: OLUPR
Highlight
Share
Copy
Want to have your highlights saved across all your devices? Sign up or sign in