LUKA 17
17
Obwonooni
(Mat. 18:6-7,21-22; Mrk. 9:42)
1Yesu naboolela abeechibe ari, “Ebiisichirasio ebichila abandu bonoone bilabaho, nebutswa ali mushilaamo shiobubi, omundu ouchila nibiikholekha! 2Bwakhaba obulayi okuchina okukhongo nikwakhaboyilwe mwikosilie, ne nasukunwa munyanza, okhushila mbu, achile mulala khubatuutu bano yonoone. 3#Mat. 18:15Kho mwilinde abeene, omwana wenywe nakhwonoonela omuhalabile, ne naba niyekalukhasia, omuleshele. 4Ne naba nakhwonoonela okhuula musafu khunyanga ndala, ne nakhukalukhakhwo buli shise naboolanga ari, ‘Ndeshela.’ Okhoyile okhumuleshela.”
Obusuubili
5Abarume abo nibaboolela Omwami bari, “Khola obusuubili bwefwe bwimeete.” 6Omwami nabakalusia ari, “Nimwakhabeele nobusuubili butiiti shinga olufwa lwomutarakwe, mwakhabeele abanyala okhuboolela omukhuyu kuno muri ‘Siulikha otsie wirache munyanza,’ nakwo nikumuhulila.”
Aka omukholi akhoyile okhukhola
7“Mulala khwinywe niyakhaba nomukholiwe nalimanga khumbako yetsing'ombe noho niyayanga amakondi, olwa achelela narula khumilimo, wakhamuboolela mbu atsie bwangu alie eshiokhuliashie? 8Tawe! Nebutswa alamuboolela ari, ‘Ngasilia eshiokhulia shianje, fwala tsingubotsio, wukhalabanile okhuula olwa emala okhulia nende okhunywa; ne olunyuma nawe olalia eshiokhuliashio.’ 9Shiakhupilakhwo omukholiwe oyo orio ta, shichila akholile aka yalakwa okhukhola. 10Kho mwesi khandi, olwa muba nimukholile aka mwalakwa okhukhola mukhoyile okhuboola muri, ‘Shikhuli abakholi bakhoyile ta, nebutswa khukholile butswa aka khukwanile okhukhola.’ ”
Yesu ahonia abobuchele ekhumi
11Olwa Yesu yali nali khuluchendo lwokhutsia Yerusalemu, yabira hakari wa Samaria nende Galilaya. 12Ne olwa yali niyenjilanga mulusoma lundi, yabukaana nende abandu ekhumi abobuchele, ne nibasinjila ehale khuye. 13Mana nibalanjilisia bari, “Yesu, Omwami, okhubeele tsimbabasi!” 14#Abal. 14:1-32Olwa Yesu yabalola yababoolela ari, “Tsie mwimanyie khubesaaliisi.” Ne olwa bali nibatsiitsanga, nibasiiyikha boosi. 15Kho mulala khubo, olwa yalola mbu wusiyiishile, yachelela, namwitsoominjia Nyasaye nomwoyo omukhongo. 16Yasikama hasi hamakulu ka Yesu namukhupila orio muno. Omundu oyo yali omusamaria. 17Mana Yesu naboola ari, “Shiehoniye abandu ekhumi? Abandi shienda bakhali hena? 18Eshichilile omurende uno yenyene nakalukha okhukhupila Nyasaye orio muno nishiina?” 19Mana Yesu namuboolela ari, “Buukha otsie, obusuubilibwo bukhuhoniye.”
Okhwitsa khwobwami bwa Nyasaye
(Mat. 24:23-28,37-41)
20Abafarisayo bandi bareeba Yesu bari, “Obwami bwa Nyasaye bulitsa liina?” Naye nabakalusia ari, “Obwami bwa Nyasaye shibulitsa nende ebilolelo ebilolekha tawe. 21Abulaho owakhaboole ari, ‘Lole, mbwobuno hano,’ noho ari, ‘Mbwobo yaho,’ tawe, shichila Obwami bwa Nyasaye buli mwinywe.”
22Mana naboolela abeechibe ari, “Tsinyanga tsitsanga olwa mwakhekombe mbu mulolekhwo ndala khutsinyanga etsia Omwana womundu, nebutswa shimwakhachilole tawe. 23Ne abandu bakhabeho abakhamuboolele bari, ‘Lole, Omwana womundu ngwoyo!’ Noho mbu, ‘Ngwouno hano!’ Nebutswa shimularula nimubalondakhwo tawe. 24Okhuba shinga lwoluhenu luhenukhanga khushialo shiosi, ne nilumwesukha khushialo okhurula khulubeka lulala lweshialo okhuula khulubeka lundi, nolwa kakhabe kario khunyanga eya Omwana womundu alichelela. 25Nebutswa okhuula anyakhane khandi abandu bolwibulo luno bamwikane. 26#Obucha. 6:5-8Shinga olwa kali mutsinyanga tsia Noa, nolwa kaliba kario mutsinyanga etsia Omwana womundu alikalukha. 27#Obucha. 7:6-24Mutsinyanga etsio, abandu batsiililila okhulia nende okhunywa, nabo abasaatsa nende abakhasi batsiililila okhuteshiania okhuula olwa Noa yenjila musafina. Mana omuyembo kweifula nikwitsa nikubamulula boosi pe. 28#Obucha. 18:20–19:25Khandi kakhabe shinga olwa kekholekha mutsinyanga tsia Loti. Abandu batsiililila okhulia nende okhunywa nibakula ebindu nende okhukusia, nibaraka nende okhumbakha. 29Nebutswa inyanga ya Loti yarula mwitookho lia Sodomu, omulilo kwarubukha okhurula mwikulu shinga ifula, nikubamulula boosi pe. 30Nolwa kakhabe kario khunyanga eya Omwana womundu alikalushilakhwo.
31 #
Mat. 24:17,18; Mrk. 13:15,16 “Khunyanga eyo, omundu yesi yesi owakhabe nali khushilama shieinzuye shialenjilakhwo munzuye okhurusiamwo emianduchie tawe. Kata owakhabe nali mumukunda yesi khandi, shialakalukhakhwo inyuma tawe. 32#Obucha. 19:26Yitsulile akekholekha khumukhasi wa Loti! 33#Mat. 10:39; 16:25; Mrk. 8:35; Luka 9:24; Yoh. 12:25Omundu outeema okhuhonia obulamubwe alabukosia, naye oukosia obulamubwe alabuhonia. 34Emuboolela toto mbu, mushilo shiene eshio abandu babili bakhabe nibeyalisiye halala, ne mulala yakhabukulwe, naye oundi yakhalekhwe. 35Abakhasi babili baliba nibasietsanga khuluchina halala; mulala yakhabukulwe, naye oundi yakhalekhwe.” [ 36Abasaatsa babili baliba nibakholanga emilimo mumukunda; mulala yakhabukulwe naye oundi yakhalekhwe.]#17:36 Amahandiko kandi shikalimwo ebiasia bino tawe (36). 37Kho Abeechi nibamureeba bari, “Omwami, ako kaliba hena?” Yesu nabakalusia ari, “Aha omulambo kuli, niho aha tsingosia tsikhung'anilanga.”
Currently Selected:
LUKA 17: OLUPR
Highlight
Share
Copy
Want to have your highlights saved across all your devices? Sign up or sign in